អាជ្ញាធរគ្រោងបណ្ដេញជនជាតិចិន ២៧នាក់ និងបរទេស ១៦៧នាក់ផ្សេងទៀតចេញពីកម្ពុជា
2024.03.14

ក្រសួងមហាផ្ទៃគ្រោងបណ្ដេញជនជាតិចិនចំនួន២៧នាក់ និងជនបរទេសចម្រុះជាតិសាសន៍ផ្សេងទៀតចំនួន ១៦៧នាក់ ចេញពីកម្ពុជានៅពេលខាងមុខ។ ជនបរទេសជិត ២រយនាក់ (១៩៤) ត្រូវបានសមត្ថកិច្ចចាប់ខ្លួន ក្នុងពេលបង្ក្រាបទីតាំងល្បែងខុសច្បាប់ផ្ទួនៗគ្នា ចំនួន ២កន្លែងនៅក្នុងខេត្តព្រះសីហនុ។
អគ្គនាយកដ្ឋានអន្តោប្រវេសន៍ នឹងបណ្តេញជនជាតិចិនចំនួន ២៧នាក់ និងជនបរទេសចម្រុះជាតិសាសន៍ចំនួន ១៦៧នាក់ផ្សេងទៀត ចេញពីប្រទេសកម្ពុជា ប៉ុន្តែមិនទាន់បានកំណត់ពេលវេលាឲ្យបានច្បាស់លាស់នៅឡើយទេ។
កាលពីថ្ងៃទី៩ និងទី១០ ខែមីនា សមត្ថកិច្ចចម្រុះ មានកងរាជអាវុធហត្ថ និងប៉ូលិស បានបើកប្រតិបត្តិការបង្ក្រាបទីតាំង អតីតកាស៊ីណូផារ៉ាដាយ អាយលែន (Paradis Island) និងទីតាំងមួយផ្សេងទៀត ក្នុងគោលបំណងបំបាត់នូវទីតាំងដែលមានបទល្មើស ឆបោកតាមប្រព័ន្ធអនឡាញ (Online Scammed) គ្រប់ប្រភេទនៅក្នុងខេត្តព្រះសីហនុ។
ក្នុងប្រតិបត្តិការនោះ សមត្ថកិច្ចបានរកឃើញជនជាតិចិន២៩នាក់ ជនជាតិតៃវ៉ាន់១២នាក់ ជនជាតិថៃ ៥៤នាក់ ជនជាតិវៀតណាម ១០៩នាក់ និងជនជាតិមីយ៉ាន់ម៉ា ម្នាក់ ដែលបានចូលមកកម្ពុជាដោយខុសច្បាប់។
ជុំវិញរឿងនេះ អង្គការសិទ្ធិមនុស្សបានបង្ហាញការគាំទ្រចំពោះរដ្ឋាភិបាល ដែលចាត់វិធានការបណ្ដេញជនបរទេសទាំងឡាយណា ដែលចូលមកកម្ពុជាខុសច្បាប់ព្រមទាំងបង្កឱ្យមានអំពើឧក្រិដ្ឋកម្មនានាផងនោះ។
នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូ (Licadho) លោក អំ សំអាត មានប្រសាសន៍ថា កម្ពុជាមានច្បាប់ ប្រសិនបើជនបរទេសណាបានចូលមកដោយខុសច្បាប់ គឺត្រូវបណ្ដេញចេញនិងត្រូវតែផ្ដន្ទាទោសទៅតាមច្បាប់។
លោក អំ សំ អាត៖ «ខ្ញុំយល់ថា គឺដល់ពេលដែលកម្ពុជា ត្រូវពង្រឹងបន្ថែមនូវយន្តការគ្រប់គ្រងទៅលើជនអន្តោប្រវេសន៍មួយចំនួន ដែលចូលមកកម្ពុជាខុសច្បាប់ឬក៏ជនជាមុខសញ្ញា ដែលបណ្ដាប្រទេសផ្សេងៗគេបានដាក់ក្នុងបញ្ជីខ្មៅ។ គួរតែមានការត្រួតពិនិត្យឱ្យបានច្បាស់លាស់មុននឹងអនុញ្ញាត ឱ្យចូលមកក្នុងប្រទេសកម្ពុជា»។
ស្រដៀងគ្នានេះដែរ ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព (PDP) លោក យង់ គិមអេង មានប្រសាសន៍ថា លោកចង់ឃើញអាជ្ញាធររបស់រដ្ឋាភិបាលកម្ពុជា អនុវត្តន៍ច្បាប់អន្តោប្រវេសន៍ជាប្រចាំ ដើម្បីទប់ស្កាត់បទល្មើសនិងអំពើឧក្រិដ្ឋផ្សេងៗ ដែលបង្កឡើងដោយជនបរទេស ហើយកំពុងតែកើតមាននៅក្នុងសង្គមកម្ពុជា។
លោក យង់ គិមអេង មានប្រសាសន៍ទៀតថា បច្ចុប្បន្នជនបរទេសខ្លះ ដែលចូលមកកម្ពុជាមិនស្របច្បាប់ ហើយថែមទាំងបានប្រព្រឹត្តខុសនឹងច្បាប់កម្ពុជាផង។
លោក យង់ គិមអេង៖ «ជនអន្តោប្រវេសន៍ បង្កបញ្ហាស្មុគស្មាញខ្លាំងណាស់ អ្នកខ្លះចូលមកបង្កឧក្រិដ្ឋកម្ម អ្នកខ្លះទៀតចូលមកបង្កបទល្មើសផ្សេងៗដែលធ្វើឱ្យប៉ះពាល់ដល់សង្គមកម្ពុជា។ ជាពិសេសយើងឃើញហើយដូចករណីជនជាតិចិននិងករណីផ្សេងៗទៀតដែលធ្វើឱ្យមានបញ្ហានៅក្នុងប្រទេសហ្នឹង គឺដោយសារតែការអនុវត្តន៍ច្បាប់អន្តោប្រវេសន៍ មិនបានហ្មត់ចត់និងដិតដល់»។
របាយការណ៍របស់អគ្គនាយកដ្ឋានអន្តោប្រវេសន៍ ឱ្យដឹងថា ក្នុងឆ្នាំ២០២៣ ក្រសួងមហាផ្ទៃ បានបណ្ដេញជនបរទេសជាង ៥រយលើក (៥១២) ស្មើនិងជនល្មើសចំនួនជាង ២ពាន់នាក់ (២,១៥៩) ចេញពីប្រទេសកម្ពុជា បន្ទាប់ពីពួកគេបានប្រព្រឹត្តអំពើល្មើសច្បាប់។
ជនបរទេសទាំងនោះ មាន៣៩សញ្ជាតិ ក្នុងនោះជនជាតិចិនច្រើនជាងគេចំនួនជាង ១ពាន់នាក់(១,០១១) ឥណ្ឌូណេស៊ី ជិត ៣រយនាក់ (២៦៧) វៀតណាម ជាង ៥រយនាក់ (៥០៧) ថៃ៦០នាក់ ឥណ្ឌា៧៧នាក់ ជប៉ុន៥៣នាក់ នីហ្សេរីយ៉ា ៣៣នាក់ ម៉ាឡេស៊ី ៣២នាក់ តៃវ៉ាន់ ២៤នាក់ កូរ៉េខាងត្បូង២០នាក់ ហ្វីលីពីន ១៦នាក់ អាមេរិក ១៤នាក់ អង់គ្លេស ១៤នាក់ និង២៦សញ្ជាតិផ្សេងទៀត តែមានចំនួនតិចតួច៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។