អតីត​រដ្ឋមន្ត្រី​ក្រសួង​កិច្ចការ​នារី​ជំរុញ​ឱ្យ​ក្រសួង​យុត្តិធម៌​ហ៊ាន​ចេញ​មុខ​ប្រាប់​លោក ហ៊ុន សែន ឱ្យ​ឈប់​ជ្រៀតជ្រែក​ប្រព័ន្ធ​យុត្តិធម៌

ដោយ សុជីវី
2021-05-17
Share
អតីត​រដ្ឋមន្ត្រី​ក្រសួង​កិច្ចការ​នារី​ជំរុញ​ឱ្យ​ក្រសួង​យុត្តិធម៌​ហ៊ាន​ចេញ​មុខ​ប្រាប់​លោក ហ៊ុន សែន ឱ្យ​ឈប់​ជ្រៀតជ្រែក​ប្រព័ន្ធ​យុត្តិធម៌ អនុប្រធាន​គណបក្ស​សង្គ្រោះជាតិ អ្នកស្រី មូរ សុខហួរ។
Photo: RFA

អនុប្រធាន​គណបក្ស​ប្រឆាំង និង​ជា​អតីត​រដ្ឋមន្ត្រី​ក្រសួង​កិច្ចការ​នារី​អ្នកស្រី មូរ សុខហួរ ជំរុញ​ឱ្យ​ក្រសួង​យុត្តិធម៌​ធានា​ផ្ដល់​យុត្តិធម៌​ពេញ​លេញ និង​ស្មើភាព​គ្នា​ដល់​ស្រ្តី​រងគ្រោះ​ដោយ​អំពើ​រំលោភបំពាន​ផ្លូវ​ភេទ និង​ត្រូវ​ហ៊ាន​ប្រាប់​ទៅ​លោកនាយក​រដ្ឋមន្ត្រី ហ៊ុន សែន ឱ្យ​ឈប់​ប្រើ​អំណាច​រំលោភ​លើ​ប្រព័ន្ធ​យុត្តិធម៌​តទៅទៀត។ ការ​លើក​ឡើង​នេះ បន្ទាប់​ពី​លោក ហ៊ុន សែន បាន​លូកដៃ​ចូល​អន្តរាគមន៍​ក្នុង​រឿងរ៉ាវ ចោទ​ប្រកាន់​ឧកញ៉ា ហេង សៀ ពី​ការ​រំលោភ​បំពាន​ផ្លូវភេទ​លើ​ពិធីការិនី​ទូរទស្សន៍ My TV

អតីត​រដ្ឋមន្ត្រី​ក្រសួង​កិច្ចការ​នារី អ្នកស្រី មូរ សុខហួរ ចង់​ឱ្យ​ក្រសួង​យុត្តិធម៌​ផ្ដល់​យុត្តិធម៌​ឱ្យ​បាន​ដូចៗ គ្នា​ទៅ​ដល់​ជនរងគ្រោះ ដោយ​ការ​រំលោភ​បំពាន​ផ្លូវភេទ ព្រមទាំង​បញ្ឈប់​នូវ​រាល់​ការ​ជ្រៀតជ្រែក​របស់​អ្នកមាន​អំណាច​ទៅ​ក្នុង​ដំណើរការ​ស្វែងរក​យុត្តិធម៌​សម្រាប់​ជន​រងគ្រោះ។

អ្នកស្រី មូរ សុខហួរ បន្ត​ថា ក្រសួង​យុត្តិធម៌​ត្រូវ​ហ៊ាន​ប្រាប់​ទៅ​លោក ហ៊ុន សែន ឱ្យ​បញ្ឈប់​ប្រើ​ឥទ្ធិពល​របស់​លោក​ទៅ​លើ​ប្រព័ន្ធ​យុត្តិធម៌ ហើយ​ត្រូវ​ពង្រឹង​សមត្ថភាព​វិស័យ​នេះ​​ឱ្យ​អនុវត្ត​តាម​គោលការណ៍​ច្បាប់ ទាំង​ច្បាប់​ជាតិ និង​ច្បាប់​អន្តរជាតិ ដើម្បី​ធានា​ផ្ដល់​យុត្តិធម៌​ដល់​អ្នករងគ្រោះ។

«នៅ​រឿង​ចឹងៗ​ ក្រសួង​យុត្តិធម៌​អត់មាន​និយាយ​អីសោះ​ថា នេះ​ជា​ឆន្ទានុសិទ្ធិ​របស់​តុលាការ ម៉េច​ក៏​មិន​និយាយ? ម៉េច​ក៏​ក្រសួង​យុត្តិធម៌​នៅ​ពេល​នេះ​មិន​ហាមប្រាម​កុំ​ឱ្យ​លោក ហ៊ុន សែន ធ្វើ​អន្តរាគមន៍? »

អាស៊ីសេរី​នៅ​មិន​ទាន់​អាច​សុំ​ការ​ឆ្លើយ​តប​រឿង​នេះ​ពី​អ្នកនាំពាក្យ​ក្រសួង​យុត្តិធម៌​បាន​នៅ​ឡើយ​ទេ​កាល​ពី​យប់​ថ្ងៃទី១៦ ខែឧសភា។

កាល​ពី​ថ្ងៃទី​១២ ខែ​ឧសភា អ្នកនាំពាក្យ​ក្រសួង​យុត្តិធម៌​លោក ជិន ម៉ាលីន បាន​សរសេរ​នៅ​លើ​ហ្វេសប៊ុក​របស់​លោក ដោយ​ប្រតិកម្ម​ទៅ​នឹង​​មតិ​ពលរដ្ឋ​នៅ​តាម​បណ្ដាញ​សង្គម​ថា​បាន​ដើរ​តួនាទី​ជំនួស​សមត្ថកិច្ច និង​តុលាការ​ក្នុង​ការវិនិច្ឆ័យ​កាត់​សេចក្តី​សំណុំរឿង​វិវាទ​រវាង​ឧកញ៉ា និង​ពិធី​ការិនី​ទូរទស្សន៍។ លោក​ថា តុលាការ​និង​សមត្ថកិច្ច​កំពុង​ស៊ើប​អង្កេត និង​ដំណើរការ​នីតិវិធី​រឿង​នេះ​តាម​ផ្លូវ​ច្បាប់។ លោក​ជំរុញ​ឱ្យ​ពលរដ្ឋ ដែល​ឈឺឆ្អាល​ស្រឡាញ់​យុត្តិធម៌ គួរ​តែ​ជា​អ្នក​តាមដាន និង​ឃ្លាំមើល​ករណី​នេះ។ ចំណែក អ្នកនាំពាក្យ​មួយ​រូប​ទៀត លោក គឹម សន្តិភាព​ កាល​ពី​ថ្ងៃ​ដដែល​នោះ​សរសេរ​នោះ​លើ​ហ្វេសប៊ុក​ដែរ​​ថា ក្រសួង​យុត្តិធម៌​បាន​តាមដាន​ដោយ​យក​ចិត្ត​ទុក​ដាក់ និង​បាន​ស្នើ​ស្ថាប័ន​តុលាការ​ឱ្យ​ស្រាវជ្រាវ​ឱ្យ​បាន​ច្បាស់លាស់ ដើម្បី​ស្វែង​រក​ការ​ពិត​ក្នុង​រឿង​នេះ។ លោក​ថា​ក្រសួង​យុត្តិធម៌ស្នើ​សាធារណជន​ស្ងប់ស្ងាត់ និង​ទុក​តួនាទី​ឱ្យ​តុលាការ​បំពេញ​តួនាទី​របស់​ខ្លួន។

តែ​ទោះ​ជាយ៉ាងណា​សារព័ត៌មាន​ស្និត​នឹង​លោក ហ៊ុន សែន ហ្វេ្រសញូវ (Fresh News) ចេញ​ផ្សាយ​កាល​ពី​ថ្ងៃ​ទី១៤ ខែឧសភា​ដោយ​ស្រង់​សម្ដី​របស់ មេធាវី លោក គី តិច ថា លោក​នាយក​រដ្ឋមន្រ្តី ហ៊ុន សែន បាន​បញ្ជា​ឱ្យ​ក្រុម​មេធាវី​ស្ម័គ្រចិត្ត​របស់​លោក​ស្រាវជ្រាវ និង​រក​យុត្តិធម៌​ឱ្យ​ពិធីការិនី​ទូរទស្សន៍ My TV កញ្ញា មាន ពេជ្ររីតា អោយ​ដល់​ទី​បញ្ចប់។

បើ​ទោះបី​ជា​​អន្តរាគមន៍​នេះ​ចេញ​ទៅ​មិន​ចំពោះ​ស្ថាប័ន​តុលាការ ឬ​ទៅ​ស្ថាប័ន​ជាក់លាក់​នៅ​ក្រោម​មែក​ធាង​ប្រព័ន្ធ​យុត្តិធម៌​ក៏​ដោយ ក៏​អ្នកស្រី មូរ សុខហួរ មើល​ឃើញ​ថា លោក ហ៊ុន សែន មាន​ឥទ្ធិពល ដែល​ធ្វើ​ឱ្យ​ប៉ះពាល់​ពិត​ប្រាកដ​ទៅ​ដល់​ដំណើរការ​ក្ដី។ អ្នកស្រី​ថា ក្រសួង​យុត្តិធម៌​ល្មម​ឈប់​បន្ទរ​តាម ឬ​ហៃអើ​តាម​លោក ហ៊ុន សែន តទៅ​ទៀត​៖ «នៅ​ពេល​ករណី​អ្នកដទៃ​ទៀត​ជាពិសេស​ករណី​ទាក់ទង​នឹង​នយោបាយ​ក្រសួង​យុត្តិធម៌​ចេញ​មុខ​ភ្លាម ថា ករណី​នេះ​ជា​ឆន្ទានុសិទ្ធិ​តុលាការ។ យើង​អត់​ចង់​ឃើញ​ថា​ប្រព័ន្ធ​តុលាការ ជា​ប្រព័ន្ធ ដែល​មាន​មុខ​ពីរ មាន​ស្តង់ដារ​ពីរ​ទេ»

ក្រុម​មេធាវី​ស្ម័គ្រចិត្ត​របស់​លោក ហ៊ុន សែន ដែល​អះអាង​ថា ​បាន​ទទួល​បញ្ជា​ពី​លោក ហ៊ុន​ សែន កំពុង​សិក្សា និង​ប្រមូល​ភស្តុតាង​សំណុំ​រឿង​ប្ដឹងផ្ដល់​គ្នា​រវាង​ពិធីការិនី​ទូរទស្សន៍ កញ្ញា មាន​ពេជ្ររីតា និង​ឧកញ៉ា ហេង សៀ។ លោក ហេង សៀ ប្តឹង​ពិធីការិនី​រូប​នោះ​ពី​បទ​លួច​ទូរស័ព្ទ​មាន​ស្ថាន​ទម្ងន់ទោស និង​ប៉ុនប៉ង​ចាក់​សម្លាប់។ ចំណែក​កញ្ញា មាន ពេជ្ររីតា វិញ​ប្ដឹង​ចោទ​លោក​ឧកញ៉ា​រូប​នោះ​ពី​បទ​ប៉ុនប៉ង​រំលោភ​សេពសន្ថវៈ ព្រមទាំង​បដិសេធ​រាល់​ការ​ចោទប្រកាន់​ទាំងឡាយ​ទាក់ទង​នឹង​រឿង​ស្នេហា​លួច​លាក់។

ទាក់ទង​នឹង​រឿង​នេះ​មក​ដល់​ពេល​នេះ សារព័ត៌មាន​ក្នុង​ស្រុក​បាន​រាយការណ៍​ថា សមត្ថកិច្ច​បាន​ឃាត់​ខ្លួន​កូនស្រី​បង្កើត របស់​ឧកញ៉ា ហេង សៀ ឈ្មោះ តាំង គីមហៀង និង​ប្ដី ឈ្មោះ ឃន ឈុនដារ៉ា ដែល​គេ​ស្គាល់​ថា​ ជាម្ចាស់​ហាង​កាហ្វេ​ល្បី​ឈ្មោះ The KOI និង ​Tube Cafe។ អ្នក​ទាំង​២ ​ត្រូវ​បាន​ចោទ​ប្រកាន់​ថា បាន​ផលិត​វីដេអូ​អាសអាភាស​ប្រឌិត​រឿង​ចោទ​ប្រកាន់​បំផ្លាញ​កិត្តិយស កញ្ញា មាន ពេជ្ររីតា។

នាយិកា​មជ្ឈមណ្ឌល​សិទ្ធិមនុស្ស​កម្ពុជា អ្នកស្រី ចក់ សុភាព ថ្លែង​ប្រាប់​អាស៊ីសេរី​ថា ចាំបាច់​ណាស់​ដែល​អាជ្ញាធរ​ពាក់ព័ន្ធ​ត្រូវ​ផ្ដល់​យុត្តិធម៌​ឱ្យ​បាន​ដូចៗ​គ្នា​ទៅ​ដល់​ជនរងគ្រោះ ដើម្បី​ធានា​បញ្ចប់​វប្បធម៌​និទ្ទណ្ឌភាព៖ «ពី​មុន​គឺ​យើង​ឃើញ​តែ​សហគមន៍​ដែល​ប្រឈម​រឿង​ដីធ្លី សកម្មជន​ជន ដែល​ត្រូវ​គេ​ចោទ​ដោយ​អយុត្តិធម៌​ហ្នឹង​នាំគ្នា​ទាមទារ​រក​យុត្តិធម៌។ អ្នកមាន​ទ្រព្យ​សម្បត្តិ​ជាច្រើន ឬ​ពលរដ្ឋ​មួយ​ចំនួន​ដែល​គាត់​មិន​បាន​ប៉ះ​នូវ​បញ្ហា​ហ្នុង​គាត់​តែង​រិះគន់​ថា​សកម្មជន​​ចេះ​តែ​ទាមទារ​អ៊ីចឹង​ទៅ។ ប៉ុន្តែ​នៅពេល​កើត​ឡើង​ចំពោះ​ខ្លួនឯង​​អ្នក​ទាំង​នោះ​ក៏​ស្រែក​រក​យុត្តិធម៌​ដែរ។ អ៊ីចឹង​សួរ​ថា​ តើ​អ្វី​ទៅ​ជា​យុត្តិធម៌ តើ​យើង​បាន​ទទួល​យុត្តិធម៌​សម្រាប់​គ្រប់គ្នា​ដែរ ឬទេខ្ញុំ​គិត​ថា ​នូវ​ចំណោទ​នេះ​ត្រូវ​ធានា​ថា ប្រព័ន្ធ​យុត្តិធម៌​របស់​យើង​ផ្ដល់​យុត្តិធម៌​ដោយ​មិន​លម្អៀង ហើយ​ផ្ដល់​នូវ​សិទ្ធិ​ទទួល​បាន​ការ ជំនុំជម្រះ​ដោយ​យុត្តិធម៌​ពិតប្រាកដ​ដល់​ពលរដ្ឋ​នោះ យើង​អាច​ឃើញ​ថា ការ​ទាមទារ​យុត្តិធម៌​ពី​គ្រប់​ភាគី​ពាក់ព័ន្ធ​អាច​ដំណើរការ​បាន»

កម្ពុជា​ជាប់​ចំណាត់ថ្នាក់​ជា​ប្រទេស​រំលោភច្បាប់​ជាងគេ​បំផុត ឈរ​នៅ​លេខ​១២៧ ជាប់​បាត​តារាង ក្នុង ​ចំណោម​ ១២៨​ប្រទេស​នៅ​លើ​ពិភពលោក ក្នុង​សន្ទស្សន៍​នៃ​ការ​គោរព​ច្បាប់​ឆ្នាំ​២០២០ របស់​អង្គការ​គម្រោង​យុត្តិធម៌​ពិភពលោក (World Justice Project)។ ចំណែក​អង្គការ​ឃ្លាំមើល​សិទ្ធិមនុស្ស​អន្តរជាតិ​ យូមែន រ៉ៃត៍ វ៉ច្ឆ (Human Rights Watch) បាន​លើកឡើង​ថា លោក ហ៊ុន សែន គឺ​ជា​មេដឹកនាំ​ដែល​កាន់អំណាច​បាន​យូរ​តាមរយៈ​ការ​ប្រើប្រាស់​អំពើ​ហិង្សា ការ​គាបសង្កត់ ការ​គៃបន្លំ​ការ​បោះឆ្នោត និង​ការប្រព្រឹត្ត​អំពើពុក​រលួយ​ធ្ងន់ធ្ងរ។ ចុង​ក្រោយ​នេះ​អង្គការ​ដដែល​នេះ​ពិនិត្យ​ឃើញ​ថា លោក ហ៊ុន សែន បាន​ប្រើប្រាស់​តុលាការ​ធ្វើ​ជា​មធ្យោបាយ ដើម្បី​បំបាត់​សំឡេង​ប្រឆាំង និង​ពង្រឹង​អំណាច​តាមរយៈ​ការ​គ្រប់គ្រង​បែប​ឯក​បក្ស៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល