តុលាការ​ខេត្ត​ត្បូងឃ្មុំ ផ្ដន្ទាទោស​សកម្មជន​បក្ស​ប្រឆាំង ៧នាក់​ឲ្យ​ជាប់​គុក​ពី ៥ ទៅ ៧ឆ្នាំ​ក្នុង​សំណុំរឿង​រួម​គំនិត​ក្បត់

ដោយ មាន ឫទ្ធិ
2020-09-22
អ៊ីម៉ែល
មតិ
Share
បោះពុម្ព
លោក គង់ សំអាន សមាជិក​ក្រុម​ប្រឹក្សា​ស្រុក​មេមត់​នៃ​គណបក្ស​សង្គ្រោះ​ជាតិ ខេត្ត​ត្បូងឃ្មុំ ដែល​ត្រូវ​អាជ្ញាធរ​ចាប់​ខ្លួន ថ្ងៃ​ទី៦ ខែ​កញ្ញា ឆ្នាំ២០២០។
លោក គង់ សំអាន សមាជិក​ក្រុម​ប្រឹក្សា​ស្រុក​មេមត់​នៃ​គណបក្ស​សង្គ្រោះ​ជាតិ ខេត្ត​ត្បូងឃ្មុំ ដែល​ត្រូវ​អាជ្ញាធរ​ចាប់​ខ្លួន ថ្ងៃ​ទី៦ ខែ​កញ្ញា ឆ្នាំ២០២០។
រូប៖ ហ្វេសប៊ុក

តុលាការ​ខេត្ត​ត្បូង​ឃ្មុំ ​នៅ​ថ្ងៃ​ទី២២ ខែកញ្ញា ​ប្រកាស​សាលក្រម​ផ្ដន្ទាទោស​សកម្មជន​បក្ស​ប្រឆាំង​ ៧នាក់​ឲ្យ​ជាប់​ពន្ធនាគារ​ពី ៥ឆ្នាំ​ទៅ ៧ឆ្នាំពី​បទ​រួម​គំនិត​ក្បត់ ​ដែល​ជា​សំណុំរឿង​ចាស់ ​កាល​ពី​ឆ្នាំ២០១៩។ មេធាវី ​និង​មន្ត្រី​សិទ្ធិមនុស្ស ​ចាត់​ទុក​សេចក្ដី​សម្រេច​នេះ​ថា អយុត្តិធម៌ និង​មាន​ចរិត​នយោបាយ។

មេធាវី​ការពារ​ក្តី​ឲ្យ​សកម្មជន​បក្ស​ប្រឆាំង ​គឺ​លោក សំ សុគង់ ប្រាប់​អាស៊ី​សេរី​ថា ក្នុង​ចំណោម​កូន​ក្តី​របស់​លោក​ទាំង ៧នាក់​នោះ​ គឺ​មាន ៥នាក់​ ត្រូវ​បាន​សាលាដំបូង​ខេត្ត​ត្បូង​ឃ្មុំ​សម្រេច​ផ្ដន្ទាទោស​ឲ្យ​ជាប់​ពន្ធនាគារ ៧ឆ្នាំ ​និង​ចេញ​ដីកា​តាម​ចាប់​ខ្លួន​ឡើង​វិញ​ ចំណែក​ពីរ​នាក់​ទៀត​ ផ្ដន្ទាទោស​ឲ្យ​ជាប់​៥ឆ្នាំ ​តែ​ព្យួរ​ទោស​សាក​ល្បង។ លោក សំ ​សុគង់ ​បញ្ជាក់​ថា ​កូន​ក្តី​របស់​លោក​ទាំង ៥នាក់​នោះ​ មាន​៣នាក់​កំពុង​រស់​នៅ​ភៀសខ្លួន​នៅ​ក្រៅ​ប្រទេស ​ហើយ​សកម្មជន​ម្នាក់​ទៀត​ដែល​កំពុង​កូន​ខ្ចី គឺ​លោក​ស្រី ​មាន ឡា​ កំពុង​ភៀស​ខ្លួន​ក្នុង​ប្រទេស ​រី​ឯ​សកម្មជន​ម្នាក់​ទៀត គឺ​លោក គង់ សំអាន ត្រូវ​ចាប់​ឃុំខ្លួន​ក្នុង​ពន្ធនាគារ ​កាល​ពី​ថ្ងៃ​ទី៦ ខែកញ្ញា ​មុន​ការ​ប្រកាស​សាលក្រម​នេះ។ ដោយ​ឡែក​សកម្មជន​ពីរ​នាក់​ទៀត​ ដែល​តុលាការ​ព្យួរ​ទោស​នោះ ​គឺ​លោក វ៉ាន់ សុផាត និង​លោក​ ជឹម វណ្ណៈ ​មិន​បាន​រត់​គេច ខ្លួន​ឡើយ ​ប៉ុន្តែ​លោក ជឹម វណ្ណៈ ​ត្រូវ​បាន​គេ​អះអាង​ថា​ បាន​សារភាព​ចុះ​ចូល​ជា​មួយ​គណបក្ស​កាន់​អំណាច។

ទោះ​យ៉ាង​ណា​លោក​មេ​ធាវី​ សំ ​សុគង់ ​ចាត់ទុកថា​ សេចក្ដី​សម្រេច​របស់​តុលាការ​នេះ​ គឺជា​រឿង​អយុត្តិធម៌​ និង​ធ្វើ​ឡើង​ផ្ទុយ​ពី​ខ្លឹមសារ​ច្បាប់ ​ដោយសារ​កូន​ក្តី​របស់​លោក ​មិន​បាន​ប្រព្រឹត្ត​ខុស​ដូច​ការ​ចោទប្រកាន់​ឡើយ៖ «ខ្ញុំ​យល់​ឃើញ​ថា​ការ​ផ្ដន្ទាទោស​នៅ​ថ្ងៃ​នេះ​ គឺ​មិន​ទាន់​អាច​ទទួល យក​បានទេ ​ដោយសារ​ចៅក្រម​ផ្ដន្ទាទោស​ហើយ​ចេញ​ដីកា​ចាប់​ខ្លួន​ទៀត​ជាពិសេស​កូន​ក្តី​របស់ខ្ញុំ ឈ្មោះ ​មាន ឡា ដែល​ជា​ស្ត្រី​ទន់ខ្សោយ ​ហើយ​ជា​ស្ត្រី​ទើប​ឆ្លងទន្លេ ​ហើយ​មាន​ជីវភាព​លំបាក​ខ្លាំង»

តុលាការ ​បាន​ចោទ​ប្រកាន់​ពួក​គេ​ពី​បទ​រួម​គំនិត​ក្បត់​ តាម​មាត្រា​ ៤៥៣​នៃ​ក្រម​ព្រហ្មទណ្ឌ ពាក់ព័ន្ធ នឹង​ការ​បញ្ចេញមតិ ​តាម​បណ្ដាញ​សង្គម​ហ្វេសប៊ុក​( Facebook) ពី​ឆ្នាំ២០១៨​ រហូត​ដល់​ខែតុលា ឆ្នាំ​២០១៩ ក្នុង​នោះ​មាន​ដូចជា​សារ​គាំទ្រ​ដំណើរ​មាតុភូមិ​និវត្តន៍​របស់​លោក ​សម​ រង្ស៊ី ជាដើម។

អាស៊ីសេរី មិន​អាច​សុំ​ឆ្លើយ​តប​ពី​ចៅក្រម​សាលាដំបូង​ខេត្ត​ត្បូងឃ្មុំ ​លោក ឈិត វិនា និង​អ្នក​នាំ​ពាក្យ​និង​ព្រះរាជ​អាជ្ញា​រង​សាលា​ដំបូង​ខេត្ត​ត្បូង​ឃ្មុំ​លោក ហាក់ សៀកលីម បាន​ទេ​ដោយ​ទូរស័ព្ទ​ចូល​ពុំ​មាន​អ្នក​ទទួល។

សកម្មជន​បក្ស​ប្រឆាំង​លោកស្រី​ មាន ឡា ថ្លែង​ថា លោកស្រី ឈឺ​ចាប់​បំផុត​ដែល​តុលាការ​ចោទ​ប្រកាន់​លោកស្រី​ទាំង​គ្មាន​មូលដ្ឋាន​បែប​នេះ។ លោកស្រី មាន ឡា រៀបរាប់​ទាំង​ក្ដុកក្ដួល​ថា លោកស្រី ​ធ្លាប់​ជាប់​ពន្ធនាគារ​យ៉ាង​អយុត្តិធម៌​រយៈពេល ២ខែ​ម្ដង​ហើយ​កាលពី​ចុង​ឆ្នាំ២០១៩ ទាំង​កាលនោះ​មានផ្ទៃ​ពោះ​ជិត ២ខែ ​ដូច្នេះ​តុលាការ​ មិន​គួរ​ផ្ដន្ទាទោស​ឲ្យ​លោកស្រី ត្រូវ​ជាប់​គុក ៧​ឆ្នាំ​ម្ដង​ទៀត​ទាំង ដែល​លោកស្រី​កំពុង​មាន​កូន​ខ្ចី​បី​ខែ​នោះ​ទេ៖ «សាលក្រម​ផ្ដន្ទាទោស​មក​លើ​នាង​ខ្ញុំ ៧ឆ្នាំ​នេះ​ គឺ​អយុត្តិធម៌​បំផុត​ដែល​ខ្ញុំ​មិន​ទាន់​ទាំង​យល់ថា​ ពាក្យ​ថា​ក្បត់​ជាតិ​នេះ​ផង។ វា​គឺ​ជា​រឿង​នយោបាយ​សុទ្ធសាធ ​វា​មិន​មែន​ជា​រឿង​អនុវត្ត​ច្បាប់​នោះ​ទេ»

ការប្រកាស​សាលក្រម​នៅ​ថ្ងៃ​ទី២២ ​ខែ​កញ្ញា​ មាន​ក្រុម​គ្រួសារ​សាច់​ញាតិ​របស់​សកម្មជន​បក្ស​ប្រឆាំង ប្រមាណ ១០០នាក់ ​បាន​នាំ​គ្នា​ឈរ​តវ៉ា ​និង​កាន់​បដា​ទាមទារ​យុត្តិធម៌​នៅ​ខាង​មុខ​សាលា​ដំបូង​ខេត្ត​ត្បូង​ឃ្មុំ។

អ្នក​នាំ​ពាក្យ​សមាគម​ការពារ​សិទ្ធិមនុស្ស​អាដហុក លោក ស៊ឹង សែនករុណា មាន​ប្រសាសន៍​ថា សេចក្ដី​សម្រេច​របស់​តុលាការ​នេះ ​មិនមែន​ជា​ការ​អនុវត្ត​ច្បាប់​នោះ​ទេ ​គឺ​ជា​រឿង​នយោបាយ ​ដើម្បី​ធ្វើ ទុក្ខ​បុក​ម្នេញ​ទៅលើ​សកម្មជន​បក្ស​ប្រឆាំង ​ខណៈ​រដ្ឋាភិបាល​ កំពុង​បង្កើន​យុទ្ធនាការ​បង្ក្រាប​អ្នក ប្រឆាំង​ឡើង​វិញ៖ «បើ​ស្ថានភាព​នយោបាយ​នៅតែ​តានតឹង​បែបនេះ សិទ្ធិ​សេរីភាព​របស់ ប្រជាពលរដ្ឋ ​និង​សកម្មជន​នយោបាយ​ដែល​គាត់​ចង់​ចូលរួម​ជីវភាព​នយោបាយ គឺ​មិន​អាច​ធ្វើ​ទៅ​រួច ទេ ​ទាល់តែ​ស្ថានភាព​នយោបាយ​ធូរ​ស្រាល​ហើយ​បើ​ចង់​ឲ្យ​ធូរ​ស្រាល ​ទាល់តែ​មេ​ដឹក​នាំ​នយោបាយ ទាំងអស់​ចរចា​គ្នា​ ឲ្យ​មក​គោរព​សិទ្ធិមនុស្ស និង​គោរព​តាម​គោលការណ៍​ប្រជាធិបតេយ្យ​ឲ្យបាន​ត្រឹម ត្រូវ​ពិតប្រាកដ​ឡើងវិញ​ ដូច្នេះ​ស្ថានភាព​នឹង​ធូរ​ស្រាល ហើយ​អាច​ស្ដារ​នូវ​ផល​ប្រយោជន៍​របស់​ប្រទេស​យើង​បាន​ទៀត​ផង ​ក្រោយពី​មាន​វិបត្តិ​កូវីដ»

មេធាវី​ការពារ​ក្តី​ឲ្យ​សកម្មជន​បក្ស​ប្រឆាំង​ អះអាង​ថា ​នឹង​ដាក់​បណ្ដឹង​ជំទាស់​ទៅ​សាលា​ឧទ្ធរណ៍​ដើម្បី​ឲ្យ​តុលាការ​ជាន់​ខ្ពស់​ច្រាន​ចោល​ការ​ចោទ​ដោយ​គ្មាន​មូលដ្ឋាន​លើ​កូន​ក្តី​របស់​ខ្លួន៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល