ខ្មែរនៅអូស្ត្រាលីចោទបក្សប្រជាជនធ្វើឱ្យមានការបែកបាក់ខ្មែរនៅក្រៅប្រទេស
2021.07.18
គណបក្សប្រជជនកម្ពុជាបានចាត់តាំងមន្ត្រីជាន់ខ្ពស់របស់ខ្លួនស្ទើរគ្រប់ផ្នែកឱ្យទៅពង្រឹងបក្សនៅប្រទេសអូស្ត្រាលី និងណូវ៉ែលសឺឡង់ ក្នុងតំបន់មានខ្មែររស់នៅច្រើនចំនួន៩តំបន់ផ្សេងៗគ្នា។ យុទ្ធសាស្ត្រានេះដើម្បីទាក់ទាញទិញទឹកចិត្តខ្មែររស់នៅប្រទេសក្រៅឱ្យងាកមកគាំទ្រគណបក្សប្រជាជនកម្ពុជា ជាថ្នូរនឹងការផ្ដល់ភាពងាយស្រួលមករកស៊ីនៅកម្ពុជា ផ្ដល់លុយកាក់ និងការទទួលបានផលប្រយោជន៍ជាច្រើនទៀត។ នេះជាការបញ្ជាក់របស់សហគមន៍ខ្មែរនៅអូស្ត្រាលី។
អតីតសមជិកសភាពអូស្ត្រាលីដើមកំណើតខ្មែរលោក ហុង លីម ឱ្យអាស៊ីសេរីដឹងថា ក្រុមនេះធ្វើការងារទាំង៩តំបន់នេះដោយបានសហការគ្នាជាមួយស្ថានទូតខ្មែរប្រចាំនៅប្រទេសទាំងពីរនេះដើម្បីដើរទិញទឹកចិត្តខ្មែរ គម្រាមកំហែងក្រុមនិស្សិតដែលទទួលបានអាហារូបករណ៍មិនឱ្យចូលរួមសកម្មភាពជាមួយសហគមន៍ខ្មែរនៅអូស្ត្រាលី និងឱ្យខ្មែរនៅទីនោះចូលរួមពិធីដឹងគុណថ្ងៃ ៧ មករា ជាដើម។ លោកឱ្យដឹងទៀតថា ក្រុមនេះប្រើប្រាស់លុយរបស់ខ្លួនដើម្បីបញ្ជ្រាបមនុស្សខ្លួនចូលក្នុងគណៈកម្មការវត្តរហូតធ្វើឱ្យមានជម្លោះក្នុងវត្តអារាមថែមទៀតផង៖ « ពួកហ្នឹងអ្នកខ្លះចង់ក្ដាប់ចង់ត្រួតត្រាវត្តអីទៅដូចជាមានវត្តពីរបីដែលយើងឃើញថា មានការគៀបសង្កត់ខ្លាំងពីពួកហ្នឹងគេអាងលុយគេគេចង់ផ្លាសចង់ប្ដូរអីចឹងទៅជាក្រុមដែលមកបំបែកបំបាក់ខ្មែរ»។
ស្រដៀងគ្នានេះដែរ សកម្មជនគណបក្សសង្គ្រោះជាតិលោក ខៀវ តារា រស់នៅទីក្រុងអាដដេលេត (Adelaide) រដ្ឋអូស្ត្រាលីខាងត្បូង ឱ្យដឹងដែរថា ក្រុមពង្រឹកបក្សកាន់អំណាចបានធ្វើឱ្យពលរដ្ឋខ្មែររស់នៅតំបន់លោកមួយចំនួនរើសអើងនយោបាយរហូតលែងមើលមុខគ្នាព្រោះតែខុសបក្សគ្នា។ លោកព្រួយបារម្ភថា ធ្វើការមនោគមន៍វិជ្ជារបស់គណបក្សប្រជាជនកម្ពុជានឹងធ្វើឱ្យខ្មែរនៅទីនេះបែកបាក់គ្នានិងមានការលាបពណ៌គ្នា។ ទោះយ៉ាងណាលោកសង្កេតឃើញថា នៅតំបន់លោករស់នៅអ្នកដែលចូលរួមជាមួយបក្សកាន់អំណាចមានតិចតួច បើធៀបទៅនឹងពលរដ្ឋដែលស្រលាញ់ប្រជាធិបតេយ្យ ឬគាំទ្រគណបក្សប្រឆាំង៖ « មានពាក់ព័ន្ធផលប្រយោជន៍នៅប្រទេសកម្ពុជា ដូច្នេះមិត្តភ័ក្ត្រដែលស្គាល់គ្នាឈប់និយាយគ្នាមើលមុខគ្នាដូចថាមិនសូវចំនេះការរើសអើងក្នុងផ្នែកនយោបាយ ប៉ុន្តែខ្ញុំមិនធ្វើអញ្ចឹងទេ ខ្ញុំនៅតែស្គាល់គាត់នៅតែស្វាគមន៍ធម្មតាគ្រាន់តែសួរសំនួរខ្លះៗថា យើងម៉េចធ្លាប់ស្គាល់មិនសូវនិយាយគ្នាអញ្ចេះមួយអញ្ចេះពីរណា»។
ខ្មែរនៅអូស្ត្រាលីឱ្យដឹងថា មន្ត្រីជាន់ខ្ពស់ដែលគ្រប់គ្រងប្រធានតំបន់ទាំង៩នោះ គឺរដ្ឋលេខាធិការក្រសួងយុត្តិធម៌លោក គឹម សន្តិភាព ដែលជាមនុស្សជំនិតរបស់លោក ហ៊ុន ម៉ាណែត កូនប្រុសច្បងរបស់លោក ហ៊ុន សែន។
ឆ្លើយតបនឹងការអះអាងរបស់ខ្មែរអូស្រ្តាលី និងមន្រ្តីបក្សប្រឆាំងនេះ អ្នកនាំពាក្យគណបក្សប្រជាជនកម្ពុជាលោក សុខ ឥសាន និយាយថា លោក ហ៊ុន ម៉ាណែត ទៅពង្រឹងបក្សនៅអូស្ត្រាលីមិនមែនទៅបំបែកបំបាក់ខ្មែរនៅទីនោះទេ។ លោកអួតអាងថា ពេលលោក ហ៊ុន ម៉ាណែត និងក្រុមការងារលោក ទៅពង្រឹកបក្សនៅទីនោះម្ដងៗអ្នកទាំងនោះចេញលុយខ្លួនឯងទាំងអស់មិនចំណាយបក្សនោះទេ។ ទោះយ៉ាងណាលោកមិនដឹងពីចំនួនលុយដែលត្រូវចំណាយនោះទេ ដោយលោកថា មានតែលោក ហ៊ុន ម៉ាណែត ទេទើបដឹង៖ «ត្រង់អ្នកណាបែកបាក់រឿងខ្លួនឯងកុំបន្ទោសគេអ្នកដទៃពីព្រោះភារកិច្ចគាត់ទៅពង្រឹងបក្សនៅមូលដ្ឋាននៅអូស្ត្រាលីមានទៅបំបែកបំបាកឯណា»។
ទាក់ទងការចោទប្រកាន់នេះ អាស៊ីសេរីបានព្យាយាមសុំការបកស្រាយពីលោក គឹម សន្ដិភាព ប៉ុន្តែទូរស័ព្ទចូលគ្មានអ្នកទទួល។ ទោះបែបនេះក្ដី ទំព័រហ្វេសប៊ុក របស់យុវជនគណបក្សប្រជាជនកម្ពុជាថ្នាក់កណ្តាលឱ្យដឹងថា លោក គឹម សន្តិភាព ជាសមាជិកគណៈកម្មាធិការកណ្តាលគណបក្សប្រជាជនកម្ពុជា និងជាប្រធានក្រុមការងាររៀបចំអង្គការចាត់តាំងយុវជនគណបក្សប្រជាជនកម្ពុជាប្រចាំប្រទេសអូស្រ្តាលី និងណូវ៉ែលហ្សេឡង់។ ប្រភពដដែលឱ្យដឹងទៀតថា កាលពីថ្ងៃទី១១ ខែកក្កដា លោក គឹម សន្តិភាព បានដឹកនាំកិច្ចប្រជុំពិភាក្សាការងារក្នុងកិច្ចប្រជុំប្រចាំខែកក្កដា ជាមួយក្រុមការងារតំបន់៧ និងគណៈកម្មាធិការសាខាបក្ស និងក្រុមការងារយុវជនគណបក្សប្រចាំនៅទីក្រុងដាវីន (Darwin) ប្រទេសអូស្ត្រាលីតាមរយៈវីដេអូ Zoom។ ទោះយ៉ាងណាប្រភពដដែលនេះមិនបានបង្ហាញលម្អិតពីខ្លឹមសារនៃកិច្ចប្រជុំនោះឡើយ។
ជុំវិញរឿងបក្សកាន់អំណាចកំពុងបង្កើតឥទ្ធិពលនៅអូស្រ្តាលី និង នូវ៉ែលហ្សេឡង់នេះ សហគមន៍ខ្មែរនៅអូស្ត្រាលីកំពុងសិក្សាផ្លូវច្បាប់ដើម្បីស្នើទៅអាជ្ញាធរអូស្ត្រាលីពិនិត្យមើលទង្វើរបស់គណបក្សប្រជាជនកម្ពុជា។ ពួកគេថា បារម្ភថា សកម្មភាពនេះជាទង្វើរដ្ឋរបទេសប្រើសិទ្ធិអំណាចរបស់ខ្លួនមកគៀបសង្កត់សិទ្ធិសេរីភាពពលរដ្ឋអូស្ត្រាលី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។