មេដឹកនាំសហជីពមួយចំនួន៦ សម្រេចរួមគ្នា ធ្វើពហិការ មិនចូលរួមកិច្ចប្រជុំជាមួយក្រសួងការងារ ស្ដីពីការកែប្រែច្បាប់ការងារ ត្រង់មាត្រា ១៤៤ និង១៦២ នៅថ្ងៃស្អែកទី១៥ កញ្ញា ដោយសារតែពួកគេ យល់ថា វិសោធនកម្មច្បាប់នេះ ធ្វើឲ្យបាត់ផលប្រយោជន៍កម្មករវេនយប់។ ពួកគេស្នើដល់រដ្ឋាភិបាលពិចារណាឡើងវិញ ដោយរក្សាទុកមាត្រាទាំងពីរនេះ ឲ្យនៅដដែល ដើម្បីបានជាប្រយោជន៍កម្មករ។
ប្រធានសហភាពការងារកម្ពុជា លោក អាត់ ធន់ មានប្រសាសន៍ថា ប្រសិនបើក្រសួងការងារនៅតែប្រកាន់ជំហរ ចង់កែប្រែច្បាប់ការងារត្រង់មាត្រា១៤៤ ម្ដងហើយម្ដងទៀតនេះ គឺពិតជាធ្វើឲ្យកម្មករធ្វើការវេនយប់ បាត់ប្រយោជន៍ជាច្រើន ដោយពួកគេនឹងទទួលប្រាក់ឈ្នួល ដូចនឹងកម្មករធ្វើការវេនថ្ងៃ ព្រោះត្រូវកាត់បន្ថយប្រាក់ការងារ ពី១៣០% មកនៅត្រឹម១០០% វិញ។
លោក បន្តថា បើច្បាប់នេះត្រូវបានធ្វើសោធនកម្ម ហើយប្រកាសឲ្យប្រើជាផ្លូវការ នោះនឹងរឹតតែធ្វើឲ្យប៉ះពាល់ដល់កម្មករវេនថ្ងៃថែមទៀត ព្រោះពួកគេមិនអាចធ្វើការថែមម៉ោង ដើម្បីរកប្រាក់ចំណូលបន្ថែមទៀតបានឡើយ។
លោកបញ្ជាក់ថា ការដែលច្បាប់តម្រូវឲ្យផ្ដល់ប្រាក់ឈ្នួលដល់កម្មករវេនយប់ច្រើនជាងវេនថ្ងៃ គឺដោយសារតែកត្តាសុខភាពមនុស្ស មិនអាចធន់នឹងការងារយប់បាន រួមនឹងបញ្ហាប្រឈមជាច្រើនទៀត ដែលអាចកើតឡើងចំពោះកម្មករវេនយប់។
ប្រធានសហជីពរូបនេះ ស្នើដល់រដ្ឋមន្ត្រីក្រសួងការងារ លោក អ៊ិត សំហេង រក្សាទុកច្បាប់ការងារនៅដដែល ដើម្បីជាប្រយោជន៍ដល់កម្មករវេនយប់៖ «យើងស្នើឲ្យក្រសួងទម្លាក់ចោលការធ្វើវិសោធនកម្មហ្នឹងតែម្ដង។ នៅក្នុងពេលនេះគឺមិនល្អសោះសម្រាប់កម្មករនិយោជិក។ វាធ្វើឲ្យខាតប្រយោជន៍កម្មករ។ ដើម្បីរក្សាប្រយោជន៍ជាភាពប្រក្រតីបាន គឺទាល់តែផ្អាកការធ្វើវិសោធនកម្មមាត្រាស្ដីអំពីការកាត់បន្ថយការងារវេនយប់ ពី១៣០ % មកនៅ១០០ % ហើយនិង១៦២ ស្ដីពីការកាត់បន្ថយថ្ងៃឈប់សម្រាក១ថ្ងៃ នៅពេលថ្ងៃបុណ្យចំថ្ងៃអាទិត្យ»។
កម្មកររោងចក្រ ហ៊ឹង ជីង នៅរាជធានីភ្នំពេញ លោក ចែម ជាតិ ដែលធ្លាប់ធ្វើការវេនយប់ហើយប្ដូរមកវេនថ្ងៃ ថ្លែងឲ្យដឹងថា កម្មករវេនយប់ ប្រឈមនឹងបញ្ហាជាច្រើន ដូចជា សុវត្ថិភាពពេលធ្វើដំណើរទៅធ្វើការពេលយប់អាធ្រាត្រ សុខភាពចុះខ្សោយដោយសារការសម្រាកមិនបានគ្រប់គ្រាន់ និងរងសម្ពាធពីថៅកែរោងចក្រ បង្ខំឲ្យធ្វើការតាមចំនួនដែលចង់បាន។
ផ្អែកលើបញ្ហាទាំងអស់នេះ លោក ចែម ជាតិ ស្នើដល់រដ្ឋមន្ត្រីក្រសួងការងារ រក្សាទុកច្បាប់ការងារឲ្យនៅដូចដើម ដើម្បីកុំឲ្យកម្មករខាត់បង់ប្រយោជន៍តទៅទៀត ជាពិសេសគឺប្រាក់ចំណូលប្រចាំខែ៖ «សូមខាងក្រសួងគាត់ជួយដោះស្រាយរឿងហ្នឹងទៅ ព្រោះអាណិតកម្មករវេនយប់ ព្រោះគ្នាជួបផលលំបាកច្រើនដែរ។ ហើយណាមួយគ្រួសារ ក៏មិនសូវជាអ្នកមានស្ដុកស្ដម្ភ។ កម្មករវេនយប់អ៊ីចឹង គ្នាធ្វើការប៉ះពាល់ដល់សុខភាពប្រចាំថ្ងៃផង ហើយមិនដូចយើងធ្វើថ្ងៃទេ។ យើងធ្វើថ្ងៃ មានពេលវេលាច្រើន ធ្វើការបានល្អអ៊ីចឹង។ សូមឲ្យរដ្ឋាភិបាលកុំកែប្រែច្បាប់ហ្នឹង ពីមុនធ្វើវេនយប់គេគុណនឹងពីរ ប្រាក់ខែច្រើនជាងវេនថ្ងៃ»។
អាស៊ីសេរី មិនអាចសុំការឆ្លើយតបរឿងពីអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ លោក ហេង សួរ ដោយលោកមិនទទួលទូរស័ព្ទ។
កាលពីឆ្នាំ២០០៧ ក្រសួងការងារបានធ្វើវិសោធនកម្មច្បាប់ស្ដីពីការងារ ត្រង់មាត្រា១៤៤ អំពីអត្រាប្រាក់ឈ្នួលបន្ថែមម៉ោង និងការងារវេនយប់ពី១៥០% មកនៅត្រឹម១៣០%នៃប្រាក់ឈ្នួលការងារវេនថ្ងៃ ដោយធ្វើឲ្យកម្មករបាត់បង់អត្ថប្រយោជន៍ការងារម្ដងរួចមកហើយ។
នៅពេលបច្ចុប្បន្ននេះ ក្រសួងការងារ គ្រោងធ្វើការកែប្រែច្បាប់ការងារត្រង់មាត្រា១៤៤ថ្មីនេះ ម្ដងទៀត ដោយកាត់បន្ថយអត្រាប្រាក់ឈ្នួលការងារវេនយប់ពី១៣០% មកត្រឹម១០០%វិញ គឺស្មើនឹងអត្រាប្រាក់ឈ្នួលការងារវេនថ្ងៃ។
ទាក់ទងនឹងគម្រោងធ្វើវិសោធនកម្មនេះ ក្រសួងការងារ និងបណ្ដុះបណ្ដាលវិជ្ជាជីវៈ ចេញលិខិតកោះហៅតំណាងសហជីពមួយចំនួន តំណាងភាគីនិយោជក និងដៃគូរបស់ក្រសួង ដើម្បីចូលរួមសិក្ខាសាលាពិគ្រោះយោបល់ ស្ដីពីការធ្វើវិសោធនកម្មច្បាប់ស្ដីពីការងារ នៅថ្ងៃទី១៥ ខែកញ្ញា ដើម្បីកែប្រែច្បាប់ កាត់បន្ថយប្រាក់ឈ្នួលពលកម្មវេនយប់ ឱ្យស្មើនឹងវេនថ្ងៃ លុបចោលថ្ងៃឈប់សម្រាកចំថ្ងៃអាទិត្យ និងពង្រីកវិសាលភាពក្រុមប្រឹក្សាអាជ្ញាកណ្ដាល ក្នុងការដោះស្រាយវិវាទបុគ្គល។
ក្រសួងការងារ អះអាងថា ការកែប្រែច្បាប់នេះ គឺដើម្បីទាក់ទាញក្រុមហ៊ុនខាងបរិក្ខារអគ្គិសនី និងគ្រឿងអេឡិចត្រូនិក មកដាក់ទុននៅកម្ពុជា និងបង្កើនការងារជូនពលរដ្ឋ។ ចំណែក ការលុបថ្ងៃឈប់សម្រាកបន្ថែមទៀត និងការកាត់ប្រាក់ឈ្នួលវេនយប់ ឱ្យស្មើវេនថ្ងៃនេះ គឺដើម្បីឆ្លើយតបទៅនឹងស្ថានភាពនៃការវិវឌ្ឍសង្គម និងសេដ្ឋកិច្ច ក្នុងគោលបំណងពង្រីកការប្រកួតប្រជែងគ្នា។
បើទោះបីជាយ៉ាងណា ថ្នាក់ដឹកនាំសហជីព ដែលជាក្រុមការងារយន្តការត្រីភាគី នៅតែទទូចស្នើសុំក្រសួងការងារ និងបណ្ដុះបណ្ដាលវិជ្ជាជីវៈ ទម្លាក់ចោលការធ្វើវិសោធនកម្មនេះ ដូចដែលក្រុមសហជីព បានស្នើសុំក្នុងកិច្ចពិភាក្សាចំនួនពីរលើករួចមកហើយ ។ ក្រុមសហជីព យល់ឃើញថា ក្នុងស្ថានភាពសង្គម សេដ្ឋកិច្ច និងនយោបាយនាពេលបច្ចុប្បន្ននេះ មិនមែនជាពេលវេលាសមស្របក្នុងការធ្វើវិសោធនកម្មច្បាប់ស្ដីពីការងារនោះឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។