តុលាការ​ក្រុងភ្នំពេញ​សម្រេច​ឃុំ​ខ្លួន​មន្ត្រី​នគរបាល​​ព្រហ្មទណ្ឌ​ម្នាក់ ​រឿង​បាញ់​បោះ​​​សេរី និង​ប៉ុនប៉ង​មនុស្ស​ឃាត

ដោយ មាន ឫទ្ធិ
2019-05-06
អ៊ីម៉ែល
មតិ
Share
បោះពុម្ព
អនុប្រធាន​នាយកដ្ឋាន​នគរបាល​ព្រហ្មទណ្ឌ ក្រសួងមហាផ្ទៃ លោក ឌួង ណាគ្រី ក្រោយ​បាន​ឃាត់​ខ្លួនករណីបាញ់បោះ កាល​ពី​ដើម​ខែ​ឧសភា ឆ្នាំ​២០១៩។
អនុប្រធាន​នាយកដ្ឋាន​នគរបាល​ព្រហ្មទណ្ឌ ក្រសួងមហាផ្ទៃ លោក ឌួង ណាគ្រី ក្រោយ​បាន​ឃាត់​ខ្លួនករណីបាញ់បោះ កាល​ពី​ដើម​ខែ​ឧសភា ឆ្នាំ​២០១៩។
រូប​ពី​គេហទំព័រ​អគ្គស្នងការនគរបាលជាតិ

ចៅ​ក្រម​ស៊ើបសួរ​នៃ​តុលាការ​ក្រុងភ្នំពេញ លោក ពេជ្រ វិជ្ជាធរ សម្រេច​ចេញ​ដីកា​ឃុំខ្លួន​អនុ​ប្រធាន​នាយកដ្ឋាន​នគរបាល​ព្រហ្មទណ្ឌ​ លោក ឌួង ណាគ្រី បណ្ដោះ​អាសន្ន នៅ​ពន្ធនាគារ​រាជធានី​ភ្នំពេញ ឬ​ហៅថា ប៉េហ្ស៊ី (PJ) ក្រោម​បទ​ចោទ​ចំនួន​ពីរ គឺ ប្រើប្រាស់​អាវុធ​ដោយ​គ្មាន​ការ​អនុញ្ញាត និង​ប៉ុនប៉ង​​ឃាតកម្ម

មាត្រា ១៩៩ នៃ​ច្បាប់​ព្រហ្មទណ្ឌ​ចែងថា អំពើ​សម្លាប់​មនុស្ស​ដោយ​ចេតនា ដោយ​ប្រើ​អាវុធ ឬ​មិន​ប្រើ​អាវុធ ដោយ​គ្មាន​ស្ថាន​ទម្ងន់​ណា​មួយ​ដូច​បាន​កំណត់​ក្នុង​មាត្រា ២០០ ដល់​មាត្រា ២០៥ គឺ​ជា​ឃាតកម្ម។ ជន​ប្រព្រឹត្ត​បទល្មើស​ ត្រូវ​ផ្ដន្ទាទោស​ដាក់​ពន្ធនាគារ​ពី ១០ឆ្នាំ​ដល់ ១៥ឆ្នាំ។

លោក ឌួង ណាគ្រី ត្រូវ​បាន​សមត្ថកិច្ច​ចាប់​ខ្លួន ហើយ​បញ្ជូន​ទៅ​តុលាការ​ក្រុង​ភ្នំពេញ កាល​ពី​ថ្ងៃ​ទី៣ ឧសភា ក្រោម​បញ្ជា​របស់​អគ្គស្នងការ​នគរបាល​ជាតិ លោក នេត សាវឿន និង​ដីកា​ឲ្យ​ចាប់​ខ្លួន​ពី​ព្រះរាជអាជ្ញា​សាលា​ឧទ្ធរណ៍។

កាល​ពី​យប់​រំលង​អាធ្រាត្រ ចូល​ថ្ងៃ​ទី២ ឧសភា មាន​ហេតុការណ៍​ផ្ទះ​អាវុធ​មួយ​នៅ​ក្បែរ​អធិការដ្ឋាន​នគរបាល ខណ្ឌ​ច្បារ​អំពៅ ដែល​បង្ក​ដោយ​មន្ត្រី​នគរបាល​ព្រហ្មទណ្ឌ​ក្រសួង​មហាផ្ទៃ ​ឈ្មោះ ឌួង ណាគ្រី ដក​កាំភ្លើង​ដៃ​បាញ់​សំដៅ​ទៅ​រថយន្ត ជន​គ្រោះ ២នាក់​ប្ដី​ប្រពន្ធ ៥គ្រាប់​ផ្ទួន​គ្នា ក្រោយ​ពី​មាន​ទំនាស់​ពាក្យ​សម្ដី​ដាក់​គ្នា។

ជន​បង្ក​ហេតុ បាន​បើក​រថយន្ត​ក្នុង​ស្ថានភាព​ស្រវឹង ដេញ​តាម​រថយន្ត​ជន​រង​គ្រោះ​ឈ្មោះ ភូរិស្ស ស្តូរ៉ា ចាប់​តាំង​ពី​មជ្ឈមណ្ឌល​កម្សាន្ត រ៉ុក រហូត​មក​ដល់​អធិការដ្ឋាន​នគរបាល ខណ្ឌ​ច្បារ​អំពៅ។ ក្នុង​ហេតុ​ការណ៍​បាញ់​បោះ​នោះ បណ្ដាល​ឲ្យ​ស្ត្រី​ជា​ប្រពន្ធ​រង​គ្រោះ សន្លប់ ហើយ​រលូត​កូន ៣ខែ ក្រោយ​ពេល​ដឹក​ដល់​មន្ទីរពេទ្យ ដោយ​សារ​ភ័យ​តក់​ស្លុត​នឹង​ស្នូរ​កាំភ្លើង​ជា​ច្រើន​គ្រាប់៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល