កម្មករ​រោងចក្រ​ស្បែក​ជើង​ជាង​២០០​នាក់​បន្ត​ធ្វើ​កូដកម្ម

កម្មករ​រោងចក្រ​ស្បែក​ជើង​ចំនួន​ជាង ២០០​នាក់ នៅ​រោងចក្រ​ឈ្មោះ ឃ្លីន ស៊ឺខូល (Clean Circle) នៅ​ជាយ​ទីក្រុង​ភ្នំពេញ នៅ​ថ្ងៃ​ទី​១០ ខែ​ឧសភា ឆ្នាំ​២០១១ កំពុង​តែ​បន្ត​ធ្វើ​កូដកម្ម​មិន​ចូល​ធ្វើ​ការងារ​រយៈពេល ៤​ថ្ងៃ​មក​ហើយ ដើម្បី​សម្ដែង​ការ​ទាមទារ​ឲ្យ​ថៅកែ​រោងចក្រ​នេះ​ទទួល​យក​កម្មករ​ចំនួន​ជាង ២០​នាក់ ដែល​រង​ការ​បញ្ឈប់​ពី​ការងារ​ដោយសារ​តែ​ចប់​កិច្ចសន្យា។
ដោយ សុខ សេរី
2011-05-10
Share

ប្រភព​ពី​កម្មករ​បាន​ឲ្យ​ដឹង​ថា ក្រុម​កម្មករ​កំពុង​តែ​ឈរ​នៅ​ក្រៅ​រោងចក្រ ដើម្បី​សម្ដែង​ការ​ទាមទារ​ដោយ​សន្តិវិធី​ក្រោម​កម្ដៅ​ថ្ងៃ​តាំង​ពី​ថ្ងៃ​ទី​៧ ខែ​ឧសភា​មក។ តំណាង​រោងចក្រ​បាន​ចេញ​មក​ជួប​កម្មករ ប៉ុន្តែ​មិន​ទាន់​បាន​ដោះស្រាយ​នៅ​ឡើយ​ទេ។ ចំណែក​ឯ​កង​កម្លាំង​នគរបាល​មួយ​ចំនួន​បាន​ឈរ​ជើង​ឃ្លាំមើល​ក្រុម​កម្មករ​តវ៉ា​ទាំង​នោះ​ខ្លាចក្រែង​មាន​អំពើ​ហិង្សា។

កម្មករ​រោងចក្រ​ស្បែក​ជើង​ឈ្មោះ គឹម សុខទ្បាយ អាយុ ២៤​ឆ្នាំ​មក​ពី​ខេត្ត​កណ្តាល បាន​ថ្លែង​ប្រាប់​តាម​ទូរស័ព្ទ​ថា ដរាប​ណា​ការ​ទាមទារ​មិន​ត្រូវ​បាន​ដោះស្រាយ កូដកម្ម​នៅ​តែ​បន្ត ៖ «ខ្ញុំ​ចង់​ជួយ​កម្មករ​នៅ​ក្នុង​ហ្នឹង កម្មករ​ចាស់​ដែល​គាត់​ផុត​ក្រុងត្រា​ហើយ ដែល​គាត់​ដក​ចេញ​ហើយ គាត់​មិន​បាន​ជម្រាប​ពួក​គាត់​មុន។ គាត់​ដក​ក៏​ដក​ចុះ ព្រោះ​អី​ផុត​កុងត្រា ប៉ុន្តែ​សុំ​ឲ្យ​គាត់​ធ្វើ​តាម​ច្បាប់។ ពួក​ខ្ញុំ​មិន​ថា​កម្មករ​ថ្មី ឬ​កម្មករ​ចាស់​ទេ គឺ​អត់​សុខ​ចិត្ត​ទេ​ដែល​គាត់​ដក​អ៊ីចឹង»

ប្រធាន​សម្ព័ន្ធ​សហជីព​ប្រជាធិបតេយ្យ​កម្មករ​កាត់ដេរ​កម្ពុជា ហៅ​កាត់​ថា ស៊ីខាឌូ (C.CAWDU) ប្រចាំការ​នៅ​រោងចក្រ​ស្បែក​ជើង​នោះ គឺ​លោក អ៊ុក ភីរម្យ អាយុ ២៩​ឆ្នាំ បាន​ថ្លែង​ថា សហជីព​សុំ​ឲ្យ​ថៅកែ​រោងចក្រ​ដោះស្រាយ​ជា​បន្ទាន់ ៖ «ដោះស្រាយ​កម្មករ​ឲ្យ​សមរម្យ កម្មករ​ហ្នឹង​អត់​មាន​កំហុស​អ្វី​ទេ។ សុំ​ឲ្យ​កម្មករ​ហ្នឹង​ចូល​ធ្វើការ​វិញ​ដូច​ដើម។ សំណូមពរ​មួយ​ទៀត​ខ្ញុំ​សុំ​ឲ្យ​ក្រុមហ៊ុន​ហ្នឹង​បន្ត​កិច្ចសន្យា​ការងារ​ឲ្យ​កម្មករ​ទាំង​អស់​វិញ»

កម្មករ​ចំនួន​ជាង ១០០​នាក់​ផ្សេង​ទៀត​នៅ​តែ​បន្ត​ការងារ​ជា​ធម្មតា គឺ​មិន​ចូលរួម​ធ្វើ​កូដកម្ម​នោះ​ទេ។ កូដកម្ម​នេះ​បាន​ចាប់​ផ្ដើម​តាំង​ពី​ថ្ងៃ​ទី​៦ និង​ថ្ងៃ​ទី​៧ ខែ​ឧសភា កន្លង​ទៅ​នេះ។

តំណាង​រោងចក្រ​ស្បែង​ជើង​ឈ្មោះ ម៉ាទ្បៃ បាន​បញ្ជាក់​ថា ថៅកែ​រោងចក្រ​កំពុង​តែ​ដោះស្រាយ​បញ្ហា​នេះ។

មន្ត្រី​នាយកដ្ឋាន​នៃ​ក្រសួង​ការងារ និង​បណ្ដុះបណ្ដាល​វិជ្ជាជីវៈ សុំ​មិន​ឲ្យ​បញ្ចេញ​ឈ្មោះ បាន​មាន​ប្រសាសន៍​ថា មន្ត្រី​ជំនាញ​កំពុង​តែ​ដោះស្រាយ​រឿង​នេះ ហើយ​ក្រសួង​ចង់​ឲ្យ​បញ្ហា​នេះ​បញ្ចប់​ឲ្យ​បាន​ឆាប់ ដើម្បី​មិន​ឲ្យ​រាំង​ស្ទះ​ដល់​ដំណើរការ​រោងចក្រ និង​ផលិតកម្ម៕

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល