គណបក្សកាន់អំណាចបានប្រកាសថា គណបក្សនេះ បានត្រៀម ខ្លួនទប់ទល់បញ្ហាមួយចំនួនដែលគណបក្សនេះថា ជាឧបាយកលអាក្រក់ ចង់បំផ្លាញសង្គម ។ ការលើកឡើងបែបនេះ ក្នុងពេលគណបក្សប្រជាជនកម្ពុជាធ្វើសន្និបាត លើកទី៤២ នៃគណៈកម្មាធិការកណ្តាល នៅមជ្ឈមណ្ឌលពិព័រណ៍និងសន្និបាតកោះពេជ្រ ក្រុងភ្នំពេញ ថ្ងៃទី០១ ខែកុម្ភៈ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន ឱ្យអាស៊ីសេរីដឹងកាលពីល្ងាចថ្ងៃទី០១ខែកុម្ភៈថា
គណបក្សប្រជាជនកម្ពុជាបានរៀបចំសន្និបាត បូកសរុបសភាពការងារឆ្នាំ២០១៩ និងទិសដៅការងារឆ្នាំថ្មី និងនិយាយពីចំណុចខ្លាំងនិងចំណុចខ្សោយ រួមទាំងបញ្ហាដែលគណបក្សត្រូវដោះស្រាយនាពេលខាងមុខ។ លោកបន្តថា សមាជិក គណបក្សបានលើកឡើងពី ជម្លោះពាណិជ្ជកម្មរវាងសហរដ្ឋអាមេរិក និងចិនសភាពនយោបាយក្នុងតំបន់ និងសភាពនយោបាយក្នុងប្រទេស។ ហើយគណបក្សក៏មិនឱ្យតម្លៃលើ បញ្ហាប្រព័ន្ធអនុគ្រោះពន្ធ EBA ដែលកម្ពុជាអាចនឹងបាត់បង់ខែកុម្ភៈខាងមុខនេះដែរ៖ «ពាក្យ EBA មាន ក៏ប៉ុន្តែមិនមានអីជាក់លាក់ក្នុងការចាត់វិធានការក្នុងការដោះស្រាយយ៉ាងណានោះ មិនមែនចំណុះលើរដ្ឋាភិបាលកម្ពុជាឯណា វាចំណុះសហភាពអឺរ៉ុបទេ អ្នកដែលដាក់ឬមិនដាក់យ៉ាងណា»។
សន្និបាតគណបក្សកាន់អំណាចនេះ មានមន្ត្រីជាន់ខ្ពស់បក្សប្រមាណ ៩០០នាក់ចូលរួម ហើយនឹងចប់នៅថ្ងៃទី២ កុម្ភៈនេះ។
ប្រធានកិត្តិយសគណបក្សប្រជាជនកម្ពុជា និងជាប្រធានរដ្ឋសភាឯកបក្ស លោក ហេង សំរិន ថ្លែងទៅកាន់បក្សសន្និបាតថា គណបក្សប្រជាជនកម្ពុជា បានជួបឧបសគ្គនិងបញ្ហា ប្រឈមច្រើនណាស់ដែលត្រូវដោះស្រាយដើម្បីធ្វើឱ្យសង្គមរីកចម្រើន។ លោកថា គណបក្សនេះបានត្រៀម ខ្លួនទប់ទល់បញ្ហាមួយចំនួនដែលគណបក្សនេះថា ជាឧបាយកលអាក្រក់ ចង់បំផ្លាញសង្គម។ លោក ហេង សំរិន មិនបានបញ្ជាក់ថា ក្រុមណាឬគណបក្សណានៅក្រោយ សមាសភាពដែលលោកចោទថា ជាសមាសភាពអាក្រក់នោះទេ។
សន្និបាតបក្សគណបក្សកាន់អំណាចនេះ ធ្វើឡើងជិតពេលដែល គណៈកម្មការអឺរ៉ុប គ្រោងនឹងប្រកាសលទ្ធផលស្ដីពីប្រពន្ធអនុគ្រោះពន្ធ EBA ដល់កម្ពុជា នៅជិតពាក់កណ្តាលខែ កុម្ភៈ ខាងមុខនេះ។
អ្នកជំនាញខាងវិទ្យាសាស្ត្រនយោបាយ លោក ឯម សុវណ្ណារ៉ា យល់ថា សន្និបាត គណបក្សប្រជាជនកាន់អំណាចនេះ អាចនឹងមានកិច្ចពិភាក្សារកមធ្យោបាយដោះស្រាយបញ្ហាប្រព័ន្ធអនុគ្រោះពន្ធ EBA។ លោកចង់ឃើញ គណបក្សនេះធ្វើតាមអនុសាសន៍របស់ សហភាពអឺរ៉ុបដែលស្នើឱ្យមានរបបលោក ហ៊ុន សែន គោរពសិទ្ធិមនុស្ស និងប្រជាធិបតេយ្យឡើងវិញ៖ «បើសិនវិធានការហ្នឹងកើតមានឡើងគណបក្សប្រជាជនកម្ពុជា ជាគណបក្សកាន់អំណាចត្រូវមានយន្តការប្រឈមមុខដោះស្រាយបញ្ហាជាតិ ប៉ុន្តែបើមិនដោះស្រាយគឺជាកិច្ចការមួយដែលគណបក្សប្រជាជនប្រឈមមុខទទួលខុសត្រូវ»។
ទោះបីសង្គមស៊ីវិលក្នុងស្រុក និងសហគមន៍អន្តរជាតិស្នើឱ្យកម្ពុជាស្ដារលទ្ធិប្រជាធិបតេយ្យ និងឱ្យមានគណបក្សប្រឆាំងឡើងវិញ ក៏ដោយ លោកនាយករដ្ឋមន្ត្រី ហ៊ុន សែន ប្រកាសម្ដងហើយម្ដងទៀតថា កម្ពុជាមិនឱនក្បាលឱ្យបរទេសដឹកច្រមុះឡើយ ទោះបីកម្ពុជាបាត់បង់ប្រព័ន្ធអនុគ្រោះពន្ធពីសហគមន៍អន្តរជាតិក៏ដោយ។
លោក ឯម សុវណ្ណារ៉ា បន្តថា បើគណបក្សប្រជាជនកម្ពុជាយល់ថា សំណើរបស់សហភាពអឺរ៉ុបបែបនេះ ជាសត្រូវរបស់កម្ពុជានោះ ភាគីទាំងពីរនឹងពិបាកក្នុងការដំណោះស្រាយបញ្ហាផ្ទុយគ្នាណាស់។ លោកបន្តថា បើគណបក្សប្រជាជនកម្ពុជាតម្កល់ប្រយោជន៍ជាតិធំ ជាងផលប្រយោជន៍បក្សនោះ វិបត្តិដែលកម្ពុជាកំពុងប្រឈមអាចនឹងដោះស្រាយបាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។