អ្នកជំងឺម្នាក់ចោទក្រុមគ្រូពេទ្យកាល់ម៉ែតថាមានការរើសអើងចំពោះអ្នកជំងឺ
2012.08.28
អ្នកស្រីបញ្ជាក់ថា ដោយសារអ្នកស្រីគ្មានលុយបង់ថ្លៃសេវាព្យាបាលជំងឺ អ្នកស្រីកាន់ប័ណ្ណអ្នកក្រីក្រ ដែលរដ្ឋាភិបាលផ្ដល់ជូនអ្នកស្រី ដើម្បីសុំឲ្យគ្រូពេទ្យជួយព្យាបាលជំងឺញ័រជើង។ តែលោកវេជ្ជបណ្ឌិត ជា ផែន បានអនុញ្ញាតឲ្យអ្នកស្រីសម្រាកព្យាបាលបានចំនួនបីថ្ងៃ។ បន្ទាប់មកអ្នកស្រីបានចោទថា គ្រូពេទ្យនោះរកលេសបង្កការលំបាកផ្សេងៗលើរូបអ្នកស្រី។
អ្នកស្រីបន្ថែមថា ក្នុងរយៈពេលបីថ្ងៃ លោកវេជ្ជបណ្ឌិត ជា ផែន ប្រើពាក្យសម្ដីមិនសមរម្យទ្រគោះបោះបោកជាច្រើនដាក់អ្នកស្រី និងរាល់ពេលគ្រូពេទ្យរូបនេះចុះពិនិត្យជំងឺ មិនដែលពិនិត្យជំងឺអ្នកស្រីនោះឡើយ។
នៅថ្ងៃទី២៤ សីហា គ្រូពេទ្យបានសុំឲ្យអ្នកស្រីចេញពីមន្ទីរពេទ្យ ដោយហេតុផលថា អ្នកស្រីគ្មានជំងឺអ្វីនោះទេ៖ «លោកអីមួយ ខ្ញុំមិនដឹងថាជាប្រធាន ឬអ្វីនោះទេ ប៉ុន្តែមនុស្សប្រុសហ្នឹង គ្រាន់តែឮថាខ្ញុំអត់លុយ គាត់ឈប់មើលខ្ញុំភ្លាម គេហៅអ្នករុញរទេះថា រុញចេញឲ្យឆាប់ទៅ អាជំងឺគ្មានលុយ ខ្ញុំមិនត្រូវការមើលទេ មើលប្រើពាក្យអ៊ីចឹងលោក ប្រើពាក្យអាក្រក់ណាស់ រុញចេញខ្ញុំមកទីណាត់ទីណែង ហាលក្ដៅ គេអ្នកមានលុយគេយកក្រណាត់គ្រប ខ្ញុំអត់លុយហាលកាត់ក្ដៅ ប៉ុន្តែខ្ញុំអត់ថាម៉េចទេ ព្រោះខ្ញុំអត់មានលុយ។ ដល់មកដល់កន្លែងលោក ផែន ដល់ពេលគេកុងត្រូលជំងឺ គាត់អត់មើលខ្ញុំទេ អ្នកដទៃៗទៀតគាត់មើលទាំងអស់ ដោយឡែកខ្ញុំ គាត់អត់មើលទេ គាត់ឲ្យតែកូនសិស្ស ពេទ្យស្អីមួយខ្មៅមកមើលខ្ញុំហើយ ពេលដែលមើលហ្នឹង គាត់ដើរចេញផុតពីខ្ញុំ ហើយគាត់ថាភ្លាម មើលស្អី អាគ្មានលុយផង ឈឺស្អី ឈឺមាយា»។
វិទ្យុអាស៊ីសេរី មិនអាចទាក់ទង លោក ជា ផែន សុំការបំភ្លឺពីបញ្ហានេះបានទេ នៅថ្ងៃទី២៧ សីហា។
អ្នកស្រី ឆេង វណ្ណឌី អះអាងថា អ្នកស្រីមានជំងឺជាច្រើនមុខ និងធ្លាប់ព្យាបាលជំងឺនៅមន្ទីរពេទ្យកាល់ម៉ែត នេះពីមុនមក ហើយជំងឺមួយចំនួនរបស់អ្នកស្រី ក៏ត្រូវព្យាបាលជាសះស្បើយនៅមន្ទីរពេទ្យនេះដែរ។ ក្រោយពីអ្នកស្រីជាសះស្បើយពីជំងឺ អ្នកស្រីក៏បានចេញពីមន្ទីរពេទ្យត្រឡប់ទៅស្រុកវិញ ប៉ុន្តែមិនប៉ុន្មាន ជំងឺញ័រជើងរបស់អ្នកស្រីចេះតែញ័រទទ្រើក ដើរមិនកើត នៅពេលអ្នកស្រីដើរ អ្នកស្រីចេះតែដួល ដូច្នេះអ្នកស្រីក៏ត្រឡប់មកមន្ទីរពេទ្យកាល់ម៉ែត ម្ដងទៀត ដើម្បីសុំឲ្យគ្រូពេទ្យជួយព្យាបាលជំងឺញ័រជើងរបស់អ្នកស្រី។
អ្នកស្រី ឆេង វណ្ណឌី ឲ្យដឹងថា អ្នកស្រីបានមកមន្ទីរពេទ្យកាល់ម៉ែត កាលពីថ្ងៃទី២១ សីហា ឆ្នាំ២០១២ ហើយក្រុមគ្រូពេទ្យឲ្យអ្នកស្រីចេញពីមន្ទីរពេទ្យវិញនៅថ្ងៃទី២៤ សីហា ដោយលោកគ្រូពេទ្យទាំងនោះបញ្ជាក់ថា អ្នកស្រីគ្មានជំងឺអ្វីនោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។