អ្នកវិភាគនយោបាយយល់ថា ការដាក់បំរាមហាមមិនឲ្យតំណាងរាស្ត្ររបស់គណបក្សប្រឆាំងបានចូលជួបលោក កឹម សុខា ក្នុងពន្ធនាគារ «ម៣» ត្រពាំងផ្លុង នឹងមិនធ្វើឲ្យគណបក្សកាន់អំណាច និងរបបក្រុងភ្នំពេញចំណេញទេ។ ផ្ទុយទៅវិញ អ្នកវិភាគចាត់ទុកទង្វើបែបនេះថា ជាការខាតបង់សម្រាប់របបក្រុងភ្នំពេញទៅវិញទេ។
តុលាការក្នុងរបបក្រុងភ្នំពេញ បានចេញលិខិតសម្រេចមិនអនុញ្ញាតឲ្យអតីតតំណាងរាស្ត្របក្សប្រឆាំងលោក កង គឹមហាក់ ដែលត្រូវបានគណបក្សប្រជាជនកម្ពុជាយកអាសនៈទាំងបំពានច្បាប់នោះ ចូលជួបសួរសុខទុក្ខលោក កឹម សុខា ក្នុងពន្ធនាគារបានទេ។ ចៅក្រមស៊ើបសួរ លោក គី ឫទ្ធី បានលើកហេតុផលថា សំណុំរឿងលោក កឹម សុខា កំពុងស្ថិតក្រោមការស៊ើបអង្កេត និងស្រាវជ្រាវពីសំណាក់តុលាការនៅឡើយ។
លើកនេះ ក៏ដូចរាល់លើកមុនៗ ដែរ គឺចៅក្រមស៊ើបសួរ លោក គី ឬទ្ធី ប្រាប់ថា មានតែក្រុមមេធាវី និងក្រុមគ្រួសារប៉ុណ្ណោះ ទើបត្រូវបានអនុញ្ញាតឲ្យចូលសួរសុខទុក្ខលោក កឹម សុខា ក្នុងពន្ធនាគារ «ម៣» បាន។
បើទោះជា ដឹងថា ការហាមមិនឲ្យតំណាងរាស្ត្របក្សប្រឆាំង បានចូលជួបលោក កឹម សុខា កំពុងជាប់ឃុំ ត្រូវរងការរិះគន់ថា ជាការរំលោភសិទ្ធិជនជាប់ឃុំធ្ងន់ធ្ងរយ៉ាងណាក៏ដោយ ក៏របបមួយនេះ ហាក់មិនបានអើពើនឹងការរិះគន់ទាំងនេះទេ ដោយនៅតែបន្ដធ្វើមិនដឹង និងចាត់ទុកថា ការសម្រេចបែបនេះ ធ្វើឡើងត្រឹមត្រូវតាមច្បាប់ ខណៈរបបមួយនេះ បានចាត់ឋានៈលោក កឹម សុខា ថា ជាជនជាប់ឃុំ កំពុងស្ថិតក្នុងដំណាក់កាលសាកសួរ សំណុំរឿងក្បត់ជាតិ។
អ្នកវិភាគនយោបាយវ័យក្មេង លោក ហង្ស វិទូ ហៅការហាមឃាត់បែបនេះថា ជាការរំលោភសិទ្ធិមនុស្សធ្ងន់ធ្ងរ ហើយមិនបានផ្ដល់ផលចំណេញដល់គណបក្សកាន់អំណាចទេ។ លោក ហង្ស វិទូ យល់ថា សកម្មភាពរបស់របបក្រុងភ្នំពេញនេះ អាចជាការបង្ហាញថា របបមួយនេះ កំពុងមានភាពភ័យខ្លាច ក្នុងការអនុញ្ញាតឲ្យតំណាងរាស្ត្របក្សប្រឆាំង បានជួបប្រធានគណបក្សសង្គ្រោះជាតិ៖ «ខ្ញុំគិតថា កាលណាយើងហាមបែបហ្នឹង ខ្ញុំយល់ឃើញថា វាជាការខាតបង់មួយ ខាតម្តងហើយម្តងទៀត។ រឹតតែហាមរឺតតែខាត ព្រោះអី ប្រជាពលរដ្ឋគាត់តាមដានព័ត៌មានច្រើន ជាពិសេស ស្តាប់វិទ្យុផ្សេងៗ ព័ត៌មានតាមទស្សនាវដ្តីច្រើនជាងពេលមុនៗ។ បើរដ្ឋាភិបាលនៅតែធ្វើអញ្ចឹងទេ រដ្ឋាភិបាលទេ ដែលជាអ្នកខាតបង់។ សព្វថ្ងៃប្រជាពលរដ្ឋមានគិតគូរច្រើនណាស់។ បើរដ្ឋាភិបាលប្រើស្តាយដដែលនោះ គឺខាតបង់ច្រើនណាស់ បាទ » ។
តំណាងរាស្ត្រជាប់ឆ្នោតមណ្ឌលខេត្តកំពង់ចាម មកពីគណបក្សសង្គ្រោះជាតិ លោក កង គឹមហាក់ កាលពីថ្ងៃទី៥ មេសា បានដាក់លិខិតទៅសាលាដំបូងរាជធានីភ្នំពេញ ដើម្បីស្នើចូលសួរសុខទុក្ខប្រធានគណបក្សប្រឆាំងលោក កឹម សុខា ដែលកំពុងជាប់ឃុំនៅពន្ធនាគារត្រពាំងផ្លុង នៅថ្ងៃទី១២ មេសា។ កន្លងមក តំណាងរាស្ត្រជាច្រើនរបស់គណបក្សប្រឆាំង មានលោក អ៊ូ ច័ន្ទរ័ត្ន លោក ម៉ៅ មុនីវណ្ណ ជាដើម សុទ្ធតែត្រូវបានចៅក្រមស៊ើបសួរ លោក គី ឬទ្ធី បដិសេធមិនឲ្យចូលពន្ធនាគារ «ម៣» សួរសុខទុក្ខលោក កឹម សុខា ក្រោមហេតុផលដូចគ្នា គឺថា លោក កឹម សុខា កំពុងស្ថិតក្នុងដំណាក់កាលស្រាវជ្រាវ និងស៊ើបអង្គេត ដែលត្រូវហាមឃាត់រាល់បុគ្គលមិនឲ្យបានចូលជួប វៀរលែងតែក្រុមមេធាវី និងក្រុមគ្រួសារ។
ទោះជាមេដឹកនាំ និងមន្ត្រីជាន់ខ្ពស់ក្នុងរបបក្រុងភ្នំពេញ អះអាងថា រឿងក្ដីលោក កឹម សុខា ស្ថិតក្នុងអំណាចតុលាការ ហើយគ្មានសិទ្ធិបញ្ជាលើតុលាការ ប៉ុន្ដែនរណាក៏ដឹងថា តុលាការគ្រាន់តែជាឧបករណ៍បម្រើឲ្យរបបក្រុងភ្នំពេញតែប៉ុណ្ណោះ។
មេធាវីម្នាក់ក្នុងចំណោមមេធាវីទាំង៧ ដែលកំពុងការពារក្ដីឲ្យលោក កឹម សុខា គឺអ្នកស្រី ម៉េង សុភារី ប្រាប់ថា កូនក្ដីរបស់អ្នកស្រី ពិតជាចង់ជួបសហការីរបស់គាត់ណាស់។ អ្នកស្រី ម៉េង សុភារី ប្រាប់ថា តាំងពីមានការចាប់ខ្លួនមក លោក កឹម សុខា មិនដែលបានជួបនរណាទាល់តែសោះ។ មេធាវីថា រឿងក្ដីរបស់លោក កឹម សុខា ហាក់ដូចជាមានការរំលោភលើសិទ្ធិជនជាប់ឃុំ ដោយសាររឿងក្ដីកន្លងមក បើទោះជាជនជាប់ឃុំ កំពុងស្ថិតក្នុងដំណាក់កាលស្រាវជ្រាវ និងស៊ើបអង្កេត ក៏ត្រូវបានអនុញ្ញាតឲ្យបងប្អូន មិត្តភក្ដិ បានចូលជួបជននោះដែរ៖ «ធម្មតាគាត់នៅក្នុងពន្ធគារ គាត់ចង់ជួបមិត្តភិក្តអីគាត់ដែរ ហើយគាត់ឯកការបន្តិចហើយ ព្រោះអីក្រៅពីក្រុមគ្រួសារគាត់ សាច់ញាតិគាត់ និងមេធាវីការពារក្តីឲ្យគាត់ គាត់មិនបានជួបអ្នកណាទេចា » ។
របបក្រុងភ្នំពេញបានរឹតត្បឹតសិទ្ធិរបស់លោក កឹម សុខា ខុសពីជនជាប់ឃុំដទៃ។ ប្រធានបក្សប្រឆាំង ត្រូវបានចាប់ និងឃុំខ្លួនមកដល់ថ្ងៃនេះ ធ្លាប់បញ្ជូនឲ្យមកស្ដាប់សវនាការក្នុងសាលាជម្រះក្ដីតែម្ដងគត់ គឺកាពីសវនាការសុំនៅក្រៅឃុំបណ្ដោះអាសន្ន កាលពីថ្ងៃទី១ កុម្ភៈ នៅសាលាឧទ្ធរណ៍។ សវនាការលើកក្រោយៗ មកទៀត សុទ្ធតែជាសវនាការ ដែលចៅក្រមស៊ើបសួរ បានទៅសាកសួរលោក កឹម សុខា ដល់ក្នុងពន្ធនាគារ «ម៣» ឬជាសវនាការ ដែលមានតែក្រុមមេធាវី ដោយអវត្តមានលោក កឹម សុខា នៅសាលាជម្រះក្ដី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។