អ្នកវិភាគ​ថា ចលនា​យុវជន​បាតុកម្ម​នៅ​ថៃ​ប្រឆាំង​រដ្ឋាភិបាល​អាច​ជះ​ឥទ្ធិពល​កម្ពុជា

ដោយ ទីន ហ្សាការីយ៉ា
2020-10-30
អ៊ីម៉ែល
មតិ
Share
បោះពុម្ព
ព្រះតេជព្រះគុណ ប៊ុត ប៊ុនតិញ ស្ថាបនិក​បណ្ដាញ​ព្រះ​សង្ឃ​ឯករាជ្យ ដើម្បី​យុត្តិធម៌​សង្គម។
ព្រះតេជព្រះគុណ ប៊ុត ប៊ុនតិញ ស្ថាបនិក​បណ្ដាញ​ព្រះ​សង្ឃ​ឯករាជ្យ ដើម្បី​យុត្តិធម៌​សង្គម។
រូប៖ RFA

អ្នក​វិភាគ​លើក​ឡើង​ថា ក្រុម​និស្សិត​ថៃ ចេញ​មុខ​តវ៉ា​ទាមទារ​សិទ្ធិ​សេរីភាព ជា​គំរូ​ល្អ​មួយ​សម្រាប់​កម្ពុជា និង​ក្នុង​តំបន់​អាស៊ាន​ទាំង​មូល ដើម្បី​ទប់​ស្កាត់​ការ​ដឹក​នាំ​តាម​បែប​ផ្ដាច់ការ​នៅ​ក្នុង​តំបន់។

អ្នក​វិភាគ​កត់​សំគាល់​ថា ទោះបីជា​ក្រុម​បាតុករ​ជួបជុំ​គ្នា​ធ្វើ​បាតុកម្ម​រាប់​សែន​នាក់​នៅ​ទីក្រុង​បាងកក និង​នៅ​ខែត្រ​មួយ​ចំនួន​ទៀត​ក្ដី ក៏ប៉ុន្តែ រដ្ឋាភិបាល​ថៃ មិន​ប្រើប្រាស់​ការ​បង្ក្រាប​ហិង្សា​ទៅ​លើ​ក្រុម​បាតុករ​ដូច​នៅ​កម្ពុជា​ឡើយ។

ក្រុម​អ្នក​វិភាគ​លើក​ឡើង​ថា ចលនា​និស្សិត​ថៃ​ចេញ​មុខ​ជា​សាធារណៈ​រាប់​ម៉ឺន រាប់​សែន​នាក់ ធ្វើ​បាតុកម្ម​នេះ ជា​ការ​ឆ្លុះ​បញ្ចាំង​ឲ្យ​ឃើញ​ថា មេ​ដឹក​នាំ​នៅ​ក្នុង​ប្រទេស​ប្រជាធិបតេយ្យ មិន​អាច​គ្រប់គ្រង​ប្រទេស ហើយ​ចង់​ធ្វើ​អ្វីៗ តាម​តែ​អំពើ​ចិត្ត​បាន​ឡើយ។

អ្នកវិភាគ​នយោបាយ​លោក​បណ្ឌិត សេង សារី មាន​ប្រសាសន៍​ថា ទោះ​បី​ជា​ថៃ​មាន​នាយក​រដ្ឋមន្ត្រី​ចេញ​មក​ពី​មេ​ដឹក​នំា​យោធា​ក៏​ដោយ ក៏​មេ​ដឹក​នាំ​ថៃ​ហាក់​ដូច​ជា​មាន​ភាព​ចាស់​ទុំ​ក្នុង​ការ​ឆ្លើយ​តប​ទៅ​ក្រុម​បាតុករ ដោយ​មិន​ជ្រើសរើស​យក​ការ​បង្ក្រាប​ដោយ​ហិង្សា​ជា​ដំណោះ​ស្រាយ​ដូច​ប្រទេស​ខ្លះ​ទៀត នៅ​ក្នុង​តំបន់​ពិសេស​កម្ពុជា​ឡើយ។ លោក​បញ្ជាក់​ថា រដ្ឋាភិបាល​មិន​ប្រើ​កង​កម្លាំង​បង្ក្រាប​ហិង្សា​លើ​ក្រុម​បាតុករ​នេះ​ហើយ ជា​គំរូ​មួយ​នៅ​ក្នុង​សង្គម​ប្រជាធិបតេយ្យ ដែល​ទាំង​រដ្ឋាភិបាល​ទាំង​ក្រុម​បាតុករ​នឹង​អាច​ឈាន​ទៅ​រក​ដំណោះ​ស្រាយ​ណា​មួយ​សម​ស្រប​នៅ​ពេល​ខាង​មុខ​បាន៖ «

ក្រុម​បាតុករ​ថៃ ដែល​ចេញ​ពី​ក្រុម​និស្សិត បាតុកម្ម​ប្រឆាំង​រដ្ឋាភិបាល​របស់​ខ្លួន​នោះ គិត​មក​ទល់​ពេល​នេះ មិន​មាន​ការ​ថមថយ​ឡើយ ដែល​ទីបំផុត​នាយក​រដ្ឋមន្ត្រី ចេញ​មុខ​ប្រកាស​ទាមទារ​ចង់​សម្រប​សម្រួល​គ្នា​ឡើង​វិញ។ នាយក​រដ្ឋមន្ត្រី​ថៃ​ លោក ប្រា​យុទ្ធ ចាន់អូចា ( Prayut Chan-o-cha) ថ្លែង​តាម​បណ្ដាញ​សារ​ព័ត៌មាន​ជាតិ​ថៃ ដោយ​អំពាវនាវ​ឲ្យ​ក្រុម​បាតុករ​ជា​និស្សិត​ងាក​មក​តុ​ចរចា​វិញ ដើម្បី​ស្វែង​រក​ដំណោះ​ស្រាយ​រួម​មួយ ក៏​ប៉ុន្តែ​ការ​អំពាវនាវ​របស់​នាយក​រដ្ឋមន្ត្រី​ថៃ​នេះ ក្រុម​បាតុករ​មិន​ទាន់​យល់​ព្រម​នៅ​ឡើយ ដរាប​ណា​លោក ប្រាយុទ្ធ ចាន់អូចា នៅ​តែ​មិន​លាលែង​ពី​តំណែង​ទេ​នោះ។

ទោះ​បី​ជា​យ៉ាង​ណា​ក៏​ដោយ ជា​ការ​កត់​សម្គាល់​លោក ប្រាយុទ្ធ ចាន់អូចា ទោះ​បី​ជា​ធ្លាប់​មេដឹកនាំ​យោធា​ចេញ​មក​ដឹក​នាំ​ប្រទេស​ជា​នាយក​រដ្ឋមន្ត្រី​ក៏​ដោយ ក៏​លោក​មិន​ប្រើប្រាស់​កង​កម្លាំង​យោធា ដើម្បី​បង្ក្រាប​ក្រុម​បាតុករ​ឡើយ ខុស​ពី​មេ​ដឹក​នាំ​កម្ពុជា បង្ក្រាប​សកម្មជន​បក្ស​ប្រឆាំង និង​អ្នក​រិះគន់។ លោក ប្រាយុទ្ធ បន្ថែម​ថា ការ​ធ្វើ​បាតុកម្ម​របស់​ក្រុម​និស្សិត គឺ​ធ្វើ​ឡើង​ក្នុង​ចេតនា​ល្អ​នោះ​ទេ។

ក្រុម​យុវជន​ថៃ​ធ្វើ​បាតុកម្ម​នេះ គឺ​ទាមទារ​ឱ្យ​បន្ថយ​អំណាច​ព្រះមហាក្សត្រ តាម​រយៈ​ការ​ធ្វើ​វិសោធនកម្ម​ធម្មនុញ្ញ​ឡើងវិញ និង​ទាមទារ​ឱ្យ​លោក ប្រាយុទ្ធ ចាន់អូចា ចុះ​ចេញ​ពី​តំណែង ហើយ​នឹង​ស្ដារ​លទ្ធិ​ប្រជាធិបតេយ្យ តាមរយៈ ត្រូវ​រៀបចំ​ការបោះឆ្នោត​សារ​ឡើង​វិញ​ជា​ដើម។ ក្រៅ​ពី​នេះ​ទៀត ក្រុម​បាតុករ​នៅ​ក្នុង​រយៈ​ពេល​ប៉ុន្មាន​ថ្ងៃ​មក​នេះ បាន​ធ្វើ​បាតុកម្ម​នៅ​មុខ​ស្ថានទូត​អាល្លឺម៉ង់ (Germany) ដើម្បី​ឲ្យ​អាល្លឺម៉ង់​បញ្ជាក់​ប្រាប់​ថា តើ​ព្រះមហាក្សត្រ​របស់​ខ្លួន​គង់​នៅ​ប្រទេស​អាល្លឺម៉ង់ ក្នុង​ពេល​ប្រជារាស្ត្រ​ថៃ​កំពុង​តែ​ជួប​វិបត្តិ​កូវីដ១៩ ឬ​យ៉ាង​ណា។

សម្រាប់​នៅ​កម្ពុជា​វិញ លោក​បណ្ឌិត សេង សារី មាន​ប្រសាសន៍​ថា មូលហេតុ​ចម្បង​ដែល​រដ្ឋាភិបាល​រឹតត្បិត​សព្វ​បែប​យ៉ាង​មិន​ឲ្យ​ពលរដ្ឋ​ជួបជុំ​សម្ដែង​មតិ​ដោយ​សន្តិវិធី​នោះ គឺ​ដោយសារ​តែ​រដ្ឋាភិបាល​បារម្ភ​ជ្រុល​ហួសហេតុ ហើយ​ប្រើ​កម្លាំង​បង្ក្រាប​អ្នក​តវ៉ា និង​ចាប់ចង​ទៅ​វិញ៖ «

កាលពីថ្ងៃទី២២តុលា លោក​នាយក​រដ្ឋមន្ត្រី ហ៊ុន សែន ប្រកាស​ព្រមាន​ដល់​សកម្មជន​បក្ស​ប្រឆាំង​មិន​ឲ្យ​ជួបជុំ​គ្នា​ធ្វើ​បាតុកម្ម ឬ​យក​ញត្តិ​ទៅ​ដាក់​នៅ​ស្ថានទូត​ចិន នៅ​ថ្ងៃ​ទី២៣ តុលា​នោះ​ទេ។ លោក ហ៊ុន សែន ថែម​ទាំង​ព្រមាន​មិន​ឲ្យ​សកម្មជន​បក្ស​ប្រឆាំង​សហការ​ជាមួយ​បាតុករ​ថៃ​ទៀត​ផង៖ «

ក្រោយ​ពី​លោក ហ៊ុន សែន ព្រមាន​មួយ​ថ្ងៃ គឺនៅថ្ងៃទី២៣តុលា អាជ្ញាធរ​របប​ឯក​បក្ស​បាន​ចាប់​ខ្លួន​ស្ត្រី​បី​នាក់​ក្នុង​ពេល​ពួក​គេ​យក​ញត្តិ​ទៅ​ដាក់​ស្ថានទូត​ចិន​ទាមទារ​ឲ្យ​ចិន​ដក​មូលដ្ឋាន​ទ័ព​នៅ​កម្ពុជា។ ស្ត្រី​ទាំង​បី​នេះ​នាក់ តុលាការ​បាន​ជញ្ជួន​ទៅ​ឃុំ​ខ្លួន​នៅ​ពន្ធនាគារ​ព្រៃ​ស។

ស្ថាបនិក​បណ្ដាញ​ព្រះ​សង្ឃ​ឯករាជ្យ ដើម្បី​យុត្តិធម៌​សង្គម ព្រះតេជព្រះគុណ ប៊ុត ប៊ុនតិញ មាន​ថេរ​ដីកា​ថា មូលហេតុ​ដែល លោក ហ៊ុន សែន រឹតត្បិត និង​មិន​ឲ្យ​ពលរដ្ឋ​ជួបជុំ​គ្នា​សម្ដែង​មតិ​នោះ ដោយសារ​តែ​ការ​ដឹក​នាំ​ប្រទេស​របស់​លោក​កន្លង​មក បាន​បំផ្លាញ​ជាតិ​ជា​ច្រើន ដែល​ធ្វើ​ឲ្យ​ប្រទេស​ជាតិ​ហិនហោច និង​ធ្វើ​ឲ្យ​ពលរដ្ឋ​ឈឺ​ចាប់៖ «

ទោះ​បី​ជា​សេរីភាព​បញ្ចេញ​មតិ និង​សិទ្ធិ​ជួប​ជុំ​កំពុង​តែ​រឹតត្បិត​ក្ដី ក៏​ប៉ុន្តែ​អ្នក​ឃ្លាំមើល​ផ្នែក​អភិវឌ្ឍន៍​សង្គម លោក សេក សុជាតិ មានប្រសាសន៍ថា បាតុកម្ម​នៅ​ថៃ គឺ​ជា​គំរូ​មួយ​សម្រាប់​ប្រទេស​នៅ​ក្នុង​តំបន់ និង​ពិភពលោក។ លោក​បញ្ជាក់​ថា នៅ​ក្នុង​បរិបទ​បែប​នេះ គឺ​មាន​ន័យ​ថា និន្នាការ​ប្រជាធិបតេយ្យ​កំពុង​តែ​ងើប​ឡើង​នៅ​អាស៊ាន​ទាំង​មូល។ លោក សេក សុជាតិ មាន​អះអាង​ថា បាតុកម្ម​នៅ​ថៃ​នេះ​នឹង​មាន​ឥទ្ធិពល​ល្អ​សម្រាប់​ប្រទេស​នៅ​ក្នុង​តំបន់ ៖ «

យុវជន​នៅ​ប្រទេស​ថៃ បាន​ធ្វើ​បាតុកម្ម ចាប់​តាំង​ពី​ពាក់​កណ្ដាល​ខែកក្កដា​មក ទោះ​បី​ជា​ប្រទេស​នេះ កំពង់​ស្ថិត​នៅ​ក្នុង​បម្រាម​មិន​ឲ្យ​មនុស្ស​ជួបជុំ​គ្នា​ជា​ទ្រង់ទ្រាយ​ធំ ដើម្បី​កុំ​ឲ្យ​ឆ្លង​ជំងឺ​កូវីដ១៩ ក្ដី ប៉ុន្តែ​ក្រុម​យុវជន​នៅ​តែ​ផុលផុស​ចេញ​មក​តវ៉ា នៅ​ទីលាន​ប្រជាធិបតេយ្យ មុន​នឹង​មក​បំបែក​ជា​ក្រុម​នៅ​តាម​ទីតាំង​ផ្សេងៗ គ្នា និងតាម​បណ្ដា​ខែត្រ​មួយ​ចំនួន​ទៀត ដើម្បី​ទាមទារ​ឲ្យ​នាយក​រដ្ឋមន្ត្រី​ថៃ លោក ប្រាយុទ្ធ ចាន់អូចា ចុះ​ចេញ​ពី​តំណែង។ ជា​ការ​កត់​សម្គាល់​បាតុកម្ម​នៅ​ថៃ​នេះ បាន​ផ្ទុះ​ឡើង​ពី​ដំបូង នៅ​បន្ទាប់​ពី​តុលាការ​បាន​រំលាយ​គណបក្ស​ឆ្ពោះ​ទៅ​អនាគត (Future Forward Party) នៅ​ចុង​ខែ​កុម្ភៈ ឆ្នាំ ២០២០។

ក្រុម​និស្សិត​ថៃ​ដែល​ប្រមូល​ផ្ដុំ​គ្នា​មនុស្ស​ច្រើន​កកកុញ​ធ្វើ​បាតុកម្ម​នេះ គឺ​មិន​ខុស​ពី​អ្វី​ដែល​កំពុង​តែ​កើត​មាន​នៅ​កម្ពុជា ដែល​សហគមន៍​អឺរ៉ុប និង​ប្រទេស​លោក​សេរី ទាមទារ​ឲ្យ​របប​លោក ហ៊ុន សែន ស្ដារ​ប្រជាធិបតេយ្យ និង​គោរព​សិទ្ធិមនុស្ស​ឡើង​វិញ​នោះ​ឡើយ។

ក្រុម​អ្នក​វិភាគ​លើក​ឡើង​ថា និន្នាការ​ផ្ទុះ​ការ​តវ៉ា​ផុលផុស​នេះ កំពុង​តែ​លេច​ជា​រូបរាង​កាន់​តែ​ធំ​ឡើង​នៅ​ក្នុង​តំបន់ ទោះ​បី​ជា​មេ​ដឹក​នាំ​កម្ពុជា​ព្យាយាម​រាំង​ខ្ទប់​ខ្លាំង​ក្លា​បែប​ណា​ក្ដី ក៏​មិន​អាច​ទប់​ស្កាត់​ពី​ចលនា​ទាមទារ​សិទ្ធិ​សេរីភាព ដោយ​ពលរដ្ឋ​បំពេញ​តួនាទី​ជា​ម្ចាស់​ប្រទេស ប្រើប្រាស់​សិទ្ធិ​របស់​ខ្លួន​រើ​បម្រាស់​ប្រឆាំង និង​ការ​ជិះជាន់​ដូច​នៅ​ថៃ​នេះ នៅ​ពេល​ខាង​មុខ​ជា​មិន​ខាន៕

 

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល