អតីតប្រធានសាលាដំបូងរាជធានីភ្នំពេញ លោក អាំង មាលតី ត្រូវបានសាលាដំបូងខេត្តកណ្ដាល សម្រេចផ្ដន្ទាទោសចំនួន ៣ឆ្នាំ ក្នុងនោះអនុវត្តទោស ២ឆ្នាំ និងព្យួរ១ឆ្នាំ នៅក្រៅពន្ធនាគារ រួមនឹងពិន័យជាប្រាក់ ៥លានរៀល។
ការសម្រេចរបស់ក្រុមប្រឹក្សាជំនុំជម្រះសាលាដំបូងខេត្តកណ្ដាល នៅថ្ងៃទី១២ កុម្ភៈ នេះ ពីបទចោទ កេងយកផលប្រយោជន៍សាធារណៈ ពេលកាន់តំណែងជាប្រធានសាលាដំបូងរាជធានីភ្នំពេញ នៃមាត្រាច្បាប់ ៥៩៨ និងមាត្រា៥៩៧ នៃក្រមព្រហ្មទណ្ឌ។
ទោះជាយ៉ាងណាក៏ដោយ លោក អាំង មាលតី នៅមិនទាន់បញ្ជាក់ថា លោកនឹងប្ដឹងទាស់ទៅនឹងការសម្រេចនោះយ៉ាងណាទេ ក្រោយការសម្រេចរបស់ក្រុមប្រឹក្សាជំនុំជម្រះសាលាដំបូងខេត្តកណ្ដាល នៅថ្ងៃនេះ។
លោក អាំង មាលតី ត្រូវបានអង្គភាពប្រឆាំងអំពើពុករលួយ បញ្ជូនទៅសាលាដំបូងខេត្តកណ្ដាល ដើម្បីសាកសួរកាលថ្ងៃទី១៦ សីហា ឆ្នាំ២០១៥ ទាក់ទងនឹងការដោះលែងជនសង្ស័យជួញដូរគ្រឿងញៀន ឲ្យនៅក្រៅឃុំបណ្ដោះអាសន្ន ជាថ្នូរនឹងរថយន្តទំនើបម៉ាកអូឌី (Audi) មួយគ្រឿង។
សូមស្ដាប់សេចក្ដីរាយការណ៍ផ្ទាល់របស់លោក ថា កិត្យា តាមការសាកសួររបស់អ្នកស្រី ខែ សុណង៖
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។