"លោក ហ៊ុន សែន ជា​មេដឹកនាំ​អាក្រក់​បំផុត ដោយសារ​រំលោភ​សិទ្ធិ​មនុស្ស និង​ប្រជាធិបតេយ្យ"

ដោយ មួង ណារ៉េត
2019-01-17
អ៊ីម៉ែល
មតិ
Share
បោះពុម្ព
លោក ថិត យ៉ូហូ (Ted Yoho) តំណាងរាស្ត្រ​ពី​ខាង​គណបក្ស​សាធារណរដ្ឋ​ប្រចាំ​រដ្ឋ​ហ្វ្ល័ររីដា (Florida) និង​ជា​ប្រធាន​អនុគណៈកម្មាធិការ​កិច្ចការ​បរទេស​ទទួល​បន្ទុក​កិច្ចការ តំបន់​អាស៊ី​ប៉ាស៊ីហ្វិក  ចូលរួម​ក្នុង​កម្មវិធី​ផ្សាយ​ទូរទស្សន៍​អាស៊ីសេរី កាល​ពី​យប់​ថ្ងៃ​ទី៦ ខែ​កុម្ភៈ ឆ្នាំ​២០១៨។
លោក ថិត យ៉ូហូ (Ted Yoho) តំណាងរាស្ត្រ​ពី​ខាង​គណបក្ស​សាធារណរដ្ឋ​ប្រចាំ​រដ្ឋ​ហ្វ្ល័ររីដា (Florida) និង​ជា​ប្រធាន​អនុគណៈកម្មាធិការ​កិច្ចការ​បរទេស​ទទួល​បន្ទុក​កិច្ចការ តំបន់​អាស៊ី​ប៉ាស៊ីហ្វិក ចូលរួម​ក្នុង​កម្មវិធី​ផ្សាយ​ទូរទស្សន៍​អាស៊ីសេរី កាល​ពី​យប់​ថ្ងៃ​ទី៦ ខែ​កុម្ភៈ ឆ្នាំ​២០១៨។
Photo: RFA

សមាជិកសភា​អាមេរិក​លោក ថិត យ៉ូហូ (Ted YOHO) ថា លោក ហ៊ុន សែន ជា​មេដឹកនាំ​អាក្រក់​បំផុត ដោយសារ​រំលោភ​សិទ្ធិ​មនុស្ស និង​ប្រជាធិបតេយ្យ​។ លោក​បញ្ជាក់​ថា ដើម្បី​ដាក់​សម្ពាធ​ឲ្យ​មេដឹកនាំ​បែបនេះ ឲ្យ​ងាក​មក​រក​គន្លង​ប្រជាធិបតេយ្យ​វិញ គឺ​មានតែ​រួមគ្នា​ដាក់​សម្ពាធ និង​ទណ្ឌកម្ម។

នេះ​ជា​បទសម្ភាសន៍​របស់​លោក មួង ណារ៉េត នៃ​វិទ្យុ​អាស៊ីសេរី ជាមួយ​លោក ថិត យ៉ូហូ ជុំវិញ​ជំហរ​របស់​សភា​អាមេរិក ដូច​តទៅ៖

មួង ណារ៉េត៖ ជា​ដំបូង​ខ្ញុំបាទ ចង់​ដឹង​ថា​តើ​សេចក្ដី​ស្នើ​ច្បាប់​ប្រជាធិបតេយ្យ​កម្ពុជា ដែល​សភា​អាមេរិក អនុម័ត​កាលពី​ខែ​កក្កដា ឆ្នាំ​២០១៨ ប៉ុន្តែ ព្រឹទ្ធសភា​មិន​ទាន់​បាន​អនុម័ត​នោះ នឹង​ត្រូវ​ស្នើ​ជាថ្មី​នៅ​ពេល​ណា?

ថិត យ៉ូហូ៖ សេចក្ដី​ស្នើ​ច្បាប់​នេះ នឹង​ត្រូវ​ស្នើ​ជាថ្មី​នៅ​សប្ដាហ៍​ក្រោយនេះ។ ច្បាប់​ស្ដីពី​ប្រជាធិបតេយ្យ​កម្ពុជា​នេះ ត្រូវ​បាន​តាក់តែង​ឡើង ដើម្បី​ដាក់ទណ្ឌកម្ម​លោក ហ៊ុន សែន និង មន្ត្រី​របប​នេះ រួម​ទាំង​ជន​ទាំងឡាយ​ណា ដែល​បាន​ចូល​ដៃ ក្នុង​ការ​បំផ្លាញ​ប្រជាធិបតេយ្យ​នៅ​កម្ពុជា​។ ខ្ញុំ​សូម​រម្លឹក​ថា ច្បាប់​នេះ​ធ្លាប់​បាន​អង្គ​សភា​ទាំងមូល​របស់​អាមេរិក អនុម័ត​ជា​ឯកច្ឆន្ទ​រួចហើយ កាលពី​សភា​អាណត្តិ​មុន។ ដូច្នេះ ច្បាប់​នេះ​ក៏​នឹង​ត្រូវ​សភា​អនុម័ត​ជា​ឯកច្ឆន្ទ​ទៀត​ដែរ​។ ម្យ៉ាងទៀត យើង​មាន​សហ​ភាគី​របស់​យើង នៅ​ខាង​ព្រឹទ្ធសភា ដែល​នឹង​យល់ព្រម​តាម​សំណើ​នេះ​ដែរ។ ហើយ​ចុងក្រោយ ច្បាប់​នេះ​នឹង​ចូល​ជា​ធរមាន។

មួង ណារ៉េត៖ តាំងពី​សំណើ​ច្បាប់​នេះ ត្រូវ​បាន​អនុម័ត​ដោយ​រដ្ឋសភា​អាមេរិក កាលពី​ខែ​កក្កដា ឆ្នាំ ២០១៨ របប​លោក ហ៊ុន សែន បាន​បន្ទន់​ឥរិយាបថ​ខ្លះ ក៏ប៉ុន្តែ ថ្មីៗ​នេះ ក្រោយ​មិន​មាន​មន្ត្រី​បក្ស​ប្រឆាំង សុខចិត្ត​សុំ​សិទ្ធិ​ធ្វើ​នយោបាយ​ឡើងវិញ ទៅតាម​ការ​ចង់​បាន​របស់​លោក ហ៊ុន សែន ស្រាប់តែ​លោក​គំរាម​ធ្វើបាប​បក្ស​ប្រឆាំង កាន់តែ​ខ្លាំង​ក្លា​ឡើង​ថែមទៀត បើ​អន្តរជាតិ ហ៊ាន​ដាក់ទណ្ឌកម្ម​របប​នេះ។ សម្ដី​លោក ហ៊ុន សែន៖ «ការដាក់​ចំពោះ​កម្ពុជា មានតម្លៃ​ស្មើនឹង​សម្លាប់​បក្ស​ប្រឆាំង។ ការ​សម្លាប់​កម្ពុជា​តាម​រូបភាព​ណាមួយ មានតម្លៃ​ស្មើនឹង​សម្លាប់​ក្រុម​ដែល​អ្នកឯង​គាំទ្រ​ឲ្យ​ប្រឆាំង​នឹង​រដ្ឋាភិបាល ហ៊ុន សែន។ ខ្ញុំ​មិន​លើកលែង​ឲ្យ​ទេ​។ បានតែ​ជ្រុល​លេង​គ្នា​ហើយ វា​ត្រូវតែ​លេង​អ៊ីចឹង​! អាហ្នឹង​ល្បែង​មាន​ទៅ​មាន​មក»។ តើ​លោក​យល់​ថា ច្បាប់​នេះ​មាន​ប្រសិទ្ធភាព លើ​របប​លោក ហ៊ុន សែន ដែរ​ឬទេ​?

ថិត យ៉ូហូ៖ បាទ​! ខ្ញុំ​យល់ថា​មាន​ប្រសិទ្ធភាព​! សហគមន៍​ខ្មែរ​យ៉ាង​ច្រើន​លើសលប់​នៅ​សហរដ្ឋអាមេរិក ចង់បាន​ឲ្យ​មាន​ប្រជាធិបតេយ្យ​ពិតប្រាកដ​នៅ​កម្ពុជា។ ពួកគាត់​ជាច្រើន បាន​មក​ជួប​ខ្ញុំ​នៅ​កន្លែងធ្វើការ​របស់ខ្ញុំ​។ ពួកគាត់​គាំទ្រ​ច្បាប់​នេះ ព្រោះ​គាត់​ប្រាប់​យើងខ្ញុំ ថា​ច្បាប់​ដាក់ទណ្ឌកម្ម​នេះ ពិត​ជា​មាន​ប្រសិទ្ធភាព អាច​ជួយ​ឲ្យ​កម្ពុជា ស្ដារ​ស្ថានការណ៍​អាក្រក់​នៅ​កម្ពុជា​បាន។ ដូច​លោក​ដឹង​ស្រាប់​ហើយ ការបោះឆ្នោត​កន្លងទៅ គឺជា​ការបោះឆ្នោត​ក្លែងក្លាយ និង​គួរ​ឲ្យ​អាម៉ាស់ ដែល​មេដឹកនាំ​ផ្ដាច់ការ​លោក ហ៊ុន សែន រម្លាយ​សំឡេង​ប្រឆាំង រួចហើយ​រៀបចំ​ការបោះឆ្នោត ដោយ​គ្មាន​បក្ស​ប្រឆាំង​ថែមទៀត។ ក្រោយ​បោះឆ្នោត​រួច លោក ហ៊ុន សែន បែរជា​បន្ទន់​ឥរិយាបថ ចង់​បើក​ចំហ​សេរីភាព​វិញ​ខ្លះ​។ ប៉ុន្តែ ជិត​ដល់​បោះឆ្នោត​ទៀត គាត់​ធ្វើ​ដដែល​នេះ​ទៀត​។ លោក ហ៊ុន សែន កាន់អំណាច​តាំងពី​ឆ្នាំ ១៩៨៥ ប៉ុន្តែ បើ​មើល​កម្រិតជីវភាព​ប្រជាពលរដ្ឋ​ខ្មែរ​វិញ នៅតែ​រក​ប្រាក់​ចំណូល បាន​ទាប​ជាងគេ នៅ​លើ​ពិភពលោក។ នេះ​គឺ​ដោយសារតែ​លោក ហ៊ុន សែន គាត់​ខ្វល់​តែ​បុគ្គល ហ៊ុន សែន មិន​ខ្វល់​ពី​ប្រជាពលរដ្ឋ​ខ្មែរ​ទូទៅ​ទេ។ ឥឡូវ​គាត់​ក្លាយ​ជា​កូនជឹង​របស់​ចិន​ទៀត។ ឲ្យ​តែ​ចិន​ឲ្យ​ធ្វើ​អ្វី គាត់​ធ្វើតាម​ហ្នឹង​។ គួរ​ឲ្យ​អនិច្ចា​ណាស់ រឿង​នេះ​!

មួង ណារ៉េត៖ លោក ហ៊ុន សែន រង​ការ​រិះគន់​ថា ហ៊ាន​ផ្គើន​ដាក់​សហគមន៍​អន្តរជាតិ ដោយសារតែ​អាង​ចិន​នេះឯង។ មិន​តែ​ប៉ុណ្ណោះ លោក​ហ៊ាន​រហូតដល់​គំរាម​សហភាព​អឺរ៉ុប ថា មានតែ​ការចរចា​ទេ​ទើប​ល្អ ព្រោះ​បើ​ហ៊ាន​ដក​ការ​អនុគ្រោះ​ពន្ធ អ្នក​ដែល​ស្លាប់​គឺ​បក្ស​ប្រឆាំង។ សម្ដី​លោក ហ៊ុន សែន៖ «បើ​ចង់​ឲ្យ​ពួក​ប្រឆាំង អា​ហ្នឹង​កាត់​ទៅ​! បើ​ចង់​ឲ្យ​ពួក​ប្រឆាំង​រស់ អាហ្នឹង​កុំ​ធ្វើ។ មក​ជជែក​គ្នា ពិភាក្សា​គ្នា កែ​លម្អ​សភាពការណ៍​ជាមួយគ្នា បន្ត​ទៅ​មុខជា​មួយ​គ្នា»។ ក្រោយ​សារ​គំរាម​នេះ​ភ្លាម លោក​ថា​នឹង​ស្នើ​ច្បាប់​ដាក់ទណ្ឌកម្ម​លោក ហ៊ុន សែន និង​មន្ត្រី​របប​នេះ​ភ្លាម​ដែរ​។ តើ​ធ្វើ​ដូច្នេះ លោក​មិន​បារម្ភ​ថា នឹង​រឹតតែ​ធ្វើ​ឲ្យ​លោក ហ៊ុន សែន ឆេះដុំ​កាន់តែ​ខ្លាំង​ទេ​ឬ?

ថិត យ៉ូហូ៖ គ្មាន​អ្វី​ចម្លែក​ទេ បើ​គាត់​ឆេះដុំ​កាន់តែ​ខ្លាំង​នោះ។ ប៉ុន្តែ រឿង​សំខាន់ គឺ​លោក ហ៊ុន សែន បាន​គំរាមកំហែង​ដល់​សិទ្ធិ​សេរីភាព​ពលរដ្ឋ​ខ្មែរ ហើយ​អំណាច​ដែល​គាត់​មាន​សព្វថ្ងៃ ក៏បាន​ដោយសារតែ​អំណាច​យោធា ផ្ដាច់ការ ប្លន់​ឆន្ទៈ​រាស្ត្រ​ខ្មែរ និង​បង្ក្រាប​សំឡេង​ប្រឆាំង​ឥត​ស្រាកស្រាន្ត។ ពលរដ្ឋ​ខ្មែរ​ទូទៅ មិន​គាំទ្រ​របប​នេះ​ទេ។ លោក ហ៊ុន សែន អាច​ព្រហើន ហ៊ាន​គំរាម​សហភាព​អឺរ៉ុប។ ប៉ុន្តែ គាត់​ត្រូវ​ចាំ​ថា ទាំង​សហភាព​អឺរ៉ុប និង​សហរដ្ឋអាមេរិក គឺជា​ទីផ្សារ​ដ៏​ធំ​របស់​កម្ពុជា។ តើ​គាត់​ហ៊ាន​ឲ្យ​បាត់បង់​ទីផ្សារ​ទាំងនេះ​ដែរ​ឬទេ​? គាត់​ស្មានថា ចិន​អាច​ជួយ​ស្តារ​បញ្ហា​សេដ្ឋកិច្ច​កម្ពុជា​បាន បើ​អត់​ទីផ្សារ​ធំ​នេះ​អ្ហ៊ៃ​? ខ្ញុំ​ថា​សារ​របស់​លោក ហ៊ុន សែន មិន​ចំណេញ​អ្វី ទល់​តែ​សោះ​ដល់​កម្ពុជា។

មួង ណារ៉េត៖ លោក ហ៊ុន សែន អួតអាង​ថា របប​លោក​ពេល​នេះ កំពុង​ត្រៀមខ្លួន​ទប់ទល់​ស្ថានការណ៍​អាក្រក់ នៃ​ការ​ដាក់​ទណ្ឌកម្ម​ទាំង​នេះ​ហើយ។ លោក ហ៊ុន សែន អះអាង​ថា កំពុង​កែទម្រង់​សេដ្ឋកិច្ច ដើម្បី​ទប់ទល់​បញ្ហា​នេះ។ តើ​លោក​យល់ថា របប​លោក ហ៊ុន សែន ពិតជា​បាន​ត្រៀមខ្លួន ដើម្បី​ទប់ទល់​ស្ថានភាព​អាក្រក់​នេះ ទៅ​រួច​ឬទេ?

ថិត យ៉ូហូ៖ ទៅ​មិន​រួច​ទេ​! លោក ហ៊ុន សែន អះអាង​ថា របប​នេះ​ត្រៀមខ្លួន​ទប់ទល់​ស្ថានការណ៍​អាក្រក់​។ ប្រវត្តិសាស្ត្រ​ចារ​ទុក​រួចទៅ​ហើយ ថា​តើន​រណា​ដែល​ធ្វើ​ឲ្យ​ស្ថានការណ៍​នេះ​អាក្រក់​? គឺ​លោក ហ៊ុន សែន ខ្លួនឯង​។ លោក ហ៊ុន សែន ជា​មេដឹកនាំ​អាក្រក់​បំផុត​។ ក្រោម​ការដឹកនាំ​របស់​លោក ហ៊ុន សែន គឺ​មានតែ​បង្ក្រាប​សំឡេង​ប្រឆាំង។ យក​ល្អ លោក ហ៊ុន សែន ត្រូវតែ​ស្តារ​ស្ថានការណ៍​អាក្រក់​នេះ​ឡើងវិញ ដោយ​រៀបចំ​ឲ្យ​មានការ​បោះឆ្នោត​មួយ ដោយ​សេរី ត្រឹមត្រូវ និង យុត្តិធម៌​។ លោក ហ៊ុន សែន ត្រូវ​ក្លាហាន ហ៊ាន​បើក​ចំហ​ឲ្យ​ពលរដ្ឋ​ខ្មែរ​ទូទៅ មាន​សិទ្ធិ​ពេញលេញ ក្នុង​ការ​ជ្រើសរើស​មេដឹកនាំ ដែល​ខ្លួន​ពេញចិត្ត។ មិនមែន​បង្ខំ​ឲ្យ​គេ​បោះឆ្នោត​ឲ្យ​គាត់ ដូច​របៀប​គាត់​ធ្វើ​នោះ​ទេ។

មួង ណារ៉េត៖ ប៉ុន្មាន​ខែ​ចុងក្រោយ​នេះ ពោល​គឺ​ក្រោយពេល​មាន​សម្ពាធ​ពី​អន្តរជាតិ លោក ហ៊ុន សែន ហាក់​ដូចជា​បន្ទន់​ឥរិយាបថ​ខ្លះ ដូចជា​ដោះលែង​អ្នក​ទោសនយោបាយ សកម្មជន​ដីធ្លី បង្គាប់​ឲ្យ​តុលាការ​ប្រញាប់​ពន្លឿន​រឿង​ក្តី លើ​មេដឹកនាំ​សហជីព​កម្មករ និង​បាន​សន្យា​ផ្ដល់​សិទ្ធិ​សេរីភាព ដល់​អង្គការ​សង្គម​ស៊ីវិល ហើយ​ចុង​ក្រោយនេះ​ទៀត គាត់​ធ្វើ​ច្បាប់​ប្រញាប់​មួយ ដោយ​អះអាង​ថា ដើម្បី​ផ្ដល់​សិទ្ធិ​ធ្វើ​នយោបាយ ដល់​មន្ត្រី​បក្ស​ប្រឆាំង​។ តើ​លោក​យល់ថា លោក ហ៊ុន សែន ធ្វើ​ប៉ុណ្ណឹង​ល្មម​គ្រប់គ្រាន់ ហើយ​ឬ​នៅ?

ថិត យ៉ូហូ៖ អត់​គ្រប់គ្រាន់​ទេ​! លោក ហ៊ុន សែន ធ្វើ​អ្វី​តាមតែ​អំពើ​ចិត្ត​គាត់ ដោយសារតែ​អំណាច​ផ្ដាច់ការ។ អ្វី​ដែល​លោក ហ៊ុន សែន កំពុង​ធ្វើ​នេះ គឺ​គ្រាន់តែ​ជា​បន្លំ​ភ្នែក ដើម្បី​គេច​ផុត​ពី​ទណ្ឌកម្ម​អន្តរជាតិ​ប៉ុណ្ណោះ។ នេះ​ជាសញ្ញាណ​បញ្ជាក់​ថា សម្ពាធ​អន្តរជាតិ ពិត​ជា​មាន​ប្រសិទ្ធភាព​លើ​របប​នេះ ដែល​បង្ខំចិត្ត​ឲ្យ​លោក ហ៊ុន សែន ដោះលែង​មន្ត្រី​បក្ស​ប្រឆាំង​ខ្លះ រួចហើយ​ប្រកាស​ធ្វើ​ដូចជា​ចិត្តល្អ ចង់​បើក​ចំហ​សេរីភាព​សារព័ត៌មាន​ឯករាជ្យ​ជាដើម​។ តែ​តាម​ធាតុ​ពិត នរណា​ក៏​ស្គាល់​ចរិត​លោក ហ៊ុន សែន ដែរ។ កុំ​ស្មាន​ឲ្យ​សោះ ថា​សភា​អាមេរិក ល្ងង់​ជឿ​តាម​ល្បិច​លោក ហ៊ុន សែន​នោះ​។ សភា​អាមេរិក ដែល​មូល​មាត់​គ្នា​ទាំងពីរ​គណបក្ស នឹង​នៅតែ​ដាក់​សម្ពាធ​លោក ហ៊ុន សែន រហូតដល់​របប​នេះ អនុញ្ញាត​ឲ្យ​មានការ​បោះឆ្នោត​មួយ ដោយ​សេរី ត្រឹមត្រូវ និង យុត្តិធម៌ ឲ្យ​ខាង​តែ​បាន​។ យើង​នឹង​ធ្វើ​យ៉ាងណា ឲ្យ​របប​នេះ ឈប់​ធ្វើទុក្ខបុកម្នេញ​សំឡេង​បក្ស​ប្រឆាំង និង​ឈប់​រំលោភ​សិទ្ធិ​មនុស្ស​តទៅទៀត។

មួង ណារ៉េត៖ នេះ​ជា​សំណួរ​ចុងក្រោយ តើ​លោក​មាន​សុទិដ្ឋិនិយម​ប៉ុនណា ថា​សេចក្ដី​ស្នើ​ច្បាប់ ដែល​លោក​គ្រោង​ដាក់​ស្នើ​នៅ​សប្ដាហ៍​ក្រោយនេះ នឹង​ចូល​ជា​ធរមាន​ឆាប់​ប៉ុនណា?

ថិត យ៉ូហូ៖ ខ្ញុំ​សង្ឃឹម​រហូតដល់ ១០០% ថា​សេចក្ដី​ស្នើ​ច្បាប់​នេះ នឹង​ត្រូវ​រដ្ឋសភា​ទាំងមូល​អនុម័ត​។ ខ្ញុំ​សង្ឃឹម​រហូតដល់ ៩៨% ថា​ព្រឹទ្ធសភា​នឹង​អនុម័ត​ច្បាប់​នេះ​ដែរ។ ខ្ញុំ​ជឿជាក់​ថា ច្បាប់​នេះ​នឹង​ចូល​ជា​ធរមាន នៅ​ចន្លោះ​ពី ៦​ខែ ទៅ​មួយ​ឆ្នាំ នៅមុន​ការបោះឆ្នោត​ជ្រើសរើស​ប្រធានាធិបតី​អាមេរិក​នា​ពេល​ខាង​មុខ​នេះ។

មួង ណារ៉េត៖ ខ្ញុំ​សូម​អរគុណ​លោក ថិត យ៉ូហូ (Ted YOHO) យ៉ាង​ជ្រាលជ្រៅ ដែល​បាន​ផ្តល់​ឱកាស ឲ្យ​ខ្ញុំ​បាន​សម្ភាសជុំវិញ​រឿង​នេះ។

ថិត យ៉ូហូ៖ សូម​អរគុណ​លោក ណារ៉េត ដែរ និង​សូម​ផ្ញើ​សេចក្ដី​នឹករលឹក​ទៅ​ពលរដ្ឋ​ខ្មែរ​ទាំងអស់​ផង​!

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល