លោក ម៉ម សូណង់ដូ ធ្លាក់ខ្លួនឈឺក្នុងពន្ធនាគារ

អ្នកស្រី ឌិន ផាណារ៉ា ជាភរិយាលោក ម៉ម សូណងដូ ឲ្យដឹងនៅថ្ងៃទី១៥ ខែសីហា នេះថា ស្វាមីអ្នកស្រីកំពុងឈឺធ្ងន់ធ្ងរនៅក្នុងគុកព្រៃស។

ដោយ វិជ័យ អានន្ទ
2012-08-16

អ្នកស្រីមានប្រសាសន៍បន្តថា ជំងឺនោះមានអាការៈក្ដៅខ្លួនខ្លាំង និងរាក ហើយឥឡូវនេះគ្រូពេទ្យនៅពន្ធនាគារកំពុងព្យួរសេរ៉ូម។ ទោះយ៉ាងណា លោក ម៉ម សូណង់ដូ មិនបានធូរស្បើយពីជំងឺនោះឡើយ។ ចាប់តាំងពីលោកត្រូវតុលាការសម្រេចឃុំខ្លួននៅពន្ធនាគារនោះរួចមក លោក ម៉ម សូណង់ដូ បានឈឺចំនួនពីរដងរួចមកហើយ រួមទាំងលើកនេះ។

អ្នកស្រី ឌិន ផាណារ៉ា មានប្រសាសន៍ថា លោក ម៉ម សូណង់ដូ ឈឺចាប់ពីថ្ងៃទី១២ សីហា មក៖ «ពីរបីថ្ងៃមុនមុខគាត់ហើម មុខខាងស្ដាំដៃ។ អាហើមហ្នឹងវាមានកម្ដៅហើយ ហើមតិចៗ ហើយជំងឺហ្នឹងអត់ដឹងជំងឺអ្វីទេ ព្រោះធ្លាប់កើតអ៊ីចឹងម្ដងហើយ ៧ ៨ខែមុនហ្នឹង ទៅពេទ្យកាល់ម៉ែតម្ដង ពេទ្យកាល់ម៉ែតរកអត់ឃើញដែរ យូរៗទៅវាបាត់ខ្លួនវាទៅ។ ដល់ឥឡូវនេះស្រាប់វាកើតឡើងទៀត វាស្រកបានបន្តិច ប៉ុន្តែឥឡូវហ្នឹងជំងឺហ្នឹងមិនទាន់ជាផងស្រាប់រាក និងគ្រុនក្ដៅ»។

លោក ម៉ម សូណង់ដូ ត្រូវបានប៉ូលិសចាប់ខ្លួនកាលពីថ្ងៃទី១៥ កក្កដា ឆ្នាំ២០១២ បន្ទាប់ពីលោកបានវិលត្រឡប់មកពីសហរដ្ឋអាមេរិកបានបីថ្ងៃ។ តុលាការបានសម្រេចឃុំខ្លួនលោក ម៉ម សូណង់ដូ នៅពន្ធនាគារព្រៃស ក្រោមការចោទប្រកាន់ពីបទផ្ដួចផ្ដើមគំនិតប្រឆាំងអ្នកសាធារណៈ ធ្វើកុប្បកម្មជ្រៀតជ្រែកខុសច្បាប់នៅក្នុងការបំពេញមុខងារសាធារណៈ ញុះញង់ឲ្យប្រជាពលរដ្ឋកាន់កាប់អាវុធខុសច្បាប់ និងប្រឆាំងនឹងអាជ្ញាធរស្របច្បាប់ ដែលមានចែងក្នុងមាត្រាមួយចំនួននៃព្រហ្មទណ្ឌទាក់ទងរឿងជម្លោះដីនៅភូមិប្រម៉ា ឃុំកំពង់ដំរី ស្រុកឆ្លូង ខេត្តក្រចេះ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។