ខ្មែរនៅជប៉ុន និងកូរ៉េខាងត្បូងធ្វើបាតុកម្មប្រឆាំងនឹងការឡើងកាន់អំណាចរបស់លោក ហ៊ុន ម៉ាណែត
2023.08.19
គណៈរដ្ឋមន្ត្រីថ្មីដែលដឹកនាំដោយលោក ហ៊ុន ម៉ាណែត នៅអាណត្តិទី៧ ដែលបន្តត្រកូលពីឪពុកគឺលោក ហ៊ុន សែន។
រូប៖ តេឡេក្រាមលោក ហ៊ុន សែន
ក្រុមពលរដ្ឋខ្មែរភាគច្រើនជាយុវជនពេញកម្លាំងរស់នៅ និងធ្វើការនៅប្រទេសកូរ៉េខាងត្បូង និងជប៉ុនរួមគ្នាធ្វើបាតុកម្មប្រឆាំងនឹងអ្វីដែលពួកគេអះអាងថា ជាការផ្ទេរអំណាចតពូជរបស់ក្រុមគ្រួសារ លោក ហ៊ុន សែន ។ ពួកគាត់ក៏នឹងស្នើដល់បណ្ដាប្រទេសជាហត្ថលេខីនៃកិច្ចព្រមព្រៀងសន្តិភាពទីក្រុងប៉ារីសជំរុញឱ្យកម្ពុជាងាកមកស្ដារលទ្ធិប្រជាធិបតេយ្យឡើងវិញ។
ពលរដ្ឋខ្មែររស់នៅប្រទេសកូរ៉េខាងត្បូង លោក កិត្យា វិបុល ប្រាប់វិទ្យុអាស៊ីសេរី នៅថ្ងៃទៅ១៩ សីហា ថា ក្រុមបាតុករជាង ៥០០នាក់នឹងមកចូលរួមបាតុកម្មនៅថ្ងៃអាទិត្យនេះ ពីព្រោះពួកគាត់មើលឃើញពីភាពអយុត្តិធម៌ និងសម្រែកនៃការឈឺចាប់របស់ពលរដ្ឋខ្មែរនៅក្នុងស្រុកកំពុងរងការធ្វើបាបពីរដ្ឋាភិបាល លោក ហ៊ុន សែន។ លោកបន្តថា លោក ហ៊ុន ម៉ាណែត គ្មានសមត្ថភាពគ្រប់គ្រាន់ក្នុងការឡើងកាន់តំណែងជានាយករដ្ឋមន្ត្រីនោះទេ ពីព្រោះលោក ហ៊ុន ម៉ាណែត មិនបានបង្ហាញពីឆន្ទៈពិតប្រាកដក្នុងការជួយដោះស្រាយបញ្ហាពលរដ្ឋរងគ្រោះដីធ្លី និងបញ្ហាសង្គមជាតិឡើយ។
លោក កិត្យា វិបុល៖ «ការដោះស្រាយវិបត្តិប្រទេសជាតិ ក៏ដូចជាជូនប្រជាពលរដ្ឋកំពុងជួបបញ្ហាដូចជាបញ្ហារឿងដីធ្លី បញ្ហាកម្មករណាហ្គាវើលដ៍ អ៊ីចឹងរឿងជាច្រើននៅស្រុកខ្មែរដែលមិនបានបង្ហាញសាធារណៈទៅកាន់ប្រជាពលរដ្ឋម្ចាស់ឆ្នោត ហើយការរបស់គាត់នេះទៀតសោត ឪពុករបស់គាត់ទេដែលជាផ្ដល់ឱ្យ គឺគាត់អត់មានសមត្ថភាព គាត់គឺជាបុគ្គលមួយមិនចេះអៀនខ្មាស គឺមើលឃើញថា សញ្ញាប័ត្រគឺយើងទទួលស្គាល់ជាសញ្ញាប័ត្របណ្ឌិតមែន ប៉ុន្តែសមត្ថភាពពិតគឺគាត់អត់មានទាល់សោះ»។
បាតុកម្មប្រឆាំង លោក ហ៊ុន ម៉ាណែត នេះក្រុមបាតុករនឹងជួបជុំគ្នានៅទីលានជុងកាក់ ក្នុងទីក្រុងសេអ៊ូល (Seoul) ដើម្បីសម្ដែងមតិអំពីការមិនគាំទ្រលោក ហ៊ុន ម៉ាណែត ជានាយករដ្ឋមន្ត្រី និងលើកឡើងពីអំពើអយុត្តិធម៌ក្នុងសង្គម ការរឹតត្បិតសិទ្ធិសេរីភាព ការធ្វើទុក្ខបុកម្នេញលើពលរដ្ឋខ្មែរស្លូតត្រង់ ការធ្វើបាបសកម្មជននយោបាយ និងសកម្មជនសង្គម ដែលពួកគាត់គ្រាន់តែប្រើប្រាស់សិទ្ធិសេរីភាពរបស់ខ្លួនទាមទារយុត្តិធម៌សង្គម ប៉ុន្តែបែរជារបបក្រុងភ្នំពេញប្រើប្រព័ន្ធតុលាការចាប់ពួកគាត់ដាក់ពន្ធនាគារទៅវិញ។ ជាងនេះទៅទៀត ក្រុមបាតុករនឹងដង្ហែញត្តិពីទីលានជុងកាក់ ឆ្ពោះទៅក្រសួងការបរទេសកូរ៉េ និងស្ថានទូតជាម្ចាស់ហត្ថលេខីនៃកិច្ចព្រមព្រៀងសន្តិភាពទីក្រុងប៉ារីស ចំនួន ១៩ប្រទេសដើម្បីស្នើសុំជួយអន្តរាគមន៍ជំរុញឱ្យកម្ពុជាបើកលំហសិទ្ធិសេរីភាព និងបើកលំហឱ្យគ្រប់គណបក្សនយោបាយបានចូលរួមគិតគូរពីការដឹកនាំរបស់រដ្ឋ។
ក្រៅពីពលរដ្ឋខ្មែរនៅប្រទេសកូរ៉េខាងត្បូងធ្វើបាតុកម្ម ក្រុមយុវជនខ្មែរនៅប្រទេសជប៉ុន ប្រមាណ២០០នាក់ ក៏គ្រោងប្រមូលផ្ដុំគ្នាធ្វើបាតុកម្មនៅថ្ងៃអាទិត្យខាងមុខនេះ ក្នុងបរិវេណសួន អូអិណុ (Ueno) ទីក្រុងតូក្យូ (Tokyo) ប្រឆាំងដាច់អហង្ការចំពោះការផ្ទេរអំណាចដឹកនាំប្រទេសតពូជ ដែលប្រាស់ចាកពីគោលការណ៍រដ្ឋធម្មនុញ្ញ។
ពលរដ្ឋខ្មែរនៅជប៉ុន លោកស្រី ណិប បូរ៉ា ថ្លែងថា លោកស្រីគ្មានជំនឿលើការដឹកនាំរបស់ លោក ហ៊ុន ម៉ាណែត ដែលអាចនឹងមានប្រជាធិបតេយ្យពលរដ្ឋរស់នៅមានជីវភាពសមរម្យនោះទេ ។ លោកស្រីបន្តថា អំពើអយុត្តិធម៌នៅក្នុងសង្គមកាន់តែបន្តកើនឡើង ហើយនេះជាមូលហេតុធ្វើឱ្យពលរដ្ឋខ្មែរនៅក្រៅប្រទេសប្រមូលផ្ដុំគ្នា ធ្វើបាតុកម្មប្រឆាំងនឹងរបបផ្ដាច់ការ លោក ហ៊ុន សែន។
លោកស្រី ណិប បូរ៉ា៖ «ជាក់ស្ដែងយើងមិនអាចឈរអោបដៃមើលទិដ្ឋភាពមួយដែលទៅរកការរំលោភសិទ្ធិមនុស្សបំផ្លាញលទ្ធិប្រជាធិបតេយ្យបំបិទសិទ្ធិសេរីភាពប្រជាពលរដ្ឋ ហើយក្នុងនាមដែលយើងមករស់នៅក្នុងប្រទេសសេរីដែលមានសិទ្ធិសេរីភាពក្នុងការបញ្ចេញមតិដូចជាយើងស្នើសុំទៅរដ្ឋាភិបាលយើងឃើញថាកម្ពុជាអត់មានសិទ្ធិធ្វើបែបហ្នឹងទេហើយអ្វីដែលយើងធ្វើគឺយើងតែងតែបញ្ចេញទៅក្រៅដើម្បីជំនួសអ្នកនៅក្នុងស្រុកដែលគាត់មិនអាចនិយាយបាន»។
ដោយឡែកសហគមន៍ខ្មែរនៅសហរដ្ឋអាមេរិកក៏នឹងធ្វើបាតុកម្មនៅថ្ងៃអាទិត្យនេះដូចគ្នាដែលក្នុងក្រុងឡូវែល (Lowell) រដ្ឋម៉ាស្សាឈូស៊ែត ដើម្បីបង្ហាញពីសាមគ្គីភាពក្នុងនាមជាពលរដ្ឋស្រឡាញ់លទ្ធិប្រជាធិបតេយ្យ និងប្រឆាំងនឹងអំពើអយុត្តិធម៌នៅក្នុងសង្គម។
វិទ្យុអាស៊ីសេរីមិនអាចទាក់ទងអ្នកនាំពាក្យគណបក្សប្រជាជនកម្ពុជា លោក សុខ ឥសាន ដើម្បីសុំអត្ថាធិប្បាយជុំវិញបញ្ហានេះបានទេនៅថ្ងៃទី១៩ សីហា។
ទាក់ទិនបញ្ហានេះនាយកទទួលបន្ទុកកិច្ចការទូទៅនៃអង្គការឃ្លាំមើលសិទ្ធិមនុស្សលីកាដូ (LICADHO) លោក អំ សំអាត មានប្រសាសន៍ថា ការធ្វើបាតុកម្មដោយអហិង្សារបស់ក្រុមពលរដ្ឋគឺជាសិទ្ធិសេរីភាព ដូច្នេះរដ្ឋាភិបាលគួរតែទទួលយកមតិរិះគន់របស់ពលរដ្ឋដើម្បីកែលំអចំណុចខ្វះខាត។ លោកបន្តថា រដ្ឋាភិបាលគួរតែបើកលំហសិទ្ធិសេរីភាពឡើងវិញ ដើម្បីបញ្ចៀសការរិះគន់អំពីបញ្ហារំលោភសិទ្ធិមនុស្ស និងនយោបាយ។
លោក អំ សំអាត៖ «រាល់អ្នកនយោបាយទាំងអស់ដែលតម្កល់ឧត្ដមប្រយោជន៍ជាតិ ឧត្ដមប្រយោជន៍ប្រជាពលរដ្ឋជាធំហើយយើងគោរពទៅតាមប្រទេសជាហត្ថលេខី បានន័យថា កម្ពុជារបស់យើងបានទទួលសច្ចាប័ន ផ្ដល់ហត្ថលេខា ចុះហត្ថលេខាទៅលើបទដ្ឋានអន្តរជាតិជាច្រើន ពាក់ព័ន្ធបញ្ហារឿងសិទ្ធិមនុស្សហើយមានចែងនៅក្នុងរដ្ឋធម្មនុញ្ញអ៊ីចឹងកម្ពុជាយើងជារដ្ឋដែលមានកាតព្វកិច្ចត្រូវអនុវត្ត»។
រដ្ឋសភានឹងបើកកិច្ចប្រជុំលើកដំបូងនៅថ្ងៃទី២១ និង២២ ខែសីហា ខាងមុខនេះ ហើយលោក ហ៊ុន ម៉ាណែត នឹងក្លាយជានាយករដ្ឋមន្ត្រីតាមការចង់បានរបស់លោក ហ៊ុន សែន ជាឪពុករបស់លោក។
កាលពីថ្ងៃទី២៣ កក្កដា កន្លងទៅក្រុមយុវជនខ្មែរនៅក្រៅប្រទេសបានធ្វើបាតុកម្មប្រឆាំងនឹងការបោះឆ្នោតដែរ ដោយពួកគាត់ចាត់ទុកថា គឺជាការបោះឆ្នោតបង្គ្រប់កិច្ច និងធ្វើឱ្យប្រជាធិបតេយ្យនៅកម្ពុជាដើរថយក្រោយ ពីព្រោះរដ្ឋាភិបាល លោក ហ៊ុន សែន បានផាត់ចោលគណបក្សភ្លើងទៀនចេញពីការបោះឆ្នោត៕
ចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- រដ្ឋាភិបាលកាត់ដីគម្របព្រៃឈើនៅខេត្តព្រះសីហនុជិត៣០ហិកតារឲ្យប្រពន្ធលោក នេត សាវឿន
- អាជីវករនៅភ្នំពេញខ្លះត្អូញត្អែរលក់ដូរមិនសូវដាច់ក្នុងថ្ងៃបុណ្យអុំទូក
- សម្ព័ន្ធភាពចាក់ស្រេះរវាងគ្រួសារអ្នកកាន់អំណាច និងគ្រួសារអ្នកជំនួញ «អាចបង្កផលប៉ះពាល់ប្រយោជន៍ជាតិធ្ងន់ធ្ងរ»
- គ្រួសារថា អាជ្ញាធរបង្ខំឱ្យលោក កង សារ៉ន សុំទោសជាថ្នូរទទួលបានសេរីភាពឡើងវិញ
- លោក ហ៊ុន សែន កាត់ដីឧទ្យានជាតិគិរីរម្យជាង ២រយហិកតារទៀតឱ្យក្រុមហ៊ុនស្និទ្ធនឹងលោក
អត្ថបទពេញនិយម
នយោបាយ
- ពលរដ្ឋនៅសង្កាត់ព្រែកជ្រៃ ព្រំដែនកម្ពុជា-វៀតណាមព្រួយបារម្ភពីការបាត់បង់ទឹកដីទៅវៀតណាម
- អាជ្ញាធរខេត្តបន្ទាយមានជ័យចាប់ខ្លួនពលរដ្ឋ ៤នាក់ រួមទាំងប្រពន្ធ និងកូនរបស់លោក កង សារ៉ន
- ក្រុមស្ត្រីភៀសខ្លួនតស៊ូមតិតាមបណ្ដាញសង្គម
- សកម្មជនភៀសខ្លួននៅម៉ាឡេស៊ី ថា ប៉ូលិសប៉ុនប៉ងចាប់ខ្លួនពួកគាត់ តាមសំណើរបស់អាជ្ញាធរខ្មែរ
- តើការដឹកនាំរបស់នាយករដ្ឋមន្ត្រីកម្ពុជា និងថៃ ដូចឬខុសដូចម្ដេចខ្លះ ក្នុងរយៈពេល៣ខែនេះ?