សាលាឧទ្ធរណ៍នឹងបើកសវនាការករណីសកម្មជនបរិស្ថាន និងនយោបាយចំនួន១០នាក់ ដែលបានជាប់ឃុំ១៤ខែ ក្រោមបទចោទ ញុះញង់នៅថ្ងៃទី២៩ កក្កដា នេះ។ អតីតក្រុមយុវជនខ្មែរថាវរៈ លោក កើត សារ៉ាយ ស្នើសុំឱ្យសាលាឧទ្ធរណ៍ទម្លាក់បទចោទរបស់សាលាដំបូងភ្នំពេញដើម្បីផ្ដល់យុត្តិធម៌ដល់ក្រុមរបស់ពួកលោក។
អតីតសមាជិកក្រុមខ្មែរថាវរៈ និងបច្ចុប្បន្នជាប្រធានសមាគមនិស្សិតបញ្ញវន្តខ្មែរ លោក កើត សារ៉ាយ ប្រាប់អាស៊ីសេរីឱ្យដឹងថា លោក និងយុវជនខ្មែរថាវរៈ នឹងទៅចូលរួមសវនាការសាលាឧទ្ធរណ៍ភ្នំពេញនៅព្រឹក ថ្ងៃទី២៩ កក្កដានេះដើម្បីឆ្លើយបំភ្លឺ និងស្នើសុំសាលាឧទ្ធរណ៍ទម្លាក់បទចោទដើម្បីផ្ដល់យុត្តិធម៌មកលើក្រុមរបស់លោក។ លោកបន្ថែមថា សកម្មភាពរបស់ក្រុមខ្មែរថាវរៈធ្វើកន្លងមក គឺជាការបំពេញភារកិច្ចក្នុងនាមជាពលរដ្ឋសកម្ម ដើម្បីទាមទារដោះលែងលោក រ៉ុង ឈុន ដែលជាមនុស្សស្អាតស្អំ ហើយផែនការធ្វើបាតុកម្ម ដែលក្រុមខ្មែរថាវរៈបានគ្រោងធ្វើកន្លងទៅ គឺក្នុងទម្រង់បែបអហិង្សាដែលមិនខុសទៅនឹងច្បាប់រដ្ឋធម្មនុញ្ញកម្ពុជានោះទេ៖ «វាជារឿងអយុត្តិធម៌ពីព្រោះបើគិតពីព្យសនកម្ម នៃអ្វីដែលពួកខ្ញុំធ្វើហ្នឹងវាគ្រាន់តែជាការសម្ដែងមតិ ហើយប្រើប្រាស់សិទ្ធិសេរីភាពក្នុងគោលដៅដើម្បីបម្រើដល់ផលប្រយោជន៍ដល់បងប្អូនប្រជាពលរដ្ឋ ហើយក៏ជាការក្នុងការចូលរួមខ្វល់ខ្វាយដល់បញ្ហានៅក្នុងប្រទេសតាមរយៈក្នុងនាមខ្លួនឯងជាម្ចាស់ប្រទេស ម្ចាស់ទឹកដីតែប៉ុណ្ណឹង»
តុលាការដំបូងភ្នំពេញកាលពីខែតុលា ២០២១ បានសម្រេចផ្ដន្ទាទោស សកម្មជនសរុប ១៤នាក់ ឱ្យជាប់ពន្ធនាគារពី២០ខែ ទៅ២ឆ្នាំ ពីបទ ញុះញង់បង្កឱ្យមានភាពវឹកវរដល់សន្តិសង្គម ដោយក្នុងនោះរួមមាន ១.អ្នកស្រី ឈឿន ដារ៉ាវី ២.កញ្ញា អេង ម៉ាឡៃ ហៅ សូ មេត្តា ៣.លោក ហ៊ុន វណ្ណៈ ៤. លោក កើត សារ៉ាយ ៥. លោក ថា ឡាវី ដែលជាសកម្មជនក្រុមខ្មែរថាវរៈ និងសមាជិកសមាគមសម្ពន្ធនិស្សិតបញ្ញវន្តខ្មែរ ២នាក់ ហើយនិងសកម្មជនគណបក្សសង្គ្រោះជាតិមួយចំនួនទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។