សកម្មជន​សង្គ្រោះជាតិ​ថា ពួកគេ​មិន​អាច​បញ្ឈប់​សកម្មភាព​នយោបាយ​ជា​ថ្នូរ​វិល​ចូល​ស្រុក​វិញ​ឡើយ

ដោយ ជី វិតា
2019-11-17
អ៊ីម៉ែល
មតិ
Share
បោះពុម្ព
ចៅ​សង្កាត់​ទើប​ជាប់​ឆ្នោត​សង្កាត់​សាលាកំរើក ក្រុង​សៀមរាប ខេត្ត​សៀមរាប លោក ជិន សុខង៉េង ចូលរួម​វេទិកា​អ្នក​ស្ដាប់​អាស៊ីសេរី នៅ​យប់​ថ្ងៃ​ទី​១២ ខែ​មិថុនា ឆ្នាំ​២០១៧។
ចៅ​សង្កាត់​ទើប​ជាប់​ឆ្នោត​សង្កាត់​សាលាកំរើក ក្រុង​សៀមរាប ខេត្ត​សៀមរាប លោក ជិន សុខង៉េង ចូលរួម​វេទិកា​អ្នក​ស្ដាប់​អាស៊ីសេរី នៅ​យប់​ថ្ងៃ​ទី​១២ ខែ​មិថុនា ឆ្នាំ​២០១៧។
Photo: RFA

សកម្មជន​គណបក្សប្រឆាំង​មួយ​ចំនួន​អះអាង​ថា ពួកគេ​មិន​អាច​បញ្ឈប់​សកម្មភាព​គាំទ្រ​គណបក្ស​សង្គ្រោះ​ជាតិ និង​គម្រោង​វិលត្រឡប់​របស់​ថ្នាក់ដឹកនាំ​គណបក្ស​នោះ​ឡើយ​។ ជំហរ​បែបនេះ​ធ្វើឡើង បន្ទាប់ពី​មេដឹកនាំ​របប​ក្រុងភ្នំពេញ ហ៊ុន សែន បាន​ប្រកូក​ប្រកាស​ឱ្យ​សកម្មជន​បក្ស​ប្រឆាំង​ដែល​រត់​ភៀសខ្លួន​នៅ​ក្រៅ​ប្រទេស វិល​ត្រឡប់​មក​កម្ពុជា​វិញ ប៉ុន្តែ​លោក​បាន​ហាមប្រាម​សកម្មជន​ទាំងនោះ មិន​ឱ្យ​ធ្វើ​សកម្មភាព​នយោបាយ​គាំទ្រ​គណបក្ស​សង្គ្រោះ​ជាតិ​ទៀត​ឡើយ។

សកម្មជន​គណបក្ស​សង្គ្រោះជាតិ​មួយ​ចំនួន​ដែល​បាន​រត់​ភៀសខ្លួន​ទៅ​ក្រៅ​ប្រទេស​ដើម្បី​គេច​ចេញពី​ការ​ធ្វើទុក្ខបុកម្នេញ​នៅ​ក្នុង​ស្រុក​ឱ្យដឹង​ថា ពួកគេ​នឹង​មិន​វិល​មក​កម្ពុជា​វិញ​តាម​ការប្រកាស​របស់​លោក ហ៊ុន សែន ឡើយ ព្រោះ​ពួកគេ​មិន​ទុកចិត្ត​សម្ដី​របស់​មេដឹកនាំ​រប​ប​ក្រុងភ្នំពេញ​រូប​នេះ។

សមាជិក​ក្រុមប្រឹក្សា​ក្រុង​កំពង់ចាម​គណបក្ស​សង្គ្រោះ​ជាតិ អ្នកស្រី គឹន ស្រីអូន ដែល​កំពុង​ភៀសខ្លួន​នៅ​ក្រៅ​ប្រទេស​ថ្លែង​ថា លោក ហ៊ុន សែន ហាក់​ដូចជា​វង្វេងវង្វាន់ ពីព្រោះ​ម្ដង​លោក​ប្រកាស​ដោះលែង និង​ហៅ​សកម្មជន​បក្ស​ប្រឆាំង​ឱ្យ​ចូល​ស្រុក​វិញ ប៉ុន្តែ​ក្រោយមក​លោក​ព្រមាន​ចាប់ខ្លួន​ពួកគេ​ឡើងវិញ​។ អ្នកស្រី​បន្ត​ថា អ្នកស្រី​មិន​អាច​ទទួល​យក​លក្ខខណ្ឌ​ឈប់​ធ្វើ​សកម្មភាព​នយោបាយ​គាំទ្រ​គណបក្ស​សង្គ្រោះ​ជាតិ​ជា​ថ្នូរ​នឹង​ការ​វិល​ចូល​ស្រុក​វិញ​នោះ​ឡើយ ពីព្រោះ​អ្នកស្រី​គាំទ្រ​គណបក្ស​នេះ​ដោយ​ឆន្ទៈ​ពិតប្រាកដ និង​ចង់​ឱ្យ​កម្ពុជា​មានការ​ផ្លាស់ប្ដូរ​មេដឹកនាំ៖ «ខ្ញុំ​ភៀសខ្លួន​នេះ គឺ​ដោយសារ​នយោបាយ ប៉ុន្តែ​បើ​ឱ្យ​ខ្ញុំ​ត្រឡប់​ទៅ​ស្រុក​វិញ គ្រាន់តែ​ទៅ​នៅតែ​ក្នុង​ផ្ទះ មិន​ធ្វើ​អ្វី ហើយ​មិន​ដឹងឮ​ពី​រឿង​ក្នុង​សង្គម មិន​ពាក់ព័ន្ធ​នឹង​រឿង​នយោបាយ នាង​ខ្ញុំ​មិន​អាច​ធ្វើតាម​សំណើ​របស់​គាត់​បាន​ទេ ពីព្រោះ​នាង​ខ្ញុំ​ធ្វើ​កន្លង​មក​នេះ ខ្ញុំ​ត្រូវការ​មានការ​ផ្លាស់ប្ដូរ​នាយក​រដ្ឋមន្ត្រី​នៅ​ប្រទេស​កម្ពុជា​របស់​ខ្ញុំ​ចេញ»

កាលពី​ថ្ងៃ​ទី​១៤ វិច្ឆិកា កន្លង​ទៅ លោកនាយក​រដ្ឋមន្ត្រី ហ៊ុន សែន បាន​បញ្ជា​ឱ្យ​ដោះលែង​សកម្មជន​បក្ស​ប្រឆាំង​ចំនួន ៧២​នាក់ ដែល​របប​របស់​លោក​បាន​ចាប់​ឃុំខ្លួន​ដាក់​ក្នុង​ពន្ធនាគារ​ពាក់ព័ន្ធ​នឹង​បទ​ចោទ​រួមគំនិត​ក្បត់​ជាតិ​។ លោក​ក៏បាន​អំពាវនាវ​ដល់​សកម្មជន​បក្ស​ប្រឆាំង​ដទៃ​ទៀត​ដែល​កំពុង​រត់​ភៀសខ្លួន​នៅ​ក្រៅ​ប្រទេស និង​រស់នៅ​លាក់ខ្លួន​នៅ​ក្នុង​ប្រទេស ឱ្យ​ត្រឡប់​ទៅ​គេហដ្ឋាន​រៀងៗ​ខ្លួន​វិញ ដោយ​របប​របស់​លោក​នឹង​មិន​យកទោស​ពៃរ៍​អ្វី​នោះ​ទេ ដោយសារ​លោក​ចាត់​ទុក​ថា សកម្មជន​ទាំងនោះ​ចាញ់បោក​ប្រធាន​ស្តីទី​គណបក្ស​សង្គ្រោះ​ជាតិ លោក សម រង្ស៊ី ហើយ​នេះ​ជា​ទឹកចិត្ត​អាណិតអាសូរ​របស់​លោក។

ទោះជា​យ៉ាងណា ពីរ​ថ្ងៃ​ក្រោយ​មក លោក ហ៊ុន សែន ស្រាប់តែ​ខឹង​សម្បារ និង​ព្រមាន​ចាប់ខ្លួន​សកម្មជន​បក្ស​ប្រឆាំង​ទាំងនោះ​មកវិញ ប្រសិនបើ​ពួកគេ​ហ៊ាន​និយាយ​ថា ការ​ដោះលែង​ឱ្យ​នៅ​ក្រៅ​ឃុំ​នេះ ដោយសារ​សម្ពាធ​ពី​អន្តរជាតិ​។ ជាមួយ​គ្នា​នេះ លោក​ព្រមាន​ថា ប្រសិនបើ​អ្នកណា​ហ៊ាន​បន្ត​សកម្មភាព​គាំទ្រ​ដំណើរ​មាតុភូមិនិវត្តន៍​របស់​លោក សម រង្ស៊ី ពួកគេ​នឹង​ប្រឈម​ការ​ចាប់​ខ្លួន​ជា​ថ្មី​ទៀត​៖ «ដីកាចាប់ខ្លួន​នៅ​បន្ត គឺ​មេខ្លោង ១៨ នាក់ អត់​រួចខ្លួន​ទេ ហើយ​បើ​អ្នកឯង​បន្ត អ្នកណា​ចូលរួម គឺ​ត្រូវ​ចាប់ខ្លួន​ទៀត ប្រសិនបើ​អ្នកឯង​ធ្វើ​សកម្មភាព​បែប​ដូច​កន្លង​ទៅ ហើយ​អ្នក​ដែល​មិន​ទាន់​បាន​កាត់ទោស​នេះ ក៏​ត្រូវតែ​ប្រយ័ត្នប្រយែង កុំ​ធ្វើ​សកម្មភាព​ឱ្យ​សោះ​។ បើ​ធ្វើ​សកម្មភាព នឹង​ត្រូវ​ប្រមូល​ត្រឡប់​មក​វិញ»

សមាជិក​ក្រុមប្រឹក្សា​ក្រុង​កំពង់ចាម អ្នកស្រី គឹន ស្រីអូន បញ្ជាក់​ថា មក​ទល់​ពេល​នេះ មាន​សកម្មជន​តិចតួច​ប៉ុណ្ណោះ​ដែល​វិលត្រឡប់​ទៅ​កម្ពុជា​វិញ ក្រោយ​ការប្រកាស​របស់​លោក ហ៊ុន សែន។ អ្នកស្រី​អះអាង​ថា មូលហេតុ​សំខាន់​នៃ​ការ​វិល​ទៅវិញ​នោះ​ទៀតសោត មិនមែន​ដោយសារ​ពួកគេ​ជឿជាក់​លើ​លោក ហ៊ុន សែន នោះ​ឡើយ ប៉ុន្តែ​គឺ​ដោយសារ​ពួកគេ​នឹករលឹក​គ្រួសារ និង​ត្រូវ​រក​ចំណូល​ផ្គត់ផ្គង់​គ្រួសារ​។ អ្នកស្រី​អះអាង​បន្ត​ថា សកម្មជន​ជាច្រើន​សុខចិត្ត​បន្ត​ស្នាក់នៅ​ក្រៅ​ប្រទេស ដើម្បី​រង់ចាំ​ដំណើរ​មាតុភូមិនិវត្តន៍​របស់​ថ្នាក់ដឹកនាំ​គណបក្ស​សង្គ្រោះ​ជាតិ​។ អ្នកស្រី​អះអាង​ទៀត​ថា សកម្មជន​គណបក្ស​សង្គ្រោះជាតិ​វិល​ចូល​ស្រុក​វិញ ឬ​អត់​នោះ មិនមែន​ស្ថិត​លើ​ការប្រកាស​របស់​លោក ហ៊ុន សែន ឡើយ ប៉ុន្តែ​ស្ថិត​នៅ​លើ​ការ​ចង្អុលបង្ហាញ​របស់​ថ្នាក់ដឹកនាំ​គណបក្ស ជាពិសេស គឺ​លោក សម រង្ស៊ី ពីព្រោះ​សកម្មជន​គ្រប់គ្នា​បាន​តាំងចិត្ត​រួចហើយ​ថា នឹង​ជម្នះ​គ្រប់​ឧបសគ្គ ដើម្បី​ឱ្យ​កម្ពុជា​ផ្លាស់ប្ដូរ​ទៅ​រក​របប​ប្រជាធិបតេយ្យ​ពិតប្រាកដ៖ «លុះត្រា​តែ​មាន​ភ្លើង​ខៀវ​ពី​មេដឹកនាំ​របស់ខ្ញុំ​ដែល​ពួកគាត់​ថា ឱ្យ​ពួក​ខ្ញុំ​ត្រឡប់​ទៅវិញ ខ្ញុំ​នឹង​ត្រឡប់​ទៅវិញ​ជាមួយ​គាត់ ប៉ុន្តែ​សម្ដី​លោក ហ៊ុន សែន ប្រកាស​ថា ឱ្យ​ពួក​ខ្ញុំ​ទៅវិញ ពួក​ខ្ញុំ​មិន​អាច​ទៅតាម​សំណើ​អ្វី​ដែល​គាត់​ស្រែក​ថា ឱ្យ​ទៅៗ ឱ្យ​នៅៗ ព្រោះ​ដើម្បី​ការពារ​សុវត្ថិភាព​ខ្លួនឯង»

ស្រដៀង​គ្នា​នេះ ចៅសង្កាត់​សាលា​កម្រើក ក្រុង​សៀមរាប ជាប់ឆ្នោត​នៃ​គណបក្ស​សង្គ្រោះ​ជាតិ លោក ជិន សុខង៉េង ដែល​មាន​ដីកា​តាម​ចាប់ខ្លួន​ពី​តុលាការ អះអាង​ថា លោក​នឹង​មិន​វិលត្រឡប់​ទៅ​កម្ពុជា​វិញ​ក្នុង​ស្ថានភាព​បែបនេះ​ឡើយ ព្រោះ​លោក​មើល​ឃើញ​ថា ការ​ដោះលែង និង​ហៅ​សកម្មជន​បក្ស​ប្រឆាំង​ឱ្យ​ចូល​ស្រុក​វិញ​នោះ គឺជា​នយោបាយ​ប្រជាភិថុតិ​របស់​លោក ហ៊ុន សែន​។ លោក​បន្ត​ថា លោក​ជា​ជនរងគ្រោះ​នៃ​ការ​ធ្វើទុក្ខបុកម្នេញ​ពី​សំណាក់​របប​លោក ហ៊ុន សែន ហើយ​សំណុំរឿង​ប្រឆាំង​នឹង​រូបលោក និង​សកម្មជន​ដទៃ​ទៀត មិន​ទាន់​ទម្លាក់​ចោល​ទាំងស្រុង​នៅឡើយ ដូច្នេះ​លោក និង​សកម្មជន​ដទៃ​ទៀត​ងាយ​នឹង​រង​គ្រោះ ពេល​របប​ក្រុងភ្នំពេញ​ចង់​ចាប់ខ្លួន​ពួក​លោក​ម្តង​ទៀត​។ លោក​សង្កត់ធ្ងន់​ថា លោក​មិន​សុខ​បញ្ឈប់​សកម្មភាព​នយោបាយ​គាំទ្រ​គណបក្ស​សង្គ្រោះ​ជាតិ ជា​ថ្នូរ​នឹង​ការ​វិល​ត្រឡប់​ទៅ​កម្ពុជា​បាន​នោះ​ឡើយ ព្រោះ​នេះ​ជា​សិទ្ធិ​សេរីភាព​ដែល​មាន​ធានា​ដោយ​ច្បាប់​ជាតិ និង​អន្តរជាតិ៖ «យើង​មិន​សុខចិត្ត​ដែល​គេ​បិទ​សិទ្ធិ​របស់​យើង​មិន​ឱ្យ​និយាយ​អ្វី​ទាំងអស់ ហើយ​គេ​ធ្វើតាម​អំពើ​ចិត្ត​នោះ​ទេ​។ ទាំងអស់​នោះ​ហើយ​ដែល​ធ្វើ​ឱ្យ​ប៉ះពាល់​ដល់​សិទ្ធិ​ជា​មូលដ្ឋាន​របស់​មនុស្ស រំលោភ​សិទ្ធិ​មនុស្ស រំលោភ​ប្រជាធិបតេយ្យ​របស់​ប្រទេស​កម្ពុជា ដូច្នេះ​យើងខ្ញុំ​មិន​សុខចិត្ត​អំពី​បញ្ហា​ទាំងអស់​ហ្នឹង​ទេ​។ អ៊ីចឹង​បានជា​ពួក​ខ្ញុំ​ទាមទារ ហើយ​នៅ​តស៊ូ​កៀក​ស្មា​គ្នា​ដើម្បី​ឱ្យ​មាន​លទ្ធិ​ប្រជាធិបតេយ្យ​ពិតប្រាកដ​នៅ​ក្នុង​ប្រទេស​កម្ពុជា»

អ្នកនាំពាក្យ​សមាគម​ការពារ​សិទ្ធិមនុស្ស​អាដហុក (ADHOC) លោក ស៊ឹង សែន​ករុណា ថ្លែង​ថា ការ​ហាមឃាត់​ពលរដ្ឋ​មិន​ឱ្យ​គាំទ្រ​គណបក្ស​នយោបាយ​ណាមួយ​ដែល​ពួកគាត់​ពេញចិត្ត ជា​ការ​អនុវត្ត​ផ្ទុយ​ពី​ច្បាប់​ជាតិ និង​អន្តរជាតិ​។ លោក​រិះគន់​ថា លក្ខខណ្ឌ​ដែល​ប្រមុខ​រដ្ឋាភិបាល​កម្ពុជា​បាន​ដាក់​ចេញ​នោះ ប្រៀប​បាន​នឹង​ការ​ខ្ទប់​មាត់ និង​បិទ​ដង្ហើម​គណបក្សប្រឆាំង ហើយ​ដកដង្ហើម​តែ​ខ្លួនឯង​យ៉ាង​ដូច្នេះ​ដែរ​។ លោក​សង្កត់ធ្ងន់​ថា ទង្វើ​បែបនេះ​មិនមែន​ជា​រឿង​ត្រឹមត្រូវ​ឡើយ ហើយក៏​មិនមែន​ជា​ការប្រកួតប្រជែង​នយោបាយ​ស្មើភាព​តាម​គោលការណ៍​ប្រជាធិបតេយ្យ​នោះ​ដែរ៖ «ក្នុង​ប្រទេស​កម្ពុជា ភាគី​នយោបាយ​យក​ឥទ្ធិពល​ទៅ​ប្រកួតប្រជែង​ជាមួយ​កម្លាំង​ម្ខាង​ដោយ​ប្រើ​មធ្យោបាយ​ដែល​មាន​ហ្នឹង គឺ​ទប់ស្កាត់​នូវ​សេរីភាព​ដែល​មាន​ចែង​ក្នុង​រដ្ឋធម្មនុញ្ញ​ក្ដី នៅ​ក្នុង​ច្បាប់​អន្តរជាតិ​ក្តី​ហ្នឹង គឺ​គេ​ទប់ស្កាត់​អត់​អាច​ធ្វើ​អ្វី​បាន​។ អ៊ីចឹង​អាហ្នឹង​គេ​ហៅថា​សេរីភាព​របៀប​យ៉ាងម៉េច?»

ក្នុង​រយៈពេល​មួយ​សប្ដាហ៍​ចុងក្រោយ​នេះ អាជ្ញាធរ​របប​ក្រុងភ្នំពេញ​បាន​ដាក់​ចេញ​នូវ​វិធានការ​មួយ​ចំនួន ដែល​មាន​លក្ខណៈ​បន្ធូរបន្ថយ​ភាព​តានតឹង​ផ្នែក​នយោបាយ ក្នុង​នោះ​មានការ​បិទ​បញ្ចប់​នីតិវិធី​ស៊ើបសួរ​សំណុំរឿង​លោក កឹម សុខា និង​បាន​អនុញ្ញាត​ឱ្យ​ប្រធាន​គណបក្ស​សង្គ្រោះ​ជាតិ មាន​សេរីភាព​ដើរហើរ​ពេញ​ស្រុក​ខ្មែរ ប៉ុន្តែ​បន្ត​ហាមឃាត់​ការ​សកម្មភាព​នយោបាយ និង​ត្រូវ​ឆ្លើយតប​ពេល​សមត្ថកិច្ច​កោះហៅ​។ ទន្ទឹម​នឹង​នេះ របប​នេះ​ក៏បាន​ដោះលែង​អ្នក​ទោស​នយោបាយ និង​អ្នកទោស​មនសិការ​រាប់​សិប​នាក់ ដែល​ត្រូវ​បាន​ឃុំខ្លួន​តាម​ទំនើងចិត្ត ឱ្យ​នៅ​ក្រៅ​ឃុំ​បណ្ដោះអាសន្ន​។ ប៉ុន្តែ​អ្នក​ដែល​ត្រូវ​បាន​ដោះលែង​ទាំងអស់​នោះ គឺ​សុទ្ធ​តែ​ជា​អ្នក​ដែល​ត្រូវ​បាន​ចាប់ខ្លួន​ថ្មីៗ ពោល​គឺ​ចាប់ពី​ខែ​សីហា​កន្លងទៅ​ពាក់ព័ន្ធ​នឹង​ការ​ចោទ​ប្រកាន់​ថា បាន​បញ្ចេញមតិ​គាំទ្រ​លោក សម រង្សី វិល​ចូល​ស្រុក។

អ្នកឃ្លាំមើល​ស្ថានការណ៍​នយោបាយ​យល់ថា វិធានការ​ទាំងនេះ គឺជា​ការ​ឆ្លើយតប​ទៅ​នឹង​កង្វល់​របស់​សហភាព​អឺរ៉ុប​ជុំវិញ​ស្ថានភាព​សិទ្ធិមនុស្ស និង​ប្រជាធិបតេយ្យ​នៅ​កម្ពុជា ក៏ប៉ុន្តែ​ពួកគេ​យល់ថា ដំណោះស្រាយ​ទាំងនេះ​មិនទាន់​គ្រប់គ្រាន់​ទៅ​នឹង​លក្ខខណ្ឌ​ដែល​សហភាព​អឺរ៉ុប​បាន​ដាក់​ចេញ​នោះ​ឡើយ ជាពិសេស​ការ​ដោះលែង​ឱ្យ​ចេញពី​ទ្រុង​តែ​នៅ​ជាប់​កន្លុះ​នេះ។

សហភាព​អឺរ៉ុប​បាន​សរសេរ​នៅ​ក្នុង​របាយការណ៍​បឋម​របស់​ខ្លួន​ថា របប​ក្រុងភ្នំពេញ​មិន​ទាន់​បាន​បំពេញ​លក្ខខណ្ឌ​គ្រប់គ្រាន់​ដើម្បី​បញ្ចៀស​ការ​បាត់​បង់​ការ​អនុគ្រោះ​ពន្ធ EBA នៅឡើយ​ទេ ផ្ទុយទៅវិញ ក្នុង​រយៈពេល​៩ ខែ​នៃ​នីតិវិធី​ត្រួតពិនិត្យ​របស់​សហភាព​អឺរ៉ុប របប​នេះ​បាន​ធ្វើ​ឱ្យ​ស្ថានភាព​សិទ្ធិមនុស្ស​កាន់តែ​អាក្រក់​។ សហភាព​អឺរ៉ុប​រក​ឃើញ​ថា របប​លោក ហ៊ុន សែន បាន​រំលោភ​បំពាន​ធ្ងន់ធ្ងរ និង​ជា​ប្រព័ន្ធ​លើ​អនុសញ្ញា​អន្តរជាតិ​ស្ដីពី​សិទ្ធិ​ពលរដ្ឋ និង​សិទ្ធិ​នយោបាយ ព្រមទាំង​អនុសញ្ញា​របស់​អង្គការ​អន្តរជាតិ​ខាង​ការងារ (ILO)​។ សហភាព​អឺរ៉ុប​បាន​ទុក​រយៈពេល ១​ខែ​ទៀត​ឱ្យ​របប​ក្រុងភ្នំពេញ​កែប្រែ​ខ្លួន មុននឹង​ការសម្រេចចិត្ត​ចុងក្រោយ​អំពី​ការ​ព្យួរ​ប្រព័ន្ធ​អនុគ្រោះ​ពន្ធ EBA ចូល​មក​ដល់ នៅ​ដើមខែ​កុម្ភៈ ឆ្នាំ​២០២០ ខាងមុខ៕

ព័ត៌មាន (1)
Share

fight all crimes to keep our pple,community,town,city and country be safe...no welcome criminal or terr activity out from our country

Be red alert to all Cambodian intellectuals oversea,and get be smart right now,this is a new Hun Sen's tactics had used during in killing fields era with n.Vietcong colluded in 1975 after ended of war.North Hanoi pro- communist espionages corporated with Hun Sen has setup a deadly trapped Khmer's intellectuals in Europe to come home and to rebuild the country which ruined by war.Unfortunately,all those than 400 students who returned home and want to rebuild their country,face a mass execution by n.Vietcong/Hun Sen's deadly-hit squads in a secreted location" I lost two siblings,sister and brother until now".Now,this tactic cde Hun Sen/Viet pro-commie ideology tries to repeat its again"watch out pple...war criminal conspiracy still alive".If,anyone see some of these criminals activity in the western countries,please raising a red alert to USCIS,or local police,state,federal,or FBI near u,or use crime hotline,Wetip anonymous crime reporting online with provides intelligence and information to all above.Use"202"737 4404,download the APP and report issues using your SmartPhone or Tablet,331 city services and police-non emergency Dial 311,anonymous Tipline"202"727 9099,anonymous Text the MPD Text 50411,crime solver Tipline"800"673 2777,Hates crimes hotline"202"727 0500.Just keep our community,town,city and our country be safe.

Nov 18, 2019 01:07 PM

គេហទំព័រ​ទាំងមូល