សាលាដំបូងរាជធានីភ្នំពេញ កាលពីថ្ងៃទី២២ ខែសីហា បានសម្រេចបញ្ជូនខ្លួនយុវជនម្នាក់ទៅឃុំនៅពន្ធនាគារព្រៃសបណ្ដោះអាសន្ន ពាក់ព័ន្ធទៅនឹងការសរសេររៀបរាប់របស់យុវជននោះ អំពីការធ្វើបដិវត្តន៍ពណ៌ផ្លាស់ប្ដូររដ្ឋាភិបាលនៅលើបណ្ដាញសង្គមហ្វេសប៊ុក (Facebook)។ យ៉ាងណាក៏ដោយ សង្គមស៊ីវិលយល់ឃើញថា ការសរសេររបស់យុវជននោះ គ្រាន់តែជាការបញ្ចេញមតិប៉ុណ្ណោះ។
មន្ត្រីការពារសិទ្ធិមនុស្សនៃអង្គការលីកាដូ (LICADHO) លោក អំ សំអាត ឲ្យដឹងនៅថ្ងៃទី២២ សីហា ថា យុវជនដែលត្រូវបានសាលាដំបូងរាជធានីភ្នំពេញ សម្រេចឃុំខ្លួនបណ្ដោះអាសន្ននោះមានឈ្មោះ គង់ រ៉ៃយ៉ា គឺជានិស្សិតច្បាប់ឆ្នាំទី១ នៃសាកលវិទ្យាល័យខេមរៈ និងជាសមាជិកនៃបណ្ដាញសហព័ន្ធនិស្សិតកម្ពុជា។
លោក អំ សំអាត ឲ្យដឹងបន្តថា យុវជន គង់ រ៉ៃយ៉ា ត្រូវបានសមត្ថកិច្ចចាប់ខ្លួនកាលពីថ្ងៃទី២០ សីហា នៅសាកលវិទ្យាល័យខេមរៈ ក្នុងខណ្ឌសែនសុខ ក្រុងភ្នំពេញ គឺជាង ១០ថ្ងៃក្រោយពីយុវជនរូបនេះ បានបង្ហោះនៅលើបណ្ដាញសង្គមហ្វេសប៊ុករបស់ខ្លួន ដោយសរសេរថា «តើមានបងប្អូនណាហ៊ានធ្វើបដិវត្តន៍ពណ៌ជាមួយខ្ញុំទេ? ថ្ងៃណាមួយនៅពេលខាងមុខនេះ ខ្ញុំនឹងធ្វើបដិវត្តន៍ពណ៌ដើម្បីផ្លាស់ប្ដូររបបដ៏ថោកទាបមួយនេះ ចេញពីសង្គមខ្មែរ ទោះបីជាត្រូវជាប់គុក ឬស្លាប់ក៏ដោយ ក៏ខ្ញុំត្រូវតែធ្វើដែរ»។
ក្រោយពីការចាប់ខ្លួន យុវជន គង់ រ៉ៃយ៉ា ត្រូវបានតុលាការចោទប្រកាន់ពីបទញុះញង់ឲ្យប្រព្រឹត្តបទឧក្រិដ្ឋជាអាទិ៍ តាមមាត្រា៤៩៥ នៃក្រមព្រហ្មទណ្ឌកម្ពុជា ហើយដែលអាចប្រឈមនឹងការជាប់ពន្ធនាគារពី ៦ខែដល់ ២ឆ្នាំ បើតុលាការរកឃើញថា មានទោសមែននោះ។
នេះគឺជាលើកទីមួយហើយដែលមានការចាប់ខ្លួនមនុស្សក្នុងរឿងបដិវត្តន៍ពណ៌ ចាប់តាំងពីមានការព្រមានរបស់លោកនាយករដ្ឋមន្ត្រី ហ៊ុន សែន និងមន្ត្រីជាន់ខ្ពស់យោធា គឺលោក ជា តារា មិនឲ្យមានបដិវត្តន៍ពណ៌ប្រឆាំងរដ្ឋាភិបាលកាលពីពេលថ្មីៗនេះ។
អ្នកនាំពាក្យក្រសួងមហាផ្ទៃ លោក ខៀវ សុភ័គ មានប្រសាសន៍ថា អ្វីដែលយុវជន គង់ រ៉ៃយ៉ា លើកឡើងនៅលើបណ្ដាញសង្គមហ្វេសប៊ុក មិនមែនជាការបញ្ចេញមតិនោះទេ ប៉ុន្តែវាជាការអំពាវនាវឲ្យមានការប្រឆាំងទៅនឹងរដ្ឋាភិបាល។ លោកថា បើយុវជន គង់ រ៉ៃយ៉ា ចង់ផ្លាស់ប្ដូររដ្ឋាភិបាល គឺគេអាចធ្វើទៅបានតាមរយៈសន្លឹកឆ្នោត៖ «រដ្ឋាភិបាលធ្វើល្អ ឬមិនល្អ បញ្ចេញមតិក្នុងរយៈពេល ៥ឆ្នាំម្តង បោះមួយសន្លឹកខ្លួនឯងទៅ បើបញ្ចេញមតិដើម្បីធ្វើបដិវត្តន៍ពណ៌ គឺមិនអាចទេ បដិវត្តន៍ដើម្បីអ្វី ច្បាប់អាចចោទប្រកាន់បាន ដូច្នេះនេះគឺជារឿងច្បាប់»។
យ៉ាងណាក៏ដោយ មន្ត្រីការពារសិទ្ធិមនុស្សនៃអង្គការលីកាដូ លោក អំ សំអាត យល់ឃើញថា អ្វីដែលយុវជន គង់ រ៉ៃយ៉ា លើកឡើងនៅលើហ្វេសប៊ុករបស់ខ្លួន វាគ្រាន់តែជាការបញ្ចេញមតិរបស់យុវជននោះ ដើម្បីសម្ដែងការមិនពេញចិត្តចំពោះរឿងអ្វីមួយនៅក្នុងសង្គមតែប៉ុណ្ណោះ។ ផ្ទុយទៅវិញ លោកគិតថា ការចាប់ខ្លួនយុវជន គង់ រ៉ៃយ៉ា ពេលនេះ អាចដោយសារសមត្ថកិច្ចយល់ឃើញថា យុវជននេះផ្គើនរដ្ឋាភិបាលដែលកន្លងមកតែងណែនាំមន្ត្រីកងកម្លាំងប្រដាប់អាវុធរបស់ខ្លួន ទប់ស្កាត់ឲ្យបាន កុំឲ្យមានបដិវត្តន៍ពណ៌កើតឡើង៖ «គាត់គ្រាន់តែជាយុវជនមួយអាយុ ២៥ឆ្នាំ ហើយគាត់បង្ហោះហ្វេសប៊ុកឲ្យប្រជាពលរដ្ឋ ឬក៏អ្នកណាទៅធ្វើបដិវត្តន៍ជាមួយគាត់ ខ្ញុំគិតថាវាគ្មានទេ ប៉ុន្តែប្រហែលជាការបញ្ចេញមតិយោបល់គាត់ ឧទាហរណ៍គាត់មានកំហឹងអ្វីមួយតែប៉ុណ្ណឹងទេ ហើយការដែលគាត់បញ្ចេញនេះ ក៏វាអត់ទាន់នាំឲ្យមានក្រុមណាមួយ ប៉ុនប៉ងធ្វើបដិវត្តន៍ពណ៌ គឺអត់មាន។ អ៊ីចឹងខ្ញុំគិតថា យើងគួរគិតអំពីសិទ្ធិសេរីភាពក្នុងការបញ្ចេញមតិប្រជាពលរដ្ឋផង»។
កាលពីពេលថ្មីៗនេះ យុវជន គង់ រ៉ៃយ៉ា ក៏ធ្លាប់បានបង្ហោះរូបថតខ្លួនឯងចាក់ច្រវាក់ដៃច្រវាក់ជើង ធ្វើជាអ្នកទោសនៅលើបណ្ដាញសង្គមហ្វេសប៊ុកជាមួយយុវជនដទៃទៀត ដើម្បីសម្ដែងការប្រឆាំងរបស់ពួកគេចំពោះការបង្កើតច្បាប់ស្ដីពីសមាគម និងអង្គការមិនមែនរដ្ឋាភិបាលផងដែរ។ ក្រោយមកនៅពេលដែលយុវជនទាំងនោះទៅសម្ដែងការតវ៉ាប្រឆាំងច្បាប់នេះនៅមុខរដ្ឋសភា ពួកគេមួយចំនួនក៏ត្រូវបានសមត្ថកិច្ចចាប់ខ្លួនសួរនាំអស់រយៈពេលមួយថ្ងៃ មុននឹងដោះលែងឲ្យមានសេរីភាពឡើងវិញ។
ទោះជាយ៉ាងណាក៏ដោយចុះ ក្រោយការបង្ហោះពាក្យសម្ដីរបស់យុវជន គង់ រ៉ៃយ៉ា ដែលមន្ត្រីសង្គមស៊ីវិលចាត់ទុកថា ជាការសម្ដែងមតិនេះ គេមិនឃើញមានអំពើហិង្សា ឬភាពចលាចលណាមួយផ្ទុះឡើងនៅក្នុងសង្គមនោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។