តុលាការ​កោះហៅ​សកម្មជន​គណបក្ស​ប្រឆាំង​ម្នាក់​ទៀត​ទៅ​បំភ្លឺ​ករណី​លោក កឹម សុខា

ដោយ ខែ សុណង
2020-01-08
អ៊ីម៉ែល
មតិ
Share
បោះពុម្ព
ប្រធាន​គណបក្ស​សង្គ្រោះ​ជាតិ លោក កឹម សុខា ថ្លែង​តាម​វីដេអូ​នៅ​លើ​ហ្វេសប៊ុក (Facebook) របស់​លោក​នៅ​ថ្ងៃ​ទី​២៨ ខែ​សីហា ឆ្នាំ​២០១៧។ Photo courtesy of Kem Sokha's Facebook Page
ប្រធាន​គណបក្ស​សង្គ្រោះ​ជាតិ លោក កឹម សុខា ថ្លែង​តាម​វីដេអូ​នៅ​លើ​ហ្វេសប៊ុក (Facebook) របស់​លោក​នៅ​ថ្ងៃ​ទី​២៨ ខែ​សីហា ឆ្នាំ​២០១៧។ Photo courtesy of Kem Sokha's Facebook Page
Photo courtesy of Kem Sokha's Facebook Page

សាលាដំបូង​រាជធានី​ភ្នំពេញ​កោះហៅ​សកម្មជន​គណបក្ស​សង្គ្រោះជាតិ​ម្នាក់ទៀត​ឱ្យ​ទៅ​បំភ្លឺ​ជា​សាក្សី​ក្នុង​ពេល​បើកសវនាការ​ជំនុំ​ជម្រះ​ក្តី សំណុំរឿង​លោក កឹម សុខា នៅ​ព្រឹក​ថ្ងៃ​ទី​១៥ មករា ខាង​មុខ។ សកម្មជន​បក្ស​ប្រឆាំង​រូប​នេះ​ថ្លែង​ថា នេះ​ជា​រឿង​ហួសចិត្ត​ដែល​លោក​គ្រាន់តែ​ជា​សកម្មជន​គណបក្ស​នយោបាយ​តូចតាច នៅ​ក្នុង​មូលដ្ឋាន ក៏ប៉ុន្តែ​បែរ​ជា​ត្រូវ​តុលាការ​កោះហៅ​ក្នុង​សំណុំរឿង​ដ៏​កក្រើក​មួយ​នេះ។

ប៉ូលិស​នៅ​ក្រុង​ប៉ោយប៉ែត​ខេត្ត​បន្ទាយមានជ័យ បាន​យក​ដីកា​កោះហៅ​របស់​សាលាដំបូង​រាជធានី​ភ្នំពេញ ប្រគល់​ឱ្យ​សកម្មជន​គណបក្ស​សង្គ្រោះ​ជាតិ​ម្នាក់ ដល់​ផ្ទះ កាល​ពី​រសៀល​ថ្ងៃ​ទី​៦ មករា។

នៅ​ក្នុង​ដីកា ព្រះរាជអាជ្ញា​រង​អម​តុលាការ​ក្រុង​ភ្នំពេញ លោក វង្ស ប៊ុនវិសុទ្ធ បាន​តម្រូវ​ឱ្យ​ចៅ​សង្កាត់រង​ទី​១ សង្កាត់​ផ្សារ​កណ្ដាល ក្រុង​ប៉ោយប៉ែត គណបក្ស​សង្គ្រោះ​ជាតិ គឺ​លោក ឡេង វិបុល ឱ្យ​ចូល​ឆ្លើយ​បំភ្លឺ​ក្នុង​សវនាការ​សួរដេញដោល​សំណុំរឿង​លោក កឹម សុខា ទាក់ទង​នឹង​បទ​សន្ទិដ្ឋិភាព ឬ​ការ​ត្រូវរ៉ូវ​ជាមួយ​បរទេស ដើម្បី​ផ្ដួល​រំលំ​រដ្ឋាភិបាល ដែល​ប្រព្រឹត្ត​នៅ​កម្ពុជា និង​ទីកន្លែង​ផ្សេង​ទៀត​កាល​ពី​អំឡុង​ឆ្នាំ​១៩៩៣ រហូត​ដល់ ថ្ងៃ​ទី​៣ ខែ​កញ្ញា ឆ្នាំ​២០១៧។

លោក ឡេង វិបុល ប្រាប់​អាស៊ីសេរី នៅ​ព្រឹក​ថ្ងៃ​ទី​៨ មករា ថា លោក​ភ្ញាក់ផ្អើល​យ៉ាង​ខ្លាំង​នៅ​ពេល​បាន​ទទួល​ដីកា​កោះ​នេះ​។ ទោះ​យ៉ាងណា​លោក​អះអាង​ថា លោក​នឹង​ចូល​ទៅ​បំភ្លឺ​តាម​ការកំណត់​របស់​សាលាដំបូង​រាជធានី​ភ្នំពេញ ពីព្រោះ​លោក​យល់ថា លោក​មិន​បាន​ប្រព្រឹត្ត​ខុសច្បាប់​នោះ​ឡើយ​។ លោក​សង្កត់ធ្ងន់​ថា កាល​ពី​គណបក្ស​សង្គ្រោះ​ជាតិ​មិនទាន់​ត្រូវ​បាន​រំលាយ ដោយ​លោក​គ្រាន់តែ​ជា​មន្ត្រី​គណបក្សប្រឆាំង​តូចតាច​ម្នាក់​នៅ​ក្នុង​មូលដ្ឋាន​ប៉ុណ្ណោះ ហើយក៏​មិន​ធ្លាប់​បាន​ជួប​និយាយ​ស្ដី​ជាមួយ​លោក កឹម សុខា ដោយ​ផ្ទាល់​ដែរ។ ចៅ​សង្កាត់​រង​ទី​១ រូប​នេះ បញ្ជាក់​ទៀត​ថា នៅ​ក្នុង​សវនាការ​ខាងមុខនេះ លោក​នឹង​ឆ្លើយ​បំភ្លឺ​តុលាការ​តាម​ការពិត​ជាក់ស្ដែង​ទាំងអស់ ដោយ​មិន​មាន​ការ​លាក់លៀម​អ្វី​ឡើយ៖ «សម្រាប់​រូប​ផ្ទាល់ គឺ​ខ្ញុំ​ស្រលាញ់​អ្វី​ដែល​ជា​ការ​ពិត អ្វី​ដែល​ជា​រឿង​មិន​ពិត​ហើយ​មានការ​បង្ខិតបង្ខំ​អី ក៏​ខ្ញុំ​មិន​អាច​និយាយ​បាន​ដែរ។ ម្យ៉ាងវិញទៀត​ប្រសិនជា​ខ្ញុំ​មិន​បាន​ទៅ​ចូលរួម​វា​ហាក់បីដូចជា​ខ្ញុំ​ហ្នឹង​បាន​ប្រព្រឹត្ត​កំហុស។ អីចឹង​ខ្ញុំ​គិត​ថា ខ្ញុំ​ជា​មនុស្ស​ស្អាតស្អំ គ្រាន់តែ​ថា​កន្លែង​នេះ គឺ​គេ​ហៅ​ខ្ញុំ​ឱ្យ​ទៅ​ធ្វើជា​សាក្សី អីចឹង​ខ្ញុំ​មិន​ដឹង​ថា គេ​ឱ្យ​ខ្ញុំ​ឆ្លើយ​បំភ្លឺ​រឿង​អី​ខ្លះ​ទេ ខ្ញុំ​អត់​ទាន់​ដឹង​ដែរ។ ការតទល់គ្នាក៏អត់ដែរ ការនិយាយដោយ​ផ្ទាល់ខ្លួនក៏អត់មានដែរ

»

លោក ឡេង វិបុល មិនមែន​ជា​មនុស្ស​ទី​មួយ​ទេ ដែល​ត្រូវ​តុលាការ​ក្រុង​ភ្នំពេញ​កោះហៅ​ទៅ​ឆ្លើយ​បំភ្លឺ​ក្នុងនាម​ជា​សាក្សី​រឿងក្ដី​របស់​លោក កឹម សុខា។ កន្លង​មក ក្នុង​ពេល​ស៊ើបអង្កេត​ក្ដី ចៅក្រម​បាន​កោះហៅ​អ្នក​ធ្លាប់​ធ្វើ​ការងារ​ជាមួយ​លោក កឹម សុខា មក​សាកសួរ​ជា​បន្តបន្ទាប់ ដូចជា អ្នកនាំពាក្យ​គណបក្ស​ប្រជាជន​កម្ពុជា លោក ឈឹម ផលវរុណ មន្ត្រី​សង្គម​ស៊ីវិល យុវជន​ដែល​ឈឺ​ឆ្អាល​​ការងារ​សង្គម​ចំនួន ២​នាក់ និង​សកម្មជន​គណបក្ស​សង្គ្រោះ​ជាតិ​ជាច្រើន​នាក់​ទៀត​។​

សហ​មេធាវី​លោក កឹម សុខា លោក ចាន់ ចេង ធ្លាប់​ប្រាប់​អាស៊ីសេរី​ថា ក្រុម​មេធាវី​បាន​ត្រៀមខ្លួន​រួចជាស្រេច ដើម្បី​ជួយ​ការពារ​ក្តី​ឱ្យ​លោក កឹម សុខា ក្នុង​ពេល​បើក​សវនាការ។ លោក​ថា ក្រុម​មេធាវី និង​លោក កឹម សុខា ផ្ទាល់ នៅតែ​សំណូមពរ ទៅ​តុលាការ​ឱ្យ​ទម្លាក់​ចោល​ការចោទប្រកាន់​នេះ។អ្នកនាំពាក្យ​សមាគម​ការពារ​សិទ្ធិមនុស្ស​អាដហុក (Adhoc) លោក សឹង សែនករុណា លើកឡើង​ថា ការ​កោះហៅ​នេះ ជា​រឿង​ចម្លែក ពីព្រោះ​មនុស្ស​ដែល​តុលាការ​តម្រូវ​ឱ្យ​ចូល​បំភ្លឺ​នោះ​ហាក់​ពុំ​មាន​ពាក់ព័ន្ធ​នឹង​សំណុំរឿង​របស់​លោក កឹម សុខា ឡើយ​។ លោក​បញ្ជាក់​ថា ការ​ធ្វើ​បែបនេះ​នឹង​មិន​អាច​រក​យុត្តិធម៌​ក្នុង​សំណុំ​រឿង​នេះ​បានទេ គឺ​មានតែ​ការ​ធ្វើ​ឱ្យ​ខាត​ពេល​ដល់​ដំណើរការ​នីតិវិធី​របស់​តុលាការ​ទៅវិញ៖ «ហើយ​សំណុំ​រឿង​នេះ នរណា​គេ​ដឹង​ដែរ ទាំង​មតិ​ជាតិ និង​អន្តរជាតិ​ទាំងអស់​ក៏​គេ​បាន​ដឹង​ដែរ គេ​ថា​គ្រាន់តែ​ជា​រឿង​នយោបាយ​មួយ ដែល​គេ​បាន​បង្កើត​ឡើង​ក្នុង​ន័យ​ចេតនា​ជម្លោះ​នយោបាយ វា​មិនមែន​ជា​រឿង​ដែល​ជា​កំហុស​ផ្លូវច្បាប់​ណាមួយ​ទេ​។ អីចឹង​យើង​មិន​យល់​រឿង​នេះ​ជាហេតុ​ផល​នៃ​ផ្លូវច្បាប់​ទេ យើង​គិត​ថា ជា​ហេតុផល​នយោបាយ​ច្រើនជាង»

សហគមន៍​ជាតិ និង​អន្តរជាតិ បាន​ចាត់​ទុក​វិធានការ​ច្បាប់​លើ​លោក កឹម សុខា ថា ជា​រឿង​នយោបាយ និង​ទាមទារ​ឱ្យ​តុលាការ​ក្រុងភ្នំពេញ​ទម្លាក់​ចោល​បទចោទប្រកាន់ និង​ផ្ដល់​សិទ្ធិ​សេរីភាព​ពេញលេញ​ដល់​មេ​បក្ស​ប្រឆាំង​រូប​នេះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល