រដ្ឋាភិបាល​ស៊ុយអែត​សម្រេច​បិទ​ស្ថានទូត​នៅ​កម្ពុជា​នៅ​ចុង​ឆ្នាំ​២០២១

ដោយ ឡេង ម៉ាលី
2020.11.27
ស៊ុយអែត កម្ពុជា (ពី​ឆ្វេង) ទង់ជាតិ​ប្រទេស​ស៊ុយអែត (Sweden) និង​ទង់​ជាតិ​ប្រទេស​កម្ពុជា ដែល​ត្រូវ​បាន​ដាក់តាំង​ក្នុង​កម្មវិធី​បុណ្យជាតិ​របស់​ស៊ុយអែត ដែល​រៀបចំ​នៅ​រាជធានី​ភ្នំពេញ កាល​ពី​ឆ្នាំ​២០១៧។
Photo courtesy of Embassy of Sweden in Phnom Penh

រដ្ឋាភិបាល​ស៊ុយអែត (Sweden) ប្រកាស​បិទ​ស្ថានទូត​របស់​ខ្លួន​នៅ​ភ្នំពេញ នៅ​ចុង​ឆ្នាំ២០២១ ខាង​មុខ។ អ្នកវិភាគ​យល់​ថា ការ​សម្រេច​ចិត្ត​ដ៏​គួរ​ឱ្យ​ភ្ញាក់​ផ្អើល​នេះ​ ទំនងជា​ប្រទេស​ស៊ុយអែត​ខក​ចិត្ត​នឹង​បញ្ហា​ប្រជាធិបតេយ្យ និង​ការ​រំលោភ​សិទ្ធិមនុស្ស​ធ្ងន់ធ្ងរ​នៅ​កម្ពុជា។

ក្រសួង​ការ​បរទេស​ស៊ុយអែត​ប្រកាស​នៅ​ថ្ងៃ​ទី២៦ ខែវិច្ឆិកា​ថា នៅ​ពេល​ដែល​ស្ថានទូត​បិទ​ចាប់​ពី​ចុង​ឆ្នាំ២០២១ ត​ទៅ​នោះ  ​នឹង​មិន​មាន​បុគ្គលិក​របស់​ខ្លួន​នៅ​កម្ពុជា​ទៀត​ឡើយ ដោយ​សកម្មភាព​ការ​បរទេស​ទាំងឡាយ​ជាមួយ​កម្ពុជា ត្រូវ​ផ្ទេរ​ឱ្យ​ស្ថិត​ក្រោម​ការ​ចាត់​ចែង​របស់​ស្ថានទូត​ស៊ុយអែត​ប្រចាំ​នៅ​ប្រទេស​ថៃ​វិញ។

ចំណែក​កិច្ច​សហ​ប្រតិបត្តិការ​អភិវឌ្ឍន៍​វិញ ក្រសួង​ការបរទេស​ស៊ុយអែត​បញ្ជាក់​ថា នឹង​នៅ​តែ​បន្ត​អនុវត្ត​តាម​រយៈ​ទីភ្នាក់ងារ​សហប្រតិបត្តិការ​អភិវឌ្ឍន៍​អន្តរជាតិ​ស៊ុយអែត ហៅ​កាត់​ថា ស៊ីដា (Sida)។ ក្រសួង​ការ​បរទេស​ស៊ុយអែត​បក​ស្រាយ​ថា​ ការ​ផ្លាស់​ប្តូរ​នេះ ជា​ផ្នែក​មួយ​នៃ​ការ​សម្រប​ខ្លួន​ជា​បន្ត​របស់​ក្រសួង​ការ​បរទេស​ស៊ុយអែត ​ដើម្បី​ឆ្លើយ​តប​នូវ​ការ​ប្រែប្រួល​ស្ថាន​ភាព​ខាង​ក្រៅ និង​តម្រូវការ​ត្រួត​ពិនិត្យ ​និង​សេវាកម្ម​ថ្មី។ ក្រសួង​ការបរទេស​ឱ្យ​ដឹង​ទៀត​ថា ដំណើរ​ការ​ផ្លាស់​ប្ដូរ​បើក ឬ​បិទ​ស្ថានទូត និង​ស្ថាន​កុងស៊ុល​នេះ​ តែង​កើត​ឡើង​ជា​ប្រចាំ។

ក្រសួង​ការ​បរទេស​ស៊ុយអ៊ែត​បន្ថែម​ថា ទោះបីជា​ស្ថានទូត​ស៊ុយអែត​នៅ​រាជធានី​ភ្នំពេញ នឹង​ត្រូវ​បិទ​ទ្វារ​នៅ​ចុងឆ្នាំ២០២១ក្តី​ ក៏​ស៊ុយអែត នៅ​តែ​មាន​ទំនាក់ទំនង​ល្អ​ជាមួយ​កម្ពុជា ហើយ​ទំនាក់​ទំនង​នេះ ​នឹង​បន្ត​តាម​មធ្យោបាយ​ថ្មី​ទៀត។

ទាក់ទង​នឹង​ករណី​នេះ អាស៊ីសេរី​មិន​អាច​សុំ​ការ​ឆ្លើយ​តប​ពី​អ្នក​នាំ​ពាក្យ​ក្រសួង​ការបរទេស​លោក ​កុយ គួង បាន​ទេ ដោយ​ទូរស័ព្ទ​ចូល​ជាច្រើន​ដង​តែ​គ្មាន​អ្នកទទួល។

ចំណែក​ប្រធាន​អង្គភាព​អ្នក​នាំ​ពាក្យ​រដ្ឋាភិបាល ​លោក ​ផៃ​ ស៊ីផាន មាន​ប្រសាសន៍​ថា ការ​រុះរើ​ស្ថាន​ទូត​ទៅ​ទីក្រុង​បាងកក​នេះ​ គឺ​ជា​ការ​សម្រេច​ចិត្ត​ផ្ទៃក្នុង​របស់​ប្រទេស​ស៊ុយអែត ឬ​អាច​ជា​ផែន​ការ​សន្សំសំចៃ​ក្រោយ​រង​ផល​ប៉ះពាល់​ពី​វិបត្តិ​ជំងឺ​កូវីដ។ លោក​អះអាង​ថា​គ្មាន​ការ​ប្រឈម​មុខ​ដាក់​គ្នា​រវាង​រដ្ឋាភិបាល​កម្ពុជា ​និង​ស៊ុយអែត​នោះ​ទេ ព្រោះ​គោល​នយោបាយ​ការ​បរទេស​របស់​រដ្ឋាភិបាល​កម្ពុជា ​មិន​យក​ប្រទេស​ណា​មួយ​ជា​សត្រូវ​ឡើយ។ លោក ​បន្ត​ថា ស៊ុយអែត ​បាន​ប្រកាស​ខ្លួនឯង​រួច​ហើយ​ថា​ ប្រទេស​ទាំង​ពីរ​នៅតែ​មាន​ទំនាក់​ទំនង​ល្អ​ជាមួយគ្នា​ ប៉ុន្តែ​លោក​សោក​ស្ដាយ​ដែល​មាន​មតិ​មួយ​ចំនួន​លើកឡើង​អំពី​ចំណុច​អវិជ្ជមាន​របស់​កម្ពុជា៖ «ស៊ុយអែត និយាយ​ប្រាប់​ច្បាស់​អ្វី​ដែល​ប្រទេស​ស៊ុយអែត បាន​និយាយ​ថា ទំនាក់ទំនង និង​កិច្ច​សហប្រតិបត្តិការ​នៅ​តែ​បន្ត​ទៅ​មុខ​ទៀត។ គេ​និយាយ​ខ្លួន​គេ​ហ្មង»

ទោះជា​យ៉ាងណា​ ក្នុង​ដំណើរ​ទស្សនកិច្ច​នៅ​ភ្នំពេញ កាល​ពី​ខែ​តុលា ឆ្នាំ២០១៧ ឯកអគ្គរាជទូត​ស៊ុយអែត​ទទួល​បន្ទុក​សិទ្ធិមនុស្ស ប្រជាធិបតេយ្យ និង​នីតិរដ្ឋ​អ្នកស្រី អ៊ែនីកា ប៊ែន ដេវីដ (Annika Ben David) បាន​បញ្ជាក់​ប្រាប់​តំណាង​រដ្ឋាភិបាល​កម្ពុជា​ហើយ​ថា បើ​គណបក្ស​សង្គ្រោះ​ជាតិ ត្រូវ​បាន​រំលាយ រឿង​នេះ​នឹង​បង្ខំ​ឱ្យ​រដ្ឋាភិបាល​ស៊ុយអែត គិតគូរ​ឡើង​វិញ​ពី​ទំនាក់ទំនង​ជាមួយ​កម្ពុជា។ លើស​ពី​នេះ កាលពីថ្ងៃទី១២ ខែមិថុនា ឆ្នាំ២០២០ ថ្មីៗ នេះ រដ្ឋាភិបាល​ស៊ុយអែត ​បាន​សម្រេច​ជា​ផ្លូវ​ការ​បញ្ឈប់​ផ្តល់​ជំនួយ​អភិវឌ្ឍន៍​ដល់​រដ្ឋាភិបាល​កម្ពុជា ដោយសារ​តែ​មើល​ឃើញ​ថា លំហ​ប្រជាធិបតេយ្យ និង​ការ​គោរព​សិទ្ធិមនុស្ស​នៅ​កម្ពុជា កំពុង​ទទួល​រង​ការ​រឹតត្បិត​ខ្លាំង​ក្នុង​រយៈពេល​ប៉ុន្មាន​ឆ្នាំ​ចុង​ក្រោយ​នេះ ​ដែល​ជា​ហេតុ​ធ្វើ​ឱ្យ​ស៊ុយអែត​ពិបាក​ក្នុង​ការ​បន្ត​កិច្ច​សហប្រតិបត្តិការ​ឱ្យ​បាន​ទូលំ​ទ​លាយ និង​ជិតដិត​ជាមួយ​រដ្ឋាភិបាល​កម្ពុជា។ ប្រទេស​ប្រជាធិបតេយ្យ​នៅ​តំបន់​អឺរ៉ុប​មួយ​នេះ បញ្ជាក់​ថា ​ខ្លួន​នឹង​ងាក​មក​ផ្ដោត​លើ​ការ​លើក​កម្ពស់​វិស័យ​សិទ្ធិ​មនុស្ស ប្រជាធិបតេយ្យ និង​នីតិរដ្ឋ​វិញ ក្នុង​នោះ ស៊ុយអែត នឹង​នៅតែ​បន្ត​គាំទ្រ​សង្គម​ស៊ីវិល អ្នក​ការពារ​សិទ្ធិមនុស្ស និង​អ្នក​តស៊ូ​មតិ​ឱ្យ​មាន​ប្រជាធិបតេយ្យ​នៅ​កម្ពុជា។

សហស្ថាបនិក​នៃ​វិទ្យាស្ថាន​ប្រជាធិបតេយ្យ​កម្ពុជា​ លោក​បណ្ឌិត ​រ៉ូ ​វណ្ណៈ ​ថ្លែង​ថា ​ស៊ុយអែត ​គឺជា​ប្រ​ទេស​មួយ ​ដែល​ពង្រឹង​ និង​ពង្រីក​យន្តការ​ប្រជាធិបតេយ្យ ​និង​សិទ្ធិមនុស្ស​ជា​សកល ​ប៉ុន្តែ​ការដែល ប្រជាធិបតេយ្យ​កម្ពុជា​ នៅ​តែ​ដើរ​ថយ​ក្រោយ​បែប​នេះ​អាច​ជា​មូលហេតុ​មួយ​នៃ​ដក​ស្ថាន​ទូត​ទៅ​ទី​ក្រុង​បាងកក។ លោក ​បន្តថា ​ការដែល​ប្រទេស​ប្រជាធិបតេយ្យ​គំរូ និង​មាន​សមាន​ចិត្ត​មួយ​នេះ​ បិទ​ស្ថាន​ទូត​នៅ​កម្ពុជា​បែបនេះ​ មិនមែន​ជា​រឿង​ល្អ​នោះ​ទេ ហើយ​អាច​ធ្វើ​ឲ្យ​ប៉ះពាល់​ដល់​មុខ​មាត់​កម្ពុជា​ផង​ដែរ៖ «ស៊ុយអែត​ចង់​បន្ត​គោល​នយោបាយ​ការ​បរទេស​អនុត្តរភាព​សេរី ដែល​មាន​អាមេរិក​ដឹក​មុខ ប៉ុន្តែ​ស៊ុយអែត​មាន​ផល​ប្រយោជន៍​រួម​ជាមួយ​សណ្ដាប់ធ្នាប់​សេរី​គឺ​ថា ពង្រឹង និង​ពង្រីក​ប្រជាធិបតេយ្យ​គ្រប់​ច្រក​ល្ហក​ទាំង​អស់​នៅ​លើ​ពិភពលោក ដូច្នេះ​នេះ​ជា​ថ្នូរ​មួយ​នៃ​អា​ហ្នឹង។ ដល់​ពេល​គាត់​ឃើញ​ទំនាក់ទំនង​ទ្វេ​ភាគី​រវាង​កម្ពុជា​មួយ​ស៊ុយអែត មាន​ភាព​រកាំរកូស​តាម​រយៈ​បស្ចិម​ប្រទេស ជាពិសេស ស៊ុយអែត គាត់​ប្រកាន់​រដ្ឋាភិបាល​កម្ពុជា​រឿង​រំលោភ​សិទ្ធិមនុស្ស និង​ការ​រឹតត្បិត​ប្រជាធិបតេយ្យ​ជា​ដើម ដែល​ធ្វើ​ឲ្យ​អាក់អន់​ស្រពន់​ចិត្ត ប៉ុន្តែ​យ៉ាង​ណា ក៏​ស៊ុយអែត មិន​ផ្ដាច់​ខ្លួន​ចេញ​ពី​កម្ពុជា​ទាំង​ស្រុង​ដែរ បាន​ន័យ​ថា គាត់​ទៅ​បាងកក តែ​នៅ​តែ​ផ្តល់​ជំនួយ​ជួយ​ដល់​វិស័យ​សិទ្ធិមនុស្ស លទ្ធិ​ប្រជាធិបតេយ្យ និង​ការអភិវឌ្ឍន៍​ដទៃ​ទៀត តាម​រយៈ​ជា​ដៃគូ​របស់​គាត់»

រីឯ​នាយិកា​ប្រតិបត្តិ​នៃ​មជ្ឈមណ្ឌល​សិទ្ធិមនុស្ស​កម្ពុជា (CCHR) អ្នកស្រី ​ចក់ ​សុភាព​ បង្ហោះ​សារ​នៅ​លើ​ទំព័រ​ហ្វេសប៊ុក (FacebooK) ថា ស៊ុយអែត ​បាន​ដើរ​តួនាទី​យ៉ាង​សំខាន់​ក្នុង​ការ​គាំទ្រ​កិច្ចការ​ជា​ច្រើន​ដល់​រដ្ឋាភិបាល​ អង្គការ​សង្គម​ស៊ីវិល​ និង​តួអង្គ​ដទៃ​ទៀត ដោយ​ឈរ​លើ​គោលការណ៍​គោរព ​និង​ការពារ​សិទ្ធិមនុស្ស។ អ្នកស្រី​ជឿ​ថា​ការ​ចាក​ចេញ​នេះ​នឹង​ប៉ះពាល់​ខ្លាំង​ដល់ នីតិវិធី​និង​ការ​ឆ្លើយ​តប​របស់​ស៊ុយអែត​ចំពោះ​កិច្ច​គាំទ្រ​ដល់​កម្ពុជា។ ស៊ុយ​អ៊ែ​ត បង្កើត​ទំនាក់ទំនង​ការទូត​ជាមួយ​កម្ពុជា​ចាប់​តាំង​ពី​ឆ្នាំ១៩៦១មក ​ប៉ុន្តែ​ដំបូង​ឡើយ​ស្ថានទូត​ស៊ុយអ៊ែត​ផ្នែក​ទំនាក់​ទំនង​ជាមួយ​កម្ពុជា ក៏​មាន​មូលដ្ឋាន​នៅ​ប្រទេស​ថៃ​ដែរ។ លុះ​ដល់​ឆ្នាំ២០១០ ទើប ប្រទេស​មួយ​នេះ បាន​សម្រេច​បើក​ស្ថាន​ទូត​របស់​ខ្លួន​នៅ​រាជធានី​ភ្នំពេញ។

ពី​ឆ្នាំ​២០១៤ ដល់​ឆ្នាំ​២០១៨ ប្រទេស​នេះ ក៏​បាន​ផ្តល់​ជំនួយ​ឥត​សំណង ក្នុង​ទឹកប្រាក់​ប្រមាណ ១២៥​លាន​ដុល្លារ​អាមេរិក ដល់​រដ្ឋាភិបាល​កម្ពុជា ដោយ​បាន​​ផ្តោត​លើ​វិស័យ​អភិបាលកិច្ច យេនឌ័រ សិទ្ធិ​មនុស្ស អប់រំ ការងារ និង​វិស័យ​ប រិស្ថាន។ ទោះ​ជា​យ៉ាង​នេះ​ក្ដី ក្នុងរយៈ​ពេល​ចុង​ក្រោយនេះ ​រដ្ឋាភិបាល​ស៊ុយអែត​ តែងតែ​ចេញមុខ​រិះគន់​ខ្លាំងៗ ចំពោះ​របប​ក្រុង​ភ្នំពេញ​ ជុំវិញ​ការ​រំលោភ​គោល​ការណ៍​ប្រជាធិបតេយ្យ និង​ការ​រំលោភ​សិទ្ធិមនុស្ស​ធ្ងន់ធ្ងរ​នៅ​កម្ពុជា៕

 

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

អត្ថបទពេញនិយម
នយោបាយ
សង្គម​ស៊ីវិល​រំពឹង​ថា​ ឯកអគ្គរដ្ឋទូត​អាមេរិក​ប្រចាំ​កម្ពុជា​ថ្មី​នឹង​បន្ត​ចូល​រួម​លើក​ស្ទួយ​ប្រជាធិបតេយ្យ
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។