សាលាដំបូងរាជធានីភ្នំពេញ នឹងបើកសវនាការជំនុំជម្រះសំណុំរឿងសកម្មជនបក្សប្រឆាំងលោក គង់ ម៉ាស់ នៅថ្ងៃទី២ ខែតុលា បន្ទាប់ពីសកម្មជនបក្សប្រឆាំងរូបនេះ បានជាប់ឃុំជិត ១០ខែមកហើយពាក់ព័ន្ធនឹងការបញ្ចេញមតិរិះគន់ការគ្រប់គ្រងរបស់លោក ហ៊ុន សែន នៅលើបណ្ដាញសង្គមហ្វេសប៊ុក (Facebook)។
មេធាវីការពារក្តីឱ្យលោក គង់ ម៉ាស់ គឺលោក សំ សុគង់ ប្រាប់អាស៊ីសេរីថា ពន្ធនាគារនឹងបញ្ជូនកូន ក្តីរបស់លោកទៅចូលរួមសវនាការជំនុំជម្រះដែលគ្រោងនឹងចាប់ផ្ដើមពីម៉ោង៨ព្រឹកថ្ងៃទី២ ខែតុលា។ លោករំពឹងថា តុលាការ នឹងសម្រេចឱ្យកូនក្តីរបស់លោកគ្មានទោស៖ «ខ្ញុំគិតថា សំណុំរឿងរបស់លោក គង់ ម៉ាស់នេះ មានរយៈពេល យូរដែរហើយ ដោយសារចាប់ខ្លួនតាំងពីខែ១ រហូតដល់ខែ១០ដូច្នេះប្រហែល១០ខែមកហើយ។ ការជុំជម្រះថ្ងៃស្អែកនេះ ក៏វាមានលក្ខណៈយឺតពេលដែរ ពាក់ព័ន្ធនឹងសិទ្ធិរបស់ជនត្រូវចោទនេះ។ ខ្ញុំគិតថា ពាក់ព័ន្ធនឹងរឿងផ្ដល់យុត្តិធម៌ ឬមិនផ្ដល់យុត្តិធម៌គឺត្រូវរង់ចាំមើលថ្ងៃសវនាថ្ងៃស្អែកសិន។ ខ្ញុំគិតថា អ្វីដែលជាការលើកឡើងរបស់កូនក្តី ខ្ញុំគឺជាសេរីភាពក្នុងការបញ្ចេញមតិនៅក្នុងប្រទេសប្រជាធិបតេយ្យ»។
របបក្រុងភ្នំពេញ បានចាប់ខ្លួនលោក គង់ ម៉ាស់ ដែលជាអនុប្រធាននាយកដ្ឋានកិច្ចការបោះឆ្នោត និងនីតិកម្ម និងជាសមាជិកក្រុមការងារគណបក្សសង្គ្រោះជាតិខេត្តស្វាយរៀង កាលពីថ្ងៃទី១៦ ខែមករា ឆ្នាំ២០១៩ ដោយចោទប្រកាន់ពីបទប្រមាថ និងញុះញង់ឱ្យប្រព្រឹត្តបទឧក្រិដ្ឋជាអាទិ៍ បន្ទាប់ពីលោកបានសរសេរសារបង្ហោះនៅតាមបណ្ដាញសង្គមហ្វេសប៊ុករិះគន់របបក្រុងភ្នំពេញ។ សារដែលលោក គង់ ម៉ាស់ បង្ហោះនោះ រួមមានយុទ្ធនាការម្រាមដៃស្អាតកាលពីមុនបោះឆ្នោត ការបង្ហោះរូបភាពជួបជុំសកម្មជនតាមមូលដ្ឋាន និងសាររិះគន់បែបស្ថាបនាអំពីភាពអសកម្មមួយចំនួនរបស់ របបលោក ហ៊ុន សែន រួមមានបញ្ហាព្រំដែនកម្ពុជា-វៀតណាម និងករណីចុងក្រោយរឿងតម្លៃកសិផលចុះថោកក្រោយពីសហភាពអឺរ៉ុបយកពន្ធអង្កកម្ពុជាជាដើម។
អ្នកច្បាប់និងមន្ត្រីសិទ្ធិមនុស្ស យល់ថា ការបង្ហោះសារផ្សេងៗរបស់លោក គង់ ម៉ាស់ គឺគ្រាន់តែជាការប្រើប្រាស់សិទ្ធិបញ្ចេញមតិដែលធានាដោយរដ្ឋធម្មនុញ្ញ និងកតិកាសញ្ញាស្ដីពីសិទ្ធិពលរដ្ឋ និងសិទ្ធិនយោបាយ ហើយការិះគន់នោះ គឺជាការរិះគន់បែបស្ថាបនា គ្មានន័យប្រមាថរដ្ឋាភិបាលឡើយ។ ពួកគេបានទាមទារឱ្យរបបក្រុងភ្នំពេញទម្លាក់ចោលការចោទប្រកាន់ និងដោះលែងលោក គង់ ម៉ាស់ ឱ្យមានសេរីភាពវិញដោយឥតលក្ខខណ្ឌ៕ កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។