បណ្ដាញសហគមន៍ការពារព្រៃឡង់ខេត្តកំពង់ធំឱ្យដឹងថាថ្មីៗនេះ គេឃើញក្រុមហ៊ុនមួយដែលមានស្លាកយីហោជាអក្សរចិន បានដើរបាញ់ថ្នាំក្រហមដើម្បីកំណត់ទីតាំងព្រំដីដែលគេត្រូវឈូសឆាយធ្វើជាទំនប់ទឹកដ៏ធំមួយ ដែលគេមិនទាន់ដឹងពីគោលបំណងច្បាស់នៅឡើយ។
ការបាញ់ថ្នាំពណ៌ក្រហមដើម្បីកំណត់ព្រំដីឈូសឆាយនេះអាចនឹងធ្វើឱ្យប៉ះពាល់ផ្ទះសម្បែងរបស់ប្រជាពលរដ្ឋមួយចំនួននៅភូមិស្រែខ្សាច់ និងព្រៃឈើច្រើនហិកតារផងដែរ។
ប្រជាពលរដ្ឋមួយចំនួននៅភូមិស្រែខ្សាច់ និងភូមិស្រែវាល ឃុំដងកាំបិត ស្រុក សណ្ដាន់ ខេត្តកំពង់ធំកំពុងព្រួយបារម្ភចំពោះការរុះរើផ្ទះសម្បែងទៅរកកន្លែងថ្មី និងការប៉ះពាល់ដីស្រែចំការដោយសារតែក្រុមហ៊ុនមួយកំពុងចាប់ផ្ដើមទៅបោះការដ្ឋានសាងសង់ទំនប់ទឹកនៅតំបន់ដែលពួកគេកំពុងរស់នៅ។អ្នកភូមិស្រែខ្សាច់ម្នាក់លោក សេង សឺន មានប្រសាសន៍ថា ក្រុមហ៊ុនមួយកំពុងតែដើរបាញ់ថ្នាំក្រហមដើម្បីកំណត់ទីតាំងព្រំដីទំនប់ទឹកបានធ្វើឱ្យប៉ះផ្ទះអ្នកភូមិជាច្រើនគ្រួសារ។
បុរសដដែលមានប្រសាសន៍ទៀតថា រូបគាត់ក៏ដូចជាអ្នកភូមិខ្លះទៀតកំពុងព្រួយបារម្ភចំពោះការប៉ះពាល់ដីធ្លី និងផ្ទះសម្បែងដីស្រែចំការដោយសារតែគំរោងសាងសង់ទំនប់ទឹករបស់ក្រុមហ៊ុនចិននោះ។
លោក សេង សឺន៖ «ប៉ះពាល់ផ្ទះនោះឃើញគេសរសេរអក្សរចិនទេដឹង?ខ្ញុំអត់ស្គាល់ដែរ។ អ្នកភូមិរបស់ខ្ញុំនៅមួយផ្នែកខាងជើងជាប់ការដ្ឋានចិន ប៉ះពាល់ម្ខាងផ្លូវនោះទាំងអស់។ អន្តរក្រសួងគេមកប្រជុំថា សំណងចាំស្អីឯករាជ្យឯណាគេមកសំរេចទៀត។ ពួកអន្តរក្រសួងនោះមកគ្រាន់តែដឹងដីប៉ះពាល់របស់អ្នកណាខ្លះ?ចំនួនប៉ុន្មានគ្រួសារប៉ុណ្ណោះ។ គេថាសងសំណងប៉ុន្តែអត់ទាន់បានអីទេ»។
អ្នកភូមិស្រែវាលម្នាក់ទៀតលោក ខៀវ មន មានប្រសាសន៍ថា តាមលោកឃើញការដើរបាញ់ថ្នាំក្រហមកំណត់ព្រំដីទំនប់ទឹកនោះ បានប៉ះពាល់ផ្ទះប្រជាពលរដ្ឋប្រហែលជា ២០គ្រួសារ ប៉ុន្តែលោកយល់ថា នៅពេលដែលធ្វើទំនប់ទឹករួចគឺវាមិនត្រឹមតែប៉ះពាល់ផ្ទះសម្បែងទេ វាអាចនឹងប៉ះពាល់ដីស្រែចំការជាច្រើនហិកតារដែលនៅជាប់នោះផងដែរ។
លោក ខៀវ មន៖ «ខ្ញុំព្រួយបារម្ភខ្លាចគេបិទទំនប់ទឹកលិចដល់ផ្ទះខ្ញុំដែរ ពីព្រោះខ្ញុំនៅខាងក្រោមពិបាករស់នៅ។ ពីដើមគេអត់បិទធ្វើទំនប់ស្រួលរស់នៅ ដល់ពេលគេបិទអីចឹងដូចជាពិបាកដែរ។ ខ្ញុំសួរពួកអ្នកភូមិគេថា ឱ្យរើចេញ ប៉ុន្តែមិនដឹងថា គេសងប៉ុន្មានអីប៉ុន្មានផង មានតែប្រាប់ប្រជាពលរដ្ឋឱ្យរើផ្ទះ។ បើរើផ្ទះចេញក៏មិនដឹងទៅសង់កន្លែងណា បើមានដីតែប៉ុណ្ណោះហើយ»។
ទោះជាយ៉ាងណាអ្នកភូមិស្រែវាល និងស្រែខ្សាច់នៅមិនទាន់ស្គាល់ឈ្មោះក្រុមហ៊ុនចិន ដែលបានទៅបោះការដ្ឋានសាងសង់ទំនប់ទឹកទីនោះទេ ដោយសារតែពួកគាត់មិនចេះអានអក្សរចិន។
បណ្ដាញសហគមន៍ព្រៃឡង់ ខេត្តកំពង់ធំ លោក ហឿន សុភាព មានប្រសាសន៍ថា ក្រុមការងារចិនដែលបានទៅឈូសឆាយដីធ្វើទំនប់ទឹកបានដាក់ប៉ាយយ៉ាងធំជាអក្សរចិន ប៉ុន្តែមិនបានបង្ហាញឈ្មោះក្រុមហ៊ុនឡើយ ហើយក៏មិនប្រាប់អ្នកភូមិឱ្យដឹងពីគោលបំណងនៃការសាងសង់ទំនប់ទឹកទីនោះសម្រាប់ធ្វើអ្វីដែរ។
លោក ហឿន សុភាព មានប្រសាសន៍ទៀតថា រយៈពេលប្រមាណ២-៣ខែនេះ លោកឃើញក្រុមហ៊ុនចិនចាប់ផ្ដើមឈូសឆាយដីបណ្ដាលឱ្យប៉ះពាល់ដីស្រែចំការ និងដំណាំហើយថ្មីៗក្រុមហ៊ុនក៏បានដើរបាញ់ថ្នាំក្រហមប៉ះពាល់ផ្ទះសម្បែងរបស់ប្រជាពលរដ្ឋថែមទៀត។ លោក ហឿន សុភាព ក៏ព្រួយបារម្ភទៅដល់ការប៉ះពាល់ព្រៃឈើជាច្រើនហិកតារនៅជាប់តំបន់នោះដែរ។
លោក ហឿន សុភាព៖ «ប្រជាជនគាត់និយាយប្រាប់ខ្ញុំថា ប៉ះផ្ទះប៉ះដីស្រែដីចំការសូម្បីតែស្រូវធ្វើពីវស្សាមិញអត់បានច្រូតទេ មួយចំនួនដែលប៉ះចំគេមិនឱ្យច្រូតទេ គេឈូសបំផ្លាញតែម្ដងហើយគេសងដែរ ប៉ុន្តែសងតិចតួច។ ប្រជាជនកំពុងភ័យព្រួយចំពោះការចាកចេញ ខ្ញុំបានសួរក្រុមការងារដែរតែអាជ្ញាធរនិងតំណាងក្រុមហ៊ុននោះគេថា សូមឱ្យរៀបចំរុះរើផ្ទះចេញហើយគោលការណ៍របស់រដ្ឋាភិបាលគឺគេនឹងមានសំណងសមរម្យ»។
ទោះយ៉ាងណា វិទ្យុអាស៊ីសេរី មិនអាចសុំការពន្យល់ពីលោក ងួន រតនៈ អភិបាលខេត្តកំពង់ធំនិងលោក គឹម យឹម មេភូមិស្រែខ្សាច់ជុំវិញបញ្ហានេះបានទេនៅថ្ងៃទី២៣ ខែធ្នូ ដោយសារតែទូរស័ព្ទលោកទាំងពីរមិនអាចទាក់ទងបាន។
ចំណែកអភិបាលស្រុកសណ្ដាន់លោក អ៊ុក វណ្ណរ៉ា បានបដិសេធអធិប្បាយដោយលោកមានប្រសាសន៍ថា កំពុងជាប់រវល់ប្រជុំ។
ប្រធានសមាគមការពារសិទ្ធិមនុស្សអាដហុក(ADHOC)លោក នី សុខា មានប្រសាសន៍ថា ជាគោលការណ៍កាលណាក្រុមហ៊ុនមួយទទួលបានសម្បទានពីរដ្ឋាភិបាលទៅធ្វើការអភិវឌ្ឍគឺត្រូវសិក្សាឱ្យច្បាស់លាស់ជាមុន ទៅលើការប៉ះពាល់ទាំងសង្គម និងបរិស្ថាន។ បើសិនជាប៉ះពាល់ដល់ទ្រព្យសម្បត្តិ ឬក៏កម្មសិទ្ធិរបស់ប្រជាពលរដ្ឋគឺត្រូវតែដោះស្រាយសំណងឱ្យបានត្រឹមត្រូវសមរម្យ និងយុត្តិធម៌ទៅតាមច្បាប់រដ្ឋធម្មនុញ្ញ និងច្បាប់អស្សាមិករណ៍។
លោក នី សុខា៖ «ប្រសិនបើវាមានការប៉ះពាល់អីចឹងវាត្រូវការសិក្សាទំហំនៃផលប៉ះពាល់ជាមុនបើកាលណាយើងទៅដាក់គម្រោងអភិវឌ្ឍន៍ ហើយដំណើរការសកម្មភាពដំណើរការអភិវឌ្ឍន៍ក្រុមហ៊ុនហើយ បានយើងទៅដកចេញគឺវាមិនងាយទេពីព្រោះថាវាប៉ះពាល់ដល់ការខូចខាតរបស់ក្រុមហ៊ុនដែរ។ដូច្នេះហើយបានជាគេតម្រូវឱ្យថា បើសិនជាធ្វើការអភិវឌ្ឍន៍ត្រូវសិក្សាទំហំប៉ះពាល់ជាមុនថា តើទំហំប៉ះពាល់គេអាចធ្វើការអភិវឌ្ឍនៅតំបន់ហ្នឹងបានដែរឬទេ?»។
លោក នី សុខា មានប្រសាសន៍ទៀតថា បើសិនជាការអភិវឌ្ឍណាមួយដែលមិនបានធ្វើការសិក្សាហើយប៉ះពាល់ប្រជាពលរដ្ឋហើយទៅបណ្ដេញប្រជាពលរដ្ឋចេញគឺវាជាការអភិវឌ្ឍមួយដែលបំពានទៅលើសិទ្ធិរបស់ប្រជាពលរដ្ឋ។
បើទោះបីជាយ៉ាងណា រហូតមកដល់ពេលនេះមិនទាន់មានអាជ្ញាធរថ្នាក់មូលដ្ឋាន ឬក៏ស្ថាប័នរបស់រដ្ឋាភិបាលណាមួយចេញមុខបង្ហាញ ពីការអភិវឌ្ឍទំនប់ទឹករបស់ក្រុមហ៊ុនចិន នៅភូមិស្រែវាល ភូមិស្រែខ្សាច់ នៃឃុំដងកាំបិត ស្រុកសណ្ដាន់ ខេត្តកំពង់ធំ នោះថា វាមានផលប៉ះពាល់ក្នុងទំហំប៉ុណ្ណានៅឡើយទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។