កាសែតបាងកកប៉ុស្តិ៍ (Bangkok Post) របស់ថៃ នៅថ្ងៃទី២៧ ខែកុម្ភៈ ឱ្យដឹងថា អាជ្ញាធរកម្ពុជាបានឃាត់ខ្លួនអ្នកនាង ភីយ៉ានុត ថាម៉ារ៉ាត់ (Piyanut Thammarat) ជាជនជាតិថៃ ដែលពាក់ព័ន្ធជាមួយនឹងបុរសជនជាតិតៃវ៉ាន់ ៤នាក់ ដែលត្រូវបានអាជ្ញាធរថៃចោទប្រកាន់ថា បានសម្លាប់ជនជាតិតៃវ៉ាន់ម្នាក់ ហើយបានរត់គេចមកប្រទេសកម្ពុជា។
អគ្គស្នងការរងនគរបាលជាតិប្រទេសថៃ លោក ថាណា ជូវង់ (Thana Chuwong) ប្រាប់កាសែតបាងកកប៉ុស្តិ៍ថា អ្នកនាង ភីយ៉ានុត ថាម៉ារាត់ អាយុ ២៣ ឆ្នាំ គឺជាម្ចាស់រថយន្តម៉ាសស្ដារ (Mazda) ដែលគេជឿថា ធ្លាប់ដឹកសាកសពជនជាតិតៃវ៉ាន់ឈ្មោះ ស៊ី មូ ជៀង (Shih Mou Chiang) ពីកន្លែងឧក្រិដ្ឋកម្មទៅទម្លាក់នៅក្នុងតូបលក់អាហារដែលគ្មានមនុស្សនៅក្បែរវាលយន្តហោះសុវណ្ណភូមិ ក្រុងបាងកក កាលពីថ្ងៃទី២៥ ខែកុម្ភៈ។ មន្ត្រីនគរបាលជាន់ខ្ពស់នេះថា អ្នកនាង ភីយ៉ានុត ថាម៉ារ៉ាត់ នឹងត្រូវនាំមកប្រទេសថៃវិញ ហើយអ្នកនាង គឺជាមនុស្សគន្លឹះក្នុងការបំបែកសំណុំរឿងនេះ។
អ្នកនាំពាក្យស្នងការដ្ឋាននគរបាលរាជធានីភ្នំពេញ លោក សំ វិច្ឆិកា ថ្លែងថា លោកនៅមិនទាន់ដឹងទេ ចំពោះករណីនេះ ហើយលោកបង្វែរសំណួរទៅកាន់អគ្គស្នងការដ្ឋាននគរបាលជាតិ។ វិទ្យុអាស៊ីសេរី នៅមិនទាន់អាចសុំការឆ្លើយតបរឿងនេះពីអ្នកនាំពាក្យអគ្គស្នងការដ្ឋាននគរបាលជាតិ លោក ឆាយ គឹមខឿន បានទេ នៅថ្ងៃទី២៨ ខែកុម្ភៈ។
ប្រធានអន្តោប្រវេសន៍ថៃខេត្តស្រះកែវ ប្រាប់កាសែតបាងកកប៉ុស្តិ៍ កាលពីថ្ងៃទី២៦ ខែកម្ភៈនេះថា មេរ៉ាសុវត្ថិភាពបង្ហាញអំពីក្រុមជនសង្ស័យទាំងនោះ ដែលមកដល់ខេត្តស្រះកែវតាមឡានក្រុងប្រហែលម៉ោង ៤រសៀល ថ្ងៃទី២៥ ខែកម្ភៈ។ ជនសង្ស័យទាំង ៥នាក់ បានបង្ហាញលិខិតឆ្លងដែនដល់មន្ត្រីអន្តោប្រវេសន៍ និងបានឆ្លងដែនចូលមកក្រុងប៉ោយប៉ែត ខេត្តបន្ទាយមានជ័យ កាលពីម៉ោង ៦ល្ងាច នៃថ្ងៃទី២៥ ខែកុម្ភៈ ហើយចូលទៅកាស៊ីណូ វេលាពីម៉ោង ៧កន្លះយប់ និងជួលរថយន្តតាក់ស៊ីចេញទៅភ្នំពេញ នៅម៉ោង ៩យប់ថ្ងៃដដែលនោះ។ នៅពេលឆ្លងដែនចូលកម្ពុជា ប៉ូលិសអន្តោប្រវេសន៍ថៃមិនទាន់អាចឃាត់ខ្លួនពួកគេបានទេ ដោយសារមិនមានដីកាឱ្យឃាត់ខ្លួននៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។