រដ្ឋាភិបាលអូស្ត្រាលីព្រមានថា នឹងមិនលើកលែងដល់យុទ្ធនាការជ្រៀតជ្រែករបស់បរទេស ក្នុងនោះរួមទាំងកម្ពុជាផង ដែលបានដាក់គោលដៅតាមធ្វើទុក្ខបុកម្នេញ យាយី និងបំភិតបំភ័យដល់ពលរដ្ឋខ្លួននៅលើទឹកដីអូស្ត្រាលី។
ការព្រមានរបស់រដ្ឋាភិបាលអូស្ត្រាលីបែបនេះ កើតមានឡើងស្របពេលដែលរដ្ឋាភិបាលរបស់លោកនាយករដ្ឋមន្ត្រី ហ៊ុន សែន និងគណបក្សកាន់អំណាចរបស់លោក កំពុងបង្កើនយុទ្ធនាការបំបែកបំបាក់សហគមន៍ខ្មែរ ក្រុមអ្នកប្រឆាំង និងពង្រីកឥទ្ធិពលរបស់ខ្លួននៅអូស្ត្រាលី។
រដ្ឋមន្ត្រីមហាផ្ទៃអូស្ត្រាលី អ្នកស្រី ក្លែ អូនៀល (Clare O'Neil) ថ្លែងក្នុងសុន្ទរកថាមួយ កាលពីថ្ងៃទី១៣ ខែកុម្ភៈ នៅឯមហាវិទ្យាល័យសន្តិសុខជាតិ នៃសាកលវិទ្យាល័យជាតិអូស្ត្រាលី (ANU National Security College) ផ្តោតលើ «ការជ្រៀតជ្រែករបស់បរទេសក្នុងប្រទេសអូស្ត្រាលី» ថា យុទ្ធនាការជ្រៀតជ្រែករបស់បរទេសកំពុងបង្កការគំរាមកំហែងកាន់តែខ្លាំងដល់ប្រទេសអូស្ត្រាលី។ អ្នកស្រីព្រមានថា អូស្ត្រាលី នឹងមិនអត់ឱនឱ្យរបបបរទេសទាំងឡាយណាដែលប៉ុនប៉ងធ្វើទុក្ខបុកម្នេញ យាយី និងបំភិតបំភ័យដល់ពលរដ្ឋខ្លួននៅលើទឹកដីអូស្ត្រាលីឡើយ៖
អ្នកស្រី ក្លែ អូនៀល៖ « វាជាការស្របច្បាប់ទាំងស្រុងសម្រាប់អ្នកណាម្នាក់នៅក្នុងប្រទេសអូស្ត្រាលី ក្នុងការនិយាយរិះគន់របបបរទេស។ ជនជាតិអូស្ត្រាលីរាប់ម៉ឺននាក់ បានធ្វើរឿងរ៉ាវប្រកបដោយភាពក្លាហាន ចេញតវ៉ា និងធ្វើដូច្នេះនៅក្នុងប្រទេសរបស់យើង។ អ្វីដែលយើងនឹងមិនអត់ឱនឱ្យជាដាច់ខាតនោះ ទោះជាស្ថិតក្នុងកាលៈទេសៈណាក៏ដោយ គឺការប៉ុនប៉ងនានា ពីសំណាក់របបបរទេស ក្នុងការរារាំងកុំឱ្យមានការតវ៉ាដោយសន្តិវិធីទាំងនោះ ឬក៏ព្យាយាមពន្យុះឱ្យមានអំពើហិង្សានៅក្នុងការតវ៉ាណាមួយ ឬក៏ព្យាយាមរាំងខ្ទប់ ចំពោះទស្សនៈជាក់លាក់ណាមួយដែលពលរដ្ឋអូស្ត្រាលីចង់សម្ដែងចេញ។ យើងក៏នឹងមិនអត់ឱនឱ្យ ចំពោះទង្វើបែបជាសត្រូវក្រោមរូបភាពនៃការតាមដានឈ្លបយកការណ៍ ការយាយី ឬការបំភិតបំភ័យប្រឆាំងនឹងបុគ្គលទាំងឡាយណា ឬសមាជិកគ្រួសាររបស់ជនជាតិអូស្ត្រាលីនៅក្នុងប្រទេសអូស្ត្រាលីឡើយ។ រដ្ឋាភិបាលអូស្ត្រាលី និងភ្នាក់ងារសន្តិសុខរបស់យើងកំពុងឃ្លាំមើលបញ្ហានេះយ៉ាងយកចិត្តទុកដាក់ ហើយយើងនឹងចាត់វិធានការដើម្បីការពារជនជាតិអូស្ត្រាលី និងសិទ្ធិប្រជាធិបតេយ្យរបស់ពួកគេ »។
សារព័ត៌មានអូស្ត្រាលី អេប៊ីស៊ី ញូស៍ (ABC News) ផ្សាយកាលពីថ្ងៃទី១៣ ខែកុម្ភៈ រាយការណ៍ថា អាជ្ញាធរអូស្ត្រាលីបានបង្កើនការព្រួយបារម្ភកាន់តែខ្លាំងអំពីវិធីដែលរដ្ឋាភិបាលបរទេសមួយចំនួន ក្នុងនោះមានដូចជា ចិន (China) អ៊ីរ៉ង់ (Iran) រ្វាន់ដា (Rwanda) និងកម្ពុជា កំពុងបំភិតបំភ័យ និងតាមដានក្រុមអ្នកប្រឆាំងនឹងរដ្ឋាភិបាលខ្លួននៅប្រទេសអូស្ត្រាលី។
ប្រធានសមាគមខ្មែរនៅរដ្ឋវិចតូរីយ៉ា (Victoria) នៃប្រទេសអូស្ត្រាលី លោក ជា យូហន ចង់ឃើញរដ្ឋាភិបាលអូស្ត្រាលីចាត់វិធានការតឹងបន្តឹងមិនផ្តល់ទិដ្ឋាការលើមន្ត្រីរដ្ឋាភិបាលរបស់លោកនាយករដ្ឋមន្ត្រី ហ៊ុន សែន ទាំងឡាយណា ដែលចង់មកបំបែកបំបាក់សហគមន៍ខ្មែរនៅអូស្ត្រាលី៖
លោក ជា យូហន៖ « ជួនកាលគឺមកបំបែកបំបាក់ គឺថាវត្តខ្លះ គឺមានការបែកបាក់គ្នាទៅហើយ។ រឿងហ្នឹងហើយ ដែលយើងមានការព្រួយបារម្ភ ដែលយើងមានការភ័យ។ យើងទាំងអស់គ្នាតែងតែ ជាពិសេស គឺប្រជាជនអូស្ត្រាលី ដែលមិនគាំទ្រចំពោះរដ្ឋាភិបាលខ្មែរយើង គឺគេចាត់ទុកអ្នកអស់ហ្នឹងដូចជា Target របស់គេអ៊ីចឹង ជាមុខព្រួញរបស់គេ ថានែកពួកហ្នឹង គឺពួកប្រឆាំងជាមួយអញ។ គឺថាសូមឱ្យរដ្ឋាភិបាលអូស្ត្រាលី មើលឱ្យច្បាស់ទៅ អ្នកណាដែលមកបង្កើតសន្តិសុខ បង្កើតការភ័យខ្លាចរបស់ប្រជាជនខ្មែរអូស្ត្រាលីហ្នឹង សូមកុំឱ្យមក គឺហាមកុំឱ្យមកឱ្យសោះមនុស្សធន់ហ្នឹង។ គឺថាទុកឱ្យគេរស់នៅ គេសប្បាយចិត្តណាស់ដែលរស់នៅ ធ្វើបាបចាប់គេដាក់គុក »។
ឆ្លើយតបនឹងរឿងនេះ អ្នកនាំពាក្យគណបក្សប្រជាជនកម្ពុជា លោក សុខ ឥសាន បដិសេធថា គណបក្សកាន់អំណាចមិនបានបញ្ជូនមនុស្សទៅបំភិតបំភ័យ បំបែកបំបាក់ ឬតាមយាយីពលរដ្ឋដើមកំណើតខ្មែរដែលមាននិន្នាការប្រឆាំងរដ្ឋាភិបាល នៅក្នុងប្រទេសអូស្ត្រាលីឡើយ។ លោកជំរុញឱ្យអូស្ត្រាលីចាត់វិធានការច្បាប់ប្រឆាំងនឹងអ្នកល្មើសច្បាប់របស់អូស្ត្រាលី៖
លោក សុខ ឥសាន៖ « អ្នកណាធ្វើខុសច្បាប់អូស្ត្រាលី ឱ្យគាត់ចាប់ទៅ គាត់មានវិធានការផ្លូវច្បាប់ទៅ ពីព្រោះអាហ្នឹងវាស្ថិតនៅក្នុងក្របខ័ណ្ឌ វិសាលភាព ឯករាជភាព អធិបតីភាព របស់អូស្ត្រាលីហើយ។ គាត់ចាំបាច់និយាយធ្វើអី បើឥតប្រយោជន៍ទេ ... ។ រដ្ឋាភិបាលអូស្ត្រាលីភ្លើជាងបងប្អូនអ្នកប្រឆាំងខ្មែរនៅអូស្ត្រាលី ឬយ៉ាងម៉េច ? នេះបើនិយាយឱ្យស្រួលស្ដាប់។ ខ្ញុំមិនជឿថា អូស្ត្រាលីគេល្ងង់ជាងបងប្អូនអាណិកជនខ្មែរ ដែលមាននិន្នាការប្រឆាំងនឹងរាជរដ្ឋាភិបាលកម្ពុជាហ្នឹង ចេះជាងគេទេ។ គេគ្រប់គ្រងស្រុកទេសគេ គេដឹង អ្នកណាធ្វើខុស អ្នកណាធ្វើត្រូវ។ អ៊ីចឹងទេ ក្រែងយើងធ្វើនយោបាយ ធ្វើសកម្មភាពវាអន់ជាងគេ ចាញ់គេ យើងចេះតែលាបពណ៌គេ ? ខ្មែរអី ដូចជា គឹម សន្តិភាព ទៅពីស្រុកខ្មែរទៅៗ ជាមានឥទ្ធិពលអីសម្បើមម្ល៉េះ រហូតដល់ទៅបំបែកបំបាក់សហគមន៍ខ្មែរនៅទីនោះបាន ?»។
ផ្ទុយពីការអះអាងនេះ កាលពីដើមឆ្នាំ២០១៨ កន្លងទៅ យ៉ាងហោចណាស់មានពលរដ្ឋសញ្ជាតិអូស្ត្រាលីដើមកំណើតខ្មែរ ៤នាក់ ក្នុងនោះមានលោក ជា យូហន លោក តាក់ ម៉េងហ៊ាង លោក ហុង លីម និងប្រពន្ធលោក កែម ឡី គឺអ្នកស្រី ប៊ូ រចនា បានរងនូវការគំរាមសម្លាប់តាមរយៈលិខិតអនាមិកមួយច្បាប់។ ដោយឡែក លោកនាយករដ្ឋមន្ត្រី ហ៊ុន សែន នៅមុនពេលទៅចូលរួមកិច្ចប្រជុំកំពូលពិសេសអាស៊ាន-អូស្ត្រាលី កាលពីខែមីនា ឆ្នាំ២០១៨ ធ្លាប់បានគំរាមតាមវាយដល់ផ្ទះពលរដ្ឋខ្មែរអូស្ត្រាលីទាំងឡាយណាដែលហ៊ានធ្វើបាតុកម្មដុតទីងមោងរូបលោក ក្នុងពេលដែលលោកទៅចូលរួមកិច្ចប្រជុំកំពូលនេះនៅប្រទេសអូស្ត្រាលី។
លោក ហ៊ុន សែន៖ « សូមផ្កាំទៅអាអ្នកត្រៀមធ្វើបាតុកម្ម បើហ៊ានតែធ្វើរូប ហើយដុតរូប ច្បាប់ជាមានរឿងហើយ ហើយខ្ញុំប្ដូរផ្ដាច់ពេលហ្នឹង បើហ៊ានតែធ្វើរូបទីងមោង រូបខ្ញុំយកទៅដុត អញតាមវ៉ៃដល់ផ្ទះប្រាប់ឲ្យហើយ។ អានេះនិយាយឲ្យច្បាស់ ! សិទ្ធិរបស់ឯងមាន បើសិទ្ធិអ្នកឯងមានដុតគេ គេមានសិទ្ធិវ៉ៃអ្នកឯងវិញ មានទាស់ខុសអី ? អាហ្នឹងសិទ្ធិទៅសិទ្ធិមក។ អ្នកឯងប្រើដល់ហិង្សាលើរូបកាយគេ អ្នកឯងចាត់ទុកថាអាហ្នឹងរូប ហ៊ុន សែន រួចហើយយកទៅដុត។ តាមដល់ផ្ទះ អត់ទេ ក្របួចយកតែម្ដង »។
ចាប់តាំងពីក្រោយការរម្លាយគណបក្សសង្គ្រោះជាតិ និងការរៀបចំព្រឹត្តិការណ៍បោះឆ្នោតជាតិ ដែលត្រូវគេចាត់ទុកថា «ក្លែងក្លាយ» កាលពីឆ្នាំ២០១៨ រួចមក គណបក្សប្រជាជនកម្ពុជារបស់លោកនាយករដ្ឋមន្ត្រី ហ៊ុន សែន បានបង្កើនយុទ្ធនាការពង្រីកឥទ្ធិពលរបស់ខ្លួនគួរឱ្យកត់សម្គាល់នៅក្រៅប្រទេស ជាពិសេសនៅប្រទេសអូស្ត្រាលី សហរដ្ឋអាមេរិក និងនៅអឺរ៉ុប ជាដើម។ យុទ្ធនាការនេះត្រូវគេមើលឃើញថា ដាក់គោលដៅបំបែកបំបាក់សហគមន៍ខ្មែរនៅក្នុងប្រទេសទាំងនោះ ដើម្បីកុំឱ្យពួកគេឈប់គាំទ្រគណបក្សប្រឆាំង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។