អ្នកសិទ្ធិមនុស្ស និងអ្នកវិភាគនយោបាយ នៅតែទទូចឱ្យមានការស៊ើបអង្កេតរកអ្នកទទួលខុសត្រូវចំពោះការសម្លាប់មនុស្សក្រៅច្បាប់ លើក្រុមមន្ត្រីយោធា និងប៉ូលិសស្មោះស្ម័គ្ររបស់គណបក្សហ៊្វុនស៊ិនប៉ិច កាលពីថ្ងៃទី៥ និងទី៦ ខែកក្កដា ឆ្នាំ១៩៩៧។ ព្រឹត្តិការណ៍នេះ ត្រូវបានមន្ត្រីអង្គការសហប្រជាជាតិចាត់ទុកថា ជាការធ្វើរដ្ឋប្រហារបង្ហូរឈាមរបស់លោក ហ៊ុន សែន ដើម្បីដណ្ដើមអំណាច ប៉ុន្តែមន្ត្រីលោក ហ៊ុន សែន នៅតែបដិសេធថា មិនមែនជារដ្ឋប្រហារឡើយ រួមទាំងមិនចង់ឱ្យមានការស៊ើបអង្កេតនោះទេ។
គិតមកដល់ពេលនេះ ជាខួប ២៦ឆ្នាំគត់ នៃការផ្ទុះអាវុធយ៉ាងកក្រើកនៅរាជធានីភ្នំពេញ ដែលត្រូវបានមន្ត្រីអង្គការសហប្រជាជាតិផ្នែកសិទ្ធិមនុស្សប្រចាំកម្ពុជានៅពេលនោះលើកឡើងថា ជាព្រឹត្តិការណ៍ធ្វើរដ្ឋប្រហារបង្ហូរឈាមដឹកនាំដោយលោក ហ៊ុន សែន នាយករដ្ឋមន្ត្រីទី២ ដើម្បីដណ្ដើមអំណាចពីនាយករដ្ឋមន្ត្រីទី១ គឺសម្ដេចក្រុមព្រះ នរោត្តម រណឫទ្ធិ ប្រធានគណបក្សរាជានិយមហ៊្វុនស៊ិនប៉ិច។ រដ្ឋប្រហារមួយប្រាវកាលណោះ បានធ្វើឱ្យជនស្លូតត្រង់ជាច្រើននាក់ រួមទាំងកុមារផង បានរងរបួសនិងស្លាប់ ជាពិសេស ការចាប់ចង និង ការសម្លាប់ក្រៅច្បាប់លើមន្ត្រីប៉ូលិស និងយោធាជាន់ខ្ពស់ប្រមាណ ៦០នាក់ របស់គណបក្សហ៊្វុនស៊ិនប៉ិច ដែលមកដល់ពេលនេះ ពុំទាន់មានការស៊ើបអង្កេតរកយុត្តិធម៌នៅឡើយ។
ប្រធានសមាគមការពារសិទ្ធិមនុស្ស និងអភិវឌ្ឍន៍នៅកម្ពុជា ហៅកាត់ថា អាដហុក (Adhoc) លោក នី សុខា ប្រាប់វិទ្យុអាស៊ីសេរី នៅថ្ងៃទី៥ កក្កដាថា លោកចង់ឱ្យមានការស៊ើបអង្កេតដោយឯករាជ្យមួយ ដែលមានការចូលរួមពីអន្តរជាតិផ្នែកសិទ្ធិមនុស្ស ដើម្បីស្វែងរកពីមូលហេតុពិតប្រាកដនៃការផ្ទុះអាវុធ កាលពីឆ្នាំ១៩៩៧ ក្នុងបំណងបញ្ឈប់ការចោទប្រកាន់គ្នាទៅវិញទៅមក និងដើម្បីផ្ដល់យុត្តិធម៌ដល់គ្រួសារជនរងគ្រោះ។ លើសពីនេះ ក៏ដើម្បីលុបបំបាត់អំពើនិទ្ទណ្ឌភាព ឬភាពគ្មានទោសពៃរ៍សម្រាប់ឧក្រិដ្ឋជននៅកម្ពុជា។ ទោះជាយ៉ាងណាក៏ដោយ លោកបន្តថា កម្ពុជាដែលគ្មានច្បាប់ប្រហារជីវិតនោះ ដូច្នេះ ការសម្លាប់មនុស្សទាំងជាប់ចំណង ឬខ្នោះដៃ និងគ្មានអាវុធនៅក្នុងដៃ ជារឿងខុសច្បាប់ ហើយសូម្បីនៅក្នុងពេលសង្គ្រាម ក៏ពុំអនុញ្ញាតឱ្យសម្លាប់គូសត្រូវបែបព្រៃផ្សៃនេះដែរ។
លោក នី សុខា៖«ជាការរំលោភទៅលើគោលការណ៍សិទ្ធិដែរ គឺថា គោលការណ៍សិទ្ធិមនុស្ស ទោះបីស្រុកកើតសង្គ្រាម ប្រសិនបើគេចាប់បានបច្ចាមិត្ត គេមិនត្រូវយកទៅសម្លាប់ទេ។ អ៊ីចឹង!អាហ្នឹងហើយ គេត្រូវស្រាវជ្រាវរកឱ្យឃើញថា តើស្លាប់ហ្នឹង វាស្លាប់ក្នុងលក្ខខណ្ឌបែបណា ជាពិសេស ការរកឃើញបែបហ្នឹង ធ្វើឱ្យខាងសាច់ញាតិក្រុមគ្រួសារ មានភាពអស់ចិត្ត។ ប្រសិនបើយើងមិន(ស្រាវជ្រាវ)អ៊ីចឹងទេ ខ្ញុំគិតថា វាស្ថិតនៅក្នុងភាពជាមន្ទិលរបស់សាច់ញាតិជនរងគ្រោះ ដែលបានស្លាប់បាត់បង់ជីវិតទាំងអស់ហ្នឹង»។
នៅពេលមានការទទូចជារឿយៗ ពីមន្ត្រីសិទ្ធិមនុស្ស ឱ្យបើកការស៊ើបអង្កេតរកអ្នកទទួលខុសត្រូវនោះ មន្ត្រីរដ្ឋាភិបាលលោក ហ៊ុន សែន តែងបង្ហាញឆន្ទៈមិនចង់ឱ្យមានការស៊ើបអង្កេតឡើយ លើសពីនេះ ថែមទាំងមិនសប្បាយចិត្ត នៅពេលមានការរំឭកព្រឹត្តិការណ៍បង្ហូរឈាមនេះថា ជារដ្ឋប្រហារទៀតផង។ កន្លងមក គណបក្សសង្គ្រោះជាតិ ធ្លាប់បានរៀបចំប្រារព្ធពិធីបង្សុកូលឧទ្ទិសកុសល និងគោរពវិញ្ញាណក្ខន្ធ អ្នកដែលបានស្លាប់ក្នុងព្រឹត្តិការណ៍រដ្ឋប្រហារនេះ មុនពេលត្រូវបានរំលាយដោយរដ្ឋាភិបាលលោក ហ៊ុន សែន។
អ្នកនាំពាក្យគណបក្សហ៊្វុនស៊ិនប៉ិច លោក ញឿន រ៉ាដែន លើកឡើងថា គណបក្សមិនបានរៀបចំពិធីបុណ្យបង្សុកូល ដើម្បីឧទ្ទិសកុសល និងគោរពវិញ្ញាណក្ខន្ធអតីតមន្ត្រីរបស់ខ្លួន ដែលត្រូវបានគេចាប់ចងយកទៅសម្លាប់នៅថ្ងៃរដ្ឋប្រហារឆ្នាំ១៩៩៧ នោះទេ។ អ្នកនាំពាក្យរូបនេះបញ្ជាក់ថា មូលហេតុ ដោយប្រធានគណបក្សព្រះអង្គម្ចាស់ នរោត្តម ចក្រាវុធ និងមន្ត្រី ជាប់រវល់ធ្វើយុទ្ធនាការឃោសនាបោះឆ្នោត ប៉ុន្តែថ្នាក់ដឹកនាំគណបក្ស តែងឆ្លៀតឱកាសឧទ្ទិសកុសលទៅដល់ជនរងគ្រោះទាំងនោះ ជំនួសនៅពេលបុណ្យចូលឆ្នាំ ឬបុណ្យភ្ជុំបិណ្ឌ។
លោក ញឿន រ៉ាដែន៖«ថ្នាក់ដឹកនាំទាំងអស់គ្នា យើងចងចាំ ហើយចំណែកកម្មវិធីអី យើងមិនអាចប្រារព្ធបានទេ ដោយសារគណបក្សកំពុងជាប់ធ្វើយុទ្ធនាការគ្រប់ទីកន្លែង»។
ទោះមានការលើកឡើងពីមន្ត្រីគណបក្សហ៊្វុនស៊ិនប៉ិចបែបនេះក្ដី អតីតមន្ត្រីខុទ្ទកាល័យសម្ដេចក្រុមព្រះ និងជាអ្នកវិភាគនយោបាយលោក គឹម សុខ លើកឡើងថា ការមិនធ្វើពិធីចងចាំអ្នកស្លាប់នៅថ្ងៃទី៥ និងទី៦ ខែកក្កដា ឆ្នាំ១៩៩៧ ជាការរមិលគុណ ចំពោះអ្នកដែលបានបូជាសាច់ស្រស់ ឈាមស្រស់ ដើម្បីការពារបូរណភាពទឹកដី និងលទ្ធិប្រជាធិបតេយ្យ និងជាការបន្ទន់ឥរិយាបថទទួលយកឧក្រិដ្ឋកម្មធ្វើរដ្ឋប្រហាររបស់លោក ហ៊ុន សែន។ លោកបន្តថា ថ្នាក់ដឹកនាំគណបក្សហ៊្វុនស៊ិនប៉ិចបច្ចុប្បន្ន គ្មានស្មារតីជាអ្នកតស៊ូប្រកួតដើម្បីយុត្តិធម៌សង្គមឡើយ។
លោក គឹម សុខ លើកឡើងស្រដៀងទៅនឹងមន្ត្រីអង្គការសិទ្ធិមនុស្សអន្តរជាតិដែរថា ក្រុមថ្នាក់ដឹកនាំគណបក្សប្រជាជនកម្ពុជាមួយចំនួន ដូចជា លោក ជា ស៊ីម លោក ស ខេង លោក ទៀ បាញ់ និងលោក កែ គឹមយ៉ាន មិនយល់ព្រមឱ្យធ្វើរដ្ឋប្រហារនោះឡើយ ហើយថា រដ្ឋប្រហារនោះជារដ្ឋប្រហាររបស់លោក ហ៊ុន សែន ដើម្បីផ្ដួលរលំរដ្ឋាភិបាលស្របច្បាប់។
លោក គឹម សុខ៖«វាជារដ្ឋប្រហាររបស់លោក ហ៊ុន សែន សុទ្ធសាធ ពីព្រោះកងកម្លាំងរបស់លោក ហ៊ុន សែន ទាំងរថក្រោះ ទាំងថ្មើរជើង ប្រមូលផ្ដុំគ្នាទាំងកងទាំងក្រុម សម្រុកចូលទៅបន្ទាយកងទ័ពរបស់គណបក្សហ្វ៊ុនស៊ិនប៉ិច។ សំនួរ តើនៅលើពិភពលោកនេះ នរណាបើករថក្រោះ ប្រមូលកម្លាំងទាំងកងទាំងក្រុម ទៅសួរសុខទុក្ខភាគីម្ខាងទៀត ដែលជាគូជម្លោះនោះ ក្រៅតែពីទៅផ្ដួល។ ម្យ៉ាងវិញទៀត ក៏នាំគ្នាទម្លាក់សម្ដេចក្រុមព្រះ នរោត្តម រណឫទ្ធិ ចេញពីតំណែងជានាយករដ្ឋមន្ត្រីស្របច្បាប់។ បើមិនមែនជារដ្ឋប្រហារ តើជាអ្វី?»។
ក្រុមមន្ត្រីជាន់ខ្ពស់សំខាន់ៗ របស់ហ៊្វុនស៊ិនប៉ិច ដែលត្រូវបានគេសម្លាប់ក្រៅច្បាប់ អំឡុងរដ្ឋប្រហារឆ្នាំ១៩៩៧ រួមមានលោកឧត្ដមសេនីយ៍យោធា ចៅ សម្បត្តិ លោកឧត្ដមសេនីយ៍យោធា ក្រូច យឿម និងលោក ហូ សុខ មានតួនាទីជារដ្ឋលេខាធិការនៃក្រសួងមហាផ្ទៃ និងជាមេបញ្ជាការក្រុមអង្គរក្សរបស់សម្ដេចក្រុមព្រះនរោត្ដម រណឫទ្ធិ។ លោក ហូ សុខ ត្រូវបានចាប់ខ្លួន ដោយកម្លាំងរបស់លោកនាយករដ្ឋមន្ត្រី ហ៊ុន សែន នៅពេលលោកកំពុងដើរចេញពីផ្ទះរបស់ឯកអគ្គរដ្ឋទូតសិង្ហបុរី ហើយក្នុងថ្ងៃតែមួយ លោកក៏ត្រូវបានគេបាញ់សម្លាប់នឹងគ្រាប់កាំភ្លើង ខណៈកំពុងជាប់ឃុំក្នុងក្រសួងមហាផ្ទៃ។
អតីតមន្ត្រីគណបក្សហ៊្វុនស៊ិនប៉ិច ពីឆ្នាំ១៩៩៥ ដល់ឆ្នាំ២០០៤ និងជាអនុប្រធានគណបក្សសង្គ្រោះជាតិបច្ចុប្បន្ននេះ អ្នកស្រី មូរ សុខហួរ មានប្រសាសន៍ថា អ្នកស្រីជាមនុស្សម្នាក់ បានជួយស្វែងរកមណ្ឌលកុមារកំព្រា សម្រាប់ធ្វើជាទីជ្រកកោនសម្រាប់កូនៗ របស់មន្ត្រីគណបក្សហ៊្វុនស៊ិនប៉ិច ដែលត្រូវបានសម្លាប់។ អ្នកស្រីបញ្ជាក់ថា ព្រឹត្តិការណ៍នៅពេលនោះ ជាការធ្វើរដ្ឋប្រហាររបស់លោក ហ៊ុន សែន ដោយសារលោកចង់បានអំណាច ហើយលោកបែរចោទប្រកាន់ស្រេចតែចិត្តខ្លួនថា ក្រុមមន្ត្រីស្ម័គ្រគណបក្សហ៊្វុនស៊ិនប៉ិចទាំងនោះ ជាអ្នកដឹកនាំកម្លាំងបង្កចលាចល ឬអនាធិបតេយ្យនៅក្នុងសង្គម ដូចអ្វីដែលលោក ហ៊ុន សែន កំពុងចោទប្រកាន់លើក្រុមមន្ត្រីគណបក្សសង្គ្រោះជាតិនៅពេលនេះថា ជាក្រុមឧទ្ទាម ដើម្បីយកធ្វើលេសតាមកម្ចាត់ សម្រាប់រក្សាអំណាចរបស់ខ្លួន ដោយមិនខ្វល់ពីច្បាប់ជាតិ និងអន្តរជាតិ។
អ្នកស្រី មូរ សុខហួរ ៖«ឈាមគាត់(ហ៊ុន សែន)ឈាមចេញមកពីខ្មែរក្រហម ដូចថា ភាពសាហាវ និងឃោរឃៅរបស់គាត់ នៅជានិច្ច ដក់នៅក្នុងអារម្មណ៍គាត់ជានិច្ច។ អ៊ីចឹងហើយ បានឃើញថា អស់រយៈពេល ៣៨ឆ្នាំ ដែលគាត់កាន់អំណាចហ្នឹង គាត់មិនដែលយោគយល់ មិនដែលធ្វើឱ្យប្រទេសកម្ពុជាយើង ក្លាយទៅជានីតិរដ្ឋ ក្លាយទៅជាកោះសន្តិភាពពិតប្រាកដទេ»។
ជុំវិញការលើកឡើងទាំងនេះ វិទ្យុអាស៊ីសេរី មិនអាចសុំការឆ្លើយតបពីប្រធានអង្គភាពអ្នកនាំពាក្យរដ្ឋាភិបាលលោក ផៃ ស៊ីផាន និងអ្នកនាំពាក្យគណៈកម្មាធិការសិទ្ធិមនុស្សរបស់រដ្ឋាភិបាល លោក កត្តា អ៊ន បានទេ នៅថ្ងៃទី៥ កក្កដានេះ។ ទោះជាយ៉ាងណាក៏ដោយ រដ្ឋាភិបាលលោក ហ៊ុន សែន ធ្លាប់ព្យាយាមពន្យល់ទៅសហគមន៍អន្តរជាតិថា ព្រឹត្តិការណ៍ថ្ងៃទី៦ និងថ្ងៃទី៧ កក្កដា ជាសកម្មភាពយោធាប្រឆាំងសម្ដេចក្រុមព្រះ និងកម្លាំងយោធារបស់ព្រះអង្គ ក្នុងការទប់ស្កាត់ការវិលមកវិញ នៃកងទ័ពខ្មែរក្រហម និងបានចោទប្រកាន់សម្ដេចក្រុមព្រះថា បានសហការជាមួយខ្មែរក្រហម ប្រឆាំងលោក រួមទាំងនាំចូលអាវុធខុសច្បាប់ពីក្រៅប្រទេស។ លើសពីនេះ អ្នកនាំពាក្យគណបក្សប្រជាជនកម្ពុជាលោក សុខ ឥសាន លើកឡើងថា ក្រុមមន្ត្រីជាន់ខ្ពស់របស់គណបក្សហ៊្វុនស៊ិនប៉ិចទាំងនោះ ស្លាប់ដោយសារការប្រយុទ្ធគ្នា មិនមែនជាដោយសារការចាប់ចងយកទៅសម្លាប់នោះទេ។
លោក សុខ ឥសាន៖«គ្រាន់តែសង្គ្រាមរយៈពេលខ្លី ដើម្បីទប់ស្កាត់កុំឱ្យនាំកម្លាំងខ្មែរក្រហមចូលមកក្នុងប្រទេស នាំឱ្យមានគ្រោះមហន្តរាយដល់អាយុជីវិតប្រទេសជាតិជាថ្មីឡើងវិញ តែប៉ុណ្ណោះទេ។ ដូច្នេះ!អត់មានពីណា កាត់ទោសគាត់(ការសម្លាប់ក្រុមមន្ត្រីគណបក្សហ៊្វុនស៊ិនប៉ិចក្រៅច្បាប់)ទេ ដូច ជា រិទ្ធី ឈុត ចៅហ្វាយខេត្តកែបអីហ្នឹង(ស្លាប់)ក្នុងចម្បាំងតើ ហើយ ក្រួច យឿម អីហ្នឹង(ស្លាប់)ក្នុងចម្បាំង តើនរណាទៅចាប់គាត់ដាក់តុលាការ»។
ប៉ុន្តែជុំវិញបញ្ហានេះ លោក ប៊្រែដ អាដាមស៍ (Brad Adams) អតីតនាយកប្រតិបត្តិទទួលបន្ទុកកិច្ចការតំបន់អាស៊ីរបស់អង្គការឃ្លាំមើលសិទ្ធមនុស្សអន្តរជាតិ យូមែន រ៉ៃត៍ វ៉ច្ឆ (Human Rights Watch) ធ្លាប់ប្រាប់វិទ្យុអាស៊ីសេរីថា តាមពិត អ្នកដែលនាំចូលសព្វាវុធខុសច្បាប់ច្រើនជាងគេ គឺលោក ហ៊ុន សែន ហើយលើសពីនេះ លោក ហ៊ុន សែន ក៏បានបង្កើតកងអង្គរក្សផ្ទាល់ខ្លួនយ៉ាងតិច ១ពាន់នាក់ ដែលបំពាក់អាវុធទំនើបៗ និងទទួលបានការហ្វឹកហ្វឺន ប្រសើរជាងកងទ័ពការពារជាតិទៅទៀត ហើយកងទ័ពទាំងនោះ ត្រូវបានប្រើប្រាស់នៅក្នុងការធ្វើរដ្ឋប្រហារ។ លោក ប៊្រែដ អាដាមស៍ បន្តថា តាមការស្រាវជ្រាវ និងចុះសម្ភាសន៍ផ្ទាល់ពីក្រុមមន្ត្រីអង្គការសហប្រជាជាតិ ពុំមានការនាំចូលកម្លាំងខ្មែរក្រហមពីតំបន់អន្លង់វែង ចូលទីក្រុងភ្នំពេញ ដូចការចោទប្រកាន់របស់លោក ហ៊ុន សែន ឡើយ។
ផ្ទុយទៅវិញលោកបញ្ជាក់ថា អ្នកដែលប្រើប្រាស់កងកម្លាំងខ្មែរក្រហម គឺលោក ហ៊ុន សែន ទៅវិញ ដោយសារមានអតីតមេបញ្ជាការខ្មែរក្រហមចំនួន ២រូប គឺលោក កែវ ពង្ស និងលោក ភុន ភាព បានដឹកនាំកូនទាហាន ចូលរួមធ្វើរដ្ឋប្រហារទម្លាក់សម្ដេចក្រុមព្រះ ពីនាយករដ្ឋមន្ត្រីស្របច្បាប់ ដែលកើតចេញពីការបោះឆ្នោតឆ្នាំ១៩៩៣ ជាការបោះឆ្នោតសេរី ត្រឹមត្រូវ និងយុត្តិធម៌តែម្ដងគត់ ដោយសារជាការរៀបចំដោយអង្គការសហប្រជាជាតិ។
លោក ប៊្រែដ អាដាមស៍ ធ្លាប់បំពេញការងាររយៈពេល ៥ឆ្នាំនៅកម្ពុជា ជាមេធាវីជាន់ខ្ពស់ឱ្យការិយាល័យឧត្ដមស្នងការអង្គការសហប្រជាជាតិ ទទួលបន្ទុកសិទ្ធិមនុស្ស មុនពេលលោកក្លាយជានាយកប្រតិបត្តិទទួលបន្ទុកកិច្ចការតំបន់អាស៊ីរបស់អង្គការឃ្លាំមើលសិទ្ធិមនុស្សអន្តរជាតិ យូមែន រ៉ៃត៍ វ៉ច្ឆ (Human Rights Watch) ពីឆ្នាំ២០០២ ដល់ឆ្នាំ២០២២។ អំឡុងពេលបំពេញការងារនៅកម្ពុជា លោក ប៊្រែដ អាដាមស៍ រួមទាំងមន្ត្រីអង្គការសហប្រជាជាតិផ្សេងទៀត ធ្លាប់ទៅជីកគាស់ឃើញសាកសពមន្ត្រីជាន់ខ្ពស់គណបក្សហ៊្វុនស៊ិនប៉ិច ដែលត្រូវគេសម្លាប់ដោយចងដៃពត់ទៅក្រោយ និងមានគ្រាប់កាំភ្លើងផុងក្នុងលលាដក្បាល។ លោកបញ្ជាក់ថា សាកសពមន្ត្រីគណបក្សហ៊្វុនស៊ិនប៉ិច ត្រូវបានគេដឹកទៅចោលនៅខេត្តកំពង់ស្ពឺ និងនៅក្នុងជ្រោះពេជ្រនិល។
ការបោះឆ្នោតឆ្នាំ១៩៩៣ ជាការបោះឆ្នោតលើកដំបូង បន្ទាប់ពីកម្ពុជាធ្លាក់ក្នុងជម្លោះផ្ទៃក្នុងរ៉ាំរ៉ៃនិងក្នុងសង្គ្រាមស៊ីវិល និងត្រូវបានគេចាត់ទុកថា ជាការបោះឆ្នោតសេរី ត្រឹមត្រូវ និងយុត្តិធម៌តែម្ដងគត់ ដោយសារកាលនោះ ជាការរៀបចំដោយអាជ្ញាធរបណ្ដោះអាសន្ននៃអង្គការសហប្រជាជាតិនៅកម្ពុជា ហៅកាត់ថា អ៊ុនតាក់ (UNTAC)។ ការបោះឆ្នោតនៅពេលនោះ គណបក្សហ៊្វុនស៊ិនប៉ិច ទទួលបានជ័យជម្នះ ដោយទទួលបានអាសនៈចំនួន៥៨ ខណៈគណបក្សប្រជាជនកម្ពុជាទទួលបាន ៥១អាសនៈ។
ប៉ុន្តែដោយសារគណបក្សប្រជាជនកម្ពុជា មិនសុខចិត្តចាញ់ការបោះឆ្នោត និងបានប្រើប្រាស់កម្លាំងទាហាននិងប៉ូលិស បណ្ដេញកងទ័ពអង្គការសហប្រជាជាតិ ចេញពីខេត្តចំនួន៧ ហើយគំរាមបំបែកប្រទេសកម្ពុជាជាពីរ នៅពេលនោះ អតីតព្រះមហាក្សត្រ ព្រះបាទ នរោត្តម សីហនុ បានដាក់ចេញរូបមន្តនាយករដ្ឋមន្ត្រីទី១ និងនាយករដ្ឋមន្ត្រីទី២ ដើម្បីទប់ស្កាត់កុំឱ្យមានការបំបែកប្រទេសជាពីរផ្នែក។ ប៉ុន្តែក្រោយមក កត្តាមួយដែលនាំឱ្យលោក ហ៊ុន សែន ប្រើកម្លាំងទ័ព ដើម្បីឡើងក្ដោបក្ដាប់អំណាចទាំងស្រុង បន្ទាប់ពីលោកខឹងក្រេវក្រោធទៅនឹងសម្ដេចក្រុមព្រះ ដែលបានសម្រេចព្រះទ័យក្នុងកិច្ចប្រជុំមួយរបស់គណបក្សហ៊្វុនស៊ិនប៉ិច ដែលមិនចង់បន្តធ្វើរដ្ឋាភិបាលចម្រុះជាមួយលោក។ នេះបើតាមការបញ្ជាក់របស់លោក ប៊្រែដ អាដាមស៍។
ការធ្វើរដ្ឋប្រហារដណ្ដើមអំណាចរបស់លោក ហ៊ុន សែន នៅពេលនោះ ក៏ត្រូវបានគេចាត់ទុកថា ជាការបំផ្លាញចោលនូវការខិតខំរបស់អង្គការសហប្រជាជាតិ ដែលចង់ឱ្យពលរដ្ឋខ្មែរទទួលបានសិទ្ធិសេរីភាពដូចបណ្ដាពលរដ្ឋប្រទេសជឿនលឿនផ្សេងទៀត និងការផ្លាស់ប្ដូរមេដឹកនាំតាមបែបសន្តិវិធី និងឈប់បង្ហូរឈាមគ្នា ដែលពួកគេមិនធ្លាប់ទទួលបានកាលពីពេលមុនមក។ ប៉ុន្តែរដ្ឋប្រហាររបស់លោក ហ៊ុន សែន បានរុញច្រានកម្ពុជា ឱ្យធ្លាក់ទៅក្នុងយុគសម័យខ្មៅងងឹតឡើងវិញ គឺមេដឹកនាំខ្មែរ នាំគ្នាដណ្ដើមអំណាច តាមរយៈកម្លាំងប្រដាប់អាវុធ និងអំពើហិង្សា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។