ពលរដ្ឋ​ឃុំ​កោះស្ដេច​អះអាង​ថា​សន្តិសុខ​ក្រុមហ៊ុន​ចិន​ប៉ុនប៉ង​ដុត​ផ្ទះ​បង្ខំ​បណ្ដេញ​ចេញ

0:00 / 0:00

ប្រជាពលរដ្ឋ​ឃុំ​កោះស្ដេច បាន​អះអាង​ថា នៅ​ល្ងាច​ថ្ងៃ​ពុធ ទី​៧ ខែ​មករា កម្លាំង​សន្តិសុខ​ក្រុមហ៊ុន​ចិន ឈ្មោះ យូញៀន ឌីវីឡុបមែន គ្រុប (Union Development Group Co., Ltd) បាន​ប៉ុនប៉ង​ធ្វើ​សកម្មភាព​ដុត​ផ្ទះ និង​រុះរើ​លំនៅឋាន​របស់​ប្រជាពលរដ្ឋ​នៅ​ចំណុច​ពយ​ជប៉ុន ជា​ទី​ដែល​ក្រុមហ៊ុន​នេះ​បាន​ចាក់​ដី​បិទ​ផ្លូវ​ចូល​ភូមិ​អ្នក​ស្រុក​ជាង​មួយ​សប្ដាហ៍​មក​ហើយ។

មន្ត្រី​សង្គម​ស៊ីវិល​ខេត្ត​កោះកុង ដែល​ចុះ​អង្កេត​ផ្ទាល់​ដល់​ទី​កន្លែង​ប្រឈម​មុខ​ដាក់​គ្នា​រវាង​កង​សន្តិសុខ​ក្រុមហ៊ុន និង​ប្រជាពលរដ្ឋ​ឃុំ​កោះស្ដេច មាន​ប្រសាសន៍​ថា ទង្វើ​របស់​ក្រុមហ៊ុន​ចិន យូញៀន មិន​ខុស​គ្នា​ទៅ​នឹង​របប​ប្រល័យ​ពូជ​សាសន៍ ប៉ុល ពត ធ្លាប់​អនុវត្ត​ពេល​កាន់​អំណាច​នោះ​ទេ។

តំណាង​ប្រជាពលរដ្ឋ ៣០​គ្រួសារ លោក ប្រាក់ ថន មាន​លំនៅឋាន​នៅ​ឃុំ​កោះស្ដេច ស្រុក​គីរីសាគរ ខេត្ត​កោះកុង បន្ត​ស្វែងរក​កិច្ច​អន្តរាគមន៍​ពី​លោក​នាយក​រដ្ឋមន្ត្រី ហ៊ុន សែន និង​ស្ថាប័ន​ពាក់ព័ន្ធ ឲ្យ​ជួយ​ដោះស្រាយ​កង្វល់​ដែល​ក្រុមហ៊ុន​ចិន យូញៀន ឌីវីឡុបមែន ថា​បាន​ប្រើ​កង​សន្តិសុខ​រាប់​សិប​នាក់ ប៉ុនប៉ង​ដុត​ផ្ទះ​ពួក​គាត់​នៅ​ល្ងាច​ថ្ងៃ​ទី​៧ ខែ​មករា។លោក​បន្ត​ថា កាល​ពី​ល្ងាច​ថ្ងៃ​ពុធ ទី​៧ ខែ​មករា មេការ​ក្រុមហ៊ុន​ចិន យូញៀន បាន​ដឹក​នាំ​កម្លាំង​ប្រមាណ​ជាង ៤០​នាក់ ចុះ​មក​មូលដ្ឋាន​ឃុំ​កោះស្ដេច ក្នុង​បំណង​រុះរើ ដុត​បំផ្លាញ​ផ្ទះ និង​ប្លន់​យក​ដី​លំនៅឋាន​របស់​ប្រជាពលរដ្ឋ​ចំនួន ៣០​គ្រួសារ។

លោក ប្រាក់ ថន ឲ្យ​ដឹង​ថា ការ​ប្រឈម​មុខ​ដាក់​គ្នា​រវាង​កង​សន្តិសុខ​ក្រុមហ៊ុន​ចិន យូញៀន ជាមួយ​ពលរដ្ឋ មិន​មាន​របួស​ស្នាម​ធ្ងន់ធ្ងរ​ទេ ដោយ​គ្រាន់​តែ​ចោល​ដុំ​ថ្ម ឬ​គប់​ដប​សាំង​ដាក់​គ្នា​ទៅ​វិញ​ទៅ​មក។ តំណាង​ពលរដ្ឋ​រូប​នេះ សំណូមពរ​ដល់​លោក​នាយក​រដ្ឋមន្ត្រី ហ៊ុន សែន បើក​ភ្នែក​មើល​ពី​កង្វល់​កូន​ចៅ​នៅ​ឃុំ​កោះស្ដេច ស្រុក​គីរីសាគរ ដែល​កំពុង​រង​ការ​រំលោភ​បំពាន​ដី​លំនៅឋាន និង​ដី​ចម្ការ ពី​សំណាក់​ក្រុមហ៊ុន​ចិន យូញៀន៖ «ឥឡូវ​កង​សន្តិសុខ​ក្រុមហ៊ុន​ចិន ចំនួន ៤​ឡាន មាន​គ្នា​ប្រមាណ ៤០​នាក់ បាន​ដក​ខ្លួន​ថយ​ពី​ម្តុំ​ពយ​ជប៉ុន ក្បែរ​ភូមិ​អ្នក​ស្រុក​វិញ​ហើយ បន្ទាប់​ពី​ប្រជាពលរដ្ឋ​ប្រមូល​ផ្តុំ​គ្នា​តវ៉ា»

តំណាង​ពលរដ្ឋ លោក ប្រាក់ ថន ឲ្យ​ដឹង​ទៀត​ថា ក្រុមហ៊ុន​ចិន យូញៀន ចាប់​តាំង​ពី​ថ្ងៃ​ទី​២៦ ខែ​ធ្នូ ឆ្នាំ​២០១៤ រហូត​មក​ដល់​ថ្ងៃ​ទី​៧ ខែ​មករា ឆ្នាំ​២០១៥ គឺ​បាន​ប្រើ​រថយន្ត​ដឹក​ដី​ចាក់​បិទ​ផ្លូវ​ចេញ​ចូល​ទៅ​ភូមិ​អ្នក​ស្រុក​នៅ​តំបន់​ពយ​ជប៉ុន ក្នុង​បំណង​បង្ខំ​បណ្ដេញ​ពលរដ្ឋ​ឲ្យ​រុះរើ​លំនៅឋាន​ចេញ​ពី​ទីតាំង​ចាស់ ទៅ​កាន់​ទីតាំង​ថ្មី​តាម​មហិច្ឆតា​របស់​ក្រុមហ៊ុន​ចិន។

ទាក់ទិន​បញ្ហា​នេះ លោក អ៊ិន គង់ជិត មន្ត្រី​សម្រប​សម្រួល​អង្គការ​លីកាដូ (Licadho) ខេត្ត​កោះកុង បាន​ពេបជ្រាយ​ចំពោះ​ភាព​កម្សោយ​នៃ​ការ​ដោះស្រាយ​ជម្លោះ​របស់​មន្ត្រី​ក្រសួង​ពាក់ព័ន្ធ ឬ​អាជ្ញាធរ​ខេត្ត​កោះកុង ដែល​មិន​បាន​អនុវត្ត​ទៅ​តាម​សេចក្តី​ណែនាំ​របស់​មុខ​ដឹក​នាំ​រដ្ឋាភិបាល ដែល​តម្រូវ​ឲ្យ​អាជ្ញាធរ​ពាក់ព័ន្ធ កាត់​ឆ្វៀល​ដី​កសិកម្ម ឬ​ដី​លំនៅឋាន​កោះស្ដេច ចេញ​ពី​គម្រោង​អភិវឌ្ឍន៍​របស់​ក្រុមហ៊ុន​ចិន តាម​រូបមន្ត​ស្បែក​ខ្លា៖ «មាន​ការ​ប៉ះ​ទង្គិច​គ្នា​មួយ​ប្រាវ ដែល​យក​ដី​ចាក់​បិទ​ផ្លូវ​ចូល​ភូមិ​ពលរដ្ឋ រវាង​កង​សន្តិសុខ​ក្រុមហ៊ុន​ចិន យូញៀន និង​ប្រជាពលរដ្ឋ ប៉ុន្តែ​មិន​មាន​រង​របួស​ទាំង​សង​ខាង​ទេ ហើយ​កង​សន្តិសុខ​ក៏​បាន​វិល​ត្រឡប់​ចេញ​ពី​លំនៅឋាន​ពលរដ្ឋ​វិញ»

បន្ថែម​លើ​នេះ លោក អ៊ិន គង់ជិត សម្ដែង​អារម្មណ៍​ហួស​ចិត្ត កាល​បើ​សង្គម​កម្ពុជា បច្ចុប្បន្ន បង្កើត​ឲ្យ​មាន​កង​កម្លាំង​សន្តិសុខ​ក្រុមហ៊ុន​អាច​ធ្វើ​សកម្មភាព​ដូច​ក្រុម​ចោរ​ប្លន់ ដើរ​គំរាម​បណ្ដេញ​ប្រជាពលរដ្ឋ​ចេញ​ពី​លំនៅឋាន​ជាដើម។

យ៉ាង​ណា​ក៏ដោយ លោក ប៊ុន លឺត អភិបាល​ខេត្ត​កោះកុង ថ្លែង​ថា មិន​បាន​ដឹង​ឮ​ចំពោះ​ករណី​ប្រឈម​មុខ​ដាក់​គ្នា​រវាង​កង​កម្លាំង​សន្តិសុខ​ក្រុមហ៊ុន​ចិន យូញៀន និង​ប្រជាពលរដ្ឋ​នៅ​ឃុំ​កោះស្ដេច នោះ​ទេ។ លោក​មិន​ធ្វើ​អត្ថាធិប្បាយ​ច្រើន​ទេ​ចំពោះ​សកម្មភាព​របស់​ក្រុមហ៊ុន​ចុះ​គំរាម​កំហែង និង​ប៉ុនប៉ង​ដុត​ផ្ទះ​ពលរដ្ឋ នា​មូលដ្ឋាន​ឃុំ​កោះស្ដេច ពេល​នេះ៖ «ខ្ញុំ​អត់​បាន​ដឹង​ព័ត៌មាន​នេះ​ទេ»

ទាក់ទិន​បញ្ហា​នេះ លោក ប៊ិន ឈិន ប្រធាន​អាជ្ញាធរ​ជាតិ​ដោះស្រាយ​ទំនាស់ ធ្លាប់​បាន​ឲ្យ​ដឹង​ថា បញ្ហា​ទំនាស់​ដីធ្លី​ដែល​កើត​មាន​រវាង​ក្រុមហ៊ុន​ចិន យូញៀន ជាមួយ​ប្រជាពលរដ្ឋ​ឃុំ​កោះស្ដេច ស្រុក​គីរីសាគរ គឺ​មាន​ជាប់​ពាក់ព័ន្ធ​សំណូក​លុយ​កាក់​រាប់​លាន​ដុល្លារ​សហរដ្ឋ​អាមេរិក ជាមួយ​ក្រសួង​បរិស្ថាន។

លោក អ៊ិន គង់ជិត មន្ត្រី​សម្រប​សម្រួល​អង្គការ​លីកាដូ បាន​ឲ្យ​ដឹង​ថា ប្រជាពលរដ្ឋ ៣០​គ្រួសារ រស់នៅ​ចំណុច​ពយ​ជប៉ុន នា​ភូមិ​ព្រែកស្មាច់ ឃុំ​កោះស្ដេច ស្រុក​គីរីសាគរ ខេត្ត​កោះកុង ដែល​ក្រាញ​ននៀល និង​បន្ត​ប្រមូល​ផ្តុំ​គ្នា​តវ៉ា​នឹង​ក្រុមហ៊ុន​ចិន យូញៀន ឌីវីឡុបមែន ពេល​នេះ គឺ​ជា​គ្រួសារ​នៅ​សេសសល់​ចុង​ក្រោយ ដែល​មិន​ព្រម​ចាក​ចេញ​ពី​ភូមិ​កំណើត​កេរ​ដំណែល​ដូនតា ទៅ​តាម​ការ​គំរាម​កំហែង​របស់​ក្រុមហ៊ុន​ចិន ដែល​ទទួល​បាន​សិទ្ធិ​វិនិយោគ​តំបន់​នោះ​ពី​រដ្ឋាភិបាល៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖

ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។