លោក ហ៊ុន សែន ថា ​នឹង​ដោះ​លែង​អ្នក​ទោស​ច្រើន​នាក់ រួម​ទាំង​សកម្មជន​បក្ស​ប្រឆាំង ១២នាក់ ដរាប​ណា​គ្មាន​ការ​រិះគន់​ថា ​ដោះលែង​​ព្រោះ​សម្ពាធ​អន្តរជាតិ

វិទ្យុ​អាស៊ី​សេរី
2018-08-23
អ៊ីម៉ែល
មតិ
Share
បោះពុម្ព
លោក ហ៊ុន សែន ពេល​ជួប​កម្មករ​កម្មការិនី​រោងចក្រ​កាត់ដេរ​នៅ​ស្រុក​កៀនស្វាយ ខេត្ត​កណ្ដាល ថ្ងៃ​ទី​២៣ ខែ​សីហា ឆ្នាំ​ ២០១៨។ រូប៖ ហ្វេសប៊ុក​លោក ហ៊ុន សែន
លោក ហ៊ុន សែន ពេល​ជួប​កម្មករ​កម្មការិនី​រោងចក្រ​កាត់ដេរ​នៅ​ស្រុក​កៀនស្វាយ ខេត្ត​កណ្ដាល ថ្ងៃ​ទី​២៣ ខែ​សីហា ឆ្នាំ​ ២០១៨។ រូប៖ ហ្វេសប៊ុក​លោក ហ៊ុន សែន
រូប៖ ហ្វេសប៊ុក​លោក ហ៊ុន សែន

មេដឹកនាំរបបក្រុងភ្នំពេញ លោក ហ៊ុន សែន ប្រកាសថា លោក​គ្រោង​ស្នើសុំ​ឱ្យ​មាន​ការ​លើក​លែង​ទោស​ទ្រង់ទ្រាយ​ធំ​ដល់ទណ្ឌិត នៅពេលខាងមុខនេះ ដែលក្នុងនោះក៏អាចមានអ្នក​ទោស​នយោបាយ​គណបក្ស​សង្គ្រោះ​ជាតិ​ចំនួន ១២​នាក់​ផង​ដែរ។ ក៏​ប៉ុន្តែ​លោក​ថា ការ​ស្នើសុំ​នេះ គឺ​ដរាប​ណា​គ្មាន​ការ​លើក​ឡើង​ថា កើត​ឡើង​ដោយសារ​សម្ពាធ​ពី​អន្តរជាតិ។ អ្នកវិភាគ​យល់​ថា ការ​ប្រកាស​របស់​លោក ហ៊ុន សែន នេះ គឺ​បង្ហាញ​ឱ្យ​ឃើញ​កាន់​តែ​ច្បាស់​ថា ករណី​ផ្លូវ​ច្បាប់​ប្រឆាំង​សកម្មជន​ទាំង​នោះ ស្ថិត​ក្នុង​សេណារីយ៉ូ​នយោបាយ ដែល​លោក ហ៊ុន សែន បាន​គូសវាស​រួច​ទៅ​ហើយ។

នាយករដ្ឋមន្ត្រី​ចាំ​ផ្ទះ លោក ហ៊ុន សែន ប្រកាសថា ការ​លើក​លែង​ទោស​ណាមួយ ដែល​អាច​កើត​មាន​ឡើង​ចំពោះ​សកម្មជន​គណបក្ស​សង្គ្រោះ​ជាតិ ដែល​កំពុង​ជាប់​ឃុំ​នោះ គឺ​ជា​ការ​សណ្តោស​ប្រណី ដែល​ចេញ​ពី​ចិត្ត​ធម៌​របស់​លោក មិនមែន​ជា​រឿង​ការ​គាប​សង្កត់​ពី​អន្តរជាតិ​ឡើយ។ លោក​ថា បើ​នៅ​តែ​មាន​អ្នក​ធ្វើ​អត្ថាធិប្បាយ​ថា ការ​ដោះលែង​ផ្តើម​ចេញ​ពី​សម្ពាធ​អន្តរជាតិ​នោះ គឺ​ត្រូវ​ឃុំ​ខ្លួន​សកម្មជន​បក្ស​ទាំង​នោះ​បន្ត​ទៅ​ទៀត រហូត​ដល់​ពួក​គេ​ថ្កោល​ទោស​អ្នក​ធ្វើ​អត្ថាធិប្បាយ​ទាំង​នោះ​វិញ។ លោក​ថ្លែង​បែប​នេះ​នៅ​ក្នុង​ពិធី​ជួប​ជាមួយ​ក្រុមកម្មកររោងចក្រជាង ១ ម៉ឺននាក់ នៅ​ស្រុក​កៀនស្វាយ ខេត្ត​កណ្តាល៖ «»

លោក ហ៊ុន សែន ក៏បានជេរប្រទេច​អ្នក​ដែល​លើក​ឡើង​ថា ការ​ចាប់​ខ្លួន ឬ​ដោះ​លែង​ស្ថិត​ក្នុង​ដៃ​របស់​លោក​ផង​ដែរ។ លោក​បញ្ជាក់​ថា រឿង​នេះ​ជា​អំណាច​ស្រប​ច្បាប់ ដែល​លោក​មាន​ក្នុង​នាម​ជា​នាយករដ្ឋមន្ត្រី ហើយ​ដោយសារ​តែ​មាន​ការ​ស្នើសុំ​របស់​លោក ទើប​ព្រះមហាក្សត្រ​មាន​សិទ្ធិ​ឡាយ​ព្រះហស្ថ​លេខា​លើក​លែង​ទោស​ដល់​អ្នក​ជាប់​ឃុំ​ទាំង​នោះ៖ «»

របបលោក ហ៊ុន សែន បាន​ដោះ​លែង​អ្នកទោស​មនសិការ​ជា​បន្ត​បន្ទាប់ រួម​មាន អ្នកវិភាគ​នយោបាយ លោក គឹម សុខ សកម្មជន​ការពារ​សិទ្ធិ​ដី​ធ្លី​អ្នកស្រី ទេព វន្នី ព្រម​ទាំង​អតីត​បុគ្គលិក​អាស៊ី​សេរី​ពីរ​រូប គឺ​លោក អ៊ួន ឈិន និង​លោក យាង សុធារិន ក្រោយ​ក្រសោប​យក​បាន​អាសនៈសភា​ទាំង​ស្រុង​ពី​ការ​បោះឆ្នោតបែបបង្គ្រប់កិច្ចកាលពីចុងខែកក្កដា។ ទោះជាយ៉ាងណា អ្នកទោស​នយោបាយ​ជា​ច្រើន​រូប​ទៀត រួមមាន លោក កឹម សុខា លោក អ៊ំ សំអាន លោក មាជ សុវណ្ណរ៉ា និង​សកម្មជន​គណបក្ស​សង្រ្គោះ​ជាតិ​ដទៃ​ទៀត មិន​ទាន់​ត្រូវ​បាន​ដោះ​លែង​នៅ​ឡើយ ទោះ​បី​ជា​ពួក​គេ​ខ្លះ​បាន​ធ្វើ​លិខិត​សុំ​ទោស​លោក ហ៊ុន សែន រួច​ទៅ​ហើយ​ក្តី។

ប្រធានក្រុមអ្នកវិភាគវ័យក្មេង លោក ហង្ស វិទូ ថ្លែងថា ការ​ប្រកាស​របស់​លោក ហ៊ុន សែន នេះ ស្តែង​ឱ្យ​ឃើញ​កាន់​តែ​ច្បាស់​ថា សំណុំរឿង​ប្រឆាំង​នឹង​សកម្មជន​គណបក្ស​ប្រឆាំង​នេះ ជា​យុទ្ធសាស្ត្រ​របស់​គណបក្សកាន់អំណាច។ លើសពីនេះ វាបង្ហាញថា តុលាការ ដែល​ជា​ស្ថាប័ន​យុត្តិធម៌​របស់​ជាតិ​នោះ ស្ថិត​ក្រោម​ឥទ្ធិពល​សឹង​ផ្តាច់​មុខ​របស់​អ្នក​កាន់​អំណាច ហើយ​ច្បាប់​ពិត​ប្រាកដ​មាន​តែ​នៅ​លើ​ក្រដាស​ប៉ុណ្ណោះ មិន​មាន​ការ​អនុវត្ត​ឱ្យ​បាន​ត្រឹមត្រូវ​ឡើយ។ លោក​ថ្លែង​ថា បញ្ហា​នេះ នឹង​ធ្វើ​ឱ្យ​កម្ពុជា​ជា​ប្រទេស​នីតិមាត់ មិនមែន​ជា​នីតិរដ្ឋ​នោះ​ទេ៖ «»

ចំណែកអ្នកវិភាគនយោបាយ លោក គឹម សុខ វិញ យល់ឃើញថា អ្នកទាំង ១២រូប ដែល​អាច​នឹង​ទទួល​បាន​ការ​លើក​លែង​ទោស​នោះ ទំនង​ជា​មន្ត្រី​នយោបាយ​ថ្នាក់​ក្រោម​របស់​គណបក្ស​ប្រឆាំង​ប៉ុណ្ណោះ មិន​អាច​ជា​មន្ត្រី​ថ្នាក់​កំពូល​របស់​គណបក្ស ដូច​ជា លោក កឹម សុខា នោះ​ឡើយ។ លោក​ជឿ​ថា បើ​ទោះ​ជា​ត្រូវ​បាន​ដោះ​លែង​ក្តី ក៏​សកម្មជន​ទាំង​នោះ​នឹង​គ្មាន​ឱកាស និង​សេរីភាព​ធ្វើ​នយោបាយ​បាន​ពេញលេញ​ដូច​ពី​មុន​ទៀត​ឡើយ៖ «»

ថ្នាក់ដឹកនាំ និងសកម្មជននយោបាយ​គណបក្ស សង្គ្រោះ​ជាតិ សរុប​ជិត ២០នាក់ ត្រូវ​បាន​អាជ្ញាធរ​នៃ​របប​លោក ហ៊ុន សែន ចាប់​ខ្លួន​ដាក់​ពន្ធនាគារ​ជា​បន្ត​បន្ទាប់ ចាប់​តាំង​ពី​ឆ្នាំ២០១៥ រហូត​មក។ ក្នុង​នោះ ពួក​គេ​ចំនួន ១៤នាក់ ត្រូវ​បាន​ចាប់​ខ្លួន និង​កាត់​ទោស​ឱ្យ​ជាប់​ពន្ធនាគារ​ពី ៧ ដល់ ២០​ឆ្នាំ ពី​បទ​ដឹក​នាំ និង​ចូលរួម​ក្នុង​ចលនា​កុប្បកម្ម​ប្រព្រឹត្ត​ទៅ​នៅ​ទីលាន​ប្រជាធិបតេយ្យ កាល​ពី​ថ្ងៃ​ទី១៥ ខែ​កក្កដា ឆ្នាំ២០១៤ កន្លង​ទៅ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (1)
Share

Phou Sok

ពី Phnom Penh

Hun Sen is law, and law is Hun Sen. If he orders to release the victims, the court has to release the victims. That is easy to understand.

Aug 23, 2018 12:22 PM

គេហទំព័រ​ទាំងមូល