មន្ត្រីគណបក្សភ្លើងទៀន ចោទប្រកាន់អាជ្ញាធរសង្កាត់សៀមរាប ក្រុងសៀមរាប ថាបានរើសអើង និងមានចេតនារឹតត្បិតចង់រករឿងពួកលោក មិនឱ្យលើកស្លាកគណបក្ស។ ចំណែកគណបក្សកាន់អំណាចអាចលើកស្លាកគណបក្សបានដោយសេរី។
តំណាងគណបក្សភ្លើងទៀនក្រុងសៀមរាបលោក សៀក ចំណាប់ ដែលជាមេឃុំជាប់ឆ្នោតនៅសង្កាត់នគរធំ អះអាងថា អាជ្ញាធរតែងតែបង្កការលំបាកដល់សកម្មភាពលើកស្លាកគណបក្សភ្លើងទៀនជានិច្ច បើទោះជារដ្ឋមន្ត្រីក្រសួងមហាផ្ទៃណែនាំ ឲ្យអាជ្ញាធរបង្កលក្ខណៈងាយស្រួលដល់គ្រប់គណបក្សនយោបាយក៏ដោយ។
លោកបន្តថា ហេតុផលរបស់អាជ្ញាធរសង្កាត់សៀមរាប មានចរិតគាបសង្កត់ និងបំបិទសិទ្ធិនយោបាយសុទ្ធសាធ ដូច្នេះពួកគាត់មិនអាចទទួលយកបានទេ។ ពួកលោក នឹងរក្សាជំហរជួបជុំគ្នាប្រមាណ៣០នាក់ ថ្ងៃទី១៣ ខែកុម្ភៈ ម៉ោង២រសៀលដដែល ដើម្បីលើកស្លាកបក្សនៅមុខផ្ទះសកម្មជន តាមសេចក្ដីជូនដំណឹងរបស់បក្សដាក់ជូនសាលាសង្កាត់សៀមរាប កាលពីថ្ងៃទី៨ ខែកុម្ភៈ។
ការលើកឡើងនេះ ក្រោយពីរដ្ឋបាលសង្កាត់សៀមរាប បានបដិសេធសេចក្ដីជូនដំណឹងរបស់តំណាងគណបក្សភ្លើងទៀនក្រុងសៀមរាប ចំនួន២ដង ដើម្បីលើកស្លាកគណបក្សភ្លើងទៀន។ កាលពីលើកទី១ អាជ្ញាធរអះអាងថា ទីតាំងដែលគណបក្សបានសុំលើកស្លាកនៅក្នុងសង្កាត់សៀមរាបនេះ គឺជាដីចំណីស្ទឹងសៀមរាប។ ឯការបដិសេធលើកទី២ លើកហេតុផលថា ស្ថិតលើផ្លូវក្រវ៉ាត់ក្រុង។ ដូច្នេះចៅសង្កាត់សៀមរាបតម្រូវឲ្យគណបក្សភ្លើងទៀន ដាក់សំណើសុំលើកស្លាកម្ដងទៀត។
តំណាងគណបក្សភ្លើងទៀនលោក សៀក ចំណាប់ អះអាងថា អាជ្ញាធរមានចេតនាមិនល្អក្នុងការរករឿងពួកគាត់ ព្រោះថា ទីតាំងដែលត្រូវលើកស្លាកនោះ មិនស្ថិតលើដីចំណីស្ទឹង ឬក្រវ៉ាត់ក្រុងទេ តែស្ថិតនៅកៀករបងផ្ទះរបស់សកម្មជនបក្សតែម្ដង ខណៈស្លាករបស់គណបក្សកាន់អំណាចអាចលើកបានដោយសេរី និងដង្ហែពេញដងផ្លូវនោះ។
ជុំវិញករណីនេះ វិទ្យុអាស៊ីសេរី មិនអាចសុំការបញ្ជាក់ពីចៅសង្កាត់សៀមរាបលោក ម៉ៃ សាម៉េត និងអភិបាលក្រុងសៀមរាបលោក នួន ពុទ្ធារ៉ា បានទេ នៅថ្ងៃទី៩ ខែកុម្ភៈ។ នេះមិនមែនជាលើកទី១ទេ ដែលអាជ្ញាធររើសអើស និងបង្ករការលំបាកដល់សកម្មភាពលើកស្លាកគណបក្សភ្លើងទៀន។ កាលពីពេលថ្មីៗនេះ អាជ្ញាធរខេត្តសៀមរាប ធ្លាប់លួចកាត់ស្លាកគណបក្សភ្លើងទៀន និងស្លាកគណបក្សប្រជាធិបតេយ្យមូលដ្ឋាន ចោលម្ដងហើយ ដោយចោទថា លើកនៅដីចំណីផ្លូវដែលត្រូវពង្រីក។ ចំណែកអាជ្ញាធរខេត្តត្បូងឃ្មុំ ក៏ធ្លាប់រារាំងដល់សកម្មភាពលើកស្លាកគណបក្សភ្លើងទៀនដែរ។
កាលពីថ្ងៃទី៧ ខែកុម្ភៈ រដ្ឋមន្ត្រីក្រសួងមហាផ្ទៃ លោក ស ខេង បានចេញលិខិតស្នើដល់មន្ត្រីក្រោមឱវាទនៅថ្នាក់ក្រោមជាតិនៅទូទាំងប្រទេស ផ្ដល់មធ្យោបាយងាយស្រួល ដើម្បីឱ្យគណបក្សនយោបាយស្របច្បាប់ អាចធ្វើសកម្មភាពនយោបាយត្រៀមខ្លួនចូលរួមការបោះឆ្នោតក្រុមប្រឹក្សា ឃុំសង្កាត់ និងការបោះឆ្នោតតំណាងរាស្ត្រ ឆ្នាំ ២០២២ និង២០២៣ ឱ្យមានលក្ខណៈសេរី ត្រឹមត្រូវ និងយុត្តិធម៌ ស្របតាមគោលការណ៍លទ្ធិប្រជាធិបតេយ្យ សេរីពហុបក្ស៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។