សាលាដំបូងខេត្តព្រះសីហនុ កាត់ទោសបុរសម្នាក់ ឲ្យជាប់ពន្ធនាគារចំនួន៧ឆ្នាំ ពីបទរំលោភកូនស្រីបង្កើតរបស់ខ្លួន។
សេចក្តីប្រកាសព័ត៌មានរបស់អង្គការប្រឆាំងការជួញដូរកុមារ ( Action Pour Les Enfants-APLE) កាលពីថ្ងៃទី១៥ ធ្នូ ឲ្យដឹងថា បុរសនោះអាយុ៤១ឆ្នាំ បានប្រព្រឹត្តអំពើរំលោភសេពសន្ថវៈលើកូនស្រីបង្កើតអាយុ ១២ឆ្នាំ ម្ដងហើយម្ដងទៀត ក្នុងគ្រាដែលម្ដាយទៅធ្វើការចំណាកស្រុកនៅប្រទេសម៉ាឡេស៊ី។ សេចក្ដីប្រកាសដដែលបញ្ជាក់ថា កុមារីរងគ្រោះត្រូវបានឪពុកគំរាមសម្លាប់បើសិនជាហ៊ានទម្លាយរឿងនេះ។
ប៉ុន្តែរឿងនេះ បានបែកការនៅពេលម្ដាយក្មេងស្រីរងគ្រោះវិលមកផ្ទះវិញ កាលពីដើមឆ្នាំ២០២០ នៅពេលដែលបុរសជាឳពុកប្រព្រឹត្តម្ដងទៀតលើកូនស្រីនៅពេលព្រឹក ទើបគាត់ដឹងនិងសម្រេចប្ដឹងហើយត្រូវសមត្ថកិច្ចចាប់ខ្លួននៅថ្ងៃទី២០ ខែមករា ឆ្នាំ២០២០។
ម្ដាយក្មេងស្រីរងគ្រោះយល់ថា ការផ្តន្ទាទោសប្ដីគាត់ឲ្យជាប់ពន្ធនាគារ៧ឆ្នាំ គឺនៅស្រាលពេក បើប្រៀបធៀបទៅនឹងការខូចខាតរបស់កូនស្រីដែលត្រូវបានរំលោភដោយឪពុករបស់ខ្លួន។ គាត់សោកស្ដាយដែលគ្មានពេលវេលាដើម្បីមើលថែកូន។
អង្គការលីកាដូ (Licadho) រកឃើញថា ការរំលោភសេពសន្ថវៈលើស្ត្រីនិងកុមារី ដោយសាច់ញាតិ កើនឡើង និងគ្មានយុត្តិធម៌ពេញលេញ។
របាយការណ៍ដែលអង្គការលីកាដូចេញផ្សាយនៅក្នុងខែធ្នូនេះ មានចំណងជើងថា “ទម្លាយភាពស្ងៀមស្ងាត់៖ ការរំលោភសេពសន្ថវៈដោយសាច់ញាតិ និងឧបសគ្គក្នុងការទទួលបានយុត្តិធម៌” បង្ហាញថា នៅក្នុងករណីរំលោភសេពសន្ថវៈ ឬប៉ុនប៉ងរំលោភសេពសន្ថវៈទាំងអស់ដែលលីកាដូបានធ្វើអន្តរាគមន៍ចាប់ពីខែមករា ឆ្នាំ២០១៧ ដល់ ខែធ្នូ ឆ្នាំ២០១៩ រកឃើញថា មានចំនួន១៣៧ករណី គឺជនសង្ស័យជាសាច់ញាតិរបស់ជនរងគ្រោះ ដូចជាឪពុក ពូ ឬជីតាបង្កើត ៤៦% និងពីអំពើហិង្សាផ្លូវភេទប្រព្រឹត្តដោយឪពុកចុង ឬសាច់ញាតិឪពុកចុង និងសាច់ថ្លៃ មាន៥៤%។
ក្នុងនោះមានករណីចំនួនលើសពីពាក់កណ្ដាលបន្តិចប៉ុណ្ណោះឬស្មើនឹង៥៣% បានឈានដល់ការជំនុំជម្រះក្ដីដោយជនល្មើសត្រូវបានផ្ដន្ទាទោសដាក់ពន្ធនាគារពេញលេញតាមច្បាប់ពាក់ព័ន្ធ។ ក្រៅពីនេះ ករណីខ្លះ រកឃើញថា មានការដោះស្រាយបញ្ចប់ក្រៅប្រព័ន្ធតុលាការ និងពន្យារពេលកាត់ក្តី ហើយជនរងគ្រោះមានសង្ឃឹមតិចតួចទទួលបានយុត្តិធម៌៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។