សាលា​ឧទ្ធរណ៍​គ្រោង​ជម្រះ​ក្តី​លោក រ៉ាត់ រត្នមុនី នៅ​ថ្ងៃ​ទី១៥ វិច្ឆិកា​ខាង​មុខ

ដោយ ម៉ៅ សុធានី
2019.11.04
រ៉ាត់ រត្នមុនី លោក រ៉ាត់ រត្នមុនី សកម្មជន​សិទ្ធិការងារ
រូប៖ អ្នកស្រី ឡុង គឹមហ៊ាង

សាលាឧទ្ធរណ៍​គ្រោង​​លើក​យក​បណ្តឹង​សារទុក្ខ​របស់​សកម្មជន​សិទ្ធិការងារ​លោក រ៉ាត់ រត្នមុនី ទៅ​ជំនុំ​ជម្រះ​នៅ​ព្រឹក​ថ្ងៃ​ទី១៥ វិច្ឆិកា​សប្តាហ៍​ក្រោយ​នេះ។

មេធាវី​ការ​ពារ​ក្តី​ឱ្យលោក រ៉ាត់ រត្នមុនី លោក សំ ទិត្យសីហា ឱ្យ​អាស៊ីសេរី​ដឹង​ថា ខាង​សាលាឧទ្ធរណ៍​បាន​ជូន​ដំណឹង​មក​លោក​អំពី​ថ្ងៃ​ជំនុំ​ជម្រះ​លើក​ទី​ពីរ​នេះ នៅ​ថ្ងៃ​ទី៤ វិច្ឆិកា។ លោក​បញ្ជាក់​ថា លោក​ និង​សហការី​មួយ​រូប​ទៀត ព្រម​ទាំង​លោក រ៉ាត់ រត្នមុនី ផង នឹង​ចូល​រួម​ក្នុង​អង្គសវនាការ​នេះ។ លោក​សង្ឃឹ​មថា សាលា​ឧទ្ធរណ៍​អាច​កោះ​ហៅ​សហ​ដើម​បណ្តឹង​រដ្ឋប្បវេណី​ទាំង​អស់​មក​​ចូល​រួម​ក្នុង​សវនាការ​នេះ ដើម្បី​ត​ទល់​គ្នា​​ចំពោះ​មុខ​ច្បាប់​ជាមួយ​កូន​ក្តី​របស់​លោក។

កាល​ពី​ថ្ងៃទី០៧ តុលា កន្លងទៅ សាលា​ឧទ្ធរណ៍​បាន​សម្រេច​ពន្យារ​ពេល​ជំនុំ​ជម្រះ​ក្តី​លោក រ៉ាត់ រត្នមុនី តាម​ការ​ស្នើសុំ​របស់​មេធាវី ដោយសារ​តែ​​ភាគី​ដើម​បណ្តឹង និង​សាក្សី​សុទ្ធ​តែ​អវត្តមាន​នៅ​ក្នុង​អង្គ​សវនាការ ដែល​អាច​ប៉ះពាល់​ដល់​សិទ្ធិ​ដេញដោល​ចំពោះ​មុខ និង​សិទ្ធិទទួល​បាន​ការ​ជំនុំ​ជម្រះ​ដោយ​យុត្តិធម៌​របស់​ជន​ជាប់​ចោទ។

ប្រធាន​សហព័ន្ធ​សហជីព​កម្មករ​សំណង់​កម្ពុជា លោក​ រ៉ាត់ រត្នមុនី ត្រូវ​បាន​តុលាការ​ក្រុង​ភ្នំពេញ​ផ្តន្ទាទោស​​ឱ្យ​ជាប់​ពន្ធនាគារ ២ឆ្នាំ ពី​បទ “ញុះញង់​ឱ្យ​មាន​​ការ​រើសអើង” និង​បង់​​សំណង​ឱ្យ​ដើម​បណ្តឹង​រដ្ឋប្បវេណី​ចំនួន ៧០លាន​រៀល ឬ​ស្មើនឹង​ជិត ២ម៉ឺន​ដុល្លារ​អាមេរិក។ ការកាត់​ទោស​សកម្មជន​សិទ្ធិ​ការងារ​រូបនេះ គឺ​ដោយ​សារ​តែលោក​​​បាន​​ជួយ​​ផលិត​ភាព​​យន្ត​ឯកសារ​ស្តីពី​ការ​ជួញ​​ដូរ​ផ្លូវ​ភេទ​នៅ​កម្ពុជា ក្រោម​ចំណង​ជើង​ថា “ម្តាយ​ខ្ញុំ​ លក់ខ្ញុំ” ឱ្យសារព័ត៌មាន RT (Russia Today) របស់​រុស្ស៊ី។

គិត​ត្រឹម​ដើម​ខែ​វិច្ឆិកានេះ លោក​បាន​ជាប់​ពន្ធនាគារ​អស់​រយៈ​ពេល​ជិត ១១ខែ​មក​ហើយ។ អង្គការ​ជាតិ និង​អន្តរជាតិ​បាន​ស្នើ​យ៉ាង​ទទូច​ឱ្យ​តុលាការ​លើក​លែង​ការ​ចោទ​ប្រកាន់ និង​ដោះ​លែង​សកម្មជន​សិទ្ធិ​ការងារ​រូប​នេះឱ្យ​មាន​សេរីភាព​វិញ បន្ទាប់​ពី​ពិនិត្យ​ឃើញ​ថា លោក​មិន​បាន​ប្រព្រឹត្ត​កំហុស​ដូច​ការ​ចោទ​ប្រកាន់​ឡើយ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។