របប​ក្រុង​ភ្នំពេញ​​ថា មិន​ធ្វើ​តាម​ការ​ទាមទារ​របស់​គណបក្ស​សង្គ្រោះ​ជាតិ​នៅ​ក្រៅ​ប្រទេស​ ឱ្យ​ដោះ​លែង​លោក​ កឹម សុខា ទេ

ដោយ ហេង រស្មី
2019.07.12
បាតុកម្ម អាមេរិក ៦២២ ខ្មែរ​នៅ​ក្រៅ​ប្រទេស​ធ្វើ​បាតុកម្ម​ប្រឆាំង​លោក​នាយក​រដ្ឋមន្ត្រី ហ៊ុន សែន នៅ​មុខ​អង្គការ​សហប្រជាជាតិ ក្នុង​បុរី​ញូវយ៉ក (New York) សហរដ្ឋ​អាមេរិក កាល​ពី​ថ្ងៃ​ទី​២៦ ខែ​កញ្ញា ឆ្នាំ​២០១៥។
RFA/Yun Samean

ប្រជាពលរដ្ឋ​ខ្មែរ​នៅ​ប្រទេស​កាណាដា​ និង​ សហរដ្ឋអាមេរិក​ដឹកនាំ​ធ្វើ​មហា​បាតុកម្ម​សា​ជា​ថ្មី​ម្ដង​ទៀត​នៅ​រដ្ឋធានី​វ៉ាស៊ីនតុន នៅ​សប្ដាហ៍​ក្រោយ ​ដើម្បី​ទាម​ទារ​អោយ​ដោះ​លែង​លោក កឹម សុខា​ ស្តា​រ​លទ្ធិ​ប្រជាធិបតេយ្យ និង​ការ​គោរព​សិទ្ធិមនុស្ស​នៅ​កម្ពុជា​ឡើងវិញ។ មន្ត្រី​របប​ក្រុង​ភ្នំពេញ​ចាត់ទុកថា​ បាតុកម្ម​នេះ​គ្រាន់​តែ​ជា​សំឡេង​មួយ ដើម្បី​ឱ្យ​អន្តរជាតិ​មើល​ឃើញ​ថា រដ្ឋាភិបាល​អាក្រក់​ តែ​មិន​បាន​ជះឥទ្ធិពល​ដល់​កម្ពុជា​ឡើយ។

អ្នកនាំពាក្យ​រដ្ឋាភិបាល​លោក​ ផៃ ស៊ីផាន ប្រាប់​អាស៊ី​សេរី​នៅ​ថ្ងៃ​ទី១១កក្កដា​ថា រដ្ឋាភិបាល​នឹង​មិន​ធ្វើ​តាម​ការ​ទាមទារ​របស់​ក្រុម​អ្នក​គាំទ្រ​គណបក្ស​ប្រឆាំង​នៅ​ក្រៅ​ប្រទេស​ទេ ដោយសារ​តែ​សំណុំ​រឿង​របស់​លោក​ កឹម សុខា ប្រធាន​គណបក្ស​សង្គ្រោះ​ជាតិ​ កំពុង​ស្ថិត​នៅ​ក្នុង​ដៃ​របស់​តុលាការ។

លោក​បញ្ជាក់​ថា​ កម្ពុជា​គ្មាន​អ្វី​ត្រូវ​ធ្វើការ​ពិចារណា​ទេ​ដោយ​សារ​តែ​រដ្ឋាភិបាល​មាន​កាតព្វកិច្ច​មួយ ​ត្រូវ​គោរព​ចំពោះ​សេចក្ដី​សម្រេច​របស់​តុលាការ​ដែល​បាន​រំលាយ​គណបក្ស​សង្គ្រោះ​ជាតិ​ ហើយ​លោក​ កឹម សុខា​ជាប់​ពាក់ព័ន្ធ​នឹង​សំណុំ​រឿង​ប៉ុនប៉ង​ផ្ដួល​រំលំ​រដ្ឋាភិបាល៖ «មិន​មាន​ឥទ្ធិពល​អ្វី​ទេ ពី​ព្រោះ​យើង​បាន​សម្រេច​រួច​ទៅ​ហើយ ​យើង​មិន​ទៅ​ កម្ទេច​សាលដីកា​របស់​តុលាការ​កំពូល​បាន​ទេ​ពីព្រោះ​នីតិរដ្ឋ​មួយ​ដែល​យើង​គោរព​។អ្នក​ណា​មិន​គោរព គឺ​ជា​រឿង​ដទៃ​ទៀត។ ទៅតាម​ច្បាប់​ ជាធរមាន​ច្បាប់​យើងត្រូវ​ដាក់​ពាក្យ​សុំ​វិល​ត្រឡប់​មក​ធ្វើ​នយោបាយ​វិញ»

 

ប្រតិកម្ម​របស់​មន្ត្រី​នាំ​ពាក្យ​រដ្ឋាភិបាល​នេះ ដោយសារតែ​ក្រុម​និយម​ប្រជាធិបតេយ្យ​នៅក្រៅប្រទេស កំពុង​ស្វែង​កិច្ច​អន្តរាគមន៍​ពី​អាមេរិក​និង​សហគមន៍​អន្តរជាតិ​ឲ្យ​រដ្ឋាភិបាល​ខ្មែរ​ស្តារ​លទ្ធិ​ប្រជាធិបតេយ្យ​ឡើង​វិញ។

ប្រធាន​គណបក្ស​សង្គ្រោះ​ជាតិ​ប្រចាំ​សហរដ្ឋ​អាមេរិក លោក អ៊ុង ឬទ្ធី ប្រាប់​អាស៊ី​សេរី​កាល​ពី​​ថ្ងៃ​ទី១១ កក្កដា​ថា ប្រជាពលរដ្ឋ​ខ្មែរ​នៅ​ប្រទេស​កាណាដា និង​ សហរដ្ឋអាមេរិក​ប្រមាណ​ជាង ៣០០​នាក់​នៅ​ពុធ ថ្ងៃ​ទី​១៧ គ្រោង​នឹង​ដឹក​នាំ​ធ្វើ​មហា​បាតុកម្ម​សារ​ជា​ថ្មី​ម្ដង​ទៀត​នៅ សេតវិមាន និង​អគារ​ព្រឹទ្ធសភា ដើម្បី​ទាមទារ​ឲ្យ​របប​ក្រុង​ភ្នំពេញ​ដោះ​លែង​លោក​ កឹម សុខា​ និង​ឲ្យ​របប​​ក្រុង​ភ្នំពេញ​ផ្ដល់​សិទ្ធិ​ឲ្យ​គណបក្ស​សង្គ្រោះ​ជាតិ​ ធ្វើ​នយោបាយ​ឡើង​វិញ ហើយ​អាច​ចូលរួម​បោះ​ឆ្នោត​នា​ឆ្នាំ​២០២៣ ខាង​មុខ​នេះ៖ «កម្ពុជា​ឥឡូវ​ប្រជាធិបតេយ្យ​សេរីភាព​ក្នុង​ការ​បញ្ចេញ​មតិ​ សេរី​ភាព​ ក្នុង​ការ​ជួប​ប្រជុំ​គ្នា​ត្រូវ​បំបិទ​ទាំង​អស់​ ហើយ​ជា​ពិសេស​គឺ​ការ​រំលាយ​គណបក្ស​សង្គ្រោះ​ជាតិ​ ហើយ​ចាប់​ឃុំ​ឃាំង​លោក​ប្រធាន​គណបក្ស​សង្គ្រោះ​ជាតិ​ លោក​ កឹម សុខា​ ដោយ​ខុស​ច្បាប់​រដ្ឋធម្មនុញ្ញ​នៃ​ប្រទេស​កម្ពុជា​»។​

 

លោក អ៊ុង ឬទ្ធី បញ្ជាក់​ថា​ អ្នក​គាំទ្រ​គណបក្ស​សង្គ្រោះ​ជាតិ​នៅ​ក្រៅ​ប្រទេស ​ក៏​ទាមទារ​​សមាជិក​​សភា​​សហរដ្ឋ​អាមេរិក ឱ្យ​ពន្លឿន​​សេចក្ដី​ច្បាប់​ដាក់​ទណ្ឌកម្ម​លើ​រដ្ឋាភិបាល​ខ្មែរ ឱ្យ​​ចេញ​រូបរាង​ជា​ផ្លូវ​ការ​ផង​ដែរ។

លោក អេង ឆៃអ៊ាង អនុប្រធាន​គណបក្ស​សង្គ្រោះ​ជាតិ​ ​ ដែល​កំពុង​ភៀស​ខ្លួន​នៅ​សហរដ្ឋអាមេរិក​ ប្រាប់​អាស៊ី​សេរី​ថា ​ថ្នាក់​ដឹកនាំ​ជាន់​ខ្ពស់​គណបក្ស​សង្គ្រោះ​ជាតិ​ដែល​រួម​មាន​លោក​ សម រង្ស៊ី​ ប្រធាន​ស្ដីទី​គណបក្ស​សង្គ្រោះ​ជាតិ  និង​អ្នកស្រី មូរ សុខហួរ អនុ​ប្រធាន​គណបក្ស​ គ្រោង​នឹង​ចូល​រួម​មហា​បាតុកម្ម​នេះ ​ ស្រប​ពេល​ដែល​ពួក​គេ​​មក​ជួប​ជាមួយ​សមាជិក​រដ្ឋសភា​ សមាជិក​ព្រឹទ្ធសភា​ និង​ មន្ត្រី​ក្រសួង​ការ​បរទេស​សហរដ្ឋអាមេរិក​នៅ​សប្ដាហ៍​ក្រោយនេះ៖ «សហគមន៍​ខ្មែរ​នៅ​សហរដ្ឋ​អាមេរិក​ហ្នឹង​នឹង​ធ្វើ​បាតុកម្ម​នៅ​ពី​មុខ​សេតវិមាន​ហើយ​ថ្នាក់​ដឹក​នាំ​ជាន់​ខ្ពស់​នឹង​ធ្វើ​ការ​នៅ​ខាង​ក្នុង​ជាមួយ​នឹង​អ្នក​មុខ​អ្នកការ​ថ្នាក់​ដឹកនាំ​សហរដ្ឋអាមេរិក»។​

សមាជិក​ព្រឹទ្ធសភា​អាមេរិក​ទាំង​បី​រូប មក​ពី​គណបក្ស​កាន់​អំណាច និង​គណបក្ស​ប្រឆាំង បាន​រួម​គ្នា​ស្នើ​ច្បាប់​ថ្មី​មួយ កាល​ពី​ថ្ងៃ​ទី១៤ ខែ​ឧសភា​បាន​ដាក់​ចេញ​នូវ​សេចក្តី​ព្រាង​ច្បាប់ S. 1468 ស្ដីពី «ការ​ទទួល​ខុស​ត្រូវ​របស់​កម្ពុជា និង​ការ​វិល​ត្រឡប់​មក​វិញ​នៃ​ការ​វិនិយោគ​ឆ្នាំ២០១៩ (Cambodia Accountability and Return on Investment Act of 2019)» ដែល​​ស្នើ​ឡើង ដើម្បី​ជំរុញ​ឲ្យ​របប​លោក ហ៊ុន សែន ងាក​មក​គោរព​គោលការណ៍​ ដែល​មាន​ចែង​នៅ​ក្នុង​កិច្ច​ព្រមព្រៀង​សន្តិភាព​ក្រុង​ប៉ារីស ឲ្យ​បាន​ពេញលេញ។

សេចក្ដី​ព្រាង​ច្បាប់ S.1468 នេះ​ទាមទារ​ឲ្យ​របប​លោក ហ៊ុន សែន ចាត់វិធានការ​ឲ្យ​មាន​ប្រសិទ្ធភាព ដើម្បី​ការពារ​សន្តិសុខ​ក្នុង​តំបន់​ការពារ​អធិបតេយ្យ​របស់​កម្ពុជា កុំឲ្យ​លុះ​តាម​ឥទ្ធិពល​របស់​ចិន​កុម្មុយនិស្ត និង​ធ្វើ​យ៉ាង​ណា​ឲ្យ​កម្ពុជា គោរព​សិទ្ធិ​របស់​ពលរដ្ឋ​ខ្មែរ និង​ការ​ទទួល​ខុសត្រូវ ដូច​ដែល​មាន​ចែង​ក្នុង​រដ្ឋធម្មនុញ្ញ​កម្ពុជា។

សេចក្ដី​ព្រាង​ច្បាប់​នេះ តម្រូវ​ឲ្យ​របប​លោក ហ៊ុន សែន ដោះលែង​ប្រធាន​គណបក្ស​សង្គ្រោះ​ជាតិ​លោក កឹម សុខា ជាបន្ទាន់ និង ដោយ​ឥត​លក្ខខណ្ឌ ដោះលែង​អ្នក​ទោស​នយោបាយ និង សកម្មជន​គណបក្ស​សង្គ្រោះ​ជាតិ​ទាំង​អស់ ព្រម​ទាំង​មន្ត្រី​អង្គការ​សង្គម​ស៊ីវិល​ផង ហើយ​ទម្លាក់​ចោល​រាល់​បទ​ចោទ​ប្រកាន់​លើ​ពួក​គាត់។ សេចក្ដី​ព្រាង​ច្បាប់​នេះ ក៏​ទាមទារ​ឲ្យ​ទម្លាក់​ចោល​រាល់​ការ​ចោទ​ប្រកាន់ ដោយ​ហេតុផល​នយោបាយ លើ​មេ​ដឹក​នាំ​ផ្សេងទៀត របស់​បក្ស​ប្រឆាំង ដូច​លោក សម រង្ស៊ី និង ទម្លាក់​ចោល​បទ​ចោទ​លើ​អតីត​អ្នក​យក​ព័ត៌មាន​អាស៊ី​សេរី​ពីរ​រូប​ផង គឺ​លោក អ៊ួន ឈិន និង​លោក យាង សុធារិន្ទ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

អត្ថបទពេញនិយម
នយោបាយ
សង្គម​ស៊ីវិល​រំពឹង​ថា​ ឯកអគ្គរដ្ឋទូត​អាមេរិក​ប្រចាំ​កម្ពុជា​ថ្មី​នឹង​បន្ត​ចូល​រួម​លើក​ស្ទួយ​ប្រជាធិបតេយ្យ
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។