ពលរដ្ឋ​ជាង ២០០​រយ​គ្រួសារ​ខេត្ត​សៀមរាប​ខកចិត្ត​នឹង​អាជ្ញាធរ​អប្សរា ដែល​មិន​ដោះស្រាយ​វិវាទ​ដីធ្លី​នៅ​តំបន់​រុនតាឯកជិត ២០ឆ្នាំ​មក​ហើយ

ដោយ ឡេង ម៉ាលី
2022.11.11
Share on WhatsApp
Share on WhatsApp
ពលរដ្ឋ​ជាង ២០០​រយ​គ្រួសារ​ខេត្ត​សៀមរាប​ខកចិត្ត​នឹង​អាជ្ញាធរ​អប្សរា ដែល​មិន​ដោះស្រាយ​វិវាទ​ដីធ្លី​នៅ​តំបន់​រុនតាឯកជិត ២០ឆ្នាំ​មក​ហើយ អ្នកភូមិ​​តានី ឃុំ​រុន​តា​ឯក ស្រុក​បន្ទាយ​ស្រី ខេត្ត​សៀមរាប តវ៉ា​ការ​ឈូស​ឆាយ​ដី ដែល​ពួកគាត់អះអាង​ថា ជា​ដី​របស់​ពួក​គាត់។
Photo Provided

ពលរដ្ឋ​ជាង ២០០​រយគ្រួសារ (២១០រស់​នៅ​ខេត្ត​សៀមរាប​ខកចិត្ត​នឹង​អាជ្ញាធរ​អប្សរា មិន​អើពើ​ដោះស្រាយ​ជម្លោះ​ដីធ្លី​រ៉ាំរ៉ៃ​ជូន​ពួកគាត់​ជិត ២០​ឆ្នាំ​មក​ហើយ ធ្វើ​ឱ្យ​អ្នក​ភូមិ​លំបាក​វេទនា ខ្វះខាត​ដី​បង្កបង្កើន​ផល​ចិញ្ចឹម​ជីវិត។ អ្នក​ភូមិ​អះអាង​ថា ដីស្រែ​ចម្ការ​កេរ​ឪពុកម្តាយ​របស់​ពួកគាត់ ឋិតនៅ​តំបន់​រុនតាឯក ត្រូវ​បាន​អាជ្ញាធរ​អប្សរា​ហ៊ុមព័ទ្ធ​ហាម​មិន​ឱ្យ​ធ្វើស្រែ តាំង​ពី​ឆ្នាំ ២០០៥ ហើយ​មក​ទល់​ពេល​នេះ អាជ្ញាធរ​មិន​ផ្តល់​សំណង​អ្វី​ទាំងអស់។

អ្នក​ភូមិ​រស់នៅ​ភូមិ​ស្នា​សង្គ្រាម ឃុំ​បល្ល័ង្គ ស្រុក​ប្រាសាទ​បាគង បង្ហាញ​ពី​ភាព​អយុត្តិធម៌ និង​ឈឺចាប់​ក្នុង​ចិត្ត នៅ​គ្រា​ដែល​អាជ្ញាធរ​អប្សរា ហាម​ពួក​គាត់​មិន​ឱ្យ​ចូល​ទៅ​បង្ក​បង្កើន​ផល​លើដី ស្រែ​កេរ​ដូនតា ឋិត​នៅ​តំបន់​រុនតាឯក។

ពួកគាត់​អះអាង​ថា មក​ទល់​ពេល​នេះ ជិត ២០​ឆ្នាំ​មក​ហើយ ដែល​អាជ្ញាធរ​អប្សរា បន្ត​ពន្យារ​ពេល​មិន​ដោះស្រាយ​ជម្លោះ​ដីធ្លី​នេះ ទាល់​តែ​សោះ ធ្វើ​ឱ្យ​ពលរដ្ឋ​ក្រីក្រ​លំបាក​វេទនា គ្មាន​ដី​បង្កបង្កើន​ផល​ចិញ្ចឹម​ជីវិត។

តំណាង​ពលរដ្ឋ លោក សំ មុំ ប្រាប់​វិទ្យុអាស៊ីសេរី នៅថ្ងៃទី១១ វិច្ឆិកា ថា នៅ​រយៈពេល​ជាងខែ​ចុងក្រោយ​នេះ អ្នក​ភូមិ​ជាង ១០០នាក់ បាន​ដាក់​ញត្តិ និង​តវ៉ា​ជា​ច្រើនដង ស្នើ​ឱ្យ​អាជ្ញាធរ​ពន្លឿន​ផ្តល់​ដំណោះស្រាយ​បញ្ហា​នេះ ប៉ុន្តែ​គ្មាន​បាន​ផល​ឡើយ។

លោក​ថា គ្រួសារ​លោក​មានដីហិកតារ​ដែល​អាស្រ័យផលជំនាន់​មក​ហើយ មុន​ឆ្នាំ១៩៧៩  ត្រូវ​អាជ្ញាធរ​អប្សរា​ហ៊ុមព័ទ្ធ​ហាម​មិន​ឱ្យ​បង្កបង្កើនផល តាំង​ពី​ឆ្នាំ២០០៥ រហូត​មកលោក​បន្ថែម​ថា ជំហរ​របស់​អ្នក​ភូមិចង់​ឱ្យ​អាជ្ញាធរ​ផ្តល់​សំណង​សមរម្យ​តាម​តម្លៃ​ទីផ្សារ ឬ​ដោះដូរដី​នៅ​ទីតាំង​ផ្សេង ដើម្បី​ផ្តល់​លទ្ធភាព​ឱ្យ​ពួកលោក មាន​ដី​បង្កបង្កើន​ផល​ចិញ្ចឹម​ជីវិត។

លោក សំ មុំ៖ «ពលរដ្ឋ​ចូល​ទៅ​ដេញ​ចាប់ ដើរ​មើល​អាជ្ញាធរ​អប្សរា​ហ៊ុមព័ទ្ធ​ការពារ​ដីហ្នឹង។ ពលរដ្ឋ​គាត់​ពិបាក​ធ្វើ​ដែរ ពលរដ្ឋ​ខ្លះ​គាត់​លួច​ធ្វើ​នៅ​ដី​ដែល​គាត់​លួច​ធ្វើ គេ​ចាប់​គោ​យន្ត​គាត់»

ចាប់​តាំង​ពី​ដើម​ខែ​តុលា មក​ទល់​ពេល​នេះ អ្នក​ភូមិ​ជាង ១០០ នាក់ បាន​លើក​គ្នា​តវ៉ា និង​ដាក់​ញត្តិ​ជា​ច្រើនដង នៅ​សាលា​ឃុំ​បល្ល័ង្គ សាលាស្រុក​ប្រាសាទ​បាគង និង​អាជ្ញាធរ​ខេត្ត​សៀមរាប ដើម្បី​ទាមទារ​ឱ្យ​អាជ្ញាធរ​អប្សរា ដោះស្រាយ​ជម្លោះ​ដីធ្លី​ទំហំ ១៦០ ហិកតារ​ជូន​ពួកគាត់ នៅ​តំបន់​រុនតាឯក។ អ្នក​ភូមិ​ទាំងនោះ​បាន​លើក​បដា សំណូមពរ​ឱ្យ​លោក​នាយករដ្ឋមន្ត្រី ហ៊ុន សែន ជួយ​អន្តរាគមន៍​រឿង​នេះ​ដោយ​យុត្តិធម៌។

តំណាង​ពលរដ្ឋ លោក សំ មុំ បន្ថែម​ថា កន្លង​ទៅ​អាជ្ញាធរ​អប្សរា បាន​ឃាត់​ចាប់​គោយន្ត​ពលរដ្ឋ​មួយ​គ្រឿង ដែល​កំពុង​ព្យួរ​ស្រែលើ​ដី​មាន​ជម្លោះ​នោះ ​ដោយ​បញ្ជូន​ទៅ​រក្សាទុក​នៅ​សាលាស្រុក ហើយ​អាជ្ញាធរ​តម្រូវ​ឱ្យ​ពលរដ្ឋ ត្រូវ​បង់​លុយ ៥០០​ដុល្លារ ជា​ថ្នូរ​លោះយក​គោយន្ត​ត្រឡប់​មក​វិញ។ 

លោក​ថា វា​ជា​រឿង​អយុត្តិធម៌ ដែល​អាជ្ញាធរ​អប្បរា រំលោភ​យក​ដី​ពួកគាត់​ទាំង​ស្រុង ដើម្បី​បែងចែក​ឱ្យ​ពលរដ្ឋ​ផ្សេង ដោយ​មិន​ផ្តល់​សំណង។
លោក សំ មុំ«ដីហ្នឹង បើ​គិត​ទៅ ដីហ្នឹង​វា​ស្មើ​នឹង ៣​ជំនាន់​មក​តាខ្ញុំ​ចែក​មក ពុក​មួយ​ជំនាន់។ វា​ជួប​បញ្ហា​លំបាក ដែល​ពលរដ្ឋ​ជម្លៀស​ពី​ភូមិ​ខ្លួន​ឯង»

ឆ្លើយ​តប​រឿង​នេះ អ្នកនាំពាក្យ​អាជ្ញាធរ​អប្សរា លោក ឡុង កុសល បកស្រាយ​ថា ករណី​ពលរដ្ឋ​ទាំងនេះ គឺ​ជា​ថ្មី​រឿង​មួយ​ដែល​ទើប​តែ​បង្កើត​ឡើង​ប៉ុណ្ណោះ ដោយសារតែ​ពេល​នេះ តំបន់​រុនតាឯក មាន​ការ​រៀបចំ​អភិវឌ្ឍន៍​ល្អ​ប្រសើរ។ លោក​បដិសេធ​ឆ្លើយ​សំណួរ​ផ្សេង​ទៀត ដោយ​គ្រាន់តែ​បញ្ជាក់​យ៉ាង​ខ្លី​ថា អាជ្ញាធរ​ពុំ​មាន​ដំណោះស្រាយ​ករណី​នេះ​ជូន​ពលរដ្ឋ​ឡើយ៖
«
វា​ជា​រឿង​មួយ​ដែល​ទើប​តែ​បង្កើត​ថ្មី វា​កើតឡើង​ដោយ​មាន​ការ​អភិវឌ្ឍ​ទីកន្លែង​ហ្នឹង ពី​មុន​មក​អត់​មាន​រឿង​ហ្នឹង​ទេ យើង​ពុំ​មាន​ដំណោះស្រាយ​ជូន​ទេ»

មន្ត្រី​សង្គមស៊ីវិល ដែល​ចុះ​អង្កេត​ជម្លោះ​ដីធ្លី​នេះ​ចាត់​ទុក ការ​លើកឡើង​របស់​អ្នកនាំពាក្យ​អាជ្ញាធរ​អប្សរា​រូប​នេះ ជា​លេស​ឆ្លើយ​ដោះសា​ប៉ុណ្ណោះ។ បន្ថែម​ពី​នេះ អ្នក​ភូមិ​ទាំងនោះ មាន​ដី​កសិកម្ម​នៅ​តំបន់​នោះ​ជា​យូរ​មក​ហើយ ដោយ​មាន​រោង​ចាំ​ចម្ការ ប៉ុន្តែ​អាជ្ញាធរ​អប្សរា បាន​យក​កម្លាំង​យាម​ល្បាត​មិន​ឱ្យ​អ្នក​ភូមិ​អាស្រ័យ​ផល លើ​ដី​ស្រែ​ចម្ការ​របស់​ពួកគាត់​តាំង​ពី​ឆ្នាំ២០០៥។

ជុំវិញ​រឿង​នេះ មន្ត្រី​សម្របសម្រួល​គម្រោង​ធុរកិច្ច និង​សិទ្ធិ​មនុស្ស នៃ​មជ្ឈមណ្ឌល​សិទ្ធិមនុស្ស​កម្ពុជា លោក វណ្ណ សុផាត យល់​ថា ក្រសួង​ដែនដី អាជ្ញាធរ​អប្សរា និង​អាជ្ញាធរ​ពាក់ព័ន្ធ​គួរតែ ចុះ​ដោះស្រាយ​ករណី​នេះ ជាមួយ​ពលរដ្ឋ​ដោយ​ស្មោះត្រង់ និងសន្តិវិធី ចៀសវាងចោទអ្នកភូមិថា ទើបតែបង្កើតបញ្ហាថ្មី ដោយខ្វះភាពស្មោះត្រង់ និងថ្លៃថ្នូរ៖

លោក វណ្ណ សុផាត៖ «គួរតែ​មាន​ដំណោះស្រាយ​អី ដែល​គាត់​ទទួល​យក​បាន គាត់​ទទួល​យក​បាន​វា​ចប់​ហើយ​រឿង​ហ្នឹង។ បើ​នៅ​តែ​រ៉ាំរៃ​ហ្នឹង ហើយ​ចេះ​តែ​ចោទ​គាត់​ផ្ដេសផ្ដាស វា​អត់ថ្លៃថ្នូរ​ធ្វើ​ឱ្យ​ការ​អភិវឌ្ឍ​ផ្សេង​ទៀត ពាក់ព័ន្ធ​រំលោភ​សិទ្ធិ​ពលរដ្ឋ អត់​ធ្វើ​ឱ្យ​កិត្តិនាម​ល្អ​ទេ»

អ្នកភូមិ​ថា ក្រោយ​ពី​ពួកគាត់​ខក​ខាន​ធ្វើ​ស្រែ​ចម្ការ​លើ​ដី​នៅ​តំបន់​រុនតាឯក ជាង ១៧​ឆ្នាំ កន្លង​មក ដីស្រែ​នៅ​តំបន់​នោះ​សរុប ១៦០​ហិកតារ ដុះ​ព្រៃ​រេច​រឹល និង​ដើមឈើ​ធំៗ ស្ទើរ​ក្លាយ​ជា​ព្រៃ​របោះ ហើយ​មាន​ផ្នែក​ខ្លះ​ទៀត​ត្រូវ​អាជ្ញាធរ​យក​គ្រឿង​ចក្រ​ឈូសឆាយ។

រដ្ឋាភិបាល​កំពុង​ឈូស​ឆាយ កសាង​ហេដ្ឋារចនាសម្ព័ន្ធ លើ​ផ្ទៃ​ដី​ជាង ១ ពាន់ ២​រយហិកតារ (.១១២) ដើម្បី​អភិវឌ្ឍន៍​តំបន់​រុនតាឯក ជា​ដី​សម្បទាន​សង្គម​កិច្ច សម្រាប់​ចែក​ជូន​ពលរដ្ឋ​ដែល​កំពុង​រស់នៅ​មិន​ស្រប​ច្បាប់ ក្នុង​តំបន់​រមណីយដ្ឋាន​អង្គរ​ឱ្យ​ទៅ​នៅ​តំបន់​នោះ។

គម្រោង​អភិវឌ្ឍន៍​នេះ មាន​ពលរដ្ឋ​ជាច្រើន​គ្រួសារ​រង​ផល​ប៉ះពាល់​កំពុង​កើតទុក្ខ​មិន​សុខចិត្ត​ចំពោះ​យន្តការ​ដោះស្រាយ ផល​ប៉ះពាល់​ដី​ស្រែ​ចម្ការ របស់​អាជ្ញាធរ​អប្សរា​ថា អយុត្តិធម៌ និង​ខ្វះតម្លាភាពអ្នក​ភូមិ​ខ្លះ បាន​បង្ខំ​ចិត្ត​ទទួល​យក​គោល​នយោបាយ​សំណង​ដោះដូរ​ដី​ដោយសារ​តែ​ខ្លាច​អាជ្ញាធរ​ដក​ហូត​ដី​ពួកគាត់​ទៅ​ទទេៗ គ្មាន​សំណង​អ្វី​ទាំងអស់៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។