សហគមន៍អំពាវនាវឲ្យស៊ើបអង្កេតករណីពុករលួយរឿងដីនៅមណ្ឌលគិរី
2014.07.24
ដីចម្ការវិលជុំនិងដីព្រៃត្រៀមបម្រុងសហគមន៍ជនជាតិដើមភាគតិចព្នង នៅភូមិស្រែអំពិល ឃុំស្រែខ្ទុំ ស្រុកកែវសីមា ខេត្តមណ្ឌលគិរី ដែលក្រុមហ៊ុន សុវណ្ណ រាជសី បាញ់ថ្នាំឈូសឆាយយកកាលពីថ្ងៃទី២៤ ខែឧសភា ឆ្នាំ២០១៤។
សហគមន៍ជនជាតិដើមព្នងនិងស្ទៀង ភូមិស្រែអំពិល ឃុំស្រែខ្ទុំ ស្រុកកែវសីមា ខេត្តមណ្ឌលគិរី អំពាវនាវជាថ្មីទៀតសុំឲ្យអាជ្ញាធរខេត្តនិងមន្ត្រីស្ថាប័នតុលាការ ស៊ើបអង្កេតករណីពុករលួយកាត់ដីត្រៀមបម្រុងសហគមន៍ ២៥០ហិកតារ ប្រគល់ទៅឲ្យក្រុមហ៊ុនសម្បទាន សុវណ្ណរាជសី ដោយពុំមានការឯកភាពពីប្រជាសហគមន៍។
គ្រឿងចក្រក្រុមហ៊ុនសម្បទាន សុវណ្ណរាជសី នៅតែបន្តឈូសឆាយទៅលើដីត្រៀមបម្រុងសហគមន៍នៅក្នុងសប្ដាហ៍នេះ បើទោះបីប្រជាពលរដ្ឋភូមិស្រែអំពិល ប្រមាណ ២០គ្រួសារ បានដាក់ពាក្យប្ដឹងទាមទារឲ្យក្រុមហ៊ុនប្រគល់ដីនោះមកសហគមន៍វិញក៏ដោយ។
សហគមន៍ភូមិស្រែអំពិល កាលពីខែឧសភា បានដាក់ពាក្យប្ដឹងសុំកិច្ចអន្តរាគមន៍ពីអាជ្ញាធរខេត្តទាក់ទិនដីសហគមន៍ដែលអាជ្ញាធរមូលដ្ឋានបានសម្រេចប្រគល់ទៅឲ្យក្រុមហ៊ុនបំពានច្បាប់ និងដាក់ពាក្យប្ដឹងប្រធានភូមិ និងតំណាងសហគមន៍ ថាបានទទទួលប្រាក់ ២ម៉ឺនដុល្លារពីក្រុមហ៊ុន ហើយចលនាឲ្យអ្នកភូមិផ្ដិតមេដៃគាំទ្រប្រគល់ដីនោះឲ្យក្រុមហ៊ុន។
អ្នកដឹកនាំការតវ៉ាអនុប្រធានសហគមន៍លោក ក្រើត អ៊ាន រៀបរាប់ថា អ្នកភូមិបានធ្វើដំណើរទៅស្ថាប័នតុលាការដើម្បីជំរុញឲ្យមន្ត្រីស្ថាប័ននេះចាត់វិធានការពាក្យបណ្ដឹងប្រជាពលរដ្ឋឲ្យបានឆាប់ ក៏ប៉ុន្តែជិតពីរខែកន្លងទៅនេះមិនឃើញមានចំណាត់ការអ្វីឡើយ ផ្ទុយទៅវិញគ្រឿងចក្រក្រុមហ៊ុនបានសម្រុកឈូសឆាយដីសហគមន៍កាន់តែច្រើន។
លោកចាត់ទុកការសម្រេចប្រគល់ដីសហគមន៍ទៅឲ្យក្រុមហ៊ុន គឺជាការលក់ដូរដីរដ្ឋបំពានច្បាប់៖ «ខ្ញុំទាមទារឲ្យរកដំណោះស្រាយរកយុត្តិធម៌សម្រាប់សហគមន៍យើងខ្ញុំ ព្រោះអ្វីអ្នកយកដីរដ្ឋលក់ឲ្យក្រុមហ៊ុនស្របច្បាប់ឬអត់។ ពួកខ្ញុំមិនមានសិទ្ធិយកដីរដ្ឋទៅលក់ឲ្យក្រុមហ៊ុនណា ឈ្មួញណាទេ អ៊ីចឹងយើងមានសិទ្ធិការពារសិទ្ធិផ្ដល់ផលពីព្រៃឈើសម្រាប់ចិញ្ចឹមជនជាតិដើមភាគតិចរស់នៅលើដីហ្នឹង»។
ភូមិស្រែអំពិល មានប្រជាពលរដ្ឋជនជាតិដើមព្នង និងស្ទៀង ៦០គ្រួសារ ក្នុងនោះរួមមានប្រជាពលរដ្ឋ ចំណាកស្រុកចូលមករស់នៅជាង ២០គ្រួសារបន្ថែមទៀត។ ក៏ប៉ុន្តែប្រជាពលរដ្ឋជនជាតិដើមភាគតិចប្រមាណ ២០គ្រួសារបដិសេធមិនចុះហត្ថលេខាប្រគល់ដីទៅឲ្យក្រុមហ៊ុនជាថ្នូរទទួលប្រាក់មួយគ្រួសារ ១លានរៀលនោះឡើយ។
សមាជិកក្រុមប្រឹក្សាឃុំស្រែខ្ទុំ លោក អឿន នា មកពីគណបក្ស សម រង្ស៊ី ទទួលស្គាល់ថា សហគមន៍មួយចំនួន រួមទាំងប្រជាពលរដ្ឋចំណាកស្រុកពិតជាបានផ្ដិតមេដៃប្រគល់ដីទៅឲ្យក្រុមហ៊ុន ដោយសារអាជ្ញាធរមូលដ្ឋាន និងប្រធានសហគមន៍ចលនាឲ្យអ្នកភូមិប្រគល់ដីក្រោមហេតុផលថា ដីនោះរដ្ឋបានសម្បទានទៅឲ្យក្រុមហ៊ុន។ ចំណែកក្រុមហ៊ុនបានផ្ដល់ប្រាក់គោលនយោបាយដោះស្រាយផលប៉ះពាល់ប្រជាពលរដ្ឋ។
លោកអះអាងថា បានប្រជុំតវ៉ាពីការផ្ដល់ដីខុសច្បាប់នោះជាមួយសមាជិកក្រុមប្រឹក្សាឃុំដទៃមកពីគណបក្សកាន់អំណាច ប៉ុន្តែយោបល់លោកជាសំឡេងភាគតិចសមាជិកក្រុមប្រឹក្សាផ្សេងទៀតនៅតែជំរុញឲ្យអ្នកភូមិផ្ដិតមេដៃប្រគល់ដី៖ «ខ្ញុំដឹងថា កំណត់ហេតុទី១ អ្នកភូមិស្រែអំពិលហ្នឹង គេបដិសេធទាំងស្រុង គេថា ២ម៉ឺនដុល្លារ តាមរយៈមេខ្យល់ហ្នឹង ដល់អ៊ីចឹងគេប្រើតាមរយៈមេឃុំ។ ដល់អ៊ីចឹងបានបងប្អូនផ្ដិតមេដៃ បើសិនផ្ដិតមេដៃបានលុយ ១លានគេថាអ៊ីចឹង»។
ប្រធានភូមិស្រែព្រះ លោក ដួង តាឡុត និងប្រធានសហគមន៍ លោក ក្លាន សី ត្រូវបានតំណាងសហគមន៍ ២០គ្រួសារ ប្ដឹងទៅស្ថាប័នអយ្យការតុលាការខេត្តពីបទលក់ដីសហគមន៍អភិរក្សជាដីសាធារណៈរបស់រដ្ឋ។ ក៏ប៉ុន្តែមេឃុំស្រែខ្ទុំ បដិសេធថា មិនមានការលក់ដូរដីដូចការចោទនោះទេ គឺប្រជាពលរដ្ឋភាគច្រើនបានផ្ដិតមេដៃទទួលប្រាក់ដោះស្រាយផលប៉ះពាល់និងការសែនព្រេនប្រពៃណីជនជាតិដើមភាគតិច។
មន្ត្រីស្ថាប័នអយ្យកាព្រះរាជអាជ្ញារងអមតុលាការខេត្តមណ្ឌលគិរី លោក សូ សុវិជ្ជា ទទួលស្គាល់ថា លោកបានទទួលចាត់ការពាក្យប្ដឹងរបស់សហគមន៍រួចហើយ ក៏ប៉ុន្តែការយឺតយ៉ាវដោយសារដីកាកោះពិបាកបញ្ជូនទៅដល់ជនពាក់ព័ន្ធត្រូវកោះហៅមកសាកសួរ។
លោកថា នៅរដូវភ្លៀងធ្លាក់ជោកជាំផ្លូវទៅកាន់តំបន់នោះពិបាកធ្វើដំណើរ៖ «ចេញដីកាកោះហើយ ប៉ុន្តែមិនឃើញបង្វិលដីកាមកវិញទេ។ ពីរទៀតដោយសារខ្ញុំប្រើរយៈពេលប្រហែលជាមួយខែ ដោយសារផ្លូវពិបាក ដល់អ៊ីចឹងទៅពាក់ព័ន្ធខាងអ្នកយកដីកាទៅឲ្យប្រជាពលរដ្ឋមានភាពយឺតយ៉ាវដោយសារហេតុផលអ៊ីចឹង»។
ក្រុមហ៊ុន សុវណ្ណ រាជសី ទទួលបានដីសម្បទានសេដ្ឋកិច្ចចំនួនជាង ៦.៥០០ហិកតារនៅស្រុកស្នួល ខេត្តក្រចេះ និងស្រុកកែវសីមា ខេត្តខេត្តមណ្ឌលគិរី តាំងពីឆ្នាំ២០១១ ប៉ុន្តែកន្លងទៅនេះ ប្រជាពលរដ្ឋភូមិស្រែព្រះ បានតវ៉ាជាច្រើនករណីទៅនឹងការឈូសឆាយបង្កបង្កើនផលប៉ះពាល់ដីធ្លី តំបន់ព្រៃឈើសហគមន៍ជនជាតិដើមនៅតំបន់នោះ។
អភិបាលស្រុកកែវសីមា លោក ស៊ិន វណ្ណវុធ ធ្លាប់បានបញ្ជាក់ថា ដីដែលក្រុមហ៊ុនឈូសឆាយ គឺជាដីសម្បទានរបស់រដ្ឋបានប្រគល់ឲ្យក្រុមហ៊ុន ក៏ប៉ុន្តែដោយសារមានផលប៉ះពាល់ជាមួយប្រជាពលរដ្ឋទើបក្រុមហ៊ុនបានសម្របសម្រួលជាមួយសហគមន៍ផ្ដល់ជាគោលនយោបាយសំណងផលប៉ះពាល់។ លោកទទួលស្គាល់ថា មានប្រជាពលរដ្ឋតិចតួចជាអ្នកអ្នកជំទាស់បញ្ហានេះ ប៉ុន្តែអ្នកភូមិភាគច្រើនបានយល់ព្រមសម្របសម្រួលយកប្រាក់ពីក្រុមហ៊ុន។
លោក ស៊ិន វណ្ណវុធ៖ «ក្រុមហ៊ុនគាត់មាន ស.ជ.ណ របស់រាជរដ្ឋាភិបាល មានទំនាស់តិចតួចជាមួយប្រជាពលរដ្ឋ អ៊ីចឹងទេ យើងឲ្យមានការសម្របសម្រួលគ្នា បែងចែកអ្វីដែលមានការប៉ះពាល់ដល់ប្រជាពលរដ្ឋឲ្យក្រុមហ៊ុនចៀសវាង ហើយផ្ដល់ឲ្យប្រជាពលរដ្ឋវិញ»។
អ្នកឃ្លាំមើលសិទ្ធិមនុស្សសមាគមអាដហុក ខេត្តមណ្ឌលគិរី លោក សុក រដ្ឋា អះអាងថា ការសម្របសម្រួលទទួលប្រាក់ពីក្រុមហ៊ុនដោយមិនមានការឯកភាពពីសមាជិកសហគមន៍ ហើយប្រគល់ដីទៅឲ្យក្រុមហ៊ុន គឺជាការរំលោភសិទ្ធិដីធ្លីសហគមន៍ជនជាតិដើមភាគតិច។ លោកកត់សម្គាល់ថា អ្នកភូមិកំពុងអស់សង្ឃឹមនិងអស់ជំនឿទៅលើក្រុមសមត្ថកិច្ច ហេតុនេះសមាគមនឹងធ្វើលិខិតថ្លែងសាទុក្ខរបស់ប្រជាពលរដ្ឋដើម្បីផ្សព្វផ្សាយជាសាធារណៈស្វែងរកកិច្ចគាំពារបញ្ហាជូនប្រជាពលរដ្ឋ និងជាពិសេសស្វែងរកកិច្ចអន្តរាគមន៍ពីអង្គការម្ចាស់ជំនួយទាក់ទិនអភិវឌ្ឍន៍សហគមន៍ដើម្បីជួយដោះស្រាយបញ្ហាដីធ្លីប្រជាពលរដ្ឋ។
លោក សុក រដ្ឋា៖ «គឺយើងបានបញ្ជូនរឿងហ្នឹងទៅឲ្យសហភាពអឺរ៉ុប ត្រួតពិនិត្យនិងធ្វើការដោះស្រាយទៅតាមយន្តការគណៈកម្មការសុរិយោដី ពីព្រោះអ៊ីយូ គេជាម្ចាស់លុយដ៏ធំមួយសម្រាប់ផ្ដល់លុយតាមរយៈរដ្ឋាភិបាលឲ្យដោះស្រាយទំនាស់ដីធ្លីជាមួយប្រជាពលរដ្ឋ»។
សហគមន៍ជនជាតិព្នង ភូមិស្រែអំពិល មានបានចុះបញ្ជីកំណត់អត្តសញ្ញាណ និងចុះបញ្ជីបង្កើតសហគមន៍ផ្លូវការតាំងពីឆ្នាំ២០១២ ទទួលស្គាល់ដោយក្រសួងមហាផ្ទៃ ហេតុនេះអ្នកភូមិអភិរក្សដីត្រៀមបម្រុងសម្រាប់ចុះបញ្ជីដីធ្លីសហគមន៍ជាកម្មសិទ្ធិសមូហភាព។
ទោះជាយ៉ាងនេះក្តី តំណាងសហគមន៍ ២០គ្រួសារ ព្រមានថា ពួកគេនឹងស្វែងរកកិច្ចអន្តរាគមន៍ពីអាជ្ញាធរថ្នាក់ជាតិ ប្រសិនអាជ្ញាធរខេត្ត និងមន្ត្រីតុលាការអូសបន្លាយពេលវេលាមិនចាត់ការរឿងក្តីនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សភាកម្ពុជាប្រតិកម្មទៅនឹងការសម្រេចរបស់សភាអឺរ៉ុបរឿងដកប្រព័ន្ធអនុគ្រោះពន្ធEBA បន្ថែម
- មន្ត្រីជាន់ខ្ពស់ និងឧកញ៉ា សុំលោក ហ៊ុន សែន ឱ្យជួយរកយុត្តិធម៌ដោយមិនពឹងតុលាការ
- កម្ពុជារកចំណូលបាន ១.៤ពាន់លានដុល្លារ ពីកំណើនភ្ញៀវទេសចរបរទេសក្នុងឆ្នាំ២០២២
- លោក ហ៊ុន សែន មិនគាំទ្រដីកាតុលាការICCដើម្បីចាប់ខ្លួនមេដឹកនាំរុស្ស៊ី
- ស្ត្រីដែលគ្រូពេទ្យវះកាត់ខុសបច្ចេកទេសបានបាត់បង់ជីវិត