សវនាការ​លោក កឹម សុខា ត្រូវ​ពន្យារ​ពេល​ដោយ​គ្មាន​មូលហេតុ​ក្រោយ​ខ្វែង​យោបល់​គ្នា​ខ្លាំង​រឿង​ភស្តុតាង​ថ្មី

ដោយ មួង ណារ៉េត
2020-02-28
អ៊ីម៉ែល
មតិ
Share
បោះពុម្ព
លោក កឹម សុខា ប្រធាន​គណបក្ស​សង្គ្រោះជាតិ។
លោក កឹម សុខា ប្រធាន​គណបក្ស​សង្គ្រោះជាតិ។
RFA

សវនាការ​ជំនុំ​ជម្រះ​ក្តី​ករណី​ចោទប្រកាន់​លោក កឹម សុខា ពី​បទ​ក្បត់ជាតិ ត្រូវ​ពន្យារពេល​ជាថ្មី​ម្តង​ទៀត ដោយ​គ្មាន​បញ្ជាក់​មូលហេតុ​ច្បាស់លាស់​។ តុលាការ​បាន​លើក​សវនាការ​ទីពីរ​ហើយ ក្រោយ​មេធាវី​ការពារ​ក្តី​លោក កឹម សុខា ខ្វែង​យោបល់​គ្នា​ខ្លាំង​ជាមួយ​ខាង​ភាគី​ចោទប្រកាន់ ជុំវិញ​ការ​ដាក់​ភស្តុតាង​ថ្មី។

សំណុំរឿង​លោក កឹម សុខា ដែល​រង​ការរិះគន់​ពី​សង្គម​ស៊ីវិល ថា​មាន​ចរិត​នយោបាយ តាំងពី​ដំបូង​ទីនោះ ឥឡូវ​កាន់តែ​បង្កើន​ភាព​មន្ទិល និង​ភាព​មិន​ច្បាស់លាស់ ថា​នឹង​ត្រូវ​អូស​បន្លាយ​យូរ​ដល់​ពេលណា ទើប​កាត់ក្ដី​ចប់ ឬ​ត្រូវ​បន្ត​អូស​បន្លាយ​ពេល​គ្មាន​ទី​បញ្ចប់ ព្រោះ​តុលាការ​បន្ត​ពន្យារពេល​សវនាការ​ញឹក​ញាប់​បែបនេះ​។

កាល​ពី​មុន ការ​បញ្ជូន​សំណុំរឿង​លោក កឹម សុខា ទៅ​ជំនុំជម្រះ​នេះ គឺ​ធ្វើ​ឡើង​យ៉ាង​ប្រញាប់ប្រញាល់ និង​តក់ក្រហល់ កាលពី​គណៈកម្មការ​អឺរ៉ុប មិនទាន់​សម្រេច​ដក​ប្រព័ន្ធ​អនុគ្រោះ​ពន្ធ EBA

សវនាការ ៥ សប្ដាហ៍​ដំបូង តាំង​ពី​ថ្ងៃទី ១៥ ខែ​មករា ប្រព្រឹត្ត​ទៅ​ដោយ​គ្មាន​ការ​លើក​ពេលនោះ​ទេ ទោះជា​ភាគី​ក្នុង​រឿង​ក្តី រួម​ទាំង​ចៅក្រម​ជំនុំជម្រះ​ផង តឹង​សរសៃក​ដាក់គ្នា ជុំវិញ​កិច្ច​ដំណើរការ​នីតិវិធី​ក្នុ​ង​សវនាការ​។

ប៉ុន្តែ ក្រោយ​គណៈកម្មការ​អឺរ៉ុប ប្រកាស​ដក​ប្រព័ន្ធ​អនុគ្រោះ​ពន្ធ EBA កាលពី​ថ្ងៃ​ទី១២ ខែកុម្ភៈ នោះ​ភ្លាម តុលាការ​ចាប់ផ្ដើម​លើក​ពេល​សវនាការ​ភ្លាម​។ សវនាការ​សប្ដាហ៍​ទី ៦ ដែល​ត្រូវ​ធ្វើ​នៅ​ថ្ងៃទី១៩ និង ២០ ខែ កុម្ភៈ ត្រូវ​លើក​ទៅ​ធ្វើ​កាលពី​ថ្ងៃ​ទី២៦ និង ២៧ ខែ កុម្ភៈ វិញ។ ឥឡូវ សវនាការ​សប្ដាហ៍​ក្រោយ ដែល​ត្រូវ​ធ្វើ​នៅ​ថ្ងៃ​ទី៤ និង​៥ ខែ​មីនា ត្រូវ​លើក​ពេល​ទៅ​ធ្វើ​នៅ​ថ្ងៃ​ទី​១១ និង ១២ ខែ​មីនា​វិញ ដោយ​គ្មាន​បញ្ជាក់​មូលហេតុ​ច្បាស់លាស់។

សហ​មេធាវី​ការពារ​ក្តី​លោក កឹម សុខា គឺ​លោក អាង ឧត្ដម ប្រាប់​អាស៊ីសេរី​កាលពី​រាត្រី​ថ្ងៃទី​២៧ ខែ កុម្ភៈ ថា​ការ​បន្ត​លើក​ពេល​សវនាការ​បែបនេះ គឺ​បញ្ជាក់​ឱ្យ​ឃើញ​កាន់តែ​ច្បាស់​ថា ការ​ចោទ​ប្រកាន់​ថា ក្រុម​មេធាវី​ការពារ​ក្តី​លោក កឹម សុខា មាន​ចេតនា​ពន្យារ​សវនាការ​នោះ គឺជា​ចោទប្រកាន់​គ្មាន​មូលដ្ឋាន ព្រោះ​ខាង​ក្រុម​ការពារ​ក្តី​លោក កឹម សុខា បាន​ទាមទារ​ឱ្យ​តុលាការ​បន្ថែម​ម៉ោង​សវនាការ ដោយ​បើកសវនាការ​មួយ​សប្ដាហ៍ ៥ ថ្ងៃ និង​បើ​សវនាការ ៦ ម៉ោង​ក្នុង​មួយថ្ងៃ ដើម្បី​ពន្លឿន​កិច្ច​ដំណើរការ​នីតិវិធី​នេះ ប៉ុន្តែ ត្រូវ​បាន​ខាង​តុលាការ​ជំទាស់។

លោក អាង ឧត្តម ថា​ការជំទាស់​នេះ​ទៀតសោត គឺ​ឈរ​លើ​ការ​ដោះសា ដែល​ថា​តុលាការ​មាន​សំណុំរឿង​ច្រើន​ផ្សេងទៀត ដែល​ត្រូវ​យក​មក​ជំនុំជម្រះ និង​ត្រូវការ​បន្ទប់​សវនាការ​នេះ ដើម្បី​បើកសវនាការ​រឿង​ក្តី​ផ្សេង​ទាំងនោះ​។ លោក អាង ឧត្តម ថា តុលាការ​មិន​ខ្វះ​បន្ទប់​សម្រាប់​ធ្វើ​សវនាការ​នោះ​ទេ បើ​តុលាការ​មាន​ឆន្ទៈ​ចង់​ពន្លឿន​សំណុំ​រឿង​នេះ៖ «ករណី​ពិសេស ករណី​វិសាមញ្ញ​អ៊ីចឹង​បន្ទប់​មួយ​ហ្នឹង ត្រូវតែ​ផ្ដាច់​មក៍​! បន្ទប់​មាន​ប៉ុន្មាន​ទៀត វា​អត់​ខ្វះ​ទេ តែ​គាត់​សម្រេច​អ៊ីចឹង តាម​ការ​សម្រេច​របស់​តុលាការ គ្រាន់តែ​យើង​យល់ថា ការ​សម្រេច​នោះ​អត់​សមរម្យ អត់​សមស្រប អត់​ត្រឹមត្រូវ»

លោក អាង ឧត្តម ដាក់​ការសង្ស័យ​ទៅ​បង្ហាញ​អ្វី ដែល​អាច​នៅ​ពីក្រោយ នៃ​ការ​បន្ត​ពន្យារពេល​សវនាការ​ញឹក​ញាប់ និង​មិន​ព្រម​ទទួលយក​សំណើ ដែល​សុំ​ឱ្យ​បើកសវនាការ​ញឹកញាប់​ជាង​នេះ​នោះ។

ស្រប​ពេល​គ្នា​ដែរ ភាគី​ខាង​ការពារ​ក្តី​ឱ្យ​លោក កឹម សុខា កាន់តែ​ព្រួយបារម្ភ​ខ្លាំង​អំពី​សុចរិត​ភាព​នៃ​ដំណើរការ​ក្តី​នេះ ដោយសារតែ​លោក​អះអាង​ថា មាន​ភាព​មិន​ប្រក្រតី និង​ភាព​មិន​ត្រឹមត្រូវ នៃ​ការ​ដាក់​ភស្តុតាង​ថ្មី ដែល​ខាង​ព្រះរាជអាជ្ញា ដាក់​បន្ថែម ដើម្បី​ដាក់​បន្ទុក​លើ​លោក កឹម សុខា នៅ​ក្នុង​ដំណាក់កាល​ជំនុំជម្រះ​នេះ។

មេធាវី​ការពារ​ក្តី​លោក កឹម សុខា ថា ដាក់​ភស្តុតាង​ថ្មី ដែល​ដាក់​បន្ទុក​លោក កឹម សុខា នៅ​ក្នុង​ដំណាក់កាល​នេះ ដែល​ព្រះរាជអាជ្ញា​ទើបតែ​ដាក់ គឺ​ផ្ទុយ​ទៅ​នឹង​គោលការណ៍​ច្បាប់ និង​បង្ហាញ​ពី​ការ​ខ្វះ​ភស្តុតាង ក្នុង​ការ​ដាក់​បន្ទុក​លើ​លោក កឹម សុខា តាំង​ពីមុន​បញ្ជូន​សំណុំរឿង​ទៅ​ជំនុំជម្រះ​មក​ម្ល៉េះ។

លោក អាង ឧត្តម បន្ថែម​ថា ព្រះ​អាជ្ញា​មិន​អាច​ដាក់​ភស្តុតាង​ថ្មី​នៅ​ក្នុង​ដំណាក់កាល​នេះ​ទេ ព្រោះ​បើ​ភស្តុតាង​នេះ​ខ្វះ​តាំង​ពីមុន មាន​ន័យថា តុលាការ​គ្មាន​មូលដ្ឋាន​ក្នុង​ការ​ចោទប្រកាន់​លោក កឹម សុខា និង​បញ្ជូន​រឿង​មក​ជំនុំជម្រះ​បែបនេះ​នោះ​ទេ គឺ​ត្រូវ​ទម្លាក់​ចោល​បទ​ចោទ​នេះ តាំងពី​ពេលនោះ​មក​ម្ល៉េះ មិនមែន​នឹកឃើញ​ចង់​ដាក់ ចេះតែ​ដាក់​បន្ថែម​ស្រេច​តែ​នឹង​ចិត្ត​នោះ​ទេ៖ «តាមពិត​នៅ​ពេល​ដែល​ខ្លួនឯង​យល់ថា វា​គ្រប់គ្រាន់​ហើយ ស្រាប់តែ​ក្រោយ​មក​យល់ឃើញ​ថា អត់​គ្រប់គ្រាន់​វិញ ខ្លួនឯង​រដ្ឋអាជ្ញា​តំណាង​អយ្យការ​នេះ ត្រូវតែ​ធ្វើការ​លើកលែង​ការចោទប្រកាន់ ដោយ​យល់​ឃើញ​ថា ភស្តុតាង​ដាក់​បន្ទុក អត់​គ្រប់គ្រាន់។ មិនមែន​ដើរ​ស្វែងរក​ភស្តុតាង​ដាក់​បន្ទុក​ថែមទៀត ឱ្យ​គ្រប់គ្រាន់ ឱ្យ​លើស​ពី​វិមតិសង្ស័យ​ទេ​។ ដូច្នេះ បើ​ក្នុង​ករណី​អត់​មាន​ភស្តុតាង​គ្រប់គ្រាន់ វា​ចូល​ក្នុង​គោលការណ៍​វិមតិសង្ស័យ​ហើយ​។ ក្នុង​ករណី​មាន​វិមតិសង្ស័យ​បែបនេះ ត្រូវ​បាន​ជា​ប្រយោជន៍​របស់​ជនជាប់ចោទ​ហើយ តាម​ច្បាប់​រដ្ឋធម្មនុញ្ញ​។ នេះ​ជា​គោលការណ៍​ច្បាប់​អន្តរជាតិ​ថែម​ទៀត​ផង មិនមែន​ត្រឹមតែ​ច្បាប់​ជាតិ​ទេ»

អាស៊ីសេរី មិនទាន់​អាច​សុំ​ការ​បំភ្លឺ​អ្នកនាំពាក្យ​សាលាដំបូង​រាជធានី​ភ្នំពេញ ជុំវិញ​រឿង​បាន​នៅឡើយ​ទេ​។

ប៉ុន្តែ ថ្មីៗ​នេះ​លោក ហ៊ុន សែន បាន​ថ្លែង​សារ ប្រកាស​កាត់ទោស​លោក កឹម សុខា ឱ្យ​ខាងតែ​បាន ដោយ​មិន​លើកលែង​នោះ​ទេ​។ លោក ហ៊ុន សែន បាន​ហៅ​លោក កឹម សុខា ថា​ជា​ជន​ក្បត់ជាតិ ទោះជា​រដ្ឋធម្មនុញ្ញ ការពារ​ការ​សន្មត​ទុកជាមុន​ថា ជន​ណា​ម្នាក់​មានទោស នៅ​មុន​តុលាការ​សម្រេច​សេចក្តី​យ៉ាង​ណា​ក្តី​។

អ្នកឃ្លាំមើល​សិទ្ធិមនុស្ស ថា សំណុំរឿង​លោក កឹម សុខា គឺជា​សំណុំរឿង​នយោបាយ ដែល​មិន​ត្រូវ​យក​ប្រព័ន្ធ​តុលាការ​មក​ដោះស្រាយ ដែល​នាំ​ឱ្យ​ប៉ះពាល់​ដល់​សុចរិត​ភាព​របស់​តុលាការ​នោះ​ទេ។

ចំណែក​ឯ​លោក អាង ឧត្ដម ថា បើ​តុលាការ​នេះ ឈរ​លើ​គោលការណ៍​សច្ចៈ​យុត្តិធម៌​ពិតប្រាកដ កូន​ក្តី​របស់​លោក នឹង​ត្រូវ​តុលាការ​រក​ឃើញ​ថា គ្មាន​កំហុស​អ្វី​ទាំងអស់។

តែ​ទោះជា​យ៉ាង​នេះ​ក្តី ក្រុម​មេធាវី​ការពារ​ក្ដី មិន​ផ្ដេកផ្ដួល​ទៅ​តាម​និន្នាការ​នយោបាយ​នោះ​ឡើយ គឺ​ត្រូវ​តស៊ូ​ការពារ​ក្ដី ទៅតាម​គោលការណ៍​យុត្តិធម៌ និង​គោលការណ៍​ច្បាប់ គ្រប់​ដំណាក់កាល​នីតិវិធី៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល