មេធាវី​ការពារ​ក្ដី​ឲ្យ​លោក អឿត អាង គ្រោង​ស្នើ​តុលាការ​ពន្យារពេល​សវនាការ

ដោយ ម៉ម មុនីរតន៍
2017.02.18
ជួប សម្លាប់ អឿត អាង ២០១៦ ៨៥៥ ជន​ត្រូវ​ចោទ ជួប សម្លាប់ ដែល​គេ​ស្គាល់​ឈ្មោះ​ពិត​ថា អឿត អាង ពេល​នាំ​ចេញ​ក្រោយ​សាកសួរ នៅ​សាលាដំបូង​រាជធានី​ភ្នំពេញ កាល​ពី​ថ្ងៃ​ទី​១៦ ខែ​កញ្ញា ឆ្នាំ​២០១៦។
RFA

មេធាវី ដែល​គណៈមេធាវី​តម្រូវ​អោយ​ការពារ​ក្ដី​ឲ្យ​ឈ្មោះ អឿត អាង ហៅ ជួប សម្លាប់ អះអាង​ថា ខ្លួន​មាន​គម្រោង​នឹង​ដាក់​ពាក្យ​ពន្យារពេល ចូលរួម​សវនាការ ដែល​គ្រោង​ធ្វើ​នៅ​ថ្ងៃទី១ មីនា ដោយសារ​ថា ពុំ​ទាន់​មាន​សំណុំរឿង​នៅ​ក្នុង​ដៃ ដើម្បី​ពិនិត្យ​នៅឡើយ។ ចំណែក​ក្រុម​គ្រួសារ និង​អ្នក​តាមដាន​ពី​ព្រឹត្តិការណ៍​សង្គម​កម្ពុជា​វិញ យល់ឃើញ​សវនាការ​នេះ នឹង​មិន​អាច​ផ្ដល់​យុត្តិធម៌​សម្រាប់​លោក​បណ្ឌិត កែម ឡី បានទេ។

មេធាវី​ការពារ​ក្ដី​ឲ្យ​ជនសង្ស័យ​ក្នុង​សំណុំរឿង​នៃ​បទឧក្រិដ្ឋ​នេះ នៅ​មិន​ប្រាកដ​នៅឡើយ​ទេ​ថា​តើ​ខ្លួន​នឹង​អាច​ចូលរួម​បានទេ នៅ​ថ្ងៃ​សវនាការ​ខាងមុខនេះ ឬ​ត្រូវ​ដាក់​លិខិត​ពន្យារពេល​ចូលរួម​ក្នុង​ថ្ងៃ​ជំនុំជម្រះ ព្រោះ​លោក​បញ្ជាក់​ថា មក​ដល់​ពេលនេះ​ទៅ​ហើយ មិន​ដឹង​ថា សំណុំ​រឿង​នេះ មាន​ទំហំ​បែប​ណា​នៅឡើយ​នោះ​ទេ។

លោក យុង ផានិត ជា​មេធាវី​ការពារ​ក្ដី​ឲ្យ​ឈ្មោះ អឿត អាត ហៅ ជួប សម្លាប់ ហាក់​នៅ​មាន​ភាព​ស្ទាក់ស្ទើ​រ​នៅឡើយ​ថា តើ​លោក​មានលទ្ធភាព​គ្រប់គ្រាន់ ដែល​អាច​ចូលរួម​ថ្ងៃ​សវនាការ​ដែរ​ឬ​យ៉ាង​នោះ​ទេ។ លោក​បន្ត​ថា សំខាន់​ពេលនេះ ក្នុង​នាម​ជា​មេធាវី​គឺ​លោក​ពុំ​ទាន់​បាន​ទទួល​សំណុំរឿង នៅ​ក្នុង​ដៃ​នៅឡើយ ពោល​ត្រូវ​រង់ចាំ​ដល់​ថ្ងៃ​ច័ន្ទ ដើម​សប្ដាហ៍​ក្រោយ​សិន បាន​អាច​ទស្សន៍ទាយ​បាន។លោក​បន្ថែម​ថា ប្រសិនបើ​សំណុំ​រឿង​នេះ មាន​ទំហំ​ធំ និង​ស្មុគស្មាញ ប្រាកដ​ណាស់​លោក​នឹង​ដាក់​លិខិត​សុំ​ពន្យារពេល​ចូលរួម សវនាការ​ហើយ ដោយ​ត្រូវ​ទុក​ពេល​សិក្សា​ពី​សំណុំរឿង​ឲ្យ​បាន​ល្អិតល្អន់​ជា​មុន​សិន។ លោក​បន្ត​ថា «ខ្ញុំ​អត់​ទាន់​សម្រេច​ច្បាស់​ថា​ត្រូវ​ពន្យារ ឬ​ក៏​ត្រូវ​ចូលរួម​សវនាការ​ទេ ប៉ុន្តែ​ត្រូវ​រង់ចាំ​ទទួល​សំណុំ​រឿង​ថ្ងៃ​ច័ន្ទ​ហ្នឹង គឺ​បើ​បាន​សំណុំ​រឿង​ហើយ ខ្ញុំ​ត្រូវ​សិក្សា​មើល​សិន»

ជុំវិញ​រឿងក្ដី​នៃ​បទឧក្រិដ្ឋ​នេះ កាលពី​ថ្ងៃទី៦ កុម្ភៈ តុលាការ​ក្រុង​ភ្នំពេញ​បាន​កំណត់​យក​ថ្ងៃទី១ ខែ មីនា ជា​ថ្ងៃ​បើកសវនាការ ក្រោយពី​ប្រើ​ពេល​ជាង ៦​ខែ ដើម្បី​ស៊ើបអង្កេត។ ប្រសិនបើ​សវនាការ​នេះ ពុំ​មាន​ការប្រែប្រួល​ទេ នៅ​សល់​ពេល​ប្រហែល ១០​ថ្ងៃ​ទៀត​ទេ នឹង​ដំណើរ​ហើយ។ ទាក់ទិន​នឹង​បទ​ចោទ ឃាតកម្ម​គិតទុក​ជាមុន និង​កាន់កាប់​អាវុធ​ដោយ​គ្មាន​ការអនុញ្ញាត​នេះ គឺ​មាន​លោក លាង សំណាត់ ជា​ចៅក្រម​ជំនុំជម្រះ និង លោក លី សុផាណា ជា​តំណាង​អយ្យការ។

ប្អូនប្រុស​បង្កើត​លោក​បណ្ឌិត កែម ឡី គឺ​លោក កែម រិទ្ធិសិទ្ធ បញ្ជាក់​ជំហរ​បោះបង់​ក្នុង​ការ​ចូលរួម​សវនាការ​នេះ ដោយ​ពុំ​មាន​ជំនឿ​ថា អាច​ស្វែងរក​យុត្តិធម៌​ឲ្យ​បងប្រុស​របស់​លោក​បាន។ ប៉ុន្តែ​លោក​បញ្ជាក់​ថា ប្រសិនបើ​មាន​ដីកា​អញ្ជើញ​ណាមួយ​ជា​ផ្លូវការ​លោក​នឹង​ចូលរួម​ដែរ។ លោក​បន្ត​ថា «ខ្ញុំ​ឆ្លើយ​ថា​ខ្ញុំ​មិន​ទៅ​ចូលរួម​ទេ ពីព្រោះ​ថា​ការ​ទៅ​ចូលរួម​វា​ដដែល​ជា​ដដែល​ទេ។ ការ​សម្រេច​របស់​តុលាការ គឺ​ថា​គេ​សម្រេច​ថា​យ៉ាង​ម៉េច គឺ​អ៊ីចឹង​ហើយ យើង​មិន​អាច​ថា​អ្នក​ឯង​សម្រេច​ខុស​បាន​ទេ។ អា​រឿង​ហ្នឹង​យើង​អង្គុយ​ចាំ​មើល​ហ្នឹង»

ចំណែក លោក សៅ កុសល គណៈកម្មការ​កសាង​ចេតិយ​សម្រាប់​សព​លោក​បណ្ឌិត កែម ឡី វិញ​ឲ្យ​ដឹង​ថា ប្រសិន​បើ​ថ្ងៃ​សវនាការ​ដែល​គ្រោង​នឹង​ដំណើរការ​នៅ​ដើមខែ​មីនា​នេះ​មិន​ប្រែប្រួល​ទេ ក្នុងនាម​លោក​ជា​អ្នក​តាម​ដាន​រឿងក្ដី​នេះ នឹង​ចូលរួម​ស្ដាប់ និង​អង្កេត​ដែរ។ យ៉ាងណា​លោក សៅ កុសល ហាក់​ពុំ​មាន​ជំនឿ​សោះ​ថា ឈ្មោះ អឿ​ត អាង ហៅ ជួប សម្លាប់ នេះ​ជា​ឃាតក​ពិត​ទេ ហើយ​រឹតតែ​មិន​រំពឹង​លើ​ការស្វែងរក​យុត្តិធម៌​នេះ​ថែម​ទៀត​ផង។ ជាងនេះទៀត​លោក​ថា បើ​ពិនិត្យ​លើ​អង្គហេតុ ទាំង​លោក​បណ្ឌិត កែម ឡី និង​ជនសង្ស័យ គឺ​ពុំ​ធ្លាប់​បាន​ទាក់ទង​គ្នា​ទាល់តែសោះ​ពី​មុន​មក​នោះ។ លោក​បន្ត​ថា «យើង​ឃើញ​ថា​មហាជន​មិន​យល់​ស្រប​ថា ជួប សម្លាប់ ហ្នឹង​ជា​ឃាតក​ពិត​ទេ។ បើ​យើង​វិភាគ​ទៅ​តាម​ការ​ទំនាក់ទំនង​គ្នា​រវាង​លោក​បណ្ឌិត កែម ឡី ជាមួយ ជួប សម្លាប់ ឥត​មាន​សោះ ទី​មួយ។ ពាក់ព័ន្ធ​នឹង​បញ្ហា​សេដ្ឋកិច្ច យើង​ឃើញ​ថា​វា​មិន​អាច​លោក ជួប សម្លាប់ មាន​លទ្ធភាព​ឲ្យ​លុយ​លោក​បណ្ឌិត​ខ្ចី ឬ​មាន​លុយ​ទិញ​កាំភ្លើង​ដើម្បី​សម្លាប់​កូន​បំណុល​ទេ»

ដោយឡែក ទាក់ទិន​រឿង​ចេតិយ​វិញ លោក សៅ កុសល បញ្ជាក់​ថា ក្រោយពី​ប្រជុំ​ពិគ្រោះ​យោបល់​លើក​ចុង​ក្រោយ ទៅលើ​ការ​កែ​ប្លង់​មេ នៅ​ថ្ងៃ​ច័ន្ទ​ទី ២០ កុម្ភៈ រួច គណៈកម្មការ​នឹង​ចាប់ផ្ដើម​ដំណើរការ​បុក​គ្រឹះ​តែម្ដង ហើយ​ការសាងសង់​នឹង​ចាប់​ដំណើរការ​ពី​ពេល​នោះ​ដែរ។

ពាក់ព័ន្ធ​សំណុំរឿង​ក្ដី​លោក​បណ្ឌិត កែម ឡី អាស៊ីសេរី ពុំ​ទាន់​អាច​សុំ​ការ​បំភ្លឺ​ពី​តុលាការ​ក្រុងភ្នំពេញ ដើម្បី​បញ្ជាក់​បន្ថែម​ជុំវិញ​ជំហរ​របស់​មេធាវី របស់​ជនសង្ស័យ​ឈ្មោះ អឿត អាង នេះ​បាន​នៅឡើយ​ទេ នៅ​ថ្ងៃទី១៨ កុម្ភៈ។

យ៉ាងណា​ទាំង​ក្រុម​គ្រួសារ​លោក​បណ្ឌិត កែម ឡី និង​អ្នកឃ្លាំមើល​ព្រឹត្តិការណ៍​សង្គម​កម្ពុជា ហាក់​ពុំ​មាន​ជំនឿ​ចំពោះ​ការ​កាត់ក្ដី​នេះ​ថា អាច​ផ្ដល់​ភាព​យុត្តិធម៌​សម្រាប់ អ្នកវិភាគ​សង្គម និង​នយោបាយ​ដ៏​មាន​ប្រជាប្រិយភាព​នេះ បាន​នោះ​ទេ។ ទាក់ទង​សំណុំរឿង​ដ៏​រសើប​នេះ​ដែរ សមាជិក​ព្រឹទ្ធសភា អ្នកស្រី ថាក់ ឡានី ប្រធាន​គណបក្សប្រឆាំង​លោក សម រង្ស៊ី ត្រូវ​រត់ចោលស្រុក ដោយ​ត្រូវ​លោក ហ៊ុន សែន ប្ដឹង ដោយឡែក អ្នកវិភាគ​វ័យក្មេង​គឺ​លោក គឹម សុខ ត្រូវ​ជាប់ពន្ធនាគារ ព្រោះតែ​រិះគន់​ថា បក្ស​ប្រជាជន​កម្ពុជា​ជា​អ្នក​បាញ់​សម្លាប់​លោក បណ្ឌិត កែម ឡី៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។