ពលរដ្ឋមានជម្លោះដីធ្លីនៅបឹងតាមោកទាមទារឲ្យតុលាការទម្លាក់បណ្ដឹងរបស់អាជ្ញាធរដែលប្ដឹងពួកគាត់
2024.08.03
ពលរដ្ឋរងគ្រោះដីធ្លីនៅតំបន់បឹងតាមោក ខណ្ឌព្រែកព្នៅ រាជធានីភ្នំពេញ ក្រោយចូលបំភ្លឺនៅសាលាដំបូងរាជធានីភ្នំពេញ កាលពីថ្ងៃទី២ សីហា ២០២៤។
រូប៖ ពលរដ្ឋផ្ដល់ឱ្យ
ពលរដ្ឋមានជម្លោះដីធ្លីនៅបឹងតាមោក ទាមទារឲ្យតុលាការ ទម្លាក់បទចោទប្រកាន់ ដែលអាជ្ញាធរបានប្ដឹង ពួកគាត់ពីបទហិង្សាដោយចេតនា និងប្រឆាំងអ្នករាជការសាធារណៈ។ ពលរដ្ឋលើកឡើងថា ការប្ដឹងនេះ ជារឿងអយុត្តិធម៌បំផុត ខណៈដែលដីធ្លីត្រូវបានរដ្ឋាភិបាលច្បាមយកឱ្យក្រុមអ្នកមានលុយមានអំណាច ចំណែក ពួកគាត់ បែររងពាក្យបណ្ដឹងនៅតុលាការ។ មន្ត្រីសង្គមស៊ីវិល ចាត់ទុកការធ្វើទុក្ខបុកម្នេញ មកលើពលរដ្ឋមានវិវាទដីធ្លីនេះថា ជាអំពើអមនុស្សធម៌។
ពលរដ្ឋមានជម្លោះដីធ្លីនៅតំបន់បឹងតាមោកម្នាក់ទៀត គឺ លោក ស៊ា សំបាត់ បានចូលបំភ្លឺនៅសាលាដំបូងរាជធានីភ្នំពេញ នៅព្រឹកថ្ងៃទី២ ខែសីហា ពាក់ព័ន្ធនឹងបណ្ដឹងរបស់អាជ្ញាធរ ដែលប្ដឹងរូបលោក និងពលរដ្ឋនៅបឹងតាមោក៩នាក់ ផ្សេងទៀតពីបទ«ប្រើហិង្សាដោយចេតនា និងប្រឆាំងអ្នករាជការសាធារណៈ»។
លោក ស៊ា សំបាត់ បានប្រាប់ថា តុលាការបានសាកសួរសំណួរជាច្រើនពាក់ព័ន្ធ ជុំវិញ ការចោទប្រកាន់របស់អាជ្ញាធរ ដែលថាបាន ប្រើអំពើហិង្សា និងរារាំងអ្នករាជការសាធារណៈ។ ទោះជាយ៉ាងណា លោកឆ្លើយថា ពុំបានធ្វើ ដូចការចោទប្រកាន់នោះទេ។ លោកសូមឱ្យតុលាការ ទម្លាប់ពាក្យបណ្ដឹងចោល មកលើរូបលោក រួមនឹងពលរដ្ឋផ្សេងទៀត ។
លោក ស៊ា សំបាត់៖ «ខ្ញុំគិតថានេះជារឿងអយុត្តិធម៌សម្រាប់ខ្ញុំណាស់។ ខ្ញុំមិនបានប្រព្រឹត្តខុសហើយ មានដីកាមក ប្ដឹងខ្ញុំពីបទព្រហ្មទណ្ឌ។ ខ្ញុំសូមឱ្យលោក តុលាការទម្លាក់បទចោទ»។
រីឯ ប្រពន្ធលោក លោក ស៊ា សំបាត់ គឺ លោកស្រី ទឹម អ៊ុក ដែលបានមកឃ្លាំមើលប្ដី ចូលបំភ្លឺនៅសាលាដំបូងរាជធានីភ្នំពេញ ដែរនោះ បានលើកឡើងថា លោកស្រី និងពលរដ្ឋ មានជម្លោះដីធ្លី នៅបឹងតាមោក គឺតែងតែ រងអំពើហិង្សាជាញឹកញាប់។ លោកស្រីថា កន្លងទៅពលរដ្ឋបានដាក់ពាក្យបណ្ដឹងទៅប៉ូលិស និងតុលាការ ជាច្រើនដង តែបែរ តុលាការ ពុំមានចំណាត់ការនោះទេ។ លោកស្រី ថានេះ រឿងអយុត្តិធម៌ ព្រោះថា អ្នកដែលប្រើអំពើហិង្សាពិតប្រាកដ គឺជាអាជ្ញាធរ ដែលបានធ្វើមកលើស្ត្រី និងកុមារ កាលពីកន្លងទៅ។
លោកស្រី ទឹម អ៊ុក៖ «ពេលពួកខ្ញុំរងគ្រោះពួកគាត់មើលមិនឃើញ។ ខ្ញុំឆ្ងល់ ប៉ូលិស និងកម្លាំងអាជ្ញាធរកម្លាំងតែមួយមែន ខ្ញុំឆ្ងល់ថាពួកគាត់កម្លាំងតែមួយមែនបានអ៊ីចឹង។ គាត់មិនបានការពារប្រជាជនដែលរងគ្រោះដូចពួកខ្ញុំទេ»។
នៅក្រៅរបងសាលាដំបូងរាជធានីភ្នំពេញ មាន ពលរដ្ឋ ៤នាក់ ដែលជាសាច់ញាតិរបស់ លោក ស៊ា សំបាត់ មកឃ្លាំមើល និងចាំលើកទឹកចិត្ត លោកអំឡុង ចូលបំភ្លឺនៅតុលាការ។ មកដល់ពេលនេះ មានពលរដ្ឋ ប្រមាណ៦នាក់ហើយ បានចូលបំភ្លឺនៅតុលាការ ក្នុងចំណោមពលរដ្ឋប្រមាណ១០នាក់ ដែលរងពាក្យបណ្ដឹង«ប្រើហិង្សាដោយចេតនា និងប្រឆាំងអ្នករាជការសាធារណៈ»។
ទាក់ទិនរឿង នេះប្រធានអង្គការសម្ព័ន្ធភាពការពារសិទ្ធិមនុស្សកម្ពុជាច្រាក់ (CHRAC) លោក រស់ សុដ្ឋា ប្រាប់វិទ្យុអាស៊ីសេរីថា ពលរដ្ឋមានជម្លោះដីធ្លីនៅបឹងតាមោកនេះ គឺជារឿងដែលស្មុគស្មាញ ហើយ ការដែលអាជ្ញាធរ ធ្វើទុក្ខបុកម្នេញ មកលើពួកគាត់ តាមរយៈប្រព័ន្ធតុលាការ និងការប្រើអំពើ ហិង្សាមួយចំនួនកន្លងទៅ គឺជា អំពើអមនុស្សធម៌ គួរឱ្យព្រួយបារម្ភ។ លោកថា តុលាការគួរតែលើកលែងការចោទ និងស្វែងរកដំណោះស្រាយវិវាទដីធ្លីដោយសន្តិវិធី។
លោក រស់ សុដ្ឋា៖ «ខ្ញុំក៏យល់ឃើញថា តុលាការលោកគួរតែសេចក្ដីមេត្តាទម្លាក់ចោលនូវការចោទប្រកាន់ហ្នឹងទៅ ហើយយើងទាំងអស់គ្នា ជាភាគីទាំងសងខាងគួរតែសម្រុះសម្រួលគ្នាទៅតាមគោលនយោបាយរបស់រដ្ឋាភិបាល ដើម្បីឲ្យបានយុត្តិធម៌ពិតប្រាកដ មានតែយើងជជែកគ្នា ចរចាគ្នា មើលសុខទុក្ខគ្នា ជួយដោះស្រាយបញ្ហាគ្នាទៅវិញទៅមកទេ»។
៤ឆ្នាំចុងក្រោយនេះ ពលរដ្ឋប្រមាណជាង៣០គ្រួសារ រស់នៅតំបន់បឹងតាមោក ក្នុងសង្កាត់សំរោង ខណ្ឌព្រែកព្នៅ រាជធានីភ្នំពេញ ពួកគាត់ ប្រឹងក្រាញននៀល រស់នៅទីនោះ ដោយលំបាក រួមនឹងការ ភ័យខ្លាចគ្រប់វិនាទី ពីការបណ្ដេញពីសំណាក់អាជ្ញាធរ។ ការព្រួយបារម្ភនេះ ក្រោយពីពលរដ្ឋ មិនព្រមទទួលយកសំណងតិចតួច ពីរដ្ឋាភិបាល ដើម្បីជាការដោះដូរ ទៅនៅកន្លែងថ្មី។
ចាប់តាំងពីពលរដ្ឋ មិនព្រមទទួលយកសំណង អាជ្ញាធរបានដាក់គ្រឿងចក្រកាយបឹង និងរុះរើ ផ្ទះសម្បែង ពលរដ្ឋជាបន្តបន្ទាប់ ហើយអាជ្ញាធរ ថែមទាំងបានប្រើប្រាស់អំពើហិង្សាលើស្ត្រី និង កុមារ បណ្ដាលឲ្យមានស្ត្រីខ្លះដួលសន្លប់ នៅពេលគាត់ព្យាយាមរារាំងសកម្មភាពរបស់អាជ្ញាធរ។ ប៉ុន្តែក្រោយមក អាជ្ញាធរបែរជាតាំងខ្លួនជាជនរងគ្រោះ ហើយប្ដឹងពលរដ្ឋទៅវិញ។បើទោះបែបនេះក្ដី ពលរដ្ឋអះអាងថា នៅតែតស៊ូទាមទារសិទ្ធិរស់នៅលើដីធ្លី របស់ពួកគាត់ដដែល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- មេធាវីគ្រោងដាក់សេចក្តីសន្និដ្ឋានទៅសាលាឧទ្ធរណ៍ភ្នំពេញបញ្ជាក់ពីភាពស្អាតស្អំលោក កឹម សុខា
- អ្នកតាមដាននយោបាយថា អាមេរិកដាក់ទណ្ឌកម្ម លោក លី យ៉ុងផាត់ ជាការកាត់ផ្ដាច់សរសៃឈាមសេដ្ឋកិច្ចរបស់បក្សកាន់អំណាច
- លោក ហ៊ុន សែន អួតនៅក្នុងវេទិកាប្រទេសកូរ៉េថា កម្ពុជាមានសន្តិភាព ខណៈអ្នកតវ៉ាទាមទារប្រជាធិបតេយ្យ
- ក្រសួងការបទេស និងគណបក្សប្រជាជនកម្ពុជាចាត់ទុកថា ជារឿងអយុត្តិធម៌ ដែលក្រសួងរតនាគារសហរដ្ឋអាមេរិកដាក់ទណ្ឌកម្មលើលោក លី យ៉ុងផាត់
- ពលរដ្ឋរិះគន់អាជ្ញាធរអប្សរាបណ្តោយឱ្យអ្នកមានលុយមានអំណាចសង់ផ្នូរខ្មោចចិនមួយធំក្នុងតំបន់អង្គរ
