ពលរដ្ឋ​ខ្មែរ​នៅ​កូរ៉េ និង​ជប៉ុន ត្រៀម​បាតុកម្ម​ទ្រង់ទ្រាយ​ធំ​ប្រឆាំង​គម្រោង CLV

ប្រជាពលរដ្ឋខ្មែរ​នៅ​ប្រទេស​កូរ៉េខាងត្បូង និង​ជប៉ុន​រាប់ពាន់នាក់​នឹង​ប្រមូលផ្តុំ​គ្នា​ធ្វើ​បាតុកម្ម​ទ្រុងទ្រាយ​ធំ ទាមទារ​រដ្ឋាភិបាល​ក្រុងភ្នំពេញ​ដកខ្លួន​ចេញ​ពី​តំបន់ត្រីកោណ​អភិវឌ្ឍន៍​ជាមួយ​រៀតណាម​និង​ឡាវ។ ការលើកឡើង​នេះ​បន្ទាប់​ពី​ពួកគាត់​បារម្ភ​ថា​តំបន់​អភិវឌ្ឍន៍​ត្រីកោណ​ពិសេស​(CLV)​នេះ​អាច​នាំឲ្យ​កម្ពុជា​ជួប​ហានិភ័យ​បាត់បង់​ធនធាន​ធម្មជាតិ និង​ទឹកដី​កម្ពុជា​ទៅ​ឲ្យ​ប្រទេស​វៀតណាម​នៅ​ថ្ងៃ​ខាងមុខ។

ប្រជាពលរដ្ឋ ជាពិសេស​យុវជនខ្មែរ​នៅ​ប្រទេស​កូរ៉េខាងត្បូង និង​ជប៉ុន​ត្រៀមចេញ​ធ្វើបាតុកម្ម​ព្រមៗ​គ្នា​នៅ​ថ្ងៃ​ទី១១ ខែ​សីហា ដើម្បី​ទាមទារ​ឱ្យ​រដ្ឋាភិបាល​លោក ហ៊ុន ម៉ាណែត បញ្ឈប់​ដាក់​ខេត្ត​ខ្មែរ​ចំនួន​៤នៅ​ក្នុង​កិច្ចសហប្រតិបត្តិការ​តំបន់​អភិវឌ្ឍន៍​ត្រីកោណ​ពិសេស​(CLV) ជាមួយ​ប្រទេស​វៀតណាម(Vietnam) និង​ឡាវ(LAO)។

អ្នកនាំពាក្យ​គណៈកម្មការរៀបចំ​បាតុកម្ម​ប្រចាំ​ប្រទេស​កូរ៉េខាងត្បូង​លោក មាស វិសាល ប្រាប់​វិទ្យុ​អាស៊ីសេរី​នៅ​ថ្ងៃ​ទី១០ ខែ​សីហា​ថា​ ពលរដ្ឋខ្មែរ​រស់​នៅ​និង​ធ្វើការ​ក្នុង​ប្រទេស​កូរ៉េ​រាប់​ពាន់នាក់ បាន​ត្រៀម​ខ្លួន​រួចហើយ​ក្នុង​ការចូលរួម​​មហាបាតុកម្ម​សម្តែងមតិ និង​ដើរ​ហែក្បូន ដោយ​សន្តិវិធី​នៅ​ទីលាន​ប្រជាធិបតេយ្យ​​ជុងកាក់​(Junghak)  ក្នុង​ក្រុង​សេអ៊ូល​(Seoul)។ លោក មាស វិសាល កត់សម្គល់​ថា ពលរដ្ឋខ្មែរ​នៅ​តាម​តំបន់​នីមួយៗ​មានសកម្មភាព​ផុសផុស​ខុស​ពី​បាតុកម្ម​លើក​មុនៗ ដោយ​ពួកគាត់​បាន​ស្ម័គ្រ​ចិត្ត​លះបង់​ពេលវេលា ចំណាយ​ធនធាន​ផ្ទាល់ខ្លួន ហើយ​អ្នកខ្លះ​ទៀត​វេច​កញ្ចប់​បាយ​ធ្វើដំណើរ​តាម​ឡានក្រុង និងមធ្យោបាយ​ផ្សេងទៀត​ដោយសារ​បុព្វហេតុ​ចង់​ការពារ​ទឹក​ដី​ឱ្យ​នៅ​គង់វង្ស។

លោក មាស វិសាល៖ «សម្រាប់​ការត្រៀម​ខ្លួន​បាតុកម្ម​នៅ​ថ្ងៃស្អែក​នេះ គឺ​យើង​បាន​ត្រៀម​ខ្លួន​គ្រប់គ្រាន់​សម្រាប់​ឱ្យ​បងប្អូន​ចូលរួម​នៅ​ថ្ងៃស្អែក​នេះ ឱ្យ​មាន​ភាព​កក់ក្តៅ ​ដោយ​ធ្វើ​យ៉ាងណា​ឱ្យ​ព្រឹត្តការណ៍ កក្រើក​មិន​ថា​នៅ​ក្នុង​ប្រទេស​កូរ៉េ​ទេ គឺកក្រើក​នៅ​ទូទាំង​ពិភពលោក​​តែម្តង​ឱ្យ​ងាក​មក​មើល​ព្រឹត្តការណ៍​នៅ​ប្រទេស​កូរ៉េនៅ​ថ្ងៃស្អែក​នេះ ជាពិសេស​របប​នៅ​កម្ពុជា​សព្វថ្ងៃ​ឱ្យ​ចាប់​អារម្មណ៍ និង​យក​ចិត្តទុកដាក់ »។

ជាមួយ​គ្នា​នេះដែរ តំណាង​គណៈកម្មការរៀបចំ​បាតុកម្ម​លោក ម៉ាត់ វណ្ណី បញ្ជាក់ថា​បាតុកម្ម​ខាងមុខ​នេះ​ទាមទារ​ឱ្យ​រដ្ឋាភិបាល ដក​កម្ពុជា​ចេញ​ពី​គម្រោង​តំបន់​ត្រីកោណ​អភិវឌ្ឍន៍​ជាមួយ​ប្រទេស​វៀតណាម និង​ឡាវ និង​ដោះស្រាយ​វិបត្តិ​សង្គម ហើយ​ងាកមក​ស្តារ​លទ្ធិប្រជាធិបតេយ្យ និង​ដោះលែង​អ្នកទោស​មនសិការ​ឱ្យ​មាន​សេរីភាព​ឡើងវិញ​ផង​ដែរ។

លោក ម៉ាត់ វណ្ណី៖ «រដ្ឋាភិបាល​ក្នុងនាម​គាត់​តំណាង​ឱ្យ​ប្រជាពលរដ្ឋ​ត្រូវតែ​ពិចារណា ហើយ​ត្រូវតែ​ជ្រើសរើស​ជំហរ​នៅ​ខាង​ប្រជាពលរដ្ឋ បើ​មិន​ដូច្នេះ​ទេ ខ្ញុំ​ព្រួយបារម្ភ​ដែល​រដ្ឋាភិបាល​នៅ​តែ​រឹង​ទទឹង មិន​ដោះស្រាយ មិន​សម្រប​តាម​ឆន្ទៈ​របស់​ពលរដ្ឋ ខ្ញុំ​បារម្ភ​មាន​បាតុភាព​ណាមួយ​កើតឡើង​នៅ​ក្នុង​ប្រទេស​កម្ពុជា។ យើង​អត់​ចង់​ឃើញ​រូបភាព​នេះ​ទេ អ៊ីចឹង​យើង​សង្ឃឹម​ថា​លោក ហ៊ុន ម៉ាណែត ដែល​ជា​ប្រមុខ​រដ្ឋាភិបាល​ពិចារណា ហើយ​ដក​ខ្លួន​ចេញ»។

ចំណែក​ប្រជាពលរដ្ឋខ្មែរ​នៅ​ប្រទេសប៉ុន នៅ​ថ្ងៃ​ទី១១ ខែ​សីហា ក៏​ចេញ​ធ្វើបាតុកម្ម​ដែរ ។ ប្រធាន​ចលនា​សង្គ្រោះជាតិ​ប្រចាំ​ប្រទេស​ជប៉ុន​លោក ហៃ វណ្ណា ឱ្យដឹង​ថា​អ្នកចូលរួម​រាប់​រយ​នាក់​នឹង​ធ្វើ​ដំណើរ​តាម​រថភ្លើង ឡានក្រុង ចំណែកអ្នក​ដែល​រស់​នៅ​តំបន់​ឆ្ងាយៗ​ត្រូវ​ជិះ​យន្តហោះ​ដើម្បី​ចូលរួម​បាតុកម្ម​នឹង​ចាប់​ផ្តើម​នៅ​វេលា​ម៉ោង២រសៀល​នៅ​ក្នុង​ទីក្រុងតូក្យូ​(Tokyo)។ លោកឱ្យដឹង​ថា​ក្រៅ​ពី​ជួបជុំ​សម្តែងមតិ​នោះ​ក្រុម​បាតុករ​នឹង​ដើរ​ដង្ហែ​ក្បួន​បាតុកម្ម ចេញ​ពី​សួនច្បារ​ស៊ីនយូហ្គឹ ជូអូ​(Shinjuku Chuo) ឆ្ពោះ​ទៅ​សាលាក្រុង​ស៊ីនយូហ្គឹ​(Shinjuku City Hall)។ លោក ហៃ វណ្ណា បញ្ជាក់​ថា​សារ​របស់​ពលរដ្ឋ​ដែល​ម្ចាស់​ប្រទេស​ព្រួយបារម្ភ​ថា​តំបន់​អភិវឌ្ឍន៍​ត្រីកោណ​ពិសេស​នេះ​នឹង​អាច​នាំឱ្យ​កម្ពុជា​បាត់បង់​ទឹកដី ​ធនធាន​ធម្មជាតិ​ទៅឱ្យ​ប្រទេស​វៀតណាម​ដូច​ប្រវត្តិសាស្រ្ត​ដ៏​ជូរចត់ ហើយ​វា​ក៏ជា​មេរៀន​សម្រាប់​កូនខ្មែរ​ត្រូវ​ប្រុង​ប្រយ័ត្ន និង​ទាមទារ​ឱ្យ​រដ្ឋាភិបាល​លោក ហ៊ុន ម៉ាណែត ដក​ខ្លួន​ចេញ​ពី​គម្រោង​នេះ។

លោក ហៃ វណ្ណា៖ «យើង​បាតុកម្មនេះ​ចង់ប្រាប់​ទៅ​រដ្ឋាភិបាល​លោក ហ៊ុន ម៉ាណែត ថា យើង​មិន​អាច​ធ្វេសប្រហែស​បាន​ទេ​ជាមួយ​ប្រទេស​វៀតណាម បើសិន​ជា​យើង​ធ្វេសប្រហែស​ គឺ​​ទឹកដី​យើង​នឹង​ត្រូវ​បាត់បង់ ខ្ញុំ​ជឿជាក់​ថា​នឹង​មាន​មនុស្សជាច្រើន​ចូលរួម​ដើម្បី​សម្តែងមតិ យើង​សង្ឃឹម​ថា​អាច​​កៀរគរ​ប្រជាពលរដ្ឋខ្មែរ​នៅ​ក្នុង​ប្រទេស​កម្ពុជា​ក្រោក​ឈរ​តស៊ូ​ទាំងអស់​គ្នា​ដើម្បី​ការពារ​ទឹកដី​យើង»។

រដ្ឋាភិបាល​ប្រទេស​កម្ពុជា វៀតណាម និង ឡាវ បាន​ព្រមព្រៀង​គ្នា​បង្កើត​តំបន់ ត្រីកោណ​អភិវឌ្ឍន៍​(CLV) កាល​ពី​ឆ្នាំ១៩៩៩។ គម្រោង​នេះ មាន​ខេត្ត​ចំនួន ១៣ ជាចំណុះ ដោយ​ប្រទេស​កម្ពុជា​មាន ៤ខេត្ត​នៅ​ភាគឦសាន ដែល​មាន​ពលរដ្ឋ សរុប​តែ​ជាង ៥០ម៉ឺននាក់។ ប្រទេស​ឡាវ​មាន​៤ខេត្ត  ដែល​មាន​ប្រជាជន​សរុបជាង ៧០ម៉ឺន​នាក់។ រីឯ​ប្រទេសវៀតណាម​មាន​៥ខេត្ត ដែល​មាន​ប្រជាជន រហូតដល់​ជាង ៧​លាន​នាក់។

បើទោះបីជា លោក ហ៊ុន សែន កាល​ពី​ថ្ងៃ​ទី២៣ ខែ​កក្កដា បាន​បកស្រាយ​ថា កិច្ចសហប្រតិបត្តិការ​តំបន់​អភិវឌ្ឍន៍​ត្រីកោណ​ពិសេស​នេះ នឹង​មិន​ធ្វើឲ្យ​បាត់បង់​ទឹកដីខ្មែរ​ទៅ​វៀតណាម និង​ព្រមាន​ពី​ការប្រើប្រាស់​គុកច្រវ៉ាក់​ចំពោះ​ពលរដ្ឋ​ដែល​ហ៊ាន​បញ្ចេញមតិ​រឿង​ទឹកដី​នេះ​ក្តី ក៏​ពលរដ្ឋខ្មែរ​នៅតែ​មិន​ជឿជាក់ និង​មិន​ចុះ​ញ៉ម​ចំពោះ​ការគំរាម​នេះ​ឡើយ។

វិទ្យុអាស៊ីសេរី មិន​អាច​សុំ​ការឆ្លើយតប​ពី​ប្រធានអង្គភាព​អ្នកនាំពាក្យ​រដ្ឋាភិបាល លោក ប៉ែន បូណា បាន​ទេ នៅ​ថ្ងៃ​ទី១០ ខែ​សីហា។ ចំណែក​អ្នកនាំពាក្យ​បក្ស​កាន់អំណាច​លោក សុខ ឥសាន ប្រាប់​ថា លោក​ជាប់​រវល់​ប្រជុំ។

ជុំវិញរឿង​នេះ អ្នកឃ្លាំមើល​សិទ្ធិមនុស្ស និង​សង្គម លោក ស៊ឹង សែនករុណា សង្កេតឃើញ​ថា​ពលរដ្ឋខ្មែរ​ស្ទើរ​គ្រប់​មជ្ឈដ្ឋាន​ខឹង​សម្បារ ប្រកាស​មិន​គាំទ្រ​គម្រោង​តំបន់​អភិវឌ្ឍន៍​ត្រីកោណ​ពិសេស​(CLV) របស់​រដ្ឋាភិបាល​លោក ហ៊ុន សែន និង​លោក ហ៊ុន ម៉ាណែត មកដល់​ពេល​នេះ។  លោកយល់​ថា​រដ្ឋាភិបាល​គួរ​បញ្ឈប់​គម្រោង​នេះ​តាម​សំណើរ​របស់​ពលរដ្ឋ បើ​មិន​ដូច្នេះ​កម្លាំង​ពលរដ្ឋ​​​ចេញ​តវ៉ា​កាន់តែ​ធំ។

លោក ស៊ឹង សែនករុណា៖ «ថ្វីត្បិត​តែ​មេដឹកនាំ​ចេញ​មក​អះអាង​ថា​ខ្លួន​មិន​អនុញ្ញាត មិនព្រម មិន​ធ្វើ ប៉ុន្តែ​គេ​មើលឃើញ​ជាក់​ស្តែង អ៊ីចឹង​ពលរដ្ឋ​នៅ​ក្នុង​ប្រទេស​មិន​អាច​ធ្វើ​បាតុកម្ម​បាន តែ​ពលរដ្ឋ​នៅ​ក្រៅ​ប្រទេស​ហាក់​មាន​ការឈឺឆ្អាល ពុះ​កញ្រ្ជោល​ខ្លាំង មិន​តែ​នៅ​ប្រទេស​ជប៉ុន កូរ៉េ អូស្រ្តាលី អាមេរិក​ទេ បណ្តា​ប្រទេស​ផ្សេងៗទៀត​ក៏​គេ​អត់​សប្បាយ​ចិត្ត​ដែរ គឺ​​គេ​ចង់​ឃើញ​អ្នកដឹកនាំ​ដែល​ជា​ឪ​និង​កូន​គួរ​តែសម្រេចិត្ត​ថា​បញ្ឈប់​អំពើ​បែប​នេះ​ទៅ»។

ប្រជាពលរដ្ឋខ្មែរ​ស្ទើរ​គ្រប់​និន្នាការ​នយោបាយ​ទាំង​ក្នុង​ប្រទេស និង​ក្រៅប្រទេស ប្រកាស​រួមគ្នា​បង្ហាញ​កម្លាំង​សាមគ្គី​ចេញ​សម្តែងមតិ និង​ធ្វើ​បាតុកម្ម​ឱ្យ​បាន​ផុលផុស​ឡើង ទាមទារ​ឱ្យ​រដ្ឋាភិបាល​លោក ហ៊ុន ម៉ាណែត ងាក​មក​ស្តាប់មតិ​របស់​ប្រជាពលរដ្ឋ ដោយ​បញ្ឈប់​ដាក់​ខេត្ត​ខ្មែរ​ចំនួន៤​នៅ​ក្នុង​កិច្ចសហប្រតិបត្តិការ​តំបន់​អភិវឌ្ឍន៍​ត្រីកោណ​ពិសេស(CLV)  ជាមួយ​ប្រទេស​វៀតណាម(Vietnam) និង​ឡាវ(Lao) ដែល​នេះ​ជា​ក្តី​កង្វល់​របស់​ពលរដ្ឋខ្មែរ​ថា​កម្ពុជា​អាចប្រឈម​បាត់បង់​ធនធាន​ធម្មជាតិ និង​ទឹកដី​របស់​ខ្លួន​ទៅ​ឲ្យ​ប្រទេស​វៀតណាម​នៅ​ថ្ងៃ​ខាងមុខ៕