អ្នកឃ្លាំមើលរិះគន់សាលាឧទ្ធរណ៍ភ្នំពេញថា បានតម្កល់សំណុំរឿងលោក កឹម សុខា ទុកឥតចាត់ការជិត ៨ខែមកហើយ បើទោះជាមេធាវីការពារក្ដីលោក កឹម សុខា បានប្ដឹងទាស់សាលក្រមសាលាដំបូងរាជធានីភ្នំពេញកាលពីខែមីនា រួចហើយក្ដី។ ទោះជាយ៉ាងណាក្ដី អ្នកនាំពាក្យសាលាឧទ្ធរណ៍ឆ្លើយតបថា តុលាការមិនទាន់បានយកសំណុំរឿងលោក កឹម សុខា មកបើកសវនាការនេះ ព្រោះសំណុំរឿងនេះមានភាពស្មុគស្មាញ។
ក្រុមមន្ត្រីការពារសិទ្ធិមនុស្សលើកឡើងថា ប្រធានគណបក្សសង្គ្រោះជាតិ លោក កឹម សុខា កំពុងរងភាពអយុត្តិធម៌ថែមទៀត នៅពេលតុលាការគ្រប់ជាន់ថ្នាក់តែងតែប្រើវេលាវែងហួសហេតុ ឬផ្អឹបទុកមិនបើកសវនាការ។ ពួកគេជំរុញសាលាឧទ្ធរណ៍ភ្នំពេញ គួរពន្លឿនការបើកសវនាការលើបណ្ដឹងសារទុក្ខរបស់មេបក្សប្រឆាំងរូបនេះ។
នាយកទទួលបន្ទុកកិច្ចការទូទៅនៃអង្គការលីកាដូ លោក អំ សំអាត សង្កេតឃើញថា សំណុំរឿងលោក កឹម សុខា តុលាការកាត់ទោសយឺតយ៉ាវតាំងពីតុលាការជាន់ទាបមកម្ល៉េះ ហើយពេលនេះ តុលាការជាន់ខ្ពស់ ក៏នៅតែកាត់ក្ដីយឺតយ៉ាវដដែល។ លោក អំ សំអាត បន្តថា ការអូសបន្លាយសំណុំរឿងនេះម្ដងហើយម្ដងទៀត បែបនេះ នាំឱ្យសហគមន៍ជាតិ និងអន្តរជាតិរិះគន់។ លោកជំរុញទៅសាលាឧទ្ធរណ៍ គួរពន្លឿនក្នុងការបើកសវនាការសំណុំរឿងលោក កឹម សុខា។ លោកបន្តថា បើទោះជាលោក កឹម សុខា ជាប់ឃុំក្នុងផ្ទះក្ដី ប៉ុន្តែ របៀបធ្វើការរបស់តុលាការបែបនេះ គឺធ្វើឱ្យប៉ះពាល់សិទ្ធិនយោបាយ និងសេរីភាពរបស់លោក កឹម សុខា យ៉ាងធ្ងន់ធ្ងរ។
លោក អំ សំអាត៖«រឿងនេះគឺការឃុំខ្លួននៅក្នុងផ្ទះអីជាដើម ទី១ គឺការដើរហើរ។ ទី២ គឺរឿងសិទ្ធិក្នុងការធ្វើនយោបាយក៏មិនទាន់ដឹងយ៉ាងម៉េចដែរ អ៊ីចឹងបានថា បើសិនជាសាលាឧទ្ធរណ៍លោក ពន្លឿននីតិវិធីក្នុងការសវនាការ ការសម្រេចហ្នឹងគឺជារឿងមួយល្អដែរ សម្រាប់ករណីហ្នឹង»។
ទាក់ទងការលើកឡើងនេះ វិទ្យុអាស៊ីសេរីមិនអាចសុំការបកស្រាយ អ្នកនាំពាក្យសាលាឧទ្ធរណ៍ លោក ឃុន លាងម៉េង និងអ្នកនាំពាក្យក្រសួងយុត្តិធម៌ លោក ជិន ម៉ាលីន ក៏មិនអាចការបំភ្លឺបានដែរនៅថ្ងៃដដែលនេះ។ ទោះបែបនេះក្ដី អ្នកនាំពាក្យសាលាឧទ្ធរណ៍ លោក ឃុន លាងម៉េង ឱ្យសារព័ត៌មានក្នុងស្រុកដឹងថា ភាពយឺតយ៉ាវលើនៃការបើកសវនាការករណីលោក កឹម សុខា ព្រោះសំណុំរឿងនេះមានឯកសារច្រើន និងមានភាពស្មុគស្មាញ។ ទោះជាយ៉ាងណាក្ដី អ្នកនាំពាក្យរូបនេះអះអាងថា សាលាឧទ្ធរណ៍រៀបចំយកសំណុំរឿងនេះ មកកាត់ក្ដីក្នុងពេលឆាប់ៗនេះ។
ទោះយ៉ាងណាក្ដី ប្រធានអង្គការសម្ពន្ធភាពការពារសិទ្ធិមនុស្សកម្ពុជា ហៅកាត់ថា ច្រាក់ (CHRAC) លោក រស់ សុដ្ឋា យល់ថា ការចោទប្រកាន់ និងកាត់ទោសលោក កឹម សុខា ធ្វើឡើងនៅក្នុងពេល ដែលប្រទេសកម្ពុជាមានទំនាស់នយោបាយ ដូច្នេះ នាំឱ្យមានការរិះគន់ថា សំណុំរឿងនេះ ជារឿងនយោបាយ។ លោកបន្តទៀតថា សំណុំរឿងបែបនេះ ប្រព័ន្ធតុលាការពិបាកនឹងផ្ដល់យុត្តិធម៌ដល់លោក កឹម សុខា ណាស់។
លោក រស់ សុដ្ឋា៖«ខ្ញុំយល់ថាទាំងមតិជាតិ និងអន្តរជាតិ មើលឃើញថា ការផ្ដល់យុត្តិធម៌ដែលមានលក្ខណៈជាប់ពាក់ព័ន្ធទៅនឹងស្ថានភាពនយោបាយ ប្រសិនជាមានឆន្ទៈរឿងហ្នឹងលឿនទេ បើសិនករណីហ្នឹងជាករណីនយោបាយ គឺរឿងប៉ុណ្ណឹងពិបាកក្នុងការបញ្ចប់»។
សមត្ថកិច្ចបានចាប់ខ្លួនលោក កឹម សុខា ទាំងកំពុងមានអភ័យឯកសិទ្ធិ កាលពីឆ្នាំ២០១៧ ដោយចោទប្រកាន់ពីសន្ទិដ្ឋភាពជាមួយរដ្ឋបរទេស ដើម្បីផ្ដួលរំលំរដ្ឋាភិបាល។ សំណុំរឿងនេះ ស៊ីពេលអស់ប្រាំឆ្នាំ ទម្រាំតុលាការកាត់ក្ដីចប់។ កាលពីថ្ងៃទី៣ ខែមីនា សាលាដំបូងរាជធានីភ្នំពេញ សម្រេចកាត់ទោសលោក កឹម សុខា ឱ្យជាប់ឃុំក្នុងផ្ទះ២៧ឆ្នាំ។ បើទោះជាសាលក្រមតុលាការមិនទាន់ចូលស្ថាពរក្ដី តែតុលាការមួយនេះ បានដាក់បម្រាម មិនឱ្យលោក កឹម សុខា មានសិទ្ធិធ្វើនយោបាយ សេរីភាពដើរហើរ និងត្រូវកាត់ផ្ដាច់ទំនាក់ទំនងជាបុគ្គលទាំងឡាយទៀតផង។
គិតមកដល់ពេលនេះជិត៨ខែមកហើយ ដែលមេធាវីការពារក្ដីលោក កឹម សុខា បានប្ដឹងទាស់សេចក្ដីសម្រេចរបស់តុលាការជាន់ទាបមួយនេះ ទៅសាលាឧទ្ធរណ៍ភ្នំពេញ ប៉ុន្តែ សាលាឧទ្ធរណ៍មិនទាន់រៀបចំកម្មវិធីបើកសវនាការនៅឡើយទេ។
ទាក់ទងបញ្ហានេះ វិទ្យុអាស៊ីសេរីមិនអាចសុំការអត្ថាធិប្បាយពីក្រុមមេធាវីលោក កឹម សុខា បានទេ នៅថ្ងៃទី៣ ខែវិច្ឆិកា។
ទោះយ៉ាងណាក្ដី មេធាវីលោក កឹម សុខា ម្នាក់គឺលោក ចាន់ ចេន សរសេរលើហ្វេសប៊ុករបស់លោក កាលពីថ្ងៃទី៣១ ខែតុលាថា ការពន្យារពេលគ្មានកំណត់បែបនេះជាការរំលោភលើសិទ្ធិរបស់លោក កឹម សុខា គឺសិទ្ធិទទួលបាននូវការជំនុំជម្រះដោយយុត្តិធម៌ និងឆាប់រហ័ស ដែលមានចែងនៅក្នុងច្បាប់ជាតិ កតិកាសញ្ញាអន្តរជាតិ។ មេធាវីមេបក្សប្រឆាំងរូបនេះបន្តទៀតថា លោក កឹម សុខា ជាប់ឃុំដោយអយុត្តិធម៌ ដោយសារលោកស្មោះត្រង់និងជាតិ ស្មោះត្រង់និងម្ចាស់ឆ្នោត។
ក្រុមប្រទេសលោកសេរី តែងតែរិះគន់ថា ការចោទប្រកាន់លើលោក កឹម សុខា ថា ជារឿងនយោបាយ និងជាការដើរខុសឆ្គងនៃប្រព័ន្ធយុត្តិធម៌នៅកម្ពុជា។ ពួកគេទទូចជាញឹកញាប់ ទៅរដ្ឋាភិបាលកម្ពុជា ឱ្យដោះលែងលោក កឹម សុខា និងអ្នកទោសនយោបាយផ្សេងទៀត ដោយគ្មានលក្ខខណ្ឌ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។