លោក ហ៊ុន ម៉ាណែត បានសរសេរសារបង្ហោះតាមហ្វេសប៊ុកនៅថ្ងៃទី០៩ ខែកញ្ញា អំពាវនាវឱ្យពលរដ្ឋបន្តជឿទុកចិត្តលើរដ្ឋាភិបាលដែលកំពុងធ្វើការងារយ៉ាងសកម្ម ដើម្បីរកដំណោះស្រាយបញ្ចប់បញ្ហាព្រំដែនជាមួយប្រទេសថៃឱ្យបានឆាប់រហ័ស បើទោះជាការងារជាច្រើនទាំងនោះមិនត្រូវបានផ្សព្វផ្សាយជាសាធារណៈ និងមើលទៅហាក់ដូចជាមានភាពស្ងៀមស្ងាត់ពេកក៏ដោយ។
លោកបានបន្តថា មូលហេតុរូបលោក និងឥស្សរជនសំខាន់ៗ មិនបញ្ចេញសារតាមបណ្ដាញសង្គម និងទូរទស្សន៍ជាប្រចាំ ហើយទុកភារកិច្ចឱ្យអ្នកនាំពាក្យរដ្ឋាភិបាល អ្នកនាំពាក្យក្រសួងការពារជាតិ និងអ្នកនាំពាក្យក្រសួងការបរទេស ធ្វើសន្និសីទសារព័ត៌មាន ដោយសារសភាពការប្រែប្រួលលឿននិងមិនច្បាស់លាស់ ហើយដើម្បីធានាសុក្រឹតភាពព័ត៌មាន កុំឱ្យពលរដ្ឋច្របូកច្របល់ក្នុងផ្លូវអារម្មណ៍។
លោក ហ៊ុន ម៉ាណែត បានបញ្ជាក់ទៀតថា ចាត់តាំងពីមានបទឈប់បាញ់នៅពាក់កណ្ដាលយប់ថ្ងៃទី២៨ ខែកក្កដា រដ្ឋាភិបាលមិនបានបញ្ជាឱ្យកងទ័ពជួរមុខដកថយឡើយ ហើយក៏គ្មានកិច្ចប្រជុំទ្វេឬចរចាទ្វេភាគី ដែលមានភ្ជាប់លក្ខខណ្ឌដោះដូរដីជាមួយប្រទេសថៃនោះដែរ។
ការចេញបកស្រាយរបស់លោក ហ៊ុន ម៉ាណែត នៅពេលនេះ បានធ្វើឡើងស្របពេលពលរដ្ឋ និងមន្ត្រីគណបក្សប្រឆាំងបានរិះគន់ថា ការប្រកាសឱ្យកងទ័ពកម្ពុជាស្ងៀមស្ងាត់ និងអត់ធ្មត់ បានធ្វើឱ្យទាហានថៃដើររាយបន្លាលួសតាមអំពើចិត្តតាមព្រំដែន ឈូសឆាយធ្វើផ្លូវ និងជីកធ្វើលេណដ្ឋាន ហើយបានព័ទ្ធយកប្រាសាទតាមាន់ធំ ភ្នំទ្រព្យ និងបណ្ដេញពលរដ្ឋខ្មែរនៅតាមព្រំដែនចេញពីលំនៅឋានជាដើម។
អតីតតំណាងរាស្ដ្រគណបក្សសង្គ្រោះជាតិលោក អ៊ុំ សំអាន បានយល់ឃើញថា ការលើកឡើងរបស់លោក ហ៊ុន ម៉ាណែត នៅពេលនេះ គ្រាន់តែជាលេសដោះសាយករួចខ្លួន។ លោកបានបន្តថា លោក ហ៊ុន ម៉ាណែត មិនហ៊ានបញ្ជាឱ្យកងទ័ពកម្ពុជាទៅដកបន្លាលួសដែលទាហានថៃរាយតាមព្រំដែន ដោយសារខ្លាចផ្ទុះសង្គ្រាមជាលើកទី២ អាចធ្វើឱ្យប៉ះពាល់អំណាចរបស់ខ្លួន។
បើគាត់ (ហ៊ុន ម៉ាណែត) ថាមិនស្ងៀមស្ងាត់ គាត់គួរតែមានចំណាត់ការឱ្យប្រជាពលរដ្ឋឃើញជាក់ស្ដែងទៅ គឺបញ្ជាឱ្យទាហានទៅរើបន្លាលួសនៅភូមិជោគជ័យ និងភូមព្រៃចាន់ និងមើលការខុសត្រូវសួរសុខទុក្ខប្រជាពលរដ្ឋដែលរស់នៅក្នុងតង់នៅក្នុងភូមិទាំងពីរហ្នឹង ហើយតំបន់ផ្សេងទៀត។ ដូចជាច្រកអានសេះ ប្រាសាទតាមាន់ធំ និងភ្នំទ្រព្យ ត្រូវទៅរើបន្លាលួសចេញ យកដីហ្នឹងមកវិញ កុំឱ្យបាត់បង់ទឹកដី។
— លោក អ៊ុំ សំអាន
មន្ត្រីគណបក្សប្រឆាំងរូបនេះ ក៏បានជំរុញឱ្យលោក ហ៊ុន ម៉ាណែត ត្រូវពន្លឿនយកសំណុំរឿងព្រំដែននៅតំបន់ប្រាសាទតាមាន់តូច ប្រាសាទតាមាន់ធំ ប្រាសាទតាក្របី និងតំបន់មុំបី រួមទាំងបញ្ចូនតំបន់ភ្នំទ្រព្យ និងតំបន់អានសេះ ប្ដឹងទៅតុលាការយុត្តិធម៌អន្តរជាតិ (ICJ) ដោយមិនត្រូវអូសបន្លាយពេលយូរទៀតនោះទេ។
ទោះជាយ៉ាងណាលោក ហ៊ុន ម៉ាណែត គ្រាន់តែបញ្ជាក់ថា កម្ពុជាបន្តប្រកាន់យកជំហរដោះស្រាយបញ្ហាព្រំដែនដោយសន្តិវិធី តាមរយៈការប្រើប្រាស់យន្តការព្រំដែនដែលមានស្រាប់ គឺគណៈកម្មការចម្រុះព្រំដែនកម្ពុជា-ថៃ (JBC) និងផ្អែកលើមូលដ្ឋាននៃកិច្ចព្រមព្រៀងរវាងកម្ពុជានិងថៃ រួមទាំងសន្ធិសញ្ញាពាក់ព័ន្ធ និងច្បាប់អន្តរជាតិ ប៉ុន្តែមិនបានបញ្ជាក់រឿងដំណើរការប្ដឹងទៅតុលាការយុត្តិធម៌អន្តរជាតិឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។