សាលាឧទ្ធរណ៍លើកពេលសាកសួរលោក ឌិន ពុទ្ធី ក្នុងសំណុំរឿងប៉ូលិសដួលមុខឡាន
2020.01.17
ប្រធានសមាគមពង្រឹងសេដ្ឋកិច្ចក្រៅប្រព័ន្ធកម្ពុជា លោក ឌិន ពុទ្ធី (រូបពាក់កម្រផ្កា) ត្រូវបានព្រះសង្ឃសូធ្យមន្តប្រោះព្រំក្រោយពេលចេញពីពន្ធនាគារខេត្តបន្ទាយមានជ័យ នៅថ្ងៃទី១៤ ខែមករា ឆ្នាំ២០១៧។
RFA
ព្រះរាជអាជ្ញានៃមហាអយ្យកាអមសាលាឧទ្ធរណ៍លោក តាន់ សេណារ៉ុង បានលើកពេលសាកសួរលោក ឌិន ពុទ្ធី ទៅពេលក្រោយវិញ ក្នុងសំណុំរឿងអតីតនាយរងប៉ុស្តិ៍នគរបាលអន្តោប្រវេសន៍ច្រកព្រំដែនអន្តរជាតិប៉ោយប៉ែត គឺលោក ឈាន ពិសិដ្ឋ ដែលបានដួលមុខឡានរបស់លោក។
ប្រធានសមាគមពង្រឹងសេដ្ឋកិច្ចក្រៅប្រព័ន្ធកម្ពុជា លោក ឌិន ពុទ្ធី ថ្លែងថា តុលាការឧទ្ធរណ៍បានពន្យារពេលសាកសួរដោយគ្មានថ្ងៃកំណត់នោះទេ។ មន្ត្រីសង្គមស៊ីវិលរូបនេះនៅតែទទូចដល់តុលាការឱ្យពន្លឿននីតិវិធីសំណុំរឿងនេះឱ្យបានឆាប់ ដើម្បីជួយរកយុត្តិធម៌ដល់លោក៖ «នៅក្នុងរឿងក្ដីនេះខ្ញុំសំណូមពរទៅតុលាការ ទម្លាក់ចោលការចោទប្រកាន់ចំពោះរូបខ្ញុំបាទទាំងអស់ ពីព្រោះដោយសាររឿងនេះពន្យារពេលយូរហើយ។ មួយទៀតលោក ឈាន ពិសិដ្ឋ ដែលជាដើមចោទប្ដឹងខ្ញុំហ្នឹងអត់ឃើញចូលមកបំភ្លឺតុលាការម្ដងណាទេ ហើយតុលាការចេះតែដំណើរនីតិវិធីរហូតមក»។
មន្ត្រីសង្គមស៊ីវិលរូបនេះបានប្ដឹងឧទ្ធរណ៍ដោយសារលោកមិនពេញចិត្តនឹងសាលក្រមរបស់សាលាដំបូងខេត្តបន្ទាយមានជ័យ ដែលបានសម្រេចឱ្យលោកចាញ់ក្ដី។
ព្រះរាជអាជ្ញានៃមហាអយ្យកាអមសាលាឧទ្ធរណ៍លោក តាន់ សេណារ៉ុង បង្គាប់ឱ្យលោក ឌិន ពុទ្ធី ចូលបំភ្លឺតុលាការនៅបន្ទប់ពិភាក្សាដេញដោលនៅព្រឹកថ្ងៃទី១៦ មរានេះ។
កាលពីធ្នូឆ្នាំ២០១៨ សាលាដំបូងខេត្តបន្ទាយមានជ័យបានផ្ដន្ទាទោសលោក ឌិន ពុទ្ធី ដាក់ពន្ធនាគារ ១ឆ្នាំ តែអនុវត្តទោសតែ ២១ថ្ងៃ ដោយបទចោទថា បានបើកឡានបុកលោក ឈាន ពិសិដ្ឋ កាលពីខែធ្នូឆ្នាំ២០១៦។ មន្ត្រីសង្គមស៊ីវិលរូបនេះថា ការសម្រេចរបស់សាលាដំបូងខេត្តនេះ ជារឿងអយុត្តិធម៌។ លោកឱ្យដឹងថា កាលពីឆ្នាំ២០១៦ នោះ នាយរងប៉ុស្តិ៍ប៉ូលិសគឺលោក ឈាន ពិសិដ្ឋ បានធ្វើពុតជាដួលដោយខ្លួនឯង។
លោក ឌិន ពុទ្ធី ត្រូវបានសាលាដំបូងខេត្តបន្ទាយមានជ័យ សម្រេចដោះលែងពីពន្ធនាគារកាលពីថ្ងៃទី១៤ ខែមករា ឆ្នាំ២០១៧ ប៉ុន្តែលោកត្រូវបានដាក់ឱ្យស្ថិតនៅក្រោមការពិនិត្យតាមដានរបស់តុលាការដដែល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ