សាច់ញាតិ និងក្រុមអ្នកគាំទ្រ បន្តដាក់ញត្តិ ស្នើសុំស្ថានទូតជប៉ុន និងអាល្លឺម៉ង់ ប្រចាំនៅកម្ពុជា ជួយអន្តរាគមន៍ទៅរដ្ឋាភិបាល ដោះលែង មេដឹកនាំសហជីព លោក រ៉ុង ឈុន និងអ្នកទោសមនសិការផ្សេងៗទៀត ដែលរងការចាប់ខ្លួន ដោយសារការឃ្លាំមើលព្រំដែន និងទាមទារយុត្តិធម៌សង្គម។ ការតវ៉ា និងដាក់ញត្តិនេះ ត្រូវបានកងសន្តិសុខ និងសមត្ថកិច្ចក្រុងភ្នំពេញជាច្រើនាក់ ព្យាយាមរារាំង និងតាមអុកឡុក ប៉ុន្តែពុំមានការប៉ះទង្គិចធ្ងន់ធ្ងរទេ។
ប្រធានសមាគមគ្រូបង្រៀនកម្ពុជាឯករាជ្យ អ្នកស្រី អ៊ុក ឆាយាវី ប្រាប់ថា អាជ្ញាធរក្រុងភ្នំពេញ បានរារាំង ក្រុមអ្នកគាំទ្រអ្នកទោសមនសិការ មិនឲ្យដើរថ្មើរជើងទៅដាក់ញត្តិ នៅតាមស្ថានទូត នៅព្រឹកថ្ងៃទី១ កញ្ញា ដោយប្រើហេតុផលថា មិនបានសុំច្បាប់ដើរដាក់ញត្តិ ពីសាលាក្រុងភ្នំពេញ។ តែយ៉ាងណា ក្រុមអ្នកគាំទ្រ ដែលមានទាំងតំណាងគ្រូបង្រៀន និស្សិតបញ្ញាវន្ត កម្មករ និងយុវជន ប្រហែល ១៥០នាក់ បានធ្វើដំណើរតាមម៉ូតូសណ្ដោងរ៉ឺម៉កកង់បី ទៅដល់ស្ថានទូតជប៉ុន និងអាល្លឺម៉ង់ ដោយជោគជ័យ។
អ្នកស្រី អ៊ុក ឆាយាវី ប្រាប់ថា មន្ត្រីស្ថានទូតជប៉ុន បានចេញមកទទួលញត្តិ ដោយសន្យាថា នឹងទាក់ទងទៅតំណាងអ្នកដាក់ញត្តិ នៅពេលក្រោយ ដើម្បីសួរនាំបន្ថែមទៀត។ ឯមន្ត្រីទូតអាល្លឺម៉ង់ បានអញ្ជើញតំណាងមួយចំនួន ចូលជួបជជែកនៅក្នុងស្ថានទូត ហើយសន្យាភ្លាមៗ ថា យកករណីនេះ ប្រាប់ទៅរដ្ឋាភិបាលអាល្លឺម៉ង់ ដើម្បីជំរុញឲ្យមានការដោះលែងអ្នកទោសមនសិការទាំងអស់។
ក្នុងញត្តិដាក់ជូនស្ថានទូតជប៉ុន និងអាល្លឺម៉ង់ ក្រុមអ្នកដាក់ញត្តិ បានស្នើសុំឲ្យស្ថានទូតប្រទេសប្រជាធិបតេយ្យធំៗ ទាំងពីរ ជួយអន្តរាគមន៍ ដោះលែង លោក រ៉ុង ឈុន ជាប្រធានសហភាពសហជីពកម្ពុជា និងជាតំណាងក្រុមប្រឹក្សាឃ្លាំមើលកម្ពុជា ព្រមទាំងដោះលែង អ្នកទោសមនសិការ ចំនួន ៦នាក់ផ្សេងទៀត៖ « ទី១ គឺលោក រ៉ុង ឈុន ហើយ។ គោលការណ៍របស់ពួកយើង ព្រោះថា លោក រ៉ុង ឈុន ជាបុរសស្អាតស្អំ អ្វីអ៊ីចឹង ហើយក៏យើងសុំឲ្យទម្លាក់ចោលការចោទប្រកាន់ទៅលើយុវជនអ្វីទាំងអស់ ដែលជាប់ ( ពន្ធនាគារ ) ដោយសារតែការតវ៉ាទាមទារឲ្យលោក រ៉ុង ឈុន នៅក្រៅឃុំហ្នឹង។ យើងបាននិយាយជាមួយទូតគេអស់ហើយ»។
ចាប់តាំងពីមានការចាប់ខ្លួនក្រុមអ្នកតស៊ូមតិដោយអហិង្សាជាបន្តបន្ទាប់មក ក្រុមសាច់ញាតិ ប្រជាពលរដ្ឋ ជាពិសេស ក្រុមយុវជន បាននាំគ្នាតវ៉ា និងដើរដាក់ញត្តិតាមស្ថានទូតមួយចំនួនរួចហើយ ដូចជា ស្ថានទូតអាមេរិក បារាំង អឺរ៉ុប ឧត្ដមស្នងការអង្គការសហប្រជាជាតិ និងស្ថានទូតអូស្ត្រាលី។ ក្រុមអ្នកគាំទ្រ នឹងបន្តដាក់ញត្តិនៅ ស្ថានទូតចំនួន ២ទៀត គឺស្ថានទូតអង់គ្លេស និងស្ថានទូតថៃ ប៉ុន្តែមិនទាន់កំណត់ថ្ងៃ ជាក់លាក់ទេ។
ក្រុមអ្នកគាំទ្រ ក៏មានគម្រោងធ្វើបាតុកម្ម នៅទីលានប្រជាធិបតេយ្យ ចាប់ពីថ្ងៃទី៧ ដល់ថ្ងៃទី១៥ សីហា ទាមទារឲ្យមានការដោះលែងអ្នកទោសមនសិការដែរ។ ប៉ុន្តែ អាជ្ញាធររាជធានីភ្នំពេញ បាន ព្រមាន ២ដងហើយថា នឹងបង្ក្រាប ប្រសិនបើនៅតែជម្នះធ្វើបាតុកម្មនេះ។ ចំណែកក្រុមអ្នកគាំទ្រ នៅក្រៅប្រទេសវិញ ដូចជា នៅប្រទេសថៃ កូរ៉េខាងត្បូង និងកាណាដា បានធ្វើបាតុកម្ម ជាបន្តបន្ទាប់ ទាមទារឲ្យមានការដោះលែងអ្នកតស៊ូមតិដោយអហិង្សាទាំងអស់ឲ្យមានសេរីភាពឡើងវិញផងដែរ។
អាស៊ីសេរី មិនអាចសុំការបញ្ជាក់ ពីអ្នកនាំពាក្យរដ្ឋាភិបាល លោក ផៃ ស៊ីផាន និងអ្នកនាំពាក្យក្រសួងយុត្តិធម៌ លោក ជិន ម៉ាលីន បានទេ នៅថ្ងៃទី១ កញ្ញា ដោយសារទូរស័ព្ទរោទ៍គ្មានអ្នកទទួល។ ប៉ុន្តែ មន្ត្រីនាំពាក្យឲ្យរាជរដ្ឋាភិបាលទាំងពីររូបនេះ ធ្លាប់ប្រាប់អាស៊ីសេរីថា ការដាក់ញត្តិ និងសកម្មភាពស្របច្បាប់នានា ជាសិទ្ធិរបស់ពលរដ្ឋ ប៉ុន្តែគ្មានឥទ្ធិពល ចំពោះសំណុំរឿងនៅក្នុងតុលាការទេ។
អ្នកនាំពាក្យសមាគមសិទ្ធិមនុស្សអាដហុក លោក ស៊ឹង សែនករុណា យល់ថា ការដាក់ញត្តិរបស់ក្រុមអ្នកតវ៉ា គឺជាមូលដ្ឋាន ដែលអាចធ្វើឲ្យមន្ត្រីស្ថានទូត និងរដ្ឋាភិបាលបរទេស មានអំណះអំណាងក្នុងការជជែកជាមួយរដ្ឋាភិបាលកម្ពុជា។ អ្នកឃ្លាំមើលសិទ្ធិមនុស្សរូបនេះ ជឿជាក់ថា ការអន្តរាគមន៍នានារបស់ស្ថានទូតបរទេស នឹងអាចជួយឲ្យមានការដោះលែង អ្នកទោសមនសិការទាំងអស់៖ « ខ្ញុំគិតថា ការអះអាងថា ( តុលាការ ) មានឯករាជភាព វាគ្រាន់តែអាចថា នៅលើតែសៀវភៅ ឬក៏នៅលើច្បាប់ ដែលមានចែងតែប៉ិនហ្នឹង។ ប៉ុន្តែអំពើនៃការអនុវត្តគឺ អត់ទាន់បានធ្វើឲ្យមានការជឿជាក់ថា ពិតជាតុលាការ បានអនុវត្តតួនាទីរបស់ខ្លួន បានត្រឹមត្រូវ និងឯករាជ្យទេ»។
ទោះជាយ៉ាងណា ក្រុមអ្នកគាំទ្រប្រាប់ថា ពួកគាត់នឹងនៅតែតវ៉ា នឹងការបង្ក្រាបនេះ ហើយនៅតែព្យាយាមស្វែងរក កិច្ចអន្តរាគមន៍ជាបន្តបន្ទាប់ទៀត ដោយរំពឹងថា បណ្ដាប្រទេសលោកសេរី នឹងមិនឱបដៃ ឈរមើលការរំលោភសិទ្ធិមនុស្សនេះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។