រដ្ឋមន្ត្រីក្រសួងយុត្តិធម៌ ប្រកាសថា ការកែប្រែការលើកលែងទោស ឬបន្ធូរបន្ថយទោសលើទណ្ឌិតដោយការអនុវត្តទោសតែមួយមុខមិនគ្រប់គ្រាន់ទេ តែត្រូវពិនិត្យលើឥរិយាបថរបស់ទណ្ឌិត។
លោករដ្ឋមន្ត្រីប្រកាសបែបនេះនៅក្នុងកិច្ចប្រជុំបន្ទាន់មួយរវាងរដ្ឋមន្ត្រីក្រសួងយុត្តិធម៌ ជាមួយព្រះរាជអាជ្ញាទូទាំងប្រទេស នៅថ្ងៃទី១៨ ខែធ្នូ នេះ បន្ទាប់ពីលោកនាយករដ្ឋមន្ត្រីនិយាយជាសាធារណៈថា ជនប្រព្រឹត្តបទល្មើសមួយចំនួនមុខដដែលៗ។ ប៉ុន្តែមន្ត្រីសង្គមស៊ីវិលថា វិធានការនេះយឺតពេលបន្តិចទៅហើយ។
ចំណាត់ការរបស់រដ្ឋមន្ត្រីក្រសួងយុត្តិធម៌ នៅពេលនេះ ធ្វើឡើងបន្ទាប់ពីលោកនាយករដ្ឋមន្ត្រី ហ៊ុន សែន ប្រាប់ទៅរដ្ឋមន្ត្រីក្រសួងយុត្តិធម៌ ពិនិត្យឡើងវិញលើការលើកលែងទោសទណ្ឌិត ខណៈបទល្មើសឆក់ប្លន់ប្រដាប់អាវុធកើតឡើងស្ទើរគ្មានលោះថ្ងៃ នៅតាមបណ្ដាខេត្តមួយចំនួន និងជាពិសេសនៅភ្នំពេញ។
រដ្ឋលេខាធិការនៃក្រសួងយុត្តិធម៌ លោក កើត រិទ្ធ ប្រាប់អ្នកសារព័ត៌មានក្រោយកិច្ចប្រជុំថា ទណ្ឌិតដែលជាប់ចោទពីបទចោទប្លន់ប្រដាប់អាវុធ ក្រសួងនឹងមិនដាក់សំណើទៅព្រះមហាក្សត្រដើម្បីលើកលែងទោសនោះទេ បើទោះជាពួកគេបានអនុវត្តទោសគ្រប់គ្រាន់តាមគោលការណ៍លើកលែងទោសក្តី។
លោកថា កន្លងមកទណ្ឌិតដែលអនុវត្តបានមួយភាគបី (១/៣) អាចត្រូវបន្ធូរបន្ថយទោស។ ចំណែកទណ្ឌិតអ្នកអនុវត្តទោសបានពីរភាគបី (២/៣) អាចលើកលែងទោស ប៉ុន្តែចាប់ពីពេលនេះតទៅ ត្រូវពិនិត្យលើលក្ខខណ្ឌផ្សេងៗ បូករួមអាកប្បកិរិយារបស់ទណ្ឌិតផង៖ «នៅពេលដែលទណ្ឌិតម្នាក់អនុវត្តទោសបានមួយភាគបី ឬមួយភាគបី មិនមែនជាសិទ្ធិរបស់គាត់ដើម្បីបន្ធូរបន្ថយទោស ឬលើកលែងទោសទេ គឺត្រូវចំណុះនៅលក្ខខណ្ឌផ្សេងទៀត»។
ក្រៅពីនេះ លោក កើត រិទ្ធ ថា រដ្ឋមន្ត្រីក្រសួងយុត្តិធម៌ បញ្ជាទៅព្រះរាជអាជ្ញាទូទាំងប្រទេសឲ្យពិនិត្យសំណុំរឿងចាស់ឡើងវិញ។
សេចក្ដីជូនដំណឹងរបស់ក្រសួងយុត្តិធម៌ ចុះថ្ងៃទី១៨ ខែធ្នូ ឲ្យដឹងថា រដ្ឋមន្ត្រីក្រសួងយុត្តិធម៌ លោក អង្គ វង្សវឌ្ឍានា នឹងប្រជុំជាមួយអ្នកពាក់ព័ន្ធ ដូចជាអគ្គស្នងការនគរបាលជាតិ និងកងរាជអាវុធហត្ថនៅថ្ងៃទី២២ ខែធ្នូ ខាងមុខ លើប្រធានបទកិច្ចសហអនុវត្តច្បាប់រវាងតុលាការ និងនគរបាលយុត្តិធម៌ក្នុងការពង្រឹងសន្តិសុខសាធារណៈ។
ទាក់ទងរឿងនេះដែរ ប្រធានផ្នែកបច្ចេកទេសស៊ើបអង្កេតនៃអង្គការសិទ្ធិមនុស្សលីកាដូ (LICADHO) លោក អំ សំអាត និយាយថា ការវាយតម្លៃលើកលែងទោសកន្លងមក មានភាពមិនប្រក្រតីច្រើន។ លោកបន្តថា កន្លងមកអង្គការលីកាដូ ទទួលព័ត៌មានពីទណ្ឌិត ឬសាច់ញាតិទណ្ឌិតថា ពួកគេរងភាពអយុត្តិធម៌ ខណៈពួកគេមានលទ្ធភាពអាចត្រូវទទួលបានការលើកលែងទោស ឬបន្ធូរបន្ថយទោស៖ «ដល់ពេលគោលចូលស៊ីស្មៅហើយទើបធ្វើរបង រឿងនេះបើសម្ដេចនាយករដ្ឋមន្ត្រីលោកមិនស្រែក អត់ឃើញមានវិធានការទេ យើងចង់ឲ្យការអនុវត្តច្បាប់មានប្រសិទ្ធភាព កុំចាំនាយករដ្ឋមន្ត្រីស្រែក»។
អំពើប្លន់ប្រដាប់អាវុធកើតឡើងស្ទើររាល់ថ្ងៃនៅរយៈពេលចុងក្រោយ រហូតក្រុមជនល្មើសចូលប្លន់ដល់ផ្ទះជាងកាត់សក់របស់លោកនាយករដ្ឋមន្ត្រី ហ៊ុន សែន ដែលមានតួនាទីនៅក្នុងជួររាជការផងនោះ។
កាលពីថ្ងៃទី១៤ ខែធ្នូ លោក ហ៊ុន សែន ប្រាប់ទៅរដ្ឋមន្ត្រីក្រសួងយុត្តិធម៌ កុំឲ្យដោះលែងទណ្ឌិតដែលជាប់ពាក់ព័ន្ធរឿងប្លន់ និងរឿងគ្រឿងញៀន ខណៈមានសេចក្ដីរាយការណ៍ថា ជនប្រព្រឹត្តមុខដដែល។ លោក ហ៊ុន សែន ថែមទាំងស្នើឲ្យពិនិត្យឡើងវិញរឿងលើកលែងទោសនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។