កម្ពុជារំពឹងថា ភាពជាដៃគូសន្តិសុខត្រីភាគី អូឃឹស (AUKUS) ទើបបង្កើតថ្មីរវាងអូស្ត្រាលី (Australia) អង់គ្លេស (UK) និងសហរដ្ឋអាមេរិក(US) នឹងមិនបង្កើនភាពតានតឹងក្នុងតំបន់បន្ថែមទៀតនោះទេ។ ការបញ្ជាក់ជំហបែបនេះធ្វើឡើងនៅក្នុងកិច្ចសន្ទនាតាមទូរស័ព្ទរវាងរដ្ឋមន្ត្រីការបរទេសកម្ពុជា លោក ប្រាក់ សុខុន ជាមួយរដ្ឋមន្ត្រីការបរទេស និងកិច្ចការនារីអូស្ត្រាលីអ្នកស្រី ម៉ារីស ផេន (Marise Payne) កាលពីថ្ងៃទី៨ ខែតុលា។
បើតាមសេចក្តីប្រកាសព័ត៌មានរបស់ក្រសួងការបរទេសកម្ពុជាលោក ប្រាក់ សុខុន គូសបញ្ជាក់ថា កម្ពុជាចង់ឃើញតំបន់ទាំងមូលនៅតែរក្សាបាននូវសន្តិភាព ស្ថិរភាព និងវិបុលភាព។ លោកសង្ឃឹមថា ភាពជាដៃគូសន្តិសុខត្រីភាគី អូឃឹស នេះ នឹងមិនបន្ថែមសាំងទៅលើការប្រកួតប្រជែងដែលលោកថា កំពុងមានស្ថានភាពមិនល្អស្រាប់ និងបង្កើនភាពតានតឹងបន្ថែមទៀតនោះទេ។
ក្រសួងការបរទេសកម្ពុជាឱ្យដឹងដែរថា ក្នុងកិច្ចសន្ទនាតាមទូរស័ព្ទនោះ រដ្ឋមន្ត្រីការបរទេសអូស្ត្រាលីអ្នកស្រី ម៉ារីស ផេន បានប្រាប់លោក ប្រាក់ សុខុន ដោយសង្កត់ធ្ងន់ថា ភាពជាដៃគូសន្តិសុខត្រីភាគី អូឃឹស រវាងអូស្ត្រាលី អង់គ្លេស និងសហរដ្ឋអាមេរិកនេះ ត្រូវបានបង្កើតឡើងដើម្បីប្រយោជន៍ទូទៅ សន្តិភាព វិបុលភាព និងសន្តិសុខនៅក្នុងតំបន់ឥណ្ឌូ-ប៉ាស៊ីហ្វិក ហើយគ្មានចេតនាណាមួយដើម្បីទទួលបានអាវុធនុយក្លេអ៊ែរ និងសមត្ថភាពនុយក្លេអ៊ែរស៊ីវិលនោះទេ។ អ្នកស្រីពន្យល់ថា អូឃឹស មិនមែនជាការបន្ថែមទៅលើការប្រកួតប្រជែងសព្វាវុធនៅក្នុងតំបន់នោះទេ។ រដ្ឋមន្ត្រីការបរទេសអូស្ត្រាលីរូបនេះបញ្ជាក់ជាថ្មីថា ប្រទេសអូស្ត្រាលី ប្តេជ្ញាចិត្តចំពោះកាតព្វកិច្ចនៃការមិនរីកសាយភាយនៃអាវុធនុយក្លេអ៊ែរ និងធ្វើការយ៉ាងជិតស្និទ្ធជាមួយទីភ្នាក់ងារថាមពលអាតូមិកអន្តរជាតិ (IAEA)។
យ៉ាងណាក៏ដោយ រដ្ឋមន្ត្រីការបរទេសអូស្ត្រាលីអ្នកស្រី ម៉ារីស ផេន មិនបានបញ្ជាក់ពីការពិភាក្សាជុំវិញប្រធានបទនេះនៅក្នុងកិច្ចសន្ទនាតាមទូរស័ព្ទនេះទេ។ អ្នកស្រីសរសេរនៅលើទំព័រហ្វេសប៊ុករបស់អ្នកស្រីក្រោយកិច្ចសន្ទនានេះថា អូស្ត្រាលី គាំទ្រកម្ពុជាខណៈប្រទេសនេះក្លាយជាប្រធានប្តូរវេនរបស់អាស៊ាននៅឆ្នាំ២០២២ ខាងមុខ។ អ្នកស្រីថា អាស៊ានគឺជាចំណុចកណ្តាលនៃចក្ខុវិស័យរបស់យើងសម្រាប់តំបន់ឥណ្ឌូ-ប៉ាស៊ីហ្វិកមួយដែលមានស្ថិរភាព និងវិបុលភាព។
នេះគឺជាលើកទីមួយហើយដែលប្រមុខការទូតកម្ពុជាបញ្ជាក់ជំហរបស់កម្ពុជាជុំវិញការបង្កើតសម្ព័ន្ធភាពយោធា អូឃឹស នេះ ក្រោយរដ្ឋាភិបាលបានរក្សាភាពស្ងៀមស្ងាត់ជុំវិញបញ្ហានេះ។
Opens in new windowកាលពីថ្ងៃទី១៦ ខែកញ្ញា ក្រុមមេដឹកនាំនៃប្រទេសសម្ព័ន្ធមិត្តទាំងបី គឺសហរដ្ឋអាមេរិក អង់គ្លេស និងអូស្ត្រាលី បានប្រកាសអំពីការបង្កើតសម្ព័ន្ធភាពយោធាត្រីភាគី ដាក់ឈ្មោះថា អូឃឹស។ តាមរយៈសម្ព័ន្ធភាពយោធានេះ សហរដ្ឋអាមេរិក និងចក្រភពអង់គ្លេស នឹងផ្តល់ឱ្យប្រទេសអូស្ត្រាលីនូវបច្ចេកវិទ្យាដើម្បីអាចឱ្យប្រទេសនេះសាងសង់នាវាមុជទឹកដើរដោយថាមពលនុយក្លេអ៊ែរជាលើកដំបូងដោយខ្លួនឯងបាន។ ការបង្កើតសម្ព័ន្ធភាពយោធាត្រីភាគីថ្មីនេះ ត្រូវប្រទេសលោកសេរីទាំងបីនេះសាទរថា ជា«ប្រវត្តិសាស្ត្រ» ថ្មីមួយ។ ក្រុមអ្នកជំនាញមើលឃើញថា សម្ព័ន្ធភាពយោធាត្រីភាគីនេះ ធ្វើឡើងដើម្បីទប់ទល់នឹងឥទ្ធិពលរបស់ប្រទេសចិនដែលកំពុងតែកើនឡើងនៅក្នុងតំបន់ឥណ្ឌូ-ប៉ាស៊ីហ្វិក ជាពិសេសនៅតំបន់ជម្លោះដណ្តើមប្រជុំកោះនៅសមុទ្រចិនខាងត្បូង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។