ក្រុមជនដៃដល់ព្រួតវាយសកម្មជនបក្សប្រឆាំងនៅភ្នំពេញ អាជ្ញាធរមិនទាន់វែកមុខឃើញនៅឡើយ
2022.08.14
សកម្មជនបក្សភ្លើងទៀននៅរាជធានីភ្នំពេញលោក នល់ ពង្សធិរិទ្ធ ពេលចេញពីមន្ទីរពេទ្យព្យាបាលរបួសក្រោយរងអំពើហិង្សា។
សកម្មជនបក្សភ្លើងទៀននៅរាជធានីភ្នំពេញលោក នល់ ពង្សធិរិទ្ធ ដែលត្រូវជនមិនស្គាល់មុខមួយក្រុមព្រួតវាយប្រហារបណ្តាលឱ្យរងរបួសធ្ងន់កាលពីខែកក្កដាថ្លែងថា លោកមិនទាន់ទទួលបានយុត្តិធម៌នៅឡើយទេ ដោយសារសមត្ថកិច្ចមិនអើពើរកចាប់ជនល្មើស។ មន្រ្តីប៉ូលិសអះអាងថា សមត្ថកិច្ចកំពុងស៊ើបអង្កេតករណីនេះ ប៉ុន្តែលទ្ធផលមិនលឿនតាមចិត្តរបស់ជនរងគ្រោះចង់បានទេ។ ទោះយ៉ាងណា មន្រ្តីសង្គមស៊ីវិលយល់ថាការឆ្លើយតបដដែលៗរបស់សមត្ថកិច្ចគ្រាន់តែជាលេសដោះសា នឹងធ្វើឱ្យពលរដ្ឋអស់ជំនឿចំពោះការអនុវត្តច្បាប់ និងរងការរិះគន់ពីសាធារណៈជនបន្ថែមទៀត។
សកម្មជនគណបក្សភ្លើងទៀនម្នាក់នៅខណ្ឌពោធិ៍សែនជ័យ រាជធានីភ្នំពេញដែលត្រូវជនមិនស្គាល់មុខព្រួតវាយទាំងកណ្តាលថ្ងៃកន្លងមកទាមទាររកយុត្តិធម៌ពីអាជ្ញាធរពាក់ព័ន្ធ។ គាត់យល់ថាភាពយឺតយ៉ាវ និងការរក្សាភាពស្ងប់ស្ងាត់នៃសំណុំរឿងនេះពីមួយថ្ងៃទៅមួយថ្ងៃនឹងធ្វើឱ្យគាត់រងអំពើអយុត្តិធម៌ដូចសកម្មជនយោបាយបក្សប្រឆាំងផ្សេងទៀតដែរ។
ជនរងគ្រោះលោក នល់ ពង្សធារិទ្ធ រៀបរាប់ប្រាប់វិទ្យុអាស៊ីសេរីនៅថ្ងៃទី១៤ ខែសីហាថាសំណុំរឿងរបស់លោកចាប់តាំងពីថ្ងៃកើតហេតុមក សមត្ថកិច្ចមិនបានជូនដំណឹងអំពីលទ្ធផលស៊ើបអង្កេតឱ្យជឿនលឿនណាមួយដើម្បីរកក្រុមជនដៃដល់នោះទេ។ លោកយល់ថាការបណ្តែតបណ្តោយឱ្យជនប្រព្រឹត្តរួចផុតពីសំណាញ់ច្បាប់បែបនេះបានធ្វើឱ្យលោកព្រួយបារម្ភអំពីសុវត្ថិភាពដោយពុំសូវហ៊ានចេញធ្វើសកម្មភាពនយោបាយដូចមុន។ លោកនៅតែចាត់ទុកករណីហិង្សានេះ គឺជារឿងគំរាមកំហែងផ្នែកនយោបាយរហូតអាជ្ញាធរផ្តល់យុត្តិធម៌ពិតប្រាកដ។
ជនរងគ្រោះវ័យ៥០ឆ្នាំរូបនេះឱ្យដឹងថាស្នាមរបួសត្រង់ក្បាលរបស់លោកមិនទាន់ជាសះស្បើយទេ ដោយនៅធ្វើទុក្ខត្រង់មុខរបួសបណ្តោយឱ្យសភាពរាងកាយទន់ខ្សោយដូចជាឧស្សាហ៍ញ័រដៃ និងត្អួតចង្អោរជាដើម។ លោក នល់ ពង្សធិរិទ្ធ ប្រាប់ថាលោកចង់ទៅមន្ទីរជំនាញដើម្បីពិនិត្យរកមើលមូលហេតុដែរ ប៉ុន្តែលោកពុំមានប្រាក់សម្រាប់បង់ថ្លៃពិនិត្យនិងព្យាបាលរបួសទេ ពីព្រោះជីវភាពគ្រួសាររបស់លោកខ្វះខាត។ ទោះយ៉ាងណាលោកនៅតែស្នើយ៉ាងទទូចដល់សមត្ថកិច្ចជួយពន្លឿនស្វែងរកយុត្តិធម៌ដល់រូបលោកឱ្យបានឆាប់៖ «ខ្ញុំមកដល់ថ្ងៃនេះម៉ោងនេះ ខ្ញុំមិនទាន់ហ៊ានដើរចេញទៅខាងក្រៅរហេតរហូតទេ ខ្ញុំនៅតែផ្ទះ ពីព្រោះសមត្ថកិច្ចមិនទាន់រកឃាតកឬជនដៃដល់ដែលប្រព្រឹត្តមកលើខ្ញុំឱ្យឃើញនៅឡើយ ដូច្នេះខ្ញុំមិនអាចដើរចេញធ្វើកិច្ចការងារអ្វីទាក់ទងនឹងគណបក្សភ្លើងទៀនបានទេ គឺខ្ញុំនៅតែផ្ទះដូចមនុស្សជាប់នៅក្នុងពន្ធនាគារអ៊ីចឹងដែរ»។
លោក នល់ ពង្សធិរិទ្ធ គឺជាអនុប្រធានក្រុមការងារគណបក្សភ្លើងទៀន ខណ្ឌពោធិ៍សែនជ័យ រាជធានីភ្នំពេញ។ កាលពីថ្ងៃទី១៧ ខែកក្កដា សកម្មជននយោបាយរូបនេះ ត្រូវបានជនមិនស្គាល់មុខព្រួតវាយជាលើកទី២បណ្តាលឲ្យរងរបួសបែកក្បាលធ្ងន់ធ្ងរ។ រូបភាពវីដេអូកាមេរ៉ាសុវត្ថិភាព បង្ហាញថា ជនល្មើសមានគ្នាជិត ១០នាក់ ជិះម៉ូតូប្រមាណ៤ទៅ៥គ្រឿង ពាក់មួកសុវត្ថិភាពប្រដាប់ដោយដែករលាស់ បានព្រួតគ្នាវាយលោកនៅភូមិព្រៃជីសាក់ សង្កាត់ចោមចៅទី៣ ខណ្ឌពោធិ៍សែនជ័យ ក្នុងពេលលោកធ្វើដំណើរទៅចូលរួមកិច្ចប្រជុំគណបក្សខណ្ឌ។ វីដេអូនោះ បង្ហាញថា ក្រុមជនល្មើសមួយចំនួនពាក់ឯកសណ្ឋានឈុតខ្មៅដូចគ្នា ហើយហាក់ដូចជាក្រុមដែលមានការបណ្តុះបណ្តាលជំនាញនិងផែនការច្បាស់លាស់ក្នុងការធ្វើសកម្មភាពវាយប្រហារដោយមានអ្នកឌុប អ្នកចាំវាយ និងមានអ្នកចាំបញ្ចប់ឬបិទជាដើម។
ឆ្លើយតបរឿងនេះ អ្នកនាំពាក្យស្នងការដ្ឋាននគរបាលរាជធានីភ្នំពេញ លោក សាន សុខសីហា ប្រាប់វិទ្យុអាស៊ីសេរីថាប៉ូលិសកំពុងស្រាវជ្រាវករណីហិង្សានេះ ដោយខាងលោកត្រូវការពេលវេលាបន្ថែមទៀត។ លោកបន្តថាសមត្ថកិច្ចមិនអាចស្រាវជ្រាវលឿនតាមចិត្តរបស់ជនរងគ្រោះចង់បានឡើយ។ លោក សាន សុខសីហា ថាបើសិសមត្ថកិច្ចមិនទាន់វាយតម្លៃលទ្ធផលនៃការស្រាវជ្រាវចុងក្រោយ ដូច្នេះមហាជនមិនត្រូវចាត់ទុកករណីហិង្សាកន្លងមកជាប់ទាក់ទងរឿងនយោបាយនោះទេ៖ «ដូចជាមិនមានការយឺតយ៉ាវទេ ដោយសារភ្លាមៗយើងបានទទួលពាក្យបណ្តឹងធ្វើការស្រាវជ្រាយ ប៉ុន្តែគ្រាន់តែថាការស្រាវស្រាវត្រូវការរយៈពេលប៉ុណ្ណា គឺអាស្រ័យលើករណីជាក់ស្តែង ពីព្រោះករណីខ្លះក៏លឿនករណីខ្លះក៏ត្រូវការពេលវេលាដែរ ដោយមិនចេះតែគ្រប់ករណី ឬមួយរយករណីបានទាំងអស់ទេ»។
ទោះយ៉ាងណាជនរងគ្រោះដែលភាគច្រើនជាសកម្មជននយោបាយ អះអាងថាជាច្រើនឆ្នាំមកនេះ គ្មានករណីណាមួយដែលត្រូវបានអាជ្ញាធរបង្ហាញលទ្ធផលស៊ើបអង្កេត ឬភស្តុតាង និងចាប់ជនដៃដល់យកមកដាក់ទោសទណ្ឌតាមច្បាប់ ដើម្បីផ្តល់ទំនុកចិត្ត ទប់ស្កាត់អំហិង្សាផ្នែកនយោបាយទេ។
ជុំវិញរឿងនេះ ប្រធានសមាគមការពារសិទ្ធិមនុស្សអាដហុក (Adhoc) លោក នី សុខា មានប្រសាសន៍ថាករណីហិង្សាលើលោក នល់ ពង្សធិរិទ្ធ ដែលមានវីដេអូឃ្លីបបង្ហាញពីសកម្មភាពជនប្រព្រឹត្តហិង្សាកន្លងមក អាជ្ញាធរមិនគួរយឺតយ៉ាវវែកមុខ និងនាំខ្លួនជនដៃដល់មកផ្តន្ទាទោសច្បាប់បែបនេះទេ។ លោកសង្កេតឃើញថាអំពើហិង្សាលើសកម្មបក្សប្រឆាំងដែលមាននិន្នាការផ្ទុយពីរដ្ឋាភិបាលនោះ អាជ្ញាធរហាក់អសមត្ថភាពក្នុងការស្វែងរកយុត្តិធម៌ជូនពួកគេ ហើយបញ្ហានេះសមត្ថកិច្ចជៀសមិនផុតពីការរិះគន់ពីសំណាក់មាហាជនដែលសង្ស័យទាក់ទងរឿងនយោបាយឡើយ។ ដូច្នេះលោកយល់ថាអាជ្ញាធរគួរតែបង្ហាញលទ្ធផលស៊ើបអង្កេតពិតប្រកដ ដើម្បីរកយុត្តិធម៌ជូនជនរងគ្រោះឱ្យបានឆាប់ និងបំបាត់វប្បធម៌និទណ្ឌភាពនៅកម្ពុជា៖ «បើសិនករណីវាយមួយរកមិនឃើញ ពីររកមិនឃើញ បីរកមិនឃើញហើយសុទ្ធតែជាអ្នកនយោបាយ និងអ្នកបញ្ចេញមតិសកម្មក្នុងសង្គមទៀតហ្នឹង ចង់មិនចង់ធ្វើឱ្យមានការរិះគន់ពីមតិជាតិនិងអន្តរជាតិថាវាប៉ះពាល់ដល់បរិយាកាសនយោបាយមុនពេលបោះឆ្នោតផងដែរ បើសិនយើងនៅតែបណ្តែតបណ្តោយអំពីបញ្ហាហ្នឹង»។
គិតមកដល់ពេលនេះ មានសកម្មជនសង្គមនិងគណបក្សនយោបាយប្រមាណ ៤០នាក់ហើយ ដែលត្រូវជនមិនស្គាល់មុខបង្កហិង្សាបណ្តាលឲ្យរបួសធ្ងន់ធ្ងរ ហើយជនរងគ្រោះខ្លះបានស្លាប់ និងធ្លាក់ខ្លួនពិការអស់មួយជីវិត។ ករណីទាំងនោះច្រើនមានលក្ខណៈប្រហាក់ប្រហែលគ្នា គឺជនដៃដល់ជិះម៉ូតូពាក់មួកសុវត្ថិភាពព្រួតវាយ ឬលួចវាយជនរងគ្រោះពីក្រោយខ្នង ឬដេញធាក់ម៉ូតូផ្តួល ឬគប់ដុំថ្មចូលក្នុងផ្ទះ ហើយភាគច្រើនបំផុតអាជ្ញាធរមិនបានចាប់ខ្លួនជនដៃដល់យកមកផ្ដន្ទាទោសនោះទេ។ ជនរងគ្រោះខ្លះមិនត្រឹមតែមិនទទួលបានយុត្តិធម៌នោះទេ តែថែមទាំងត្រូវបានជនល្មើសលួចវាយប្រហារផ្ទួនៗគ្នាពីរលើក ហើយអ្នកខ្លះទៀត ថែមទាំងត្រូវបានអាជ្ញាធររបស់លោក ហ៊ុន សែន ចាប់ឃុំខ្លួនដាក់ក្នុងពន្ធនាគារទៀតផង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
រឿងដែលគេអានច្រើនបំផុត
RFA
- ក្រុមអ្នកវិទ្យាសាស្ត្រ រកឃើញត្រីកម្រដែលជិតផុតពូជនៅទន្លេមេគង្គ
- អ្នកឃ្លាំមើលថា ដំណើរទស្សនកិច្ចរបស់លោក ហ៊ុន សែន ទៅគុយបាជាការពង្រឹងអំណាចផ្តាច់ការច្រើនជាងផលប្រយោជន៍ជាតិ
- សកម្មជនបក្សប្រឆាំង និងពលករនៅថៃនាំគ្នាលើកបដាប្រឆាំងនឹងរបបផ្ដាច់ការលោក ហ៊ុន សែន
- តុលាការចោទសកម្មជនបក្សសង្គ្រោះជាតិ ដែលចូលរួមវគ្គបណ្ដុះបណ្ដាលនៅប្រទេសឥណ្ឌូនេស៊ីថា ជាគម្រោងធ្វើបដិវត្តពណ៌
- យុវជន និងអ្នកវិភាគរិះគន់សៀវភៅ "កូនប្រុសច្បងនាយករដ្ឋមន្ត្រី ដំណើរឆ្ពោះទៅបន្តវេន"
រឿងដែលគេអានច្រើនបំផុត
នយោបាយ
- ជំទប់ទី២បក្សភ្លើងទៀនខេត្តបាត់ដំបងចោទមេឃុំបក្សកាន់អំណាចថា រើសអើងនិន្នាការនយោបាយ
- សកម្មជនបក្សប្រឆាំងដែលកំពុងភៀសខ្លួននៅថៃសុខចិត្តរស់នៅលំបាកដើម្បីទាមទារឲ្យមានប្រជាធិបតេយ្យនៅកម្ពុជា
- ពលរដ្ឋខ្មែរនាំគ្នាធ្វើបាតុកម្ម ប្រឆាំងវត្តមានលោក ហ៊ុន សែន នៅបុរីញ៉ូវយ៉កសហរដ្ឋអាមេរិក
- បក្សកាន់អំណាច និង គ.ជ.ប រក្សាជំហរបន្តប្ដឹងលោក សុន ឆ័យ អនុប្រធានគណបក្សភ្លើងទៀន
- អ្នកវិភាគថា លោក ហ៊ុន សែន ប្រកាសថាកម្ពុជាមានសន្តិភាព ជាការបំពានលើការជួយជ្រោមជ្រែងរបស់អ.ស.ប