សង្គមស៊ីវិលស្នើឲ្យរដ្ឋាភិបាលទប់ស្កាត់អំពើជួញដូរផ្លូវភេទ
2011.08.16
ថ្លែងនៅក្នុងសិក្ខាសាលាផ្សព្វផ្សាយរបាយការណ៍របស់ខ្លួន ស្ដីអំពីការជួញដូរផ្លូវភេទ ការកេងប្រវ័ញ្ចផ្លូវភេទ និងការរំលោភសេពសន្ថវៈនៅកម្ពុជា ក្នុងឆ្នាំ២០១០ នៅទីក្រុងភ្នំពេញ ថ្ងៃទី១៦ ខែសីហា នាយកប្រតិបត្តិគណៈកម្មាធិការបំបាត់ពេស្យាចារ ការរំលោភ និងការជួញដូរកុមារនៅកម្ពុជា ហៅថា អ៊ិកផាត (Ecpat) លោក ជិន ច័ន្ទវាសនា មានប្រសាសន៍ថា ក្រៅពីរបកគំហើញសំខាន់ៗនៅក្នុងរបាយការណ៍ទិន្នន័យស្ថិតិរួមរបស់អង្គការនានានោះ ក៏មានអនុសាសន៍ខ្លះទៅនាយកដ្ឋាន និងស្ថាប័នរដ្ឋាភិបាលមួយចំនួនដើម្បីធ្វើការពិចារណា និងចាត់វិធានការទាន់ពេលក្នុងការទប់ស្កាត់បញ្ហាទាំងនេះដែរ។
លោកមានប្រសាសន៍ទៀតថា ៖ «ដូច្នេះហើយការលើកអនុសាសន៍របស់យើង គឺហាក់ដូចជាគ្រាន់តែស្នើសុំឲ្យគាត់ដឹកនាំ មិនមែនជាការបញ្ជាទេ ប៉ុន្តែជាការស្នើសុំមួយទាក់ទងនឹងការថ្កោលទោសអំពើកេងប្រវ័ញ្ចផ្លូវភេទគ្រប់ទម្រង់ រដ្ឋាភិបាលគួរដឹកនាំការងារនេះ ដែលមានការចូលរួមពីអង្គការក្រៅរដ្ឋាភិបាលនានា ព្រោះជារឿងមួយដែលគួរធ្វើទូទាំងប្រទេស ជាពិសេសក្រុមការងារដឹកនាំថ្នាក់ជាតិនេះ គួរតែដឹកនាំការងារនេះឡើង ដើម្បីឲ្យ NGOs គាត់បានចូលរួម ហើយធ្វើម៉េចបានថ្កោលទោសការកេងប្រវ័ញ្ចផ្លូវភេទនេះជាលក្ខណៈទូទៅតែម្ដង»។
នៅក្នុងសៀវភៅរបាយការណ៍ដែលមាន ៨៩ទំព័រ ស្ដីអំពីការជួញដូរផ្លូវភេទ ការកេងប្រវ័ញ្ចផ្លូវភេទ និងការរំលោភសេពសន្ថវៈនៅកម្ពុជា ក្នុងឆ្នាំ២០១០ បានសរសេរបង្ហាញពីចំនួនករណីស្ថានភាពជនរងគ្រោះ មូលហេតុដែលនាំឲ្យមានការជួញដូរ និងការរំលោភសេពសន្ថវៈ សាវតាររបស់ជនប្រព្រឹត្ត ការចាត់វិធានការតាមផ្លូវច្បាប់ និងការបញ្ជូនជនរងគ្រោះទៅកាន់សហគមន៍វិញជាដើម។
ទន្ទឹមនឹងគ្នានេះ ក៏មានអនុសាសន៍មួយចំនួនទៀតដែរ ដើម្បីផ្ដល់ឲ្យរដ្ឋាភិបាលធ្វើការប្រយុទ្ធប្រឆាំងបញ្ហាទាំងនេះ។ ក្នុងរបាយការណ៍បញ្ជាក់ថា មានជនរងគ្រោះ ៨០% មិនបានទទួលសេវាផ្នែកច្បាប់ក្នុងការដោះស្រាយករណីរបស់ពួកគេ ជនល្មើសមិនត្រូវបានផ្ដន្ទាទោស ហើយរដ្ឋាភិបាលកម្ពុជាគួរដឹកនាំការងារនេះ។ នាយកដ្ឋានសំខាន់ៗរបស់រាជរដ្ឋាភិបាល គួរធ្វើការឲ្យបានជិតស្និទ្ធជាមួយសហគមន៍ និងសាលារៀន និងពង្រឹងការអនុវត្តគោលនយោបាយការពារកុមារ។
ឆ្លើយតបបញ្ហានេះ អនុប្រធាននាយកដ្ឋានប្រឆាំងការជួញដូរមនុស្ស និងការពារអនីតិជន លោកឧត្ដមសេនីយ៍ត្រី ប៊ែន បូរ៉ានី ដែលបានចូលរួមក្នុងពិធីផ្សព្វផ្សាយរបាយការណ៍នេះដែរ មានប្រសាសន៍ថា នេះជាសមិទ្ធផលមួយរបស់សម្ព័ន្ធក្រុមអង្គការសង្គមស៊ីវិលដែលបានខិតខំក្នុងការស្វែងរកដំណោះស្រាយ និងដើម្បីប្រយុទ្ធប្រឆាំងការជួញដូរមនុស្ស និងការកេងប្រវ័ញ្ចផ្លូវភេទលើកុមារនៅកម្ពុជា។
លោកថា ក្រសួងមហាផ្ទៃកំពុងបន្តធ្វើការស្រាវជ្រាវ និងទប់ស្កាត់លើបញ្ហាពាក់ព័ន្ធទាំងនេះជាបន្តបន្ទាប់ ប៉ុន្តែអនុសាសន៍នៅក្នុងរបាយការណ៍នេះគួរតែមានពាក្យខ្លះត្រូវធ្វើការកែសម្រួលឡើងវិញ ៖ «យើងគួរកុំដាក់ថា រដ្ឋាភិបាលគួរតែដឹកនាំ ខ្ញុំអត់ចង់ឲ្យប្រើពាក្យគួរ អាហ្នឹងវាមិនខុសពីអីថា ធ្វើក៏បានមិនធ្វើក៏បាន ពាក្យហ្នឹងគឺវាមិនល្អទេ។ ព្រោះឥឡូវរាជរដ្ឋាភិបាលមានគោលនយោបាយហើយ ប្រយុទ្ធប្រឆាំងការជួញដូរ ជាពិសេសការឆ្លងដែន គឺមានទាំងអស់ ផ្នែកលើពិធីសារផាលាម៉ូ ច្បាប់ស្ដីពីការបង្ក្រាបការជួញដូរមនុស្ស និងអាជីវកម្មផ្លូវភេទ យើងក៏លើកអំពីការគោរពសិទ្ធិមនុស្ស ជាពិសេសគឺគោរពសិទ្ធិកុមារដែរ យើងមានអស់ហើយ យើងគួរដាក់ពាក្យសហការវិញ»។
នេះជារបាយការណ៍លើកទី៥ហើយ ដែលបានរៀបចំដោយបណ្ដាញទាំង៤ គឺមាន គណៈកម្មាធិការអ៊ិកផាតកម្ពុជា គណៈកម្មាធិការអង្គការមិនមែនរដ្ឋាភិបាលដើម្បីសិទ្ធិកុមារ សម្ព័ន្ធកូសេកាំ និងសម្ព័ន្ធបញ្ឈប់ការជួញដូរកុមារ ហៅថា Cambodia Acts។
ក្នុងឆ្នាំ២០១០ ដែលក្នុងនោះគេបានរកឃើញថា ករណីជួញដូរផ្លូវភេទមានចំនួន ៣៩ករណី ពាក់ព័ន្ធជនរងគ្រោះ ៣៩នាក់ និងជនប្រព្រឹត្តចំនួន ៦១នាក់។ ករណីកេងប្រវ័ញ្ចផ្លូវភេទមានចំនួន ២៨ករណី មានជនរងគ្រោះចំនួន ៤៣នាក់ និងមានមេខ្យល់ចំនួន ៣៤នាក់ និងករណីសេពសន្ថវៈមានចំនួន ៥២៤ករណី មានជនរងគ្រោះ ៥៣៩នាក់ និងជនល្មើសចំនួន ៥៩៦នាក់៕
រឿងដែលគេអានច្រើនបំផុត
RFA
- ធនាគារABA មិនព្រមបើកប្រាក់ជាង១ម៉ឺន ៥ពាន់ដុល្លារ ដែលឧបត្ថម្ភដល់បុគ្គលិកណាហ្គាវើលដ៍
- គណបក្សភ្លើងទៀនស្វាគមន៍វត្តមានលោក រ៉ុង ឈុន អតីតមន្ត្រីជាន់ខ្ពស់ គ.ជ.ប ដែលហក់មកចូលរួមជីវភាពជាមួយគណបក្សនេះ
- ថៃយល់ព្រមឱ្យកម្ពុជាប្រើពាក្យ «គុនខ្មែរ» ក្នុងព្រឹត្តិការណ៍ស៊ីហ្គេម២០២៣
- «ករណីឧកញ៉ា សៀង ចាន់ហេង ប្រគល់ដីឲ្យប្អូនស្រីនាយករដ្ឋមន្ត្រីបង្ហាញថា អ្នកធំតែងឈ្នះ»
- អាមេរិក ផ្តល់ពានរង្វាន់អ្នកការពារសិទ្ធិមនុស្សសកលប្រចាំឆ្នាំឲ្យកញ្ញា ឈឹម ស៊ីថរ
រឿងដែលគេអានច្រើនបំផុត
ព័ត៌មានថ្មីៗ
- លោក ហ៊ុន សែន បន្តប្រកាសថា នឹងការពារមិនឱ្យមានរដ្ឋប្រហារ ដើម្បីអភិវឌ្ឍប្រទេសឱ្យរីកចំរើន
- អ្នកវិភាគថា លោក ហ៊ុន ម៉ាណែត បកស្រាយបំភ្លៃច្បាប់បោះឆ្នោតជ្រើសតាំងតំណាងរាស្ត្រ
- អ្នកឃ្លាំមើលថា គណបក្សប្រជាជនកម្ពុជាពុំបានប្រកាន់ជំហរគោលនយោបាយបរទេសឯករាជ្យ
- ប្រតិភូខ្មែរក្រោមប្រាប់សន្និសិទអន្តរសាសនាស្តីពីការរំលោភសិទ្ធិសាសនាខ្មែរក្រោម
- គណបក្សភ្លើងទៀនចាប់ផ្ដើមយុទ្ធនាការពង្រឹងសមាជិកបក្សតាមមូលដ្ឋាន ដើម្បីទទួលបានការគាំទ្រពីប្រជាពលរដ្ឋ