តំណាង​សហគមន៍​ជម្លោះ​ដីធ្លី ៥នាក់​ទៀត ចូល​បំភ្លឺ​នៅ​តុលាការ​ខេត្ត​កោះកុង​ករណី​វិវាទ​ដីធ្លី​រ៉ាំរ៉ៃ ជាមួយ​ក្រុមហ៊ុន​ឯកជន

ដោយ សេក បណ្ឌិត
2020-11-18
Share
បញ្ហាដីធ្លី​កោះកុង 111720 តំណាង​សហគមន៍​មាន​ជម្លោះ​ដីធ្លី ៥នាក់ ដែល​តុលាការ​ខេត្ត​កោះកុង​កោះ​ហៅ​នៅ​ថ្ងៃ​ទី១៧ ខែវិច្ឆិកា ឆ្នាំ២០២០ ឱ្យ​ទៅ​បំភ្លឺ​អំពី​វិវាទ​ដីធ្លី​រ៉ាំរ៉ៃ ជាមួយ​ក្រុមហ៊ុន​ឯកជន​ឈ្មោះ ហេង ហ៊ុយ អេហ្គ្រីខាលឆ័រ គ្រុប (Heng Huy Agriculture Group)។
រូប៖ ពលរដ្ឋ

តំណាង​សហគមន៍​ជម្លោះ​ដីធ្លី ​ចំនួន ​៥​នាក់​ទៀត​ ចូល​បំភ្លឺ​នៅ​សាលា​ដំបូង​ខេត្ត​កោះកុង ករណី​វិវាទ​ដីធ្លី​រ៉ាំរ៉ៃ ជាមួយ​ក្រុមហ៊ុន​ឯកជន ហេង ហ៊ុយ អេហ្គ្រីខាលឆ័រ គ្រុប (Heng Huy Agriculture Group)។ អ្នក​ឃ្លាំមើល​សិទ្ធិ​ដីធ្លី ជំរុញ​ឲ្យ​អាជ្ញាធរ​ចុះ​ទៅ​សិក្សា ពិនិត្យ​មើល​ដល់​ទីតាំង​ដី មាន​ជម្លោះ​ជាក់ស្ដែង ជាជាង​ការ​ប្រើប្រាស់​ប្រព័ន្ធ​តុលាការ។

តំណាង​សហគមន៍​មាន​​​ជម្លោះ​ដីធ្លី នៃ​ក្រុម ១៩៧​គ្រួសារ ក្នុង​ឃុំ​ជីខ​លើ ស្រុក​ស្រែ​អំបិល លោកស្រី ដេត ហួរ ឲ្យ​ដឹង​ថា នៅ​ល្ងាច​ថ្ងៃ​ទី១៧ វិច្ឆិកា ចៅក្រម​បញ្ចប់​ការ​សាកសួរ​លើ​តំណាង​សហគមន៍​ទាំង​៥នាក់​ហើយ ដោយ​អនុញ្ញាត​ឲ្យ​ត្រឡប់​ទៅ​ផ្ទះ​វិញ ប៉ុន្តែ​ដាក់​ពួក​គេ​ឱ្យ​ស្ថិត​ក្រោម​ការ​ត្រួត​ពិនិត្យ តាម​ផ្លូវ​តុលាការ។

លោកស្រី សំណូមពរ​ឲ្យ​តុលាការ​កាត់​ក្ដី ឈរ​លើ​គោលការណ៍​យុត្តិធម៌ ដោយ​ទម្លាក់​ចោល​បទ​ចោទ​ប្រកាន់​របស់​ម្ចាស់​ក្រុមហ៊ុន​ប្រឆាំង​អ្នក​ភូមិ ព្រោះ​អ្នក​ភូមិ មិន​បាន​ប្រព្រឹត្តិ​បទ​ល្មើស​បរិហារ​បង្កាច់​កេរ្តិ៍ ឬ​ញុះញង់​ឲ្យ​មាន​ភាព​វឹកវរ​ធ្ងន់ធ្ងរ​ដល់​សង្គម​ជាតិ តាម​រយៈ​ការ​ទាមទារ​ដីធ្លី​មាន​ទំនាស់​រ៉ាំរ៉ៃ ដូច​ការ​ចោទ​ប្រកាន់​ឡើយ។ តំណាង​សហគមន៍​រូប​នេះ ក៏​ចង់​ឲ្យ​មន្ត្រី​អាជ្ញាធរ ចុះ​ទៅ​សិក្សា​ដល់​ទីតាំង​ដី​មាន​ជម្លោះ ដើម្បី​ដោះ​ស្រាយ​បញ្ចប់​ទំនាស់​ផង​ដែរ៖ «សួរ​ចម្លើយ ហើយ​នឹង (ចោទ) បង្ក​ភាព​វឹកវរ​ដល់​សង្គម​ទៀត។ អ៊ីចឹង ពួក​យើង​តំណាង​ទាំង​អស់​គ្នា​អត់​ទទួល​យក​បាន​ទេ ហើយ​ពួក​ខ្ញុំ​សង្ឃឹម​ថា តុលាការ​ចុះ​ទៅ​ស្រាវជ្រាវ និង​​ដោះ​ស្រាយ​ត្រឹមត្រូវ ដោយ​ឯករាជ្យ ព្រោះ​ក្នុង​ច្បាប់​ប្រទេស​កម្ពុជា​យើង ចែង​ច្បាប់​ថា តុលាការ គឺ​ឯករាជ្យ។ អ៊ីចឹង ពួក​ខ្ញុំ​សង្ឃឹម​ថា តុលាការ​នឹង​ឯករាជ្យ»

នៅ​ក្នុង​ដំណើរ​ការ​សាកសួរ​នេះ មាន​ប្រជាពលរដ្ឋ​ប្រហែល ២០០នាក់ បាន​ប្រមូល​ផ្ដុំ​គ្នា នៅ​ខាង​មុខ​តុលាការ​ខេត្ត​កោះកុង ដើម្បី​គាំទ្រ​តំណាង​របស់​ពួក​គេ។ អ្នក​ភូមិ​ចាត់​ទុក​ចំណាត់​ការ​របស់​តុលាការ​នេះ​ថា គឺ​ជា​រឿង​អយុត្តិធម៌ និង​ជា​ការ​បំបាក់​ស្មារតី​របស់​អ្នក​ភូមិ​មិន​ឲ្យ​តវ៉ា​ទាមទារ​រឿង​ដីធ្លី​បន្ត​ទៀត។

ចៅក្រម​ស៊ើបសួរ​ នៃ​សាលាដំបូង​ខេត្ត​កោះកុង លោក ឡោ ក្រឹម បាន​ចេញ​ដីកា កាល​ពី​ចុង​ខែ​តុលាការ​កោះ​ហៅ​តំណាង​សហគមន៍​មាន​ជម្លោះ​ដីធ្លី ១៩៧គ្រួសារ ចំនួន ១០នាក់ ឱ្យ​មក​ឆ្លើយ​បំភ្លឺ​ នៅ​ថ្ងៃ​ទី១២ វិច្ឆិកា ចំនួន ៥នាក់ និង​ថ្ងៃ​ទី១៧ វិច្ឆិកា ចំនួន ៥នាក់​ទៀត ពី​បទ​បរិហារ​បង្កាច់​កេរ្តិ៍ និង​ញុះញង់​ឱ្យ​ប្រព្រឹត្ត​បទ​ល្មើស​អំពើ​បង្ក​ឱ្យ​វឹកវរ​ដល់​សន្តិសុខ​សង្គម ផ្អែក​តាម​មាត្រា ៣១១ មាត្រា ៤៩៤ និង​មាត្រា ៤៩៥ នៃ​ក្រម​ព្រហ្មទណ្ឌ តាម​បណ្ដឹង​របស់​លោក ហេង ហ៊ុយ ម្ចាស់​ក្រុមហ៊ុន​​ឯកជន ហេង ហ៊ុយ អេហ្គ្រីខាលឆ័រ គ្រុប (Heng Huy Agriculture Group)។

ដើម​ហេតុ​នៃ​វិវាទ​នេះ បណ្ដាល​មក​ពី​រដ្ឋាភិបាល បាន​ផ្ដល់​ដី​សម្បទាន​សេដ្ឋកិច្ច ​ទៅ​ឱ្យ​ក្រុមហ៊ុន​ ហេង ហ៊ុយ អភិវឌ្ឍន៍ ជាង ៤.០០០​ហិកតារ ដើម្បី​វិនិយោគ​ដំណាំ​អំពៅ កាល​ពី​ឆ្នាំ២០០៧។ នៅ​ឆ្នាំ២០១០ ពលរដ្ឋ​ចោទ​ ក្រុមហ៊ុន ហេង ហ៊ុយ ថា បាន​យក​គ្រឿងចក្រ​ទៅ​ឈូស​ឆាយ​ដី​លំនៅ​ឋាន​ប្រជាពលរដ្ឋ និង​គំរាម​ចាប់ខ្លួន​ប្រជាពលរដ្ឋ​ណា ​ដែល​ហ៊ាន​តវ៉ា ចំពោះ​ការ​ឈូស​ឆាយ​វាទ​យក​ដី​របស់​ក្រុមហ៊ុន។

ពលរដ្ឋ​ក្នុង​សហគមន៍​អះអាង​ថា ពួក​គេ​បាន​ចូល​កាន់កាប់ និង​អាស្រ័យ​ផល លើ​ដី​មាន​ទំនាស់ ចាប់​តាំង​ពី​ឆ្នាំ១៩៩៣ មក​ម្ល៉េះ ដោយ​មាន​ប័ណ្ណ​កាន់កាប់​ដីធ្លី ទទួល​ស្គាល់​ពី​អាជ្ញាធរ​មូលដ្ឋាន។ បន្ទាប់​ពី​ការ​ឈូស​ឆាយ​លើ​ដី​មាន​ជម្លោះ និង​រង​ការ​គំរាម​កំហែង​រួច ក្រុម​ពលរដ្ឋ​នាំ​គ្នា​ចេញ​តវ៉ា ជា​បន្ត​បន្ទាប់​បន្ទាប់ ចាប់​ពី​ថ្នាក់​ភូមិ ឃុំ រហូត​ដល់​ការ​តវ៉ា នៅ​តាម​ស្ថាប័ន​ថ្នាក់​ជាតិ នៅ​រាជធានី​ភ្នំពេញ។

ពលរដ្ឋ​អះអាង​ថា ជម្លោះ​ដីធ្លី​នេះ បាន​បណ្ដាល​ឱ្យ​ពួក​គេ​ធ្លាក់​ខ្លួន​ក្រីក្រ​ត​ជំនាន់ បាត់បង់​មុខ​របរ​ធ្វើ​ស្រែ​ចម្ការ​លើ​ដី​ខ្លួន ជំពាក់​បំណុល​ធនាគារ អ្នក​ខ្លះ​រត់​ទៅ​ធ្វើ​ពលករ​នៅ​ប្រទេស​ថៃ​ ហើយ​ក្មេងៗ ក្នុង​សហគមន៍​ភាគ​ច្រើន​បោះ​បង់​ការ​សិក្សា ហើយ​ចេញ​តវ៉ា​ទាមទារ​ដី​ជា​មួយ​ឪពុក​ម្ដាយ។

អាស៊ី​សេរី​មិន​អាច​សុំ​ការ​ឆ្លើយ​តប​ពី​លោក ហេង ហ៊ុយ បាន​ទេ នៅ​ថ្ងៃ​ទី១៧ វិច្ឆិកា។

អ្នក​សម្រប​សម្រួល​អង្គការ​លីកាដូ ខេត្ត​កោះកុង លោក ហ៊ួរ អ៊ីន ខក​ចិត្ត​ចំពោះ​មន្ត្រី​តុលាការ​ខេត្ត​កោះកុង ដែល​កោះ​ហៅ​ពលរដ្ឋ​មក​ចោទ​សួរ​ពី​បទ​ចោទ​ដ៏​ធ្ងន់ធ្ងរ តាម​បណ្ដឹង​របស់​ភាគី​ក្រុមហ៊ុន។ អ្នក​តាមដាន​ជម្លោះ​ដីធ្លី​នេះ ជំរុញ​ឲ្យ​ដោះស្រាយ​វិវាទ​នៅ​ក្រៅ​ប្រព័ន្ធ​តុលាការ និង​គួរ​តែ​តម្រូវ​ឲ្យ​អាជ្ញាធរ​ចុះ​ទៅ​ពិនិត្យ និង​សិក្សា​ពី​ប្រវត្តិ​ដី ដល់​ទីតាំង​មាន​ទំនាស់ ទើប​ជា​ការ​ប្រសើរ៖ «ក្រសួង​ដែន​ដី ក៏​ដូច​ជា ខាង​អាជ្ញាធរ​ខេត្ត​ហ្នឹង​ គួរ​តែ​មាន​ការ​ស៊ើប​អង្កេត​ឲ្យ​ច្បាស់​ទៅ។ តើ​ជម្លោះ​ដីធ្លី​ហ្នឹង វា​កើត​ឡើង​ដោយ​របៀប​ណា? តើ​ប្រជាពលរដ្ឋ​បាត់​បង់​ដី​ហ្នឹង មែន​ឬ​ក៏​អត់? ឬ​ប្រជាពលរដ្ឋ ចេះ​តែ​តវ៉ា​ទេ? គួរ​តែ​ធ្វើការ​ឲ្យ​មាន​ការ​ស៊ើប​អង្កេត​ច្បាស់​លាស់​ជាមុន​សិន ហើយ​ចំពោះ​ការ​ប្រើ​ប្រព័ន្ធ​តុលាការ​ទៅ​លើ​តំណាង​ប្រជាពលរដ្ឋ វា​មិន​មែន​ជា​ដំណោះស្រាយ​ទេ។ វា​កាន់​តែ​ធ្វើ​ឲ្យ​ប្រជាពលរដ្ឋ​មាន​ការ​ឈឺ​ចាប់ ហើយ​នឹង​ធ្វើ​ការ​តវ៉ា​ទៅ​មុខ​ទៀត។ បើ​ក្នុង​លក្ខណៈ​ធ្ងន់ធ្ងរ បើ​តំណាង​របស់​គាត់​ត្រូវ​បាន​ឃុំ​ខ្លួន ឬ​យ៉ាង​ណា​ហ្នឹង យើង​ឃើញ​ថា​ស្ថានភាព​ហ្នឹង វា​កាន់​តែ​អាក្រក់​ហើយ។ វា​ប៉ះពាល់​ហើយ​ដល់​មុខមាត់​អាជ្ញាធរ​ដែន​ដី ដែល​មិន​អាច​ដោះ​ស្រាយ​បាន ដែល​ធ្វើ​ឲ្យ​ប្រជាពលរដ្ឋ​ជាប់​គុក ដោយ​សារ​តែ​ការ​តវ៉ា​រឿង​​ជម្លោះ​ដីធ្លី»

ពលរដ្ឋ​មាន​ទំនាស់​ដីធ្លី​ក្នុង​សហគមន៍​ទទូច​ថា ដើម្បី​ដោះស្រាយ​វិវាទ​នេះ អាជ្ញាធរ​គួរ​កាត់​ឆ្វៀល​ដី មាន​ទំនាស់ ទំហំ ៤២១​ហិកតារ ស្ថិត​នៅ​ក្នុង​ឃុំ​ជី​ខ​លើ​ស្រុក​ស្រែ​អំបិល ចេញ​ពី​គម្រោង​អភិវឌ្ឍន៍​របស់​ ក្រុមហ៊ុន ហេង ហ៊ុយ អេហ្គ្រី​ខាល​ឈ័រ (Heng Huy Agriculture Group)

តែ​អាជ្ញាធរ​ខេត្ត​កោះកុង ​បាន​ចេញ​លិខិត​បដិសេធ​ សំណើ​នេះ​ កាល​ពី​ថ្ងៃ​ទី១ កក្កដា និង​ជំរុញ​ឲ្យ​ដោះ​ស្រាយ​វិវាទ​តាម​ផ្លូវ​តុលាការ ព្រោះ​អាជ្ញាធរ​មិន​មាន​សមត្ថកិច្ច​លើ​ករណី​នេះ​ទេ។ ពលរដ្ឋ​ ព្រមាន​ថា ពួក​គេ​មាន​គម្រោង​ទៅ​ដេក​តវ៉ា នៅ​មុខ​សាលា​ខេត្ត​ទៀត ប្រសិន​បើ​នៅ​តែ​គ្មាន​ដំណោះ​ស្រាយ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល