មន្ត្រីសង្គមស៊ីវិលនិងមន្ត្រីបក្សប្រឆាំងលើកឡើងថា គម្រោងធ្វើសមយុទ្ធរួមគ្នាវាងកម្ពុជា ឡាវ និងវៀតណាម មិនមែនជាការចាំបាច់គួរធ្វើក្នុងពេលនេះទេ ខណៈកម្ពុជានិងប្រទេសនានាកំពុងប្រឈមការរាតត្បាតនៃជំងឺកូវីដ-១៩។ ទោះយ៉ាងណាមន្ត្រីជាន់ខ្ពស់ក្រសួងការពារជាតិអះអាងថា បញ្ហាជំងឺកូវីដក្រសួងមានវិធានការក្នុងបង្ការយ៉ាងត្រឹមត្រូវហើយ។
តំណាងក្រុមឃ្លាំមើលកម្ពុជា និងជាប្រធានសហភាពសហជីពកម្ពុជា លោក រ៉ុង ឈុង យល់ថា ការជួយសង្គ្រោះពេលមានគ្រោះមហន្តរាយមិនបាច់មានរហូតទៅដល់ការធ្វើសមយុទ្ធរួមគ្នារវាងកម្ពុជា ឡាវ និងវៀតណាមនោះទេ។ លោកថា ដើម្បីបង្ការបញ្ហាភាគីកម្ពុជាអាចហ្វឹកហ្វឺនបន្ថែមលើមន្ត្រីកម្ពុជា គឺជាការគ្រប់គ្រាន់ហើយ។ លោក រ៉ុង ឈុន ក៏ព្រួយបារម្ភដែរថា ប្រសិនបើមានការចល័តទ័ពចេញចូលឆ្លងដែនហើយខ្វះការប្រុងប្រយ័ត្ននោះវាអាចបង្កើតជាបញ្ហាធំគឺរីករាលនៃជំងឺកូវីដ-១៩ ខណៈកម្ពុជានិងប្រទេសនានាកំពុងប្រឈមឆ្លងជាថ្មី៖ « ប្រសិនជាយើងមិនមានការប្រុងប្រយ័ត្នទេអាចធ្វើឱ្យមានការឆ្លងតាមការធ្វើសមយុទ្ធនេះដែរយើងមិនដឹងថា សមាសភាពមកពីប្រទេសយួនក៏ដូចជាប្រទេសឡាវមិនដឹងគាត់មានផ្ទុក ( ជំងឺ១៩ ) ឬក៏មិនផ្ទុក » ។
ប្រតិកម្មរបស់លោក រ៉ុង ឈុន នេះធ្វើឡើងដោយសារតែក្រសួងការពារជាតិកម្ពុជាប្រកាសថា កម្ពុជាត្រៀមចូលរួមនឹងប្រទេសឡាវ និងវៀតណាម ធ្វើសមយុទ្ធរួមគ្នាក្នុងកិច្ចការជួយសង្គ្រោះគ្រោះមហន្តរាយ។ ទោះបីជាយ៉ាង ក្រសួងការពារជាតិមិនទាន់ប្រកាលពីវេលា និងទីកន្លែងសម្រាប់ធ្វើសមយុទ្ធយោធានេះនៅឡើយទេ។ រដ្ឋលេខាធិការក្រសួងការពារជាតិ និងជាប្រធានគណៈកម្មការសង្គ្រោះគ្រោះមហន្តរាយក្រសួងការពារជាតិ លោក ម៉ឹង សំផន ប្រាប់សារព័ត៌មានរបស់លោកនាយករដ្ឋមន្ត្រី ហ៊ុន សែនថា ភាគីកម្ពុជាបានត្រៀមកម្លាំងជំនាញទាំងបីប្រភេទ គឺកងទ័ពជើងគោគ ជើងទឹក និងជើងអាកាស ព្រមទាំងឧបករណ៍ សម្ភារៈ និងមធ្យោបាយផ្សេងៗ ទៀត ក្នុងការធ្វើសមយុទ្ធសង្គ្រោះនេះ ដែលមានសមាសភាពចូលរួមពីកងទ័ពកម្ពុជា កងទ័ពឡាវ និងកងទ័ពវៀតណាមដែលគ្រោងធ្វើនាពេលខាងនេះ។ ជុំវិញគម្រោងធ្វើសមយុទ្ធយោធានេះ តំណាងរាស្ត្រគណបក្សសង្គ្រោះជាតិដែលកំពុងរស់នៅសហរដ្ឋអាមេរិក លោក អ៊ុំ សំអាន ស្នើទៅរដ្ឋាភិបាលលោក ហ៊ុន សែន គិតឡើងវិញពីបញ្ហាសុខភាពកងទ័ពកម្ពុជា ប្រសិនបើមានការធ្វេសប្រហែសបណ្ដាលឱ្យឆ្លងជំងឺកូវីដ-១៩ តើពួកគេទៅជាយ៉ាងណា។ លោកចោទជាសំនួរថា តើការធ្វើសមយុទ្ធជួយសង្គ្រោះគ្រោះមហន្តរាយ កងទ័ពប្រទេសទាំងបីនេះហ៊ានធ្វើតំបន់មានគ្រោះទឹកជំនន់ដែរឬទេ តែបើមិនហ៊ានទេ គម្រោងធ្វើសមយុទ្ធនេះក៏គ្មានន័យអ្វីដែរ? តំណាងរាស្ត្រគណបក្សប្រឆាំងរូបនេះយល់ថា រដ្ឋាភិបាលគួរដឹកទ័ពទៅតំបន់ព្រំដែនកន្លែងដែលកងទ័ពវៀតណាមបោះតង់វិញទើបជារឿងត្រឹមត្រូវគួរធ្វើក្នុងពេលនេះ៖ « ឱ្យដឹកច្រមុះទៅធ្វើសមយុទ្ធយោធាវិញ បើសិនយើងមិនខ្លាចយួនយើងទៅប្រឈមជាមួយយួនបោះតង់ដឹកទាហានយើងរឿងយួនបោះតង់ » ។
ឆ្លើយតបទៅនឹងមន្ត្រីបក្សប្រឆាំង រដ្ឋលេខាធិការក្រសួងការពារជាតិទទួលបន្ទុកប្រធាននាយកដ្ឋាននយោបាយនិងទំនាក់ទំនងការបរទេសនៃក្រសួងការពារជាតិ នាយឧត្ដមសេនីយ៍ នឹម សុវត្ថិ ឱ្យអាស៊ីសេរីដឹងថា ការបង្ការជំងឺកូវីដ-១៩ ជាវិធានការទូទៅដែលភាគីពាក់ព័ន្ធបានអនុវត្តវៀងៗ ខ្លួន។ ទោះយ៉ាងណា មន្ត្រីជាន់ខ្ពស់ក្រសួងការពារជាតិរូបនេះថា លោកមិនទាន់អាចដឹងលម្អិតអំពីផែនការនៃការធ្វើសមយុទ្ធនេះនៅឡើយទេ៖ « ការងារហ្នឹងគណៈកម្មាធិការសមយុទ្ធគាត់ទទួលខុសត្រូវ។ រឿងហ្នឹងធម្មតាជាវិធានការទូទៅទូទាំងសកលលោករឿងការរៀបចំបែបផែនណាមួយដែលប្រើប្រាស់វិធានការទប់ស្កាត់កូវីដហ្នឹងបាទ » ។
អាស៊ីសេរីបានព្យាយាមសុំការបំភ្លឺបន្ថែមពីអ្នកនាំពាក្យក្រសួងការពារជាតិ លោក ឈុំ សុជាត នៅថ្ងៃទី១៧ ខែកក្កដា ប៉ុន្តែពេលទូរស័ព្ទហៅចូលត្រូវលោកចុចបិទ។ រីឯអ្នកពាក្យកងទ័ពជើងគោកលោក ម៉ៅ ផល្លា ថា លោកមិនទាន់បានដឹងរឿងនេះនៅឡើយទេ៖ « រឿងហ្នឹងខ្ញុំអត់ដឹងផងសុំអធ្យាស្រ័យខ្ញុំអត់អាចឆ្លើយបានទេខ្ញុំអត់ដឹងផែនការហ្នឹងផងខ្ញុំជើងគោគអត់ដឹងទេទាល់តែក្រសួងការពារជាតិទាល់ឯកឧត្ដម ឈុំ សុជាត បានលោកមានប្រសាសន៍បានបាទ » ។
កាលពីខែមីនា កងកម្លាំងមកពីកងយោធពលខេមរភូមិន្ទរបស់កម្ពុជា និងកងទ័ពរំដោះប្រជាជនចិនបានប្រមូលផ្ដុំគ្នាធ្វើការហ្វឹកហាត់ «សមយុទ្ធនាគមាស ២០២០» ដែលប្រើប្រាស់កងកម្លាំងទាំងពីរប្រទេសប្រមាណ ៣ពាន់នាក់ ។ បើទោះកម្ពុជាបានធ្វើសមយុទ្ធជាបន្តបន្ទាប់ចិន និងគ្រោងធ្វើជាមួយប្រទេសជិតខាងដែលជាប្រទេសកុម្មុយនិស្តក្ដី ប៉ុន្តែកម្ពុជាបានផ្អាកធ្វើសមយុទ្ធជាមួយប្រទេសសេរីរួមមានសហរដ្ឋអាមេរិកនិងអូស្ត្រាលីអស់រយៈពេល ៤ឆ្នាំមកហើយ។ លោក អ៊ុំ សំអាន លើកឡើងថា គម្រោងនៃការធ្វើសមយុទ្ធនេះ គឺវៀតណាមចង់បង្ហាញឥទ្ធិពលថា ខ្លួនជាបងធំនៃប្រទេសកម្ពុជានិងប្រទេសឡាវ ដែលប្រទេសវៀតណាមតែងមានមហិច្ឆតាចង់លេបយកប្រទេសទាំងពីរ ដើម្បីគ្រប់ គ្រង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។