រដ្ឋមន្រ្តីការបរទេសអាស៊ាននៅថ្ងៃទី១៧ ខែកុម្ភៈ ប្តេជាជាថ្មីទៀតនឹងរក្សាភូមិភាគអាស៊ីអាគ្នេយ៍ជាតំបន់ដែលគ្មានអាវុធនុយក្លេអ៊ែនិងគ្មានរាល់អាវុធប្រល័យលោកផ្សេងទៀត។
ការប្តេជ្ញានេះធ្វើឡើងនៅក្នុងកិច្ចប្រជុំចង្អៀតរដ្ឋមន្រ្តីការបរទេសអាស៊ាននៅរាជធានីភ្នំពេញនៅថ្ងៃទី១៧ ខែកុម្ភៈ ដែលកម្ពុជាធ្វើជាប្រធានប្តូរវេនដឹកនាំដោយរដ្ឋមន្រ្តីក្រសួងការបរទេសកម្ពុជាលោក ប្រាក់ សុខុន និងដោយមិនមានតំណាងនៃរបបយោធាមីយ៉ាន់ម៉ាចូលរួមឡើយ។
ក្រៅពីបង្ហាញការប្តេជ្ញាចិត្តមិនឱ្យតំបន់អាស៊ីអាគ្នេយ៍មានអាវុធនុយក្លេអ៊ែស្របទៅនឹងគោលការណ៍ដែលមានចែងនៅក្នុងសន្ធិសញ្ញាតំបន់អាស៊ីអាគ្នេយ៍គ្មានអាវុធនុយក្លេអ៊ែនិងធម្មនុញ្ញ អាស៊ាន រដ្ឋមន្រ្តីការបរទេសអាស៊ានតាមរយៈសេចក្តីថ្លែងការណ៍របស់ខ្លួនក៏បានសំដែងការស្វាគមន៍ចំពោះសេចក្តីថ្លែងការណ៍រួមនៃមេដឹកនាំរបស់ប្រទេសទាំង ៥ ដែលមានអាវុធនុយក្លេអ៊ែដែលបានបង្ហាញការប្តេជ្ញាចិត្តនៅក្នុងការទប់ស្កាត់មិនឱ្យមានសង្គ្រាមនុយក្លេអ៊ែកើតឡើងនិងការបញ្ចៀសនូវការប្រកួតប្រជែងអាវុធដែលបានធ្វើឡើងកាលពីថ្ងៃទី២២ ខែមករា ឆ្នាំ២០២២។
ទោះជាយ៉ាងណាក៏ដោយរដ្ឋមន្រ្តីការបរទេសអាស៊ាននៅតែសំដែងការបារម្ភអំពីការកាន់កាប់និងវត្តមាននៃអាវុធនុយក្លេអ៊ែនៅលើពិភពលោកហើយពួកគេយល់ថា មានតែមធ្យោបាយបំផ្លាញ អាវុធនុយក្លេអ៊ែចោលទាំងស្រុងទើបអាចធានាថា អាវុធទំាងអស់នោះនឹងមិនត្រូវបានយកទៅប្រើប្រាស់នៅក្នុងសង្រ្គាមឬប្រឆាំងមនុស្សជាតិ។
ជាមួយគ្នានេះរដ្ឋមន្រ្តីការបរទេសអាស៊ានក៏ប្តេជ្ញាចិត្តបន្តធ្វើការជាមួយប្រទេសមាន អាវុធនុយក្លេអ៊ែ និងជំរុញឱ្យមានការខិតខំប្រឹងប្រែងជាមួយគ្រប់ភាគីពាក់ព័ន្ធទាំងអស់ដើម្បីដោះស្រាយនូវបញ្ហាចំបងៗស្របទៅតាមទិសដៅនិងគោលការណ៍ដែលមានចែងនៅក្នុងសន្ធិសញ្ញាតំបន់អាស៊ីអាគ្នេយ៍គ្មានអាវុធនុយក្លេអ៊ែ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។