ពលរដ្ឋជាង ២០០គ្រួសារនៅកោះកុង ខកចិត្តនឹងអាជ្ញាធរមិនការពារព្រៃកោងកាងជាប្រភពចំណូលសហគមន៍
2024.11.29
ទិដ្ឋភាពព្រៃកោងកាងក្នុងតំបន់អភិរក្សប្រើប្រាស់ច្រើនយ៉ាងដងពែង ក្នុងភូមិជ្រោយស្វាយខាងលិច ឃុំជ្រោយស្វាយ ស្រុកស្រែអំបិល ខេត្តកោះកុង ដែលពលរដ្ឋប្តឹងឱ្យអាជ្ញាធរ និងតុលាការ ចាត់វិធានការលើជនល្មើសកាលខែមីនា ឆ្នាំ២០២៤។
រូប៖ ពលរដ្ឋផ្តល់ឱ្យ
ព្រៃកោងកាងទំហំជាង ៦០ហិកតារ ដែលជាប្រភពផ្តល់ប្រាក់ចំណូលដល់ប្រជាសហគមន៍នេសាទសមុទ្រជាង ២០០គ្រួសារក្នុងខេត្តកោះកុង នៅតែប្រឈមការបាត់បង់។
ពលរដ្ឋខកចិត្តនឹងអាជ្ញាធរខេត្តនេះថា មិនត្រឹមតែមិនអើពើការពារធនធានធម្មជាតិទាំងនេះទេ តែបែរជាចង់បង្កើតតំបន់នោះ ធ្វើជាទីលានចាក់សំរាមទៅវិញ។
ពលរដ្ឋជាង ២០០ គ្រួសារ(២១៣) រស់នៅភូមិជ្រោយស្វាយខាងលិច ឃុំជ្រោយស្វាយ ស្រុកស្រែអំបិល កំពុងបារម្ភបាត់បង់ព្រៃកោងកាង ទំហំ ៦៣ហិកតារ នៅកៀកនឹងភូមិកំណើតរបស់ពួកគាត់ ស្របពេលដែលអាជ្ញាធរខេត្តនេះ និងតុលាការនៅតែមិនអើពើដោះស្រាយពាក្យបណ្តឹងរបស់អ្នកភូមិ។
តំណាងពលរដ្ឋ លោកស្រី ហៀប ឪ ប្រាប់វិទ្យុអាស៊ីសេរី នៅថ្ងៃទី ២៨ វិច្ឆិកាថា អ្នកភូមិចង់ឱ្យអាជ្ញាធរ និងតុលាការដកហូតដីព្រៃកោងកាងទំហំជាង ១០ហិកតារ ដែលក្រុមជនល្មើសកាប់ទន្ទ្រានធ្វើជាកម្មសិទ្ធិខុសច្បាប់ មកជាសម្បត្តិរដ្ឋ ហើយដាំដើមឈើស្តារព្រៃឡើងវិញ។
លោកស្រីថា ព្រៃកោងកាងគឺជាឆ្នាំងបាយរបស់ពលរដ្ឋ ហើយក៏ជាជម្រកសត្វស្លាបទាក់ទាញអ្នកទេសចរ ប៉ុន្តែអាជ្ញាធរមិនត្រឹមតែមិនអើពើការពារនោះទេ តែបែរជាចង់ឈូសឆាយព្រៃមួយផ្នែកធំក្នុងតំបន់នោះ ដើម្បីបង្កើតជាទីលានចាក់សំរាមទៅវិញ។
លោកស្រី ហៀប ឪ៖ «គេយកទៅថាយកដីនោះទៅចាក់សំរាម ប៉ុន្តែពលរដ្ឋដីនោះមិនអាចចាក់បានទេព្រោះខូចបរិស្ថានសម្បើមណាស់។ ព្រោះព្រៃកោងកាងធ្វើអ៊ីចឹងប៉ះពាល់ខ្លាំងដល់អ្នកភូមិណាស់»។
ស្ត្រីដដែលបន្ថែមថា កន្លងទៅសាលាដំបូងខេត្តកោះកុង និងសាលាឧទ្ធរណ៍ព្រះសីហនុបានតម្កល់ពាក្យបណ្តឹងរបស់សហគមន៍ ដែលប្តឹងឱ្យតុលាការចាត់វិធានការច្បាប់លើជនល្មើសកាប់ព្រៃកោងកាង ប៉ុន្តែតុលាការមិនចាត់ការ ហើយអ្នកភូមិក៏បានប្តឹងទាស់បន្តទៅតុលាការកំពូល ក៏ប៉ុន្តែមកទល់ពេលនេះ តុលាការកំពូលមិនទាន់មានចំណាត់ការនៅឡើយទេ។
កាលពីឆ្នាំ២០២១ អ្នកភូមិ ៣នាក់ តំណាងឱ្យពលរដ្ឋ ២១៣គ្រួសារ រស់នៅភូមិជ្រោយស្វាយលិច ឃុំជ្រោយស្វាយ បានប្តឹងមនុស្ស ៥នាក់ ពីបទលួចកាប់ទន្ទ្រានដីព្រៃកោងកាងលិចទឹក ដើម្បីយកធ្វើជាកម្មសិទ្ធិ ទំហំ ៦៣ហិកតារខុសច្បាប់។ ពួកគាត់មានឯកសារ និងភស្តុតាងច្បាស់លាស់បញ្ជាក់ថា ជនសង្ស័យទាំងនោះ បានកាប់ទន្ទ្រានដីព្រៃកោងកាងរបស់រដ្ឋខុសច្បាប់។
ពលរដ្ឋម្នាក់ទៀត លោក អ៊ុយ សារុន និយាយថា ព្រៃកោងកាងនៅតំបន់នោះមានសក្ដានុពលធនធានធម្មជាតិសម្បូរបែប ដែលពលរដ្ឋរាប់រយគ្រួសារ នេសាទត្រីចិញ្ចឹមជីវិតដោយក្នុងមួយថ្ងៃអាចរកប្រាក់ចំណូលបានចាប់ពី ៥ម៉ឺនរៀល ទៅ ជាង ១០ម៉ឺនរៀល។
លោកថា ក្រោយពីព្រៃកោងកាងតំបន់នោះ រងការកាប់ទន្ទ្រានទ្រង់ទ្រាយធំមក អ្នកភូមិបាត់បង់ទីកន្លែងនេសាទសមុទ្រ ធ្លាក់ចុះប្រាក់ចំណូល។
លោក អ៊ុយ សារុន៖ «ប្រជាពលរដ្ឋរស់នៅដោយពឹងពាក់លើធនធានធម្មជាតិ កាលណាតែបាត់បង់ទៅប្រជាពលរដ្ឋអាចចំណាកស្រុកទៅធ្វើកម្មករ ព្រោះអីព្រៃទាំងអស់នោះប្រជាពលរដ្ឋគាត់អាស្រ័យផលរាល់ថ្ងៃ រកក្ដាម រកងាវ ឆ្លុះបង្គាពេលខ្លះក្នុងមួយថ្ងៃទោះបីឪពុកម្ដាយឈឺក៏កូនអាចទៅរកបានដែរ»។
វិទ្យុអាស៊ីសេរីមិនទាន់អាចទាក់ទងសុំការបំភ្លឺរឿងនេះ ពីអភិបាលខេត្តកោះកុងអ្នកស្រី មិថុនា ភូថង និងអ្នកនាំពាក្យតុលាការកំពូល អ្នកស្រី ម៉ៅ ធីតា បាននៅឡើយទេ នៅថ្ងៃទី២៨ វិច្ឆិកា ដោយទូរស័ព្ទហៅចូលតែគ្មានអ្នកលើក។
ក៏ប៉ុន្តែអ្នកភូមិថា កន្លងទៅអភិបាលខេត្តរូបនេះ បានចុះទៅតំបន់នោះដោយថ្លែងប្រាប់ប្រជាពលរដ្ឋនៅចំពោះមុខថា មន្ត្រីជំនាញកំពុងសិក្សាបង្កើតទីលានចាក់សំរាម ក្នុងតំបន់ព្រៃកោងកាង ក៏ប៉ុន្តែសហគមន៍បានបដិសេធគម្រោងនេះ។
ជុំវិញរឿងនេះមន្ត្រីពង្រឹងសិទ្ធិអំណាចសហគមន៍មូលដ្ឋាន នៃសមាគមអាដហុក លោក ប៉ែន ប៊ុណ្ណារ៍ យល់ថា អាជ្ញាធរ និងតុលាការ ត្រូវយកចិត្តទុកដាក់ដោះស្រាយបណ្តឹងរបស់ពលរដ្ឋ ដើម្បីការពារធនធានធម្មជាតិ ដែលជាកន្លែងនេសាទត្រីរបស់សហគមន៍ មិនគួរបណ្តែតបណ្តោយឱ្យជនល្មើសកាប់បំផ្លាញភោគទ្រព្យជាតិខុសច្បាប់នោះទេ។
លោក ប៉ែន ប៊ុណ្ណារ៍៖ «ចំពោះរឿងហេតុការណ៍កើតឡើងនៅមូលដ្ឋានប្រជាពលរដ្ឋគាត់បានទៅប្រាប់ និងប្ដឹងអំពីការបាត់បង់ដីព្រៃកោងកាងរួចហើយ តែលោកនៅមិនចាត់ការ។ ទើបសហគមន៍ប្ដឹងអាជ្ញាធរថ្នាក់ភូមិ ថ្នាក់ឃុំ ថ្នាក់ស្រុក ថ្នាក់ខេត្ត និងអាជ្ញាធរដែនដីអយ្យការជាដើម»។
ព្រៃកោងកាងទំហំ ៦៣ហិកតារ ដែលពលរដ្ឋកំពុងទាមទារ ឋិតក្នុងតំបន់អភិរក្សប្រើប្រាស់ច្រើនយ៉ាងដងពែង គ្រប់គ្រងដោយក្រសួងបរិស្ថាន។ អ្នកភូមិថា ព្រៃនៅតំបន់នោះ អាចបង្កើតជាតំបន់អេកូទេសចរណ៍ធម្មជាតិរកប្រាក់ចំណូលជូនពលរដ្ឋមូលដ្ឋាន និងបង្កើតឱកាសការងារដល់សហគមន៍៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សភាអឺរ៉ុប ជំរុញឱ្យសើរើប្រព័ន្ធអនុគ្រោះពន្ធ EBA នៅសល់៨០% និងដាក់ទណ្ឌកម្មជាក់លាក់លើរដ្ឋាភិបាលកម្ពុជា
- UNHCR អំពាវនាវដល់កម្ពុជា និងថៃ ឱ្យគោរពតាមច្បាប់ស្ដីពីការមិនចាប់បញ្ជូនជនភៀសខ្លួនត្រឡប់ទៅឱ្យរងទុក្ខបុកម្នេញនៅប្រទេសកំណើត
- លោក ហ៊ុន សែន ស្នើមេដឹកនាំចិនឱ្យផ្ដល់ជំនួយ និងប្រាក់កម្ចីបន្ថែម ក្នុងគ្រាដែលកម្ពុជាអាចប្រឈមនឹងទណ្ឌកម្មសេដ្ឋកិច្ចពីសំណាក់សហភាពអឺរ៉ុប
- ពលរដ្ឋខ្មែរនៅកូរ៉េគ្រោងធ្វើបាតុកម្មជំរុញឱ្យរដ្ឋាភិបាលប្ដឹងទាមទារកោះគជ់ទៅតុលាការអន្តរជាតិ
- លោក ហ៊ុន សែន ប្ដេជ្ញាបន្តប្រកាន់ជំហរគោលនយោបាយចិនតែមួយ និងថា ប្រទេសចិនបានជួយនយោបាយកម្ពុជាឱ្យមានឯករាជ្យ