ពលរដ្ឋព្រះវិហាររិះគន់អាជ្ញាធរថា មិនអើពើទប់ស្កាត់ក្រុមហ៊ុនចិនច្រូតស្រូវពលរដ្ឋជិត១០ហិកតារ
2020.11.18
ក្រុមហ៊ុន ហេង ហ្វូ (Hengfu Group Sugar Industry) នៅខេត្តព្រះវិហារ។ រូបថត កាលពីអំឡុងខែសីហា ឆ្នាំ ២០១៩។
Photo Provided
ពលរដ្ឋរស់នៅឃុំតស៊ូ ស្រុកជ័យសែន ខេត្តព្រះវិហារ ចោទក្រុមហ៊ុនចិន ហេង ហ្វូ (Hengfu Group Sugar industry) ថា យកគ្រឿងចក្រច្រូតស្រូវរបស់ពលរដ្ឋអស់ជិត ១០ហិកតារជាថ្មីទៀត។ អ្នកភូមិ ៤គ្រួសារថា អាជ្ញាធរមូលដ្ឋានមិនបានយកចិត្តទុកដាក់ដោះស្រាយបញ្ហារបស់ពួកគេនោះទេ។
ពលរដ្ឋ ៤គ្រួសារ រស់នៅភូមិតស៊ូ ឃុំតស៊ូ រិះគន់អាជ្ញាធរមូលដ្ឋានខេត្តព្រះវិហារថា គ្មានចេតនាដោះស្រាយ ពាក្យបណ្តឹងរបស់ពលរដ្ឋនោះទេ បើទោះបីជាពួកគេបានស្នើសុំកិច្ចអន្តរាគមន៍បន្ទាន់ជាច្រើនសារក្ដី។ អ្នកភូមិ៤គ្រួសារនោះ បានធ្វើស្រែលើដី ៨ហិកតារ និងត្រៀមប្រមូលផល តែត្រូវបានក្រុមហ៊ុន ប្រើម៉ាស៊ីនច្រូតស្រូវមួយគ្រឿង ច្រូតស្រូវ យកស្ទើរតែទាំងស្រុង នៅរយៈពេល ៤ថ្ងៃចុងក្រោយនេះ។
តំណាងពលរដ្ឋ លោកស្រី ហួត ស្រីនុច ប្រាប់អាស៊ីសេរីនៅថ្ងៃទី១៧ វិច្ឆិកាថា គ្រួសារលោកស្រី ធ្វើស្រែ ៣ហិកតារ តែត្រូវបានក្រុមហ៊ុនច្រូតយកស្ទើរទាំងអស់។ លោកស្រីថា ដីស្រែដែលអ្នកភូមិធ្វើកសិកម្ម ជាដីកេរឪពុកម្ដាយ ដែលអាស្រ័យផលជាច្រើនឆ្នាំមកហើយ។ លោកស្រីត្អូញថា ពលរដ្ឋ ៤គ្រួសារសុទ្ធសឹងតែជំពាក់បំណុលគេ ហើយរំពឹងផលស្រូវទាំងនេះ ដើម្បីបង្វិលសងម្ចាស់បំណុល ក៏ប៉ុន្តែបែរជាខកបំណង៖ «ខ្វះណាស់លោកគ្រូអើយ ហើយទុកឱ្យគ្នា ៧០អារ គ្នា ៤គ្រួសារ លោកគ្រូគិតមើល? ហើយអាស្រូវកន្លែងល្អៗគេច្រូតយកអស់ ហើយអាកន្លែងមិនល្អគេទុកឱ្យពួកខ្ញុំច្រូត»។
ស្ត្រីដដែលបន្ថែមថា បើទោះបីក្រុមហ៊ុនចិន ប្រកាសក្ស័យធនជាច្រើនខែមកហើយក្តី ក៏ប៉ុន្តែគេឃើញមានមេការជនជាតិចិន និងកម្មករខ្មែររាប់សិបនាក់ បានធ្វើស្រែរាប់រយហិកតារ លើដីកំពុងមានជម្លោះជាមួយពលរដ្ឋចំនួន៣ស្រុក និងដីរបស់ក្រុមហ៊ុន។ រីឯកម្មករក្រុមហ៊ុនភាគច្រើន ជាពលរដ្ឋចំណាកស្រុក។
អាស៊ីសេរីមិនទាន់ទាក់ទង តំណាងក្រុមហ៊ុន ហេង ហ្វូ ដើម្បីសុំការបំភ្លឺរឿងនេះបានថា យ៉ាងណានៅឡើយទេ នៅថ្ងៃទី១៧ វិច្ឆិកា។
ចំណែកមេឃុំតស៊ូ លោក ស្រី សៀន ថ្លែងថា អាជ្ញាធរឃុំបានចុះអន្តរាគមន៍ដោះស្រាយជូនពលរដ្ឋរួចរាល់អស់ហើយករណីនេះ។ លោកថា អាជ្ញាធរបានជំរុញឱ្យក្រុមហ៊ុនទុកស្រូវ ២ហិកតារ ដើម្បីឱ្យអ្នកភូមិច្រូតកាត់ រីឯក្រុមហ៊ុនទទួលបានស្រូវ ៦ហិកតារ នៅលើដី៨ហិកតាដែលអ្នកភូមិដាំដុះស្រូវនោះ។ លោកបញ្ជាក់ថា ដីដែលពលរដ្ឋធ្វើស្រែ ជាដីរបស់ក្រុមហ៊ុនចិន៖ «ខ្ញុំបានដោះស្រាយរួចហើយ វិវាទម្ចាស់ស្រែដែលគេធ្វើហ្នឹង កន្លងមកដីហ្នឹង ជាដីរបស់ក្រុមហ៊ុនចិន តែគ្រាន់តែវាជាប់ក្បាលស្រែគាត់ ដល់ឆ្នាំហ្នឹងចិនក្ស័យធនទៅ គេមិនបានធ្វើ ហើយអ្នកស្រែជាប់ហ្នឹង គេយល់ថា ក្បាលស្រែគេ ក៏គេភ្ជួរធម្មតា ដោយមិនបានទំនាក់ទំនងជាមួយភាគីចិនទេ»។
ផ្ទុយពីការលើកឡើងនេះ អ្នកភូមិអះអាងថា ក្រុមហ៊ុនចិនបានទុកស្រូវតែ ៧០ អា ប៉ុណ្ណោះសម្រាប់ឱ្យពលរដ្ឋច្រូតកាត់។ លើសពីនេះទៀត ដីស្រែទាំងនោះ ជាដីកេរឪពុកម្ដាយ ដែលអ្នកភូមិធ្វើកសិកម្មមុនពេលមិនទាន់មាន វត្តមានក្រុមហ៊ុនចិន។
ក្រុមហ៊ុនសម្បទានសេដ្ឋកិច្ច ហេង ហ្វូ (Hengfu Group Sugar Industry) ទទួលសិទ្ធិវិនិយោគពីរដ្ឋាភិបាលលើផ្ទៃដីទំហំជាង ៤ម៉ឺនហិកតារ (៤២.០០០) តាំងពីឆ្នាំ ២០១១ វិនិយោគដាំអំពៅ និងកៅស៊ូ ប៉ុន្តែចុងក្រោយនេះ ក្រុមហ៊ុនបានផ្អាកចង្វាក់ផលិតកម្មរបស់ខ្លួន ហើយបានដាំស្រូវជំនួសវិញ។ ក្រុមហ៊ុននេះជាក្រុមហ៊ុនមេ និងមានបុត្រសម្ព័ន្ធក្រុមហ៊ុនចំនួន ៤ទៀត។ មន្ត្រីសង្គមស៊ីវិលចោទក្រុមហ៊ុនចិននេះថា បំពានទៅលើកិច្ចសន្យាវិនិយោគ ជាមួយរាជរដ្ឋាភិបាលក្នុងការទទួលបានដីសម្បទានសេដ្ឋកិច្ច។
មន្ត្រីសម្របសម្រួលសមាគមអាដហុក ខេត្តព្រះវិហារ លោក ឡោ ចាន់ ជំរុញឱ្យអាជ្ញាធរពាក់ព័ន្ធខេត្តព្រះវិហារ ដោះស្រាយបញ្ហានេះជូនពលរដ្ឋ ឱ្យត្រឹមត្រូវ មិនគួរបណ្ដែតបណ្ដោយឱ្យក្រុមហ៊ុនបំពានសិទ្ធិពលរដ្ឋម្តងហើយម្តងទៀតនោះទេ។ លោកថា ថ្វីត្បិតក្រុមហ៊ុន អនុវត្តផ្ទុយពីកិច្ចសន្យាវិនិយោគក្ដី ក៏ប៉ុន្តែអាជ្ញាធរជាតិហាក់មិនអើពើ ដោះស្រាយរឿងនេះ ឱ្យដាច់ស្រឡះនោះឡើយ៖ «គាត់ខំធ្វើស្រូវ ក្រុមហ៊ុនទៅច្រូតយករបស់គាត់ទៀត ហើយក្រុមហ៊ុនហាក់បីដូចជា ខុសកុងត្រាហើយ។ ខាងថ្នាក់លើមិនបានធ្វើការដោះស្រាយ និងមិនបានបញ្ឈប់កន្លែង ហើយចេះតែបណ្ដែតបណ្ដោយឱ្យក្រុមហ៊ុនដណ្ដើមទីផ្សារ ក៏ដូចជាចេះតែ ជម្លោះជាមួយពលរដ្ឋ។ ខ្ញុំគិតថា ដោយសារអាជ្ញាធរមួយចំនួន ឃុបឃិតជាមួយក្រុមហ៊ុនបានចេះតែបណ្ដែតបណ្ដោយ»។
ក្រោយពីមានវត្តមានក្រុមហ៊ុនចិនហេងហ្វូ (Hengfu Group) ចាប់ពីឆ្នាំ២០១១ ធ្វើឲ្យប៉ះពាល់ដល់ជនជាតិដើមភាគតិច ប្រមាណ ២ពាន់គ្រួសារ ( ២.០០០) ដែលមានប្រជាពលរដ្ឋប្រមាណ ១ម៉ឺននាក់ ស្ថិតនៅក្នុងភូមិចំនួន២៥ ឃុំចំនួន១០ និងស្រុកចំនួន៣ គឺស្រុក ជ័យសែន ស្រុកឆែប និងស្រុកត្បែងមានជ័យ។ មន្ត្រីសង្គមស៊ីវិលរកឃើញថា ក្រុមហ៊ុនបានឈូសឆាយប៉ះពាល់ដីស្រែពលរដ្ឋ លុបប្រភពទឹកអូរធម្មជាតិ បំផ្លាញទំហំព្រៃឈើ និងបានឈូសឆាយដីទួលប្រាសាទបុរាណ ៤កន្លែង និងស្ថានីយបុរាណផ្សេងទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- លោក ឃួង ស្រេង ពីមន្ត្រីខណ្ឌតូចតាចទៅជាអភិបាលក្រុងភ្នំពេញដោយសារស្នាដៃបម្រើគ្រួសារត្រកូលហ៊ុន
- លោក ហ៊ុន ម៉ានី ស្នើឲ្យនាយករដ្ឋមន្ត្រី លោក ហ៊ុន ម៉ាណែត ដកប្រធានមន្ទីរបរិស្ថានចំនួន៤ ខេត្ត នៅជុំវិញតំបន់ព្រៃឡង់
- លោក ហេង សិទ្ធី ត្រូវបានចាប់ខ្លួនដល់រុស្សីក្រោយស្នើឱ្យលោក ហ៊ុន ម៉ាណែត ចុះចេញពីតំណែង
- ខ្មាន់កាំភ្លើងបង្ហាញអត្តសញ្ញាណអ្នកបញ្ជាឱ្យបាញ់សម្លាប់លោក លិម គិមយ៉ា ក្រោយពេលតុលាការចេញដីកាចាប់ខ្លួនលោក លី រតនរស្មី
- មន្ត្រីបក្សកាន់អំណាចព្យាយាមលាងជម្រះលោក ហ៊ុន សែន ពាក់ព័ន្ធឃាតកម្មលើលោក លិម គិមយ៉ា